💓പ്രാണസഖി 4

എല്ലാവർക്കും നമസ്കാരം ……….

കഥയുടെ കഴിഞ്ഞ ഭാഗത്തിന് നിങ്ങൾ നൽകിയ സപ്പോർട്ടിന് ആദ്യമെനന്ദി പറയുന്നു. ഈ പാർട്ട് അല്പം വൈകിപ്പോയി മറ്റൊന്നുമല്ല കഥ എഴുതാനുള്ള ഒരു മാനസിക അവസ്ഥയിലല്ലായിരുന്നു ഞാൻ , തിരക്കുകൾ ബുദ്ധിമുട്ടിച്ചു കൊണ്ടിരുന്നു  . അപ്പോൾ കഥയുടെ ബാക്കി  ഭാഗം ഇവിടെ തുടരുകയാണ്…….

എന്നാൽ തുടങ്ങട്ടെ ……..

” ടർർർ …………….”

മൊബൈൽ പോക്കറ്റിൽ കിടന്ന് വൈബ്രേഷൻ കാരണം നിരങ്ങിയപ്പോൾ പഴയകാലത്തിൽ നിന്ന് ഞാൻ മടങ്ങി വന്നു.  ഞാൻ പോക്കറ്റിൽ നിന്ന് മൊബൈൽ ഫോൺ കയ്യിലെടുത്തു ………

ഫോണിന്റെ ഡിസ്പ്ലേയിൽ വിനോദ് എന്ന പേര് തെളിഞ്ഞു നിൽക്കുന്നു . ഞാൻ മൊബൈലിൽ വന്ന കോൾ എടുത്തു.

“ഹലോ…… ”

” എടാ ഹരി…… നീ എവിടെയാ …. ഞാൻ റൂമിൽ നോക്കിയപ്പോൾ നിന്നെ കാണാനില്ല…. വീടിന്റെ മുൻവശത്തെ ഡോറ് തുറന്നു കിടക്കുന്നു . നീ ഇത് എവിടെയാ……..? ”

ഞാൻ കോൾ എടുത്ത ഉടൻ വിനോദ് ടെൻഷനടിച്ച മട്ടിൽ തിരക്കി ….

” എടാ നീ പേടിക്കണ്ട, നമ്മൾ കുളിക്കാൻ വന്നില്ലേ കുളം …. ഞാനിവിടെയുണ്ട് ….”

” നിന്റെ ഒരു കാര്യം മറ്റുള്ളവരെ ഇട്ട് തീ തീറ്റിക്കാനായിട്ട് ഞാൻ ദാ വരുന്നു….. ”

വിനോദ് അത്രയും പറഞ്ഞ് കോൾ കട്ടു ചെയ്തു…

പകലിനെക്കാൾ ഭംഗി രാത്രിക്കാണെന്ന് എനിക്ക് തോന്നിപ്പോയി . ആ സുന്ദരമായ കാഴ്ചകൾ എന്റെ സങ്കടമൊക്കെ എവിടേക്കോ വലിച്ചെറിഞ്ഞതുപോലെ ഒരു തോന്നൽ.. പതിയെ ആ പടിക്കെട്ടിൽ ഞാൻ ആകാശത്തിലെ നക്ഷത്രങ്ങളെയും നോക്കി അങ്ങനെ കിടന്നു ……

ഒരാൾ നടക്കുന്ന ശബ്ദം കേട്ട് ഞാൻ കണ്ണുകൾ തുറന്നു അത് വിനോദായിരുന്നു. ഞാൻ എണീറ്റ് പടിക്കെട്ടിൽ ഇരുന്നു. അവൻ  എന്റെ അടുത്ത് വന്നിരുന്നു.

“വീട്ടിൽ ഇരുന്ന് കരയാൻ സ്ഥലമില്ലാഞ്ഞിട്ടാണോ ഇങ്ങോട്ട് വന്നത് …. ”

എന്റെ കണ്ണിലെ നനവ് കണ്ട് അവൻ ചോദിച്ചു ….

” എടാ അത്  പഴയതൊക്കെ ഓർത്തപ്പോൾ … ഉറക്കം വരാത്തതുകൊണ്ട് ഇങ്ങോട്ട് വന്നതാ….. ഇവിടെ വന്നപ്പോ എന്തോ മനസ്സിന് നല്ല സന്തോഷം തോന്നുന്നു.”

“ഉം …… എന്തായാലും കൊള്ളാം .. വെറുതേ തണപ്പത്തിരുന്ന് വല്ലതും വരുത്തി വയ്ക്കണ്ട . സമയം പാതിരാത്രിയായി പോയി കിടന്ന് ഉറങ്ങാം വാ…ഒന്നാമതെ ഒന്നും കഴിച്ചിട്ടില്ല വയറിനകത്ത് നിന്ന് ആരോ രാമായണം വായിക്കുന്ന പോലെ , എണീറ്റ് വാ….. ”

വിനോദ് അതും പറഞ്ഞ് എന്റെ കയിൽ പിടിച്ച് വലിച്ച് എണീപ്പിച്ച് എന്നെയും കൂട്ടി തിരിച്ച് വീട്ടിലേക്ക് നടന്നു.  വീട്ടിൽ എത്തി കട്ടിലിൽ കിടന്നപ്പോൾ എപ്പോഴോ എന്നെ നിദ്രാ ദേവി വന്ന് എന്ന കൂട്ടി കൊണ്ട് പോയി ….

.

…………

” ടാ വിനോദേ എണീക്ക് ഒന്ന് നടന്നിട്ട് വരാം … മുൻപത്തെ പോലെ ഇനി ഉച്ചവരെ ഉറങ്ങാൻ നിന്നെ ഞാൻ വിടില്ല. വാടാ……”

വിനോദ് എന്റെ തോളിൽ കൈ തട്ടി വിളിച്ചപ്പോൾ ഞാൻ ഉറക്കം വിട്ട് ഉണർന്നു . കട്ടിലിന്റെ ഒരു വശത്ത് ഇരുന്ന മൊബൈൽ ഫോൺ എടുത്തു നോക്കി ….

” എടാ സമയം 5 ആയതെ ഉള്ളൂ …..”

എന്നും പത്ത് പതിനൊന്ന് മണി വരെ കിടന്ന്  ഉറങ്ങുന്ന ഞാൻ ഒരു പരിഭവത്തോടെ പറഞ്ഞു.

” ആ…. ഉറങ്ങിയത് മതി എണീറ്റ് വാടാ  ”

വിനോദ് അതും പറഞ്ഞ് എന്റെ കയിൽ പിടിച്ച് വലിച്ച് കട്ടിലിൽ നിന്ന് എണീപ്പിച്ചു …….

ഞാൻ പോയി മുഖവും കഴുകി ഒരു ഗ്ലാസ്സ് വെള്ളവും കുടിച്ച് വീടിന് പുറത്തേക്ക് ഇറങ്ങി. ഞാനിറങ്ങിയതും വിനോദ് വീട് പൂട്ടി താക്കോൽ കയ്യിലെടുത്തു.

‘പണ്ട് ജോലിയൊക്കെ കിട്ടുന്നതിന് മുൻപ് സ്ഥിരം ഉള്ള പരിപാടിയായിരുന്നു ഈ വെളുപ്പിലെ ഉള്ള നടത്തം , ഞാനും വിനോദും പിന്നെ കുറച്ച് സുഹൃത്തുകളും … ഇനി ആ കാലം തിരിച്ച് വരില്ലല്ലോ ….’

ഞാൻ മനസ്സിൽ ഓർത്തു..

സൂര്യന്റെ ആദ്യ പ്രഭാത കിരണങ്ങൾ മെല്ലെ ഭൂമിയിലേക്ക് പതിച്ച് തുടങ്ങിയിരിക്കുന്നു . രാത്രിയുടെ ഇരുട്ടിനെ തള്ളി മാറ്റിക്കൊണ്ട് ഭൂമിയിലേക്ക് നേരിയ വെളിച്ചം വന്ന് തുടങ്ങിയിരിക്കുന്നു.

ഞങ്ങൾ രണ്ടു പേരും വീടിന്റെ മുൻപിലുള്ള ആ ചെറിയ റോഡിലൂടെ മുന്നോട്ട് നടന്നു.

രാവിലത്തെ ചെറു തണുപ്പിൽ ഗ്രാമത്തിന്റെ കാഴ്ചകൾ കണ്ട്  കൈവീശി നടക്കണം അത് സന്തേഷം  പകരുന്ന ഒരു അനുഭൂതി തന്നെയാണ്. മൊബൈൽ ഫോണിൽ പാട്ടും  കേട്ടുകൊണ്ടാണ് വിനോദിന്റെ നടത്തം …

” എടാ എങ്ങോട്ടാ എനിക്ക് ഈ നാട്ടിലെ വഴിയറിയില്ല കേട്ടോ….”

ഞാൻ വിനോദിനോട് പറഞ്ഞു.

” അതിനെന്താ ഞാനില്ലേ അധികമൊന്നും പോകണ്ട അടുത്തുള്ള കവലവരെ … അത്ര മതി.”

വിനോദ് അതും പറഞ്ഞ് കയ്യും വീശി മുൻപേ ഒരു വഴികാട്ടിയെ പോലെ  നടക്കുകയാണ്.

ഭൂമിയിലെ വെളിച്ചം കൂടി വന്നപ്പോൾ ഗ്രാമപദേശങ്ങളിലെ ചില സ്ഥിരം കാഴ്ചകൾ ഞാൻ കണ്ടു. രാവിലെ തന്നെ വീട്ടിലേക്ക് പാത്രവും പാലുമൊക്കെ എത്തിക്കുന്ന  ചില ചേന്മാർ , കൂടുകളിൽ നിന്ന് തീറ്റ തേടി ശബ്ദമുണ്ടാക്കി പറന്നു പോകുന്ന കിളികൾ . ചെറിയ കാറ്റിൽ ആടി ഉലയുന്ന നെൽക്കതിരും  അങ്ങനെ  ചില കാഴ്ചകൾ .

ടാറിട്ട ആ ചെറിയ റോഡിലൂടെ നടന്ന് ഞങ്ങൾ ഒരു ആൽ മരം നടുക്കും അതിന് ചുറ്റും ചെറിയ കട മുറികളും ഉള്ള ആ ചെറിയ കവലയിൽ എത്തി. ഒരു ചായക്കടയുടെ മുന്നിലെ ബഞ്ചിൽ ചായയും കുടിച്ച് പത്രവും വായിച്ച് ലോകകാര്യങ്ങൾ ചർച്ച ചെയ്യുന്ന ചിലരെ കണ്ടപ്പോൾ എനിക്ക് എന്തോ സന്തോഷം കൊണ്ട്   മുഖത്ത് പുഞ്ചിരി നിറഞ്ഞു.

“എടാ വാ…. ”

ഞാൻ വിനോദിനെയും കൂട്ടി ആ ചായക്കടയിൽ കയറി .

“ചേട്ടാ രണ്ട് സ്ടോങ്ങ് ചായ ”

ചായക്കടയിലെ ആ ചേട്ടനോട് ഞാൻ വിളിച്ച് പറഞ്ഞു.

കുറച്ച് കഴിഞ്ഞപ്പോൾ ചൂടേറിയ ചായ ഞങ്ങളുടെ മുന്നിലെത്തി . പതിയെ ആ ചായയും കുടിച്ച് അതിന്റെ കാശും കൊടുത്ത് തിരിച്ച് വീട്ടിലേക്ക് നടന്നു. അപ്പോഴേക്കും സമയം നന്നേ പുലർന്നിരുന്നു.

“എടാ നീ ഒറ്റ ദിവസം കൊണ്ട് വല്ലാണ്ട് മാറിയിരിക്കുന്നു. ആ പഴയ ഹരിയായ പോലെ എനിക്ക് തോന്നുന്നു. ഞാനാടാ തെറ്റ്കാരൻ നിന്നെ ഒറ്റയ്ക്ക് വിടാൻ പാടില്ലായിരുന്നു എങ്കിൽ നീ ഈ അവസ്ഥയിലാകുമായിരുന്നില്ല പറഞ്ഞിട്ട് കാര്യമില്ല ഞാൻ ആ സമയം ഗൾഫിലായിപ്പോയില്ലേ ഒന്ന് ലീവ് എടുക്കാൻ പോലും പറ്റാതെ . ”

തിരിച്ച് വീട്ടിലേക്ക് നടക്കുന്നതിനിടയ്ക്ക് വിനോദ് എന്നോട് പറഞ്ഞു.

” അത് നീ വിട്ട് കള എല്ലാം കഴിഞ്ഞില്ലേ ….. എടാ എനിക്കിപ്പൊ തോന്നുന്നു അന്ന് സങ്കടം വന്നപ്പോൾ ഇതു പോലെ എങ്ങോട്ടെങ്കിലും കുറച്ച് ദിവസം മാറി നിന്നെങ്കിൽ ഞാൻ ഒരു കൂടിയനായി നാട്ടുകാർക്ക് മുൻപിൽ നാണംകെടില്ലായിരുന്നു എന്ന് . ”

ഞാൻ ഒരു ചെറുപുഞ്ചിരിയോടെ വിനോദിനോട് പറഞ്ഞു . എന്റെ മറുപടി കേട്ടതും അവന്റെ കൈ എന്റെ തോളിലൂടെ ഇട്ടു .

“എല്ലാം നല്ലതിനെന്ന് ചിന്തിച്ചാൽ മതിയെടാ…..”

ചിരിച്ചു കൊണ്ട് വിനോദ് അതും പറഞ്ഞ് എന്റെ മുഖത്തേക്ക് നോക്കി.

ഞങ്ങൾ നടന്ന് തിരിച്ച് വീട്ടിൽ എത്തി . അപ്പോഴാണ് ലക്ഷ്മി  മുറ്റം അടിച്ച് വാരികൊണ്ട് നിൽക്കുന്നത് ഞങ്ങൾ കണ്ടത്.

” ആരെ വായിൽ നോക്കാൻ പോയതാ ഇത്രയും നേരത്തെ രണ്ടും പേരും കൂടെ…… ”

നടന്നു വരുന്ന ഞങ്ങളെ കണ്ടപാടെ  കയ്യിലിരുന്ന ചൂല് ശരിയാക്കി കൊണ്ട് ഒരു പുഞ്ചിരിയോടെ   വിനോദിന്റെ മുഖത്ത് നോക്കി ലക്ഷ്മി അത് ചോദിച്ചു. അവളുടെ ആ മുഖം കണ്ടാൽ ഇന്നലെ ഒരു സംഭവവും നടന്നിട്ടില്ല എന്ന മട്ടാണ്…

” ആഹാ ….. അപ്പൊ നിന്റെ പിണക്കമൊക്കെ മാറിയോ …. ”

അവളുടെ ചോദ്യം കേട്ട് വിനോദ് തിരക്കി

“കുറച്ച് മാറി ….. രണ്ട് പേരുടെയും ഇനിയുള്ള സ്വഭാവം നോക്കട്ടെ എന്നിട്ട് തീരുമാനിക്കാം . ഞാൻ ചോദിച്ചതിന് ഉത്തരം പറ രാവിലെ തന്നെ എങ്ങോട്ടാ പോയത് . ”

” ആ.. അതൊ, ഞങ്ങൾ രണ്ടു പേരും കൂടെ നിനക്ക് പറ്റിയ ഒരു ചെക്കനെ നോക്കി ഇറങ്ങിയതാ … ”

വിനോദ് അപ്പോൾ തന്നെ ചിരിച്ചു കൊണ്ട് ഉരുളയ്ക്ക് ഉപ്പേരി കണക്കെ മറുപടി കൊടുത്തു…

“എന്നിട്ട് കിട്ടിയോ…..? ”

”  ഉം…….. ഇല്ല ….. ”

അതും പറഞ്ഞ് എന്റെ തോളിൽ ചാരി പൊട്ടിചിരിക്കുന്ന വിനോദിനെയാണ് ഞാൻ കണ്ടത് . ഞാൻ അവർ സംസാരിക്കുന്നതും നോക്കി നിൽക്കുകയായിരുന്നു .

” ചേട്ടന്റെ കൂട്ടുകാരനെന്താ ചേട്ടനോട് മാതമേ സംസാരിക്കൂ…. അല്ല ഇതു വരെ ആ ശബ്ദം ഞങ്ങളാരും കേട്ടില്ല അതാ ….. ”

എന്റെ മുഖത്തു നോക്കിയുള്ള അവളുടെ ആ ചോദ്യം എന്നെ ഒന്ന് അമ്പരപ്പിച്ചു. ഒരു പുഞ്ചിരി നിറഞ്ഞ മുഖത്തോടെയാണ് അവളുടെ നിൽപ്പ് . എനിക്ക് എന്തോ അവൾ സക്ഷാൽ ലക്ഷ്മി ദേവി തന്നെയെന്ന് തോന്നിപ്പോയി. എത്ര സുന്ദരിയാണവൾ ..

” എടാ നിന്റോടയാ അവൾ ചോദിച്ചത് വല്ലതും സംസാരിക്ക് ഇല്ലെങ്കിൽ അത് മതി ഇന്നത്തെക്ക് അവൾക്ക് മുഖം വീർപ്പിക്കാൻ . ”

വിനോദ് എന്നോടതു പറഞ്ഞതും ഞാൻ അവളുടെ മുഖത്തേക്ക് ഒന്ന് നോക്കി അപ്പോഴേക്കും ലക്ഷമിയുടെ അമ്മ അവിടെയെത്തി…..

” എന്താ മൂന്നു പേരും കൂടെ ഒരു ചർച്ച ?”

ഞങ്ങളെ കണ്ടപാടെ ഒരു കുശലന്വേഷണം കണക്കെ ലക്ഷ്മിയുടെ അമ്മ ചോദിച്ചു .

“അത് ചെറിയമ്മേ ഞങ്ങൾ ഇവളുടെ കല്യാണക്കാര്യം സംസാരിക്കുകയായിരുന്നു. പഠിപ്പൊക്കെ കഴിഞ്ഞില്ലേ ഇനി കെട്ടിച്ച് വിടാം….”

വിനോദ് അത് പറഞ്ഞതും ലക്ഷ്മിയുടെയും അവളുടെ അമ്മയുടെയും  മുഖത്തെ  സന്തോഷം മങ്ങുന്നത് ഞാൻ കണ്ടു …

” സോറി ചെറിയമ്മേ ഞാനതു മറന്നു ക്ഷമിക്കണം …  ”

ഉടനെ തന്നെ വിനോദ് ലക്ഷ്മിയുടെ അമ്മയോട് പറഞ്ഞു…

” അത് കുഴിയില്ല വിനോദേ…. നിങ്ങൾ വാ കാപ്പി കുടിക്കാം ഇന്നലെ അത്താഴം പോലും കഴിച്ചില്ലല്ലോ . ”

ഞങ്ങളോടതും പറഞ്ഞ് മുഖത്ത് ഒരു സന്തോഷം വരുത്തിയ ശേഷം ലക്ഷ്മിയുടെ അമ്മ വീടിനകത്തേക്ക് പോയി. ലക്ഷ്മിയും പിന്നാലെ പോയി…

” എന്താടാ എന്താ കാര്യം ? നീ അങ്ങനെ പറഞ്ഞപ്പോ എന്താ അവർ അങ്ങനെ സന്തോഷം ഇല്ലാത്തതുപോലെ നിന്നത് , നീ എന്തിനാ അവരോട് സോറി പറഞ്ഞത് ? ”

എന്റെ മനസ്സിൽ വന്ന സംശയം ചോദ്യങ്ങളായി ഞാൻ വിനോദിനോട് ചോദിച്ചു.

” എടാ അത്….  അവളുടെ ഒരുപാട്  വിവാഹ ആലോചനകൾ മുടങ്ങിയതാണ് . ജാതക പ്രശ്നം അവൾക്ക് ഭർത്താവ് വാഴില്ല പോലും … അത് കാരണം ആരും വിവാഹത്തിന് സമ്മതിക്കാറില്ല. ലോകം എത്ര ആധുനികവൽക്കരിക്കപ്പെട്ടു എന്ന് പറഞ്ഞാലും ഇതൊക്കെ കേൾക്കുമ്പോഴുള്ള മരണഭയം കൊണ്ടാകാം  ആരും തയ്യാറല്ല . അതുകൊണ്ടാ ഡിഗ്രി കഴിഞ്ഞ ശേഷം ഈ പ്രശ്നങ്ങളൊക്കെ ഉണ്ടായപ്പോ അവൾ വീണ്ടും പഠിക്കാമെന്ന് തീരുമാനിച്ചത് . ഇപ്പോ ആ കോഴ്സും ഏകദേശം പൂർത്തിയായി. ഞാൻ മുൻപത്തെ കാര്യം ഒരു നിമിഷത്തേക്ക് മറന്നു പോയി . ശേ…. അവർക്ക് അത് വിഷമമായികാണും . ”

വിനോദ് അതും പറഞ്ഞ് സ്വയം പഴിച്ച് താടിക്ക് കയ്യും കൊടുത്തുനിന്നു…

” എടാ വിനു … എനിക്ക് ഈ ജാതകത്തിലൊക്കെ വിശ്വാസം ഉണ്ടായിരുന്നു ആറ് മാസം മുമ്പ് വരെ . ഇപ്പൊ ഒട്ടും വിശ്വാസം ഇല്ല . അതിലെഴുതിയിരിക്കുന്നത് എല്ലാം ശരിയല്ല . എല്ലാം വിധിയാണ് . കാലം ആണ് എല്ലാം തീരുമാനിക്കുന്നത് . മനുഷ്യൻ തന്റെ തുശ്ചമായ അറിവുകൊണ്ട് എന്തൊക്കെയോ എഴുതി പിടിപ്പിക്കുന്നു. ഭൂമിയിൽ ജനിക്കുന്ന ഏതു ജീവിക്കും ദൈവം ഒരു ജാതകം എഴുതിയിട്ടുണ്ട് ചിലപ്പോൾ ഈശ്വരന് തന്നെ അത് മാറ്റി എഴുതാനും സാധിക്കും…. ”

” നീ ഇനി അതും പറഞ്ഞ് സെന്റി ആകണ്ട . നല്ല വിശപ്പുണ്ട് നീ വാ …… ”

വിനോദ് അതും പറഞ്ഞ് എന്നെയും കൂട്ടി ലക്ഷ്മിയുടെ വീട്ടിനുള്ളിലേക്ക് കയറി . ഇന്നലെ ഇരുന്ന ആ ഡൈനിംഗ് ടേബിളിൽ ഞങ്ങൾ സ്ഥാനം പിടിച്ചു.

അപ്പോഴേക്കും ഞങ്ങൾക്ക് മുൻപിൽ ചൂട് പുട്ടും കടലയും എത്തി. ലക്ഷമി തന്നെ ഞങ്ങൾക്കത് വിളിമ്പി തന്നു. എനിക്ക് കാപ്പി വിളമ്പുന്നതിനിടയ്ക്ക് ഞാൻ അവളുടെ മുഖത്തേക്ക് ഒന്ന് നോക്കി. ”  സോറി  ”  അവളുടെ ചുണ്ടുകൾ ശബ്ദമുണ്ടാക്കാതെ എന്നെ നോക്കി മൊഴിഞ്ഞു. അത് എല്ലാത്തിനും ഉള്ള ഒരു മാപ്പ് പറച്ചിലായി എനിക്ക് തോന്നി.

” സത്യത്തിൽ ഞാനല്ലേ തന്നോട് സോറി പറയേണ്ടത് അന്ന് നടന്ന കാര്യങ്ങൾക്ക് , സോറി ”

ഞാനവളോട് പറഞ്ഞു.

” എന്താടാ എന്താ ഇപ്പൊ ഒരു സോറി പറച്ചിൽ ”

നടന്നതൊന്നും മനസ്സിലാകാതെ മുൻപിലിരുന്ന പുട്ട് തട്ടുന്നതിനിടയ്ക്ക് വിനോദ് എന്നോട് ചോദിച്ചു.

“ഒന്നുമില്ല ടാ … അന്ന് ബീച്ചിൽ വച്ച് നടന്ന കാര്യത്തിന് ഞാൻ ലക്ഷ്മിയോട് സോറി പറഞ്ഞതാ . ”

” ഓ… അങ്ങനെ അപ്പൊ പ്രശ്നം തീർന്നല്ലോ ? നീ ചൂട് തണുക്കുന്നതിന് മുൻപ് ആഹാരം കഴിക്ക്. ”

വിനോദ് അതും പറഞ്ഞ് അവന്റെ പരിപാടി തുടർന്നു.

” രണ്ടു പേരും വയറ് നിറച്ച് കഴിക്ക് . ”

ലക്ഷ്മിയുടെ അമ്മ അതും പറഞ്ഞ് എന്റെ അടുത്ത് വന്ന് നിന്നു .

“മോനേ ഇന്നലെ ചേച്ചിയെ വിനോദിന്റെ അമ്മയെ വിളിച്ച് അന്വേഷിച്ചപ്പോഴാണ് മോന്റെ കാര്യങ്ങളൊക്കെ അറിഞ്ഞത് . എല്ലാം വിധിയാണെന്ന് ഓർത്ത് സമാധാനിക്ക് മോനേ … നിനക്ക് ഇനിയും ജീവിതമുണ്ട് , ഇനി മോൻ കുടിക്കരുത്.  ദൈവം എത്ര ദുഃഖം ജീവിതത്തിൽ തന്നാലും പിന്നീട് ദു:ഖിച്ചതിലുപരി സന്തോഷം തരും മോനേ … കാത്തിരിക്കാനുള്ള ഒരു മനസ്സ് കാണിച്ചാൽ മതി…..”

എന്റെ തലമുടിയിഴകളിൽ തടവിക്കൊണ്ട് ലക്ഷ്മിയുടെ അമ്മ പറഞ്ഞു. എന്റെ അമ്മയുടെ വാത്സല്യം കരുതലും ഈ അമ്മയിലും ഞാൻ കണ്ടു.

“മോൻ കഴിക്ക് …”

അവർ അതും പറഞ്ഞ് തിരിച്ച് അടുക്കളയിലേക്ക് പോയി . ആ വാക്കുകൾ കേട്ടപ്പോൾ അറിയാതെ എന്റെ കണ്ണുകൾ നിറഞ്ഞിരുന്നു.

ഞാൻ നോക്കിയപ്പോൾ എന്റെ മുഖത്തേക്ക് തന്നെ നോക്കി നിൽക്കുകയാണ് ലക്ഷ്മി  .

ഞാൻ കൈ കൊണ്ട് എന്താ എന്ന് ആംഗ്യം കാണിച്ചതിന് കണ്ണുകളടച്ച് തോളുപൊക്കി ഒന്നുമില്ല എന്ന തരത്തിലുള്ള ആംഗ്യമായിരുന്നു മറുപടി.

” അവിടെയിരുന്ന് ആക്ഷൻ സോങ് കളിക്കാതെ എണീറ്റ് വാടാ  . ”

കഴിച്ച പാത്രവും കയ്യിലെടുത്ത് എന്നെയും ലക്ഷ്മിയെയും നോക്കി നിന്നു കൊണ്ടാണ് വിനോദ് അത് പറഞ്ഞത് . വേഗം ഞാനും കഴിച്ച് കയ്യും കഴുകി പുറത്തിറങ്ങി . തിരിച്ച് എന്റെ റൂമിലേക്ക് പോയി കട്ടിലിൽ കിടന്ന് ഒരോന്ന് ആലോചിച്ചു.

‘ ഇന്നലെ വരെ എന്റെ മനസ്സ് ഒരു കടലു പോലെ തിരയടിച്ചു കൊണ്ടിരുന്നു പക്ഷെ ഇപ്പൊ ലക്ഷ്മിയുടെ മുഖവും അവളുടെ സന്തോഷമൊക്കെ കണ്ടപ്പോൾ എന്തോ ഒരു സന്തോഷം . ഇനിയും ജീവിക്കണമെന്ന ഒരു തോന്നൽ   . എനിക്ക് അവളോട് പ്രണയമാണോ ? അറിയില്ല …..’

എന്റെ മനസ്സിലൂടെ പല ചിന്തകളും വന്ന് പോയി.

” എന്താടാ രാവിലെ കിടന്ന്  ഒരു ദിവാ സ്വപ്നം കാണുന്നേ ..? ”

ഞാൻ കട്ടിലിൽ കിടന്ന്  എന്തോ ആലോചിക്കുന്നത് ഡോറിനടുത്ത് നിന്ന് നോക്കി നിന്നുകൊണ്ട് വിനോദ് ചോദിച്ചു.

” എന്താടാ നല്ല സന്തോഷത്തിലാണല്ലോ… എത്ര ദിവസത്തിന് ശേഷമാടാ നിന്നെ ഇങ്ങനെ കാണുന്നേ  ….. ”

എന്റെ മുഖത്തെ സന്തോഷം കണ്ടിട്ട് വിനോദ് കാര്യം തിരക്കി…

” എടാ അത് ഇന്നലത്തെ കാര്യമൊക്കെ ആലോചിച്ച് ഞാൻ വട്ടായിരിക്കുവായിരുന്നു  . പക്ഷെ ഇപ്പൊ പ്രശ്നമൊന്നുമില്ലല്ലോ ….   ”

” അതൊക്കെ വിട്ട് കള ഹരീ….. ഞാൻ പറഞ്ഞില്ലേ ഒരു എടുത്ത് ചാട്ടക്കാരിയാണ് പിന്നീട് വന്ന് സോറി പറയുന്നതാണ് അവളുടെ സ്വഭാവമൊന്ന് .

ഇന്ന് അവള് നിന്റോടെ സോറി പറഞ്ഞില്ലേ അത് ഞാൻ കണ്ടു. ഇനിയെന്താ പരിപാടി , കഴിഞ്ഞ ആറ് മാസമായി ബാങ്കിലെ നിന്റെ പൈസ കൊണ്ട് നീ കുടിച്ച് കൂത്താടി നടന്നു. ഇനി നീ എങ്ങനെ ജീവിക്കും ഒരു ജോലി വേണ്ടേ ? ”

വിനോദ് ഞാനിരുന്ന കട്ടിലിൽ വന്നിരുന്ന് എന്നോട് ചോദിച്ചു.

” എടാ അത് ഞാനും അലോചിക്കുവാ , നിന്റെ ജോലി എങ്ങനെയാ പോയത് അത്  നീ പറഞ്ഞില്ലല്ലോ , ഇനിയെന്താ പരിപാടി. ”

” എടാ അവിടെ തല്ക്കാല വേക്കൻസിയിലല്ലേ ഞാൻ പോയത്  . സമയം കഴിഞ്ഞപ്പോ അവർ പറഞ്ഞു വിട്ടു. ഇന്നലെ വിളിച്ചപ്പോൾ ഞാൻ അച്ഛനോട് കാര്യം പറഞ്ഞു. അച്ഛന്റെ പരിചയം വച്ച് ഗൾഫിൽ തന്നെ എന്തെങ്കിലും പണി തരപ്പെടുത്തി തരാമെന്ന്  പറഞ്ഞു.  അതൊക്കെ വിട് നിനക്ക് ബോറടിക്കുന്നില്ലേ എനിക്ക് വട്ട് പിടിക്കുന്നു.”

നാട്ടിൽ ഏതു നേരവും കറങ്ങിനടക്കുന്ന അവന്റെ മാനസിക അവസ്ഥ എനിക്ക് മനസ്സിലാക്കാൻ പറ്റുമായിരുന്നു ….

” നീ വാ….. ”

ഞാനവനെയും  വിളിച്ച് പുറത്തിറങ്ങി.

” എങ്ങോട്ടാടാ ”

” എടാ നമുക്ക് ആ കുളക്കരയിൽ പോയി ഇരിക്കാം എന്താ എന്ന് അറിയില്ല അവിടെ ഇരിക്കുമ്പോൾ ഒരു പോസിറ്റീവ് എനർജിയാ എനിക്ക് . ”

” എങ്കിൽ വാ പോയേക്കാം. ”

ഞങ്ങൾ പതിയെ വീടിന് പുറകിലൂടെ ആ പാടവരമ്പിലേക്ക് ഇറങ്ങി നടന്നു .

“വിനോദേട്ടാ ….. ഒന്ന് നിന്നേ ഞാനും വരുന്നു. ”

പുറകിൽ നിന്നുള്ള ലക്ഷ്മിയുടെ ആ വിളി കേട്ട് ഞങ്ങൾ തിരിഞ്ഞ് നോക്കി. അവൾ കൈ കൊണ്ട് നിൽക്കാൻ ആംഗ്യം കാണിച്ച് ഞങ്ങളുടെ അടുത്തേക്ക് ഓടി വരികയാണ്.

” നീ എങ്ങോട്ടാ വീട്ടിൽ പണിയൊന്നുമില്ലേ …. ”

ഞങ്ങളുടെ അടുത്തെത്തിയ ലക്ഷ്മിയെ നോക്കി വിനോദ് ചോദിച്ചു.

” ഒന്ന് നടന്ന് പോയേ… ഞാനും വരുന്നു. അമ്മ പറഞ്ഞു നിങ്ങളെ ഒന്ന് ശ്രദ്ധിച്ചോളാൻ , ഇനി എവിടെയെങ്കിലും പോയിരുന്ന് കുടിക്കാനാണ് പ്ലാനെന്ന് ആര് കണ്ടു.”

അവൾ ഒരു പുഞ്ചിരിയോടെ അതു പറഞ്ഞു .

“എന്റെ പൊന്നോ നമിച്ച് …… ഒന്നു പോ ……  ”

വിനോദ് അത് പറഞ്ഞതും ലക്ഷ്മി ഞങ്ങൾക്ക് മുൻപേ നടന്നു…..

ഞങ്ങൾ നടന്ന് ആ കുളകരയിൽ എത്തി. ഞാൻ ഒരു പടിക്കെട്ടിൽ ഇരുന്നു . വിനോദും ലക്ഷ്മിയും എന്തോ തകർത്ത് സംസാരിക്കുകയാണ് .

” ടർ ർ ർ…     ”

എന്റെ ഫോൺ മുഴങ്ങിയപ്പോൾ ഞാനൽപ്പം മാറി നിന്ന് ആ കോൾ എടുത്തു  ……

“ഹലോ ….. യെസ് ഹരി കൃഷ്ണൻ ”

……………

“ആരാടാ …… നീ ഇംഗ്ലീഷിൽ തകർത്ത് സംസാരിക്കുന്നത് കേട്ടല്ലോ… ആരാ ….? ”

ഞാൻ കോൾ കട്ട് ചെയ്ത് തിരിച്ച് ആ പടിക്കെട്ടിൽ വന്നിരുന്നപ്പോൾ വിനോദ്  കാര്യം തിരക്കി ….

” എടാ ഞാൻ ലണ്ടനിൽ വർക്ക് ചെയ്തിരുന്ന കമ്പനിയിലെ CEO ആണ് വിളിച്ചത് . ഞാൻ കുറച്ച് മുൻപ് ഒരു മെയിലയച്ചിരുന്നു അവിടെ ജോബ് വേക്കൻസി വല്ലതും ഉണ്ടോ എന്നറിയാൻ … പിന്നെ ഞാൻ അന്ന് തിരിച്ച് വരാത്തതിന്റെ കാരണവും കൂടെ ഇപ്പൊ പറഞ്ഞപ്പോൾ അയാൾ പറഞ്ഞു വിവരം പിന്നീട് വിളിച്ച് അറിയിക്കാമെന്ന്   … ”

അങ്ങനെ ഞങ്ങൾ ഓരോന്ന് സംസാരിച്ചിരുന്നു.

” നീ എന്തിനാ അന്ന് ബീച്ചിൽ വന്നത് . അല്ല അതുവരെ വന്നിട്ട് നീ ഞങ്ങളെ എന്താ അറിയിക്കാത്തത് . ”

വിനോദ് ലക്ഷ്മിയോട് ചോദിച്ചു.

” അത് ഞങ്ങൾ ഫയനൽ ഇയേഴ്സിന്റെ ടൂർ ആയിരുന്നു. പിന്നെ അന്ന് അങ്ങനെ നടക്കുമെന്ന് ആരുകണ്ടു. ”

ലക്ഷ്മി അത് എന്റെ മുഖത്ത് നോക്കിയാണ് പറഞ്ഞത് ഞാൻ ആകെ ചമ്മിപ്പോയി .

ലക്ഷ്മി പെട്ടെന്ന് തന്നെ ഞാനുമായി കമ്പനിയായി അവൾ ഒരു വായാടി തന്നെയെന്ന് എനിക്ക് മനസ്സിലായി. എന്തോ അവളോടെ സംസാരിക്കുമ്പോൾ ഭയങ്കര സന്തോഷം ….

……….

വൈകിട്ട് ഞാനും വിനോദും കൂടെ ടി.വി കണ്ടിരിക്കുമ്പോൾ ആ തല വേദന എന്നെ വീണ്ടും വന്ന് മൂടി.

” ടാ ….. എന്തു പറ്റി ”

ഞാൻ തലയിൽ കൈ ശക്തമായി അമർത്തി പിടിച്ച് വച്ച് ഇരിക്കുന്നത് കണ്ട വിനോദ്  കാര്യം തിരക്കി…

” എടാ തല വേദനിക്കുന്നു പിന്നെ തലകറങ്ങുന്ന പോലെ …… ”

” നീ ആ കസേരയിൽ ചാരി ഇരിക്ക് ഞാൻ ദാ….. വരുന്നു. ”

വിനോദ് അതും പറഞ്ഞ് ഓടി അടുക്കളയിലേക്ക് പോയി. അല്പം കഴിഞ്ഞ് ഇന്നലത്തെപ്പോലെ കുപ്പിയും വെള്ളവുമായി വന്നു. അവൻ ഇന്നലത്തെ പോലെ ഗ്ലാസ്സിൽ ഒഴിച്ച് എനിക്ക് തന്നു ഞാനത് വാങ്ങി കുടിച്ചു.

” ഉം…………. ”

ലക്ഷ്മിയുടെ ഇരുത്തിയുള്ള മൂളല് കേട്ടപ്പോഴാണ് ഞങ്ങൾ മുൻവശത്തെ ഡോറിലേക്ക് നോക്കിയത്.

” അമ്മ രാവിലെ പറഞ്ഞത് മറന്നോ  …. ഇനി കുടിക്കരുത് എന്ന്. ”

ലക്ഷ്മി അതും പറഞ്ഞ് എന്റെ മുഖത്തേക്ക് നോക്കി . അപ്പോഴാണ് തലവേദന കാരണം ചുവന്ന് കലങ്ങിയ കണ്ണുകളുമായി തലയിൽ കൈവച്ച് ഇരിക്കുകയാണ് ഞാനെന്ന് അവൾക്ക് മനസ്സിലായത് .

” എന്താ വിനോദേട്ട …….. ഹരിയേട്ടൻ ഇങ്ങനെ ഇരിക്കുന്നേ എന്തുപറ്റി ? ”

” അവന് തലവേദനയാ ….  ലക്ഷ്മീ ആൽക്കഹോളിക് അഡിക്ട് ആയിരുന്നു ഇവൻ . അതിൽ നിന്നും കര കയറുമ്പോ ഇങ്ങനെ ചില പ്രശ്നങ്ങൾ ഉണ്ടാകും. അതുകൊണ്ടാ ഒരു മരുന്ന് കണക്കേ ഞാനിവന് ഡോസ് കുറച്ച് മദ്യം കൊടുക്കുന്നത്. അല്ലാതെ ഞാൻ അവനെ കുടിപ്പിക്കുന്നതല്ല. ”

” സോറി വിനോദേട്ടാ ..ഞാനറിഞ്ഞില്ല. ഹരിയേട്ടാ ഇപ്പൊ എങ്ങനെയുണ്ട്. ”

“കുഴപ്പമില്ല ലക്ഷ്മി കുറച്ച് നേരം കഴിയുമ്പോൾ ശരിയാകും. ”

ഞാനതും പറഞ്ഞ് കസേരയിൽ ചാരി ഇരുന്നു.

……………..

* നിന്റെ ജീവിതം മുന്നേ കുറിക്കപ്പെട്ട് കഴിഞ്ഞു ഹരീ.  നിനക്ക് കിട്ടേണ്ടതെങ്കിൽ കിട്ടും അത് എന്ത് തന്നെയായാലും . പക്ഷെ അതിന് മുൻപ് നീ വീണ്ടും സങ്കടകടലിൽ മുങ്ങും .*

ഒരു അശരീരി പോലെ എന്റെ ചെവികളിൽ മുഴങ്ങി കേട്ടു. മാസങ്ങൾക്ക് ശേഷം മറ്റൊരു സ്വപ്നം എന്റെ ജീവിതത്തിലേക്ക് കടന്നുവന്നു.

ഞാൻ ഞെട്ടി ഉണർന്ന് കട്ടിലിൽ എണീറ്റ് ഇരുന്നു .

‘ എന്താണിത് എനിക്ക് ഒന്നും മനസ്സിലാകുന്നില്ല , എന്തിനാണ് ഇങ്ങനെ ഒരു സ്വപ്നം കണ്ടത്. എന്താണിത് അർത്ഥമാക്കുന്നത് . ‘

ഞാൻ എന്നോട് തന്നെ ചോദിച്ചു. പക്ഷെ എനിക്ക് ഒന്നും മനസ്സിലായില്ല.

……….

” ഹരീ …… എടാ എണീക്ക് .”

രാവിലെ വിനോദ് തട്ടി വിളിച്ചപ്പോഴാണ് ഞാനുണർന്നത്  …

” എന്താടാ നടക്കാൻ പോകാനാണോ നിൽക്ക് ഒന്ന് മുഖം കഴുകിക്കോട്ടേ….. നീ എന്താ റെഡിയായി ഒരുങ്ങി നിൽക്കുന്നേ എന്താടാ കാര്യം ? ”

ദേഹത്ത് മൂടിയിരുന്ന പുതപ്പ് വലിച്ച് മാറ്റിക്കൊണ്ട് ഞാനവനോട് ചോദിച്ചു . ഞാൻ പതിയെ കട്ടിലിൽ നിന്ന് എണീറ്റു ….

” എടാ നടക്കാനല്ല . ഇന്നലെ രാത്രി അച്ഛൻ വിളിച്ചിരുന്നു. എനിക്ക് ഗൾഫിൽ എന്തോ ജോലി തരപ്പെടുത്തിയിട്ടുണ്ടെന്ന് ആരെയോ കാണണം പോലും ഇന്ന് എന്റോടെ അങ്ങോട്ട് ചെല്ലാൻ പറഞ്ഞു. എടാ ഞാൻ നാളെ വൈകിട്ട് മടങ്ങിയെത്താം , ഞാൻ പൊയ്ക്കോട്ടെ ….. നിനക്ക് ഇവിടെ ഒറ്റയ്ക്ക് നിൽക്കാൻ മടിയുണ്ടോ … ”

വിനോദ് അത് എന്നോട് പറഞ്ഞപ്പോൾ എന്നെ തനിച്ചാക്കുന്നതിൽ ഉള്ള സങ്കടം അവന്റെ മുഖത്ത് ഉണ്ടായിരുന്നു.

” എടാ അതിനെന്താ നീ പോയിട്ട് വാ …. എനിക്ക് കുഴപ്പമില്ല . ”

” എന്നാൽ  ശരിയെടാ ഇപ്പൊ പോയാലേ ഉച്ച കഴിയുമ്പോൾ അവിടെയെത്തു. ചെറിയമ്മയോട് ഞാൻ പറയുന്നില്ല സമയം 5 ആയതല്ലേ ഉള്ളൂ … നീ ഒന്ന് പറഞ്ഞേക്ക് . പിന്നെ എന്തെങ്കിലും ആവശ്യമുണ്ടെങ്കിൽ എന്നെ വിളിക്കണേ ടാ …. ”

” ശരി നീ പോയിട്ട് വാ…”

വിനോദ്  ബൈക്കിന്റെ താക്കോലെടുത്ത് പുറത്തിറങ്ങി . ബൈക്ക് സ്റ്റാർട്ടാക്കി എന്റെ നേരെ കൈകാണിച്ച ശേഷം അവൻ ബൈക്കോടിച്ച് പോയി ….

ഞാൻ തിരിച്ച് പോയി കട്ടിലിൽ ഇരുന്നു .

‘ ഇനി ഇന്നും നാളെയും എങ്ങനെ തള്ളിനീക്കും അവന്റെ കൂടെ പോയാൽ മതിയായിരുന്നു. ‘

ഞാൻ ഓരോന്ന് ആലോചിച്ചിരുന്നപ്പോഴാണ് എന്റെ ഓർമ്മയിലേക്ക് രാത്രി സ്വപ്നത്തിൽ കേട്ട ആ വാക്കുകൾ ഓർമ്മ വന്നത്.

” ഈശ്വരാ എനിക്ക് ഇനിയും സങ്കടമാണോ നീ കല്പിച്ച് വച്ചിരിക്കുന്നത്. ”

ഞാനതും മനസ്സിൽ പറഞ്ഞ് വീണ്ടും പതിയെ കട്ടിലേക്ക് കിടന്നു.

……

മുറ്റത്ത് നിന്ന് പല്ലും തേച്ച് കാഴ്ചകളും കണ്ടു നിന്നപ്പോഴാണ് ലക്ഷ്മി എന്റെ അടുത്തേക്ക് വന്നത് .

” ആഹാ ….  ഇന്ന്  നടക്കാൻ പോയില്ലെ . മറ്റെയാൾ എവിടെ കാണാനില്ല അകത്താണോ . ”

എന്നെ കണ്ടപാടെ ലക്ഷ്മി തിരക്കി .

” അവൻ എന്തോ ജോലിയുടെ കാര്യത്തിന് ആരെയോ കാണാൻ വേണ്ടി വെളുപ്പിലേ നാട്ടിലേക്ക് പോയി . നാളെ വരും … ”

ഞാൻ ദൂരത്തേക്ക് നോക്കി നിന്നു കൊണ്ട് പറഞ്ഞു.

” ഓ ….. അതാണ് ചേട്ടന്റെ  മുഖത്തെ മൂഖതയ്ക്ക് കാരണം ല്ലേ…. സാരമില്ല ….. ചേട്ടൻ  വാ കാപ്പി എടുത്ത് വച്ചിരിക്കുവാ ….. ”

ലക്ഷ്മി അതും പറഞ്ഞ് തിരിച്ച് നടന്നു. ഞാൻ മുഖവും കഴുകി  ലക്ഷ്മിയുടെ വീട്ടിലേക്ക് പോയി. ഞാൻ നേരെ ചെന്ന് ഡൈനിംഗ് ടേബിളിൽ സ്ഥാനം ഉറപ്പിച്ചു. ലക്ഷ്മി എനിക്ക് കാപ്പി വിളമ്പിയ ശേഷം അവളും ഒരു പ്ലേറ്റിൽ കാപ്പി എടുത്ത് എന്റെ എതിരെ ഇരുന്നു.

“ഹരിയേട്ടാ ഒരു ഹെൽപ്പ് ചെയ്യാവോ ?”

കഴിക്കുന്നതിനിടയ്ക്ക് എന്നെ നോക്കി ലക്ഷ്മി ചോദിച്ചു.

” എന്താ ലക്ഷ്മി കാര്യം പറ . ”

” എന്നെ ബൈക്കിൽ കോളേജിലേക്ക് കൊണ്ടു പോകുമോ .. അടുത്ത മാസം എക്സാമാ അപ്പൊ അതിന്റെ കുറച്ച് ഫോമുകളും മറ്റും കോളേജിൽ എഴുതി കൊടുക്കണം . ”

“അതിന് ബൈക്ക് ഇല്ലല്ലോ. വിനോദിന്റെ ബൈക്ക് അവൻ കൊണ്ട് പോയി . ”

ഞാൻ ലക്ഷ്മിയോട് പറഞ്ഞു .

” അച്ഛന്റെ ബുള്ളറ്റ് പോർച്ചിൽ മൂടി വച്ചിട്ട് മാസങ്ങളായി അതിൽ പോകാം ബൈക്കിന്റെ ബാറ്ററി എന്തോ ഊരി മാറ്റി വച്ചിരിക്കുവാ അതെടുത്ത് ഫിറ്റ് ചെയതാൽ മതി . ”

” നിനക്കെന്താ ലക്ഷ്മി ബസ്സിൽ പോയാൽ പോരേ… ഈ കൊച്ചിനെ ഇട്ട് ബുദ്ധിമുട്ടിക്കാനായിട്ട്. ”

ലക്ഷ്മി പറയുന്നത് കേട്ടുകൊണ്ട് വന്ന ലക്ഷ്മിയുടെ അമ്മ അവളോട് പറഞ്ഞു.

” കുഴപ്പമില്ല ആന്റി ഞാനിവിടെ വെറുതേ ഇരിക്കുവല്ലേ എനിക്ക് പ്രശ്നമില്ല. ”

ഞാനതും പറഞ്ഞ് കാപ്പിയും കുടിച്ച് എണീറ്റു. മുറ്റത്തേക്ക് ഇറങ്ങി . പഴയ ടൈപ്പ് വീടാണെങ്കിലും ഒരു ചെറിയ കാർപ്പോച്ച് വീടിനോട് ചേർത്ത് പിന്നീടെപ്പോഴോ ചെയ്തിട്ടുണ്ട്. ഞാൻ ബുള്ളറ്റിന്റെ പുറത്ത് മൂടിയിരുന്ന കവറ് മാറ്റി. പഴയ മോഡൽ ബുളളറ്റാണ് പക്ഷെ വണ്ടിക്ക് അത്ര പഴക്കം തോന്നിക്കുന്നില്ല. ഞാൻ പതിയെ ബുള്ളറ്റ് പുറത്തേക്ക്  ഇറക്കി വച്ചു.

” ദാ പിടിച്ചോ ? ”

അകത്ത് നിന്ന് എടുത്തോണ്ട് വന്ന ബൈക്കിന്റെ ബാറ്ററി എന്റെ കയ്യിൽ തന്നുകൊണ്ട് ലക്ഷ്മി പറഞ്ഞു…

” ശരിയാക്കാൻ അറിയാമോ … ?  കേടാക്കല്ലേ .. അച്ഛൻ വഴക്ക് പറയും ”

ലക്ഷ്മി ഒരു പേടിയോടെ ചോദിച്ചു.

” ആഹാ അങ്ങനെയാണോ എനിക്കറിയില്ല ഇതൊന്നും . എന്നാലും ഒന്ന് പരീക്ഷിച്ച്     നോക്കാം. ”

ഞാൻ വെറുതെ ലക്ഷ്മിയെ കളിപ്പിക്കാൻ വേണ്ടി പറഞ്ഞു.

” എങ്കിൽ ഞാൻ ബസ്സിൽ പോയിക്കോളാം ചേട്ടൻ ബൈക്ക് അകത്ത് കയറ്റിവച്ചോ . ”

ബാറ്ററി തിരികെ വാങ്ങാൻ കൈ നീട്ടിക്കൊണ്ട് ലക്ഷ്മി പറഞ്ഞു .

” ലക്ഷ്മി ഞാൻ വെറുതെ പറഞ്ഞതാ പഠിത്തം  കഴിഞ്ഞ് കുറച്ച് ദിവസം ഞാൻ ഒരു വർക്ക് ഷോപ്പിൽ നിന്നതാ താൻ പേടിക്കാതെ .”

ഞാനതും പറഞ്ഞ് ബാറ്ററി ബൈക്കിൽ ഫിറ്റ് ചെയ്തു സ്റ്റാർട്ടാക്കാൻ നോക്കി . കുറച്ച് മാസങ്ങളായി അനക്കമില്ലാതിരുന്നതു കൊണ്ടാകാം പുള്ളിക്കാരൻ ആദ്യമൊക്കെ സ്റ്റാർട്ടാകാൻ മടി കാണിച്ചു. പിന്നീട് സ്റ്റാർട്ടിയി ആ ഗാംഭീര്യ ശബ്ദം സൈലൻസറിലൂടെ പുറത്തു വന്നു.

” ഞാൻ റെഡിയായിട്ട് വരാം .”

ലക്ഷ്മി അതും പറഞ്ഞ് അകത്തേക്ക് ഓടി . ഞാനും വീട്ടിൽ ചെന്ന് കുളിച്ച് ഡ്രെസ് ഒക്കെ മാറി വന്നു. ബൈക്കിൽ ചാരി നിന്ന് ഫോണിൽ വാട്സാപ്പും നോക്കി നിന്നപ്പോഴാണ്,

”  അമ്മേ….. ഞാൻ പോയിട്ട് വരാം . ”

ലക്ഷ്മി അതും പറഞ്ഞ് വീടിനകത്തു നിന്ന് വരുന്നത് കണ്ടത്. ഒരു കറുത്ത ചുരിദാറാണ് വേഷം കയ്യിൽ ചെറിയ ഒരു ബാഗും തലമുടിയൊക്കെ വിടർത്തിക്കെട്ടി , അവളെ അങ്ങനെ കണ്ടപ്പോൾ ലക്ഷ്മീ ദേവി പ്രത്യക്ഷപ്പെട്ടതു പോലെ എനിക്ക് തോന്നി .

” എന്താ ഇങ്ങനെ നോക്കി നിൽകണേ പോകാം . ”

ഞാനവളെത്തന്നെ നോക്കി നിൽക്കുന്നതു കണ്ട ലക്ഷമി പറഞ്ഞു .

” പോകാം . ”

ഞാനതും പറഞ്ഞ് ബുള്ളറ്റിൽ കയറി വണ്ടി സ്റ്റാർട്ടാക്കി ഉടനെ അവളും പുറകിൽ കയറി .

” സൂക്ഷിച്ച് പോണേ മോനേ … ”

വാതിലിനടുത്തു നിന്ന ലക്ഷ്മിയുട അമ്മ വിളിച്ചു പറഞ്ഞു.

” ശരി ആന്റി ”

ഞാനതും പറഞ്ഞ് വണ്ടി മുന്നോട്ടെടുത്തു. ലക്ഷ്മി അവളുടെ കൈ എന്റെ തോളിൽ വച്ചപ്പോൾ എനിക്ക് എന്തോ പോലെ ആദ്യമായിട്ട് ഒരു പെൺകുട്ടിയെയും കൊണ്ട് ബൈക്കിൽ പോകുന്നതു കൊണ്ടാകാം , എന്തോ…..

” ലക്ഷ്മി എങ്ങോട്ടാ എനിക്ക് ഈ ദേശത്തിലെ വഴിയറിയില്ല കേട്ടോ…. ”

” ചേട്ടാ … വഴി ഞാൻ പറഞ്ഞു തരാം ഇപ്പൊ മുൻപോട്ട് പോകട്ടെ … ”

അങ്ങനെ ലക്ഷ്മി പറഞ്ഞ വഴികളിലൂടെ ബുള്ളറ്റ് മുന്നോട്ട് കുതിച്ചു . എന്റെ തോളിൽ കൈവച്ചിട്ടുണ്ട് എങ്കിലും ഞങ്ങൾ തമ്മിൽ നല്ല അകലത്തിലാണ് ഇരിക്കുന്നത്. ബൈക്ക് ഗ്രാമത്തിൽ നിന്നും സിറ്റിയിലേക്ക് പ്രവേശിച്ചു . ഒടുവിൽ ഒരു എഞ്ചിനീയറിംഗ് കോളേജിന്റെ മുൻപിൽ ബൈക്ക് എത്തി . ഞാൻ ബുള്ളറ്റ് അകത്തേക്ക് എടുത്തു പാർക്കിംഗ് ഏരിയയിൽ  ഒതുക്കി. ഏകദേശം ഒന്നര മണിക്കൂറത്തെ യാത്ര .

” ചേട്ടൻ വരുന്നില്ലേ….. ? ”

ബുള്ളറ്റിൽ നിന്ന് ഇറങ്ങിയ ലക്ഷ്മി എന്നോട് ചോദിച്ചു.

” ഇല്ല താൻ പോയിട്ട് വാ  …. ”

ഞാനതും പറഞ്ഞ് വണ്ടിയിൽ ചാരി നിന്നു . ലക്ഷ്മി അകത്തേക്ക് പോയി . ഞാൻ നടന്ന് അടുത്തുള്ള മരച്ചുവട്ടിൽ ഇരുന്നു. ക്ലാസ്സൊക്കെ കഴിഞ്ഞതുകൊണ്ടാകാം അധികം വിദ്യാർത്ഥിളൊന്നും ഇല്ല .

അവിടെ ഇരുന്നപ്പോൾ എനിക്ക് ഓർമ്മ വന്നത് എന്റെ കോളേജ് ലൈഫാണ്. ഒരു പ്രണയ ജോഡി കൈകോർത്ത് പിടിച്ച് നടന്നു പോകുന്നതു കണ്ടപ്പോൾ പഴയ ചില കാര്യങ്ങൾ ഓർമ്മ വന്നു.

……..

പണ്ട് കോളേജിൽ പഠിച്ചപ്പോൾ ഒരു പെൺകുട്ടിയോട് തോന്നിയ ഇഷ്ടം തുറന്നു പറയാതെ നാല് വർഷം മനസ്സിൽ കൊണ്ടു നടന്നു. നിമിഷ അതാണ് അവളുടെ പേര് . ഒരേ ക്ലാസ്സിൽ പഠിക്കുന്നവർ , എനിക്ക് അവളോട് പ്രണയമുണ്ടെങ്കിലും തുറന്നു പറയാനാവാതെ ഫണ്ട്സ് എന്ന അക്ഷരങ്ങളിൽ മാത്രമായി അത് ഒതുങ്ങിക്കൂടി . എന്റെ അന്നത്തെ കുടുംബത്തിന്റെ അവസ്ഥ കാരണമാകാം ഞാൻ ആ ഇഷ്ടം ആരോടും പറഞ്ഞില്ല. ഒടുവിൽ കോളേജ് ലൈഫ് തീർന്നപ്പോൾ എല്ലാവരെയും പോലെ ഒരു ഗുഡ് ബൈയും പറഞ്ഞ് അവളും പോയി. പിന്നീട് അവളെ കാണുന്നത് ഞാൻ ഫാമിലിയുമായി ടൂർ പോയ അന്നാണ് ആ ബീച്ചിൽ വച്ച് . അന്ന് അവളുടെ കയ്യിൽ പിടിച്ച് നടക്കുന്ന ഒരു രണ്ട് വയസ്സുകാരിയും അവളുടെ ഭർത്താവും ഒപ്പം ഉണ്ടായിരുന്നു . അന്ന് ഞാൻ മനസ്സിലാക്കി തുറന്നു പറയാനാകാത്ത സ്നേഹത്തിന് കീറിയ നോട്ടിന്റെ വില പോലും ഇല്ല എന്ന്.

പഴയ കാര്യങ്ങളും ആലോചിച്ച് അങ്ങനെ ഇരുന്നപ്പോഴാണ് ലക്ഷ്മി കോളേജ് കെട്ടിടത്തിനത്തു നിന്ന് നടന്ന് വരുന്നത് കണ്ടത്. ഒപ്പം അവളുടെ ചില കൂട്ടുകാരികളും ഉണ്ടായിരുന്നു.

” ഇതാണ് ഞാൻ പറഞ്ഞ ഹരിയേട്ടൻ ”

എന്റെ അടുത്തെത്തിയ ലക്ഷ്മി അവളുടെ കൂട്ടുകാരികൾക്ക് എന്നെ പരിചയപെടുത്തികൊടുത്തു .

” അറിയാം അന്ന് ഞങ്ങളും ഉണ്ടായിരുന്നല്ലോ ? ”

അവളുടെ കൂട്ടുകാരി അത് പറഞ്ഞപ്പോൾ ഞാനാകെ ചമ്മി നാറിപ്പോയി …..

” ശരിയെടി ഞാൻ പോണൂ ….. ”

ലക്ഷ്മി അതും പറഞ്ഞ് എന്റെ തോളിൽ തട്ടി ബൈക്ക് എടുക്കാൻ പറഞ്ഞു.

ഞാൻ ബുള്ളറ്റ് സ്റ്റാർട്ടാക്കിയതും ലക്ഷ്മി പുറകിൽ കയറി. രണ്ടു മൂന്ന് പയ്യന്മാർ ബുള്ളിന്റെ അടുത്തേക്ക് നടന്ന് വന്ന് ബൈക്ക് ഓഫാക്കി ചാവി ഊരിയെടുത്തു . അന്ന് എന്നെ തല്ലാൻ മുൻ നിരയിൽ ഉണ്ടായിരുന്നവന്മാർ ആയിരുന്നു അത്.

” ആഹാ ….. കൊള്ളാമല്ലോ …. നമ്മൾ ഇത്രയും ദിവസം നിന്റെ പുറകേ നടന്നിട്ട് ഞങ്ങളെ ആരെയും നിനക്ക് വേണ്ട ഒടുവിൽ കിട്ടിയത് ഈ കുടിയനെ   ആണോ…….. ?   …. ഹ..ഹ… ഇതറിഞ്ഞിരുന്നേൽ മുൻപേ തന്നെ ഞാൻ നിന്റെ ദേഹത്ത് കൂടെ വീഴുമായിരുന്നല്ലോടീ… ”

അവന്മാർ അതും പറഞ്ഞ് അട്ടഹസിക്കുകയാണ്.

” ലക്ഷ്മി താൻ ഇറങ്ങ് . ”

ഞാൻ പറഞ്ഞതും അവൾ ബുള്ളറ്റിൽ നിന്ന് താഴേക്ക് ഇറങ്ങി . അവൾ മിണ്ടാതെ നിൽക്കുകയാണ് കണ്ണൊക്കെ നിറഞ്ഞിട്ടുണ്ട്.

” ടാ … താക്കോലെടുക്ക് . ”

ഞാൻ ലക്ഷ്മിയോട് സംസാരിച്ചവനോട് പറഞ്ഞു.

” ആഹാ അത്രയ്ക്ക് ധൈര്യമോ അന്ന് ഞങ്ങൾ തന്നത് ഓർമ്മയുണ്ടല്ലോ . ധൈര്യമുണ്ടെങ്കിൽ എടുത്തോ …. ”

അവൻ അതും പറഞ്ഞ് ആ താക്കോലെടുത്ത് പാന്റിന്റെ പോക്കറ്റിലിട്ടു.

“എടാ നിന്നെ അന്നേ ഞാൻ നോട്ടമിട്ടതാ … മരിയാതിക്ക് പറഞ്ഞാൽ അനുസരിക്കാൻ വയ്യ ചോദിച്ച് വാങ്ങിച്ചാൽ പിന്നെ എന്താ  ചെയ്യാ…..”

“ഠോ …… ”

ഞാനത്രയും പറഞ്ഞ് അവന്റെ കരണത്ത് ഒന്ന് കൊടുത്തു ….പടക്കം പൊട്ടുന്ന പോലെ ഒരു ശബ്ദം കേട്ടു . അവൻ അത് ഒട്ടും പ്രതീക്ഷിചില്ല . അവൻ കൈ അവന്റെ കരണത്ത്  പിടിച്ച് വേദന കൊണ്ട് നിൽക്കുയാണ്.

ഞാനന്റെ ഹർട്ടിന്റെ കോളറിൽ പിടിച്ച് കോളേജ് ബിൽഡിങ്ങിലെ ചുവരിൽ ചേർത്ത് നിർത്തി അവന്റെ പോക്കറ്റിൽ നിന്നും താക്കോലെടുത്തു . അപ്പോഴേക്കും അവന്റെ മറ്റ് രണ്ട് കൂട്ടുകാർ എന്നെ തല്ലാനായി വന്നു. ഞാൻ ഒരുത്തന്റെ വലത്തെ കയ്യിൽ പിടിച്ച് തിരിച്ച് ഞെരിച്ചു .അവൻ വേദനിച്ച് വിളിക്കുന്നത് കണ്ടതും മറ്റവൻ ഒന്ന് പരുങ്ങി..

” കോളേജല്ലേ ….  നിങ്ങൾ തമാശ കാണിച്ചതെന്ന് ഞാൻ വിജാരിച്ചോളാം ഇതിന്റെ പേരിൽ ഇവളെ ശല്യം ചെയ്താൽ ഞാൻ ഒന്നുകൂടെ വരും . ഒരിക്കൽ മരിക്കാൻ തയ്യാറായി നടന്നവനാ ഞാൻ എന്നെക്കൊണ്ട് കൂടുതൽ ഒന്നും   ചെയ്യിപ്പിക്കരുത്. ”

ഞാനത്രയും പറഞ്ഞ് അവന്റെ കൈവിട്ടു . ബുള്ളറ്റിൽ കയറി സ്റ്റാർട്ടാക്കി .

” ലക്ഷ്മി കയറ് … ”

ലക്ഷ്മി വന്ന് ബുള്ളറ്റിൽ കയറിയതും ഞാൻ ബൈക്ക് ഒന്ന് റൈസ് ചെയ്ത് മുന്നോട്ടെടുത്തു. ഈ കോളേജിനകത്തെ പാവപ്പെട്ട പിള്ളേരെ പേടിപ്പിച്ച് മാത്രം ശീലമുള്ള അവന്മാർ എന്റെ അപ്പോഴത്തെ ദേഷ്യം കണ്ട് പേടിച്ച് നിൽകുകയാണ് . മറ്റ് കുറച്ച് വിദ്യാർത്ഥികൾ എന്താണ് കാര്യമെന്ന് മനസ്സിലാകാതെ ദൂരത്ത് നിന്ന് നോക്കുന്നുണ്ട്. ഞാൻ ബൈക്ക് റോഡിലേക്ക് ഇറക്കി അത്യാവശ്യം നല്ല സ്പീഡിൽ പറപ്പിച്ചു. എന്തോ ലക്ഷ്മി കുറച്ച് കൂടി ശക്തിയായി ആണ്  തോളിൽ കൈ പിടിച്ചിരിക്കുന്നത്.

ഞാൻ ഒരു തട്ടുകടയ്ക്ക് മുന്നിൽ ബുള്ളറ്റ് നിർത്തി .

” ലക്ഷ്മി ഇറങ്ങ് .”

ഞാൻ ഇറങ്ങി നോക്കിയപ്പോഴാണ് പുള്ളിക്കാരി ഇത്രയും നേരം കരഞ്ഞു കൊണ്ടിരിക്കുകയാണെന്ന് എനിക്ക് മനസ്സിലായത് .

” ലക്ഷ്മീ താനെന്തിനാ കരയുന്നേ ….. കണ്ണുനീർ തുടയ്ക്ക് ആരെങ്കിലും കാണും . ”

” അത്  ഞാൻ കാരണമല്ലേ ഇന്ന് ……. ”

അവൾ ചുരിദാറിന്റെ ഷോൾ കൊണ്ട് കണ്ണുനീർ തുടച്ചു കൊണ്ട് പറഞ്ഞു .

” ഇതു കൊള്ളാം … താനെന്ത് ചെയ്തെന്നാ … സത്യത്തിൽ തന്നോട് ഞാൻ നന്ദി പറയേണ്ടതാ … അന്നേ ഞാനവന് ഒന്ന് പൊട്ടിക്കണമെന്ന് വിജരിച്ചതാ പക്ഷെ അത്രിത്ര പെട്ടെന്ന് നടക്കുമെന്ന് പ്രതീക്ഷിച്ചില്ല. താങ്ക്സ് …… ”

ഞാനത് പറഞ്ഞപ്പോൾ അത്രയും നേരം കരഞ്ഞു കൊണ്ട് നിന്നവൾ നിന്ന് ചിരിക്കുകയാണ്.

” അവന് അല്ലെങ്കിലും ഒരടിയുടെ കുറവുണ്ടായിരുന്നു . ”

ലക്ഷ്മി അതും പറഞ്ഞ് നിന്ന് വീണ്ടും ചിരിക്കുകയാണ് .

” അത് കൊണ്ടല്ലേ ഞാൻ ഒന്ന് കൊടുത്തത്. താൻ വാ … ”

ഞാൻ അവളെയും വിളിച്ച് ആ തട്ടുകടയ്ക്ക് ഉള്ളിൽ കയറി . നല്ല ചൂട് പൊറോട്ടയും ചിക്കനും തട്ടിയ ശേഷമാണ് ഞങ്ങൾ അവിടെ നിന്ന് തിരിച്ചത് . ഉച്ച കഴിഞ്ഞപ്പോഴേക്കും ഞങ്ങൾ വീട്ടിലെത്തി. വീടിന്റെ ഉമ്മറത്തു തന്നെ ലക്ഷ്മിയുടെ  അമ്മ ഞങ്ങളെ കാത്ത് നിൽക്കുന്നുണ്ടായിരുന്നു . ഞാൻ ബൈക്ക് നിർത്തിയതും ലക്ഷ്മി ചാടി  ഇറങ്ങി …

” വാ മോനേ കഴിച്ചിട്ട് പോകാം .”

ഞാൻ ബൈക്ക് പോർച്ചിൽ കയറ്റി വച്ചതും ലക്ഷ്മിയുടെ അമ്മ പറഞ്ഞു.

” ഇപ്പൊ വേണ്ട ആന്റി ഞങ്ങൾ കഴിച്ചു. ശരി…..”

ഞാനതും പറഞ്ഞ് വീട്ടിലേക്ക് നടന്നു. റൂമിൽ കയറി ഡ്രെസ് ഒക്കെ മാറി ഒരു റ്റിഷർട്ടും പേന്റും ഇട്ട് കട്ടിലിൽ കയറി കിടന്നു. ഫോണെടുത്ത് ഗ്യാലറി ഓപ്പൺ ആക്കിയപ്പോൾ കണ്ടത് കുറച്ച് ഫോട്ടോകളാണ് അന്ന് വീട്ടുകാരോടൊപ്പം പുറത്തു പോയപ്പോൾ എടുത്ത ഫോട്ടോകൾ . അന്ന് അത്രയും സന്തോഷിച്ചപ്പോൾ അറിഞ്ഞില്ലല്ലോ ഇത്രയും വലിയ ദുഃഖം എനിക്ക് ദൈവം തരുമെന്ന് .ഞാൻ കണ്ണിൽ നിറഞ്ഞ കണ്ണുനീർ തുടച്ചുമാറ്റി… ശരീരത്തിൽ മുഴുവൻ നല്ല കുളിര് പോലെ ഞാൻ പുതപ്പും വലിച്ച് മൂടി കട്ടിലിൽ കയറി കിടന്നു.

……………

“ഹരിയേട്ടാ എന്താ … എന്തു പറ്റി …….? എണീക്ക് …..”

ലക്ഷ്മിയുടെ വിളികേട്ടാണ്  ഞാൻ ഉറക്കത്തിൽ നിന്നും ഉണർന്നത് . കണ്ണിലൂടെയും മൂക്കിലൂടെയും ചൂട് ആവി പറക്കുന്നു. ശരീരം മുഴുവൻ തണുത്ത് വിറയ്ക്കുകയാണ് , ശരീരമാകെ ചെറിയ വേദനയും ഉണ്ട് . ഞാൻ കട്ടിലിൽ തന്നെ കിടന്നു .

ലക്ഷ്മി പതിയെ അവളുടെ കൈ എന്റെ നെറ്റിയിൽ വച്ചു.

” ഭഗവതീ …. നല്ല പനിയുണ്ടല്ലോ …… ഞാൻ ദാ വരുന്നു …. ”

ലക്ഷ്മി അതും പറഞ്ഞ് പുറത്തേക്ക് ഓടി . ഉടനെ തന്നെ ലക്ഷ്മി അവളുടെ അമ്മയെയും കൂട്ടി വന്നു .

” എന്താ മോനേ എന്തുപറ്റി . ”

ലക്ഷ്മിയുടെ  അമ്മ അതും ചോദിച്ച് എന്റെ നെറ്റിയിൽ കൈവച്ച് നോക്കി .

” സാരമില്ല മോനേ …. ഇത് ഒരു ചുക്ക് കാപ്പി കുടിക്കുമ്പോഴേക്കും മാറും …. ”

ലക്ഷ്മിയുടെ അമ്മ ഉടനെ പുറത്തേക്ക് പോയി . കുറച്ച് കഴിഞ്ഞപ്പോൾ ഒരു കപ്പ് കാപ്പിയുമായി വന്നു .

” മോനിത് കുടിക്ക് . ”

അവർ അതും പറഞ്ഞ് എന്നെ കട്ടിലിൽ എണീപ്പിച്ച് ഇരുത്തി ആ കപ്പ് എന്റെ കയിൽ തന്നു. നല്ല ചൂട് കാപ്പി മറ്റെന്തൊക്കെയോ ചേർത്തിട്ടുണ്ട് ഒരു പുതിയ രുചി , ഞാൻ പതിയെ അത് മുഴുവനും കുടിച്ചു.

” മോൻ കിടന്നോ ഒന്ന് ഉറങ്ങി എണീക്കുമ്പോഴേക്കും എല്ലാം മാറും. ”

ഞാൻ വീണ്ടും കട്ടിലിൽ പുതപ്പും വലിച്ച് മൂടി കിടന്നു ഉടനെ ഉറങ്ങിപ്പോയി .

………..

* നിന്റെ ജീവിതം മുന്നേ കുറിക്കപ്പെട്ട് കഴിഞ്ഞു ഹരീ.  നിനക്ക് കിട്ടേണ്ടതെങ്കിൽ കിട്ടും അത് എന്ത് തന്നെയായാലും . പക്ഷെ അതിന് മുൻപ് നീ വീണ്ടും സങ്കടകടലിൽ മുങ്ങും .*

ഒരു അശരീരി പോലെ എന്റെ ചെവികളിൽ ആ വാക്കുകൾ വീണ്ടും മുഴങ്ങി കേട്ടു ….

ഞാൻ ഞെട്ടി ഉണർന്നു. ഇതെന്താ ഞാനീ സ്വപ്നം വീണ്ടും കണ്ടത് … ഞാൻ കട്ടിലിൽ ഒരു വശത്ത് ഇരുന്ന ഫോണെടുത്ത് സമയം നോക്കി വെളുപ്പിലെ 5 മണി. ഇന്നലത്തെ പനിയൊക്കെ മാറിയിരിക്കുന്നു . എണീക്കാനായി പുതപ്പ് മാറ്റിയപ്പോഴാണ് എന്റെ കാലിൽ എന്തോ തട്ടിയത് നോക്കിയപ്പോൾ തറയിൽ ഇരുന്നു കൊണ്ട് തല കട്ടിലിൽ വച്ച് ഉറങ്ങുന്ന ലക്ഷ്മിയെയാണ് ഞാൻ  കണ്ടത്. അവളുടെ കൈയ്യാണ് എന്റെ കാലിൽ തട്ടിയത്.

‘ അപ്പൊ രാത്രി മുഴുവൻ ലക്ഷ്മി ഇവിടെ ആയിരുന്നോ  .’ ഞാനാലോചിച്ചു.

” ലക്ഷ്മീ…..  എണീക്ക്….. ”

ഞാനവളുടെ കയിൽ തട്ടി വിളിച്ചു. എന്റെ വിളികേട്ട് ഞെട്ടിയാണ് അവൾ ഉണർന്നത് , ഉടനെ തന്നെ അവൾ ചാടി എണീറ്റു.

” ഇപ്പൊ എങ്ങനെയുണ്ട് പനി കുറഞ്ഞോ  … ”

എണീറ്റ ഉടനെ അവൾ എന്നോട് ചോദിച്ചു.

” ആ പനിയൊക്കെ തന്റെ അമ്മയുടെ ഒറ്റമൂലി കാരണം പമ്പ വിട്ടു ….. താൻ എന്തിനാ ഇവിടെ ഇരുന്ന് ഉറങ്ങിയത് താൻ തന്റെ വീട്ടിൽ പോയി കിടന്ന് ഉറങ്ങാത്തതെന്താ … ?  ”

” അത് അമ്മ പറഞ്ഞു ചേട്ടൻ ഒറ്റയ്ക്കല്ലേ അതുകൊണ്ട് എന്റോടെ വിനോദേട്ടന്റെ റൂമിൽ കിടന്നോളാൻ . ഞാൻ ഉറങ്ങി കഴിഞ്ഞാൽ ചിലപ്പോൾ ചേട്ടന് പനി കൂടിയാൽ അറിയില്ലല്ലോ അതാ ഇവിടെ വന്നിരുന്നത് പിന്നെ എപ്പോഴോ ഉറങ്ങിപ്പോയി … ”

” ആ കൊള്ളാം എനിക്ക് കുഴപ്പമൊന്നുമില്ല താൻ പോയി കിടന്ന് ഉറങ്ങ്. ”

ഞാനത് പറഞ്ഞതും അവൾ എന്റെ നെറ്റിയിൽ കൈവച്ച് ചൂട് നോക്കി

” ശരിയാ പനി കുറഞ്ഞു . ചേട്ടാ അമ്മ എണീറ്റ് കാണും ഞാൻ പോകുവാ…. ”

ലക്ഷ്മി അതും പറഞ്ഞ് പുറത്തേക്ക് ഓടി. ഞാൻ ബാത്ത്റൂമിൽ പോയി തിരിച്ച് കട്ടിലിൽ വന്നിരുന്ന് ഫോൺ നോക്കി … വിനോദിന്റെ 5 മിസ്സ് കോൾ . ഫോൺ എങ്ങനെയോ സൈലന്റ് മോഡായി കിടക്കുവായിരുന്നു ഞാനതറിഞ്ഞതുമില്ല.

ഞാൻ വിനോദിനെ തിരിച്ച് വിളിച്ചു.

” ഹലോ ….. വിനോദേ ….. ”

” നീ ഒന്നും പറയണ്ട പുറത്തേക്ക് വാ …….”

വിനോദ് അതും പറഞ്ഞ് കോൾ കട്ട് ചെയ്തു .

എനിക്കൊന്നും മനസ്സിലായില്ല . ഞാൻ പുറത്തേക്ക് ചെന്നപ്പോൾ വിനോദ് പുറത്ത് നിന്ന് ലക്ഷ്മിയോട് സംസാരിക്കുകയാണ് ….

” എടാ നീ എപ്പൊ എത്തി .”

”  കൊള്ളാം  ഇന്നലെ അച്ഛൻ പറഞ്ഞ ആളിനെയും കണ്ട് വീട്ടിൽ എത്തി ഒരഞ്ചാറ് വട്ടം വിളിച്ചിട്ടും നീ ഫോണെടുക്കുന്നില്ല എന്താണെന്ന് അറിയാൻ ഇവളെ വിളിച്ചപ്പോഴല്ലേ നീ ഇവിടെ പനിച്ച് വിറച്ച് കിടക്കുന്നൂന്ന് അറിഞ്ഞത്. പിന്നെ എനിക്ക് ഇരിക്കപ്പൊറുതി കിട്ടുവോ പിന്നെ പാതി രാത്രി തന്നെ ഞാൻ അവിടെന്ന് തിരിച്ചു. ഇപ്പൊ എങ്ങനെയുണ്ട്…. ”

” ഇപ്പൊ കുഴപ്പമില്ല പനി മാറി . ”

” ആ അതാ ചെറിയമ്മയുടെ വൈദ്യം ഒരു വിധം പനിയൊക്കെ പുള്ളിക്കാരി പറ പറപ്പിക്കും . ഇനി ബാക്കി സംസാരം പിന്നീട് എനിക്കൊന്ന് ഉറങ്ങണം . ”

വിനോദ് അതും പറഞ്ഞ് അകത്തേക്ക് പോയി , ലക്ഷ്മി അവളുടെ വീട്ടിലേക്കും . ഞാനും കട്ടിലിൽ കയറി വെറുതേ കിടന്നു .

………..

” എടാ നീ പോയ കാര്യം എന്തായി . ”

ഞാൻ കുളത്തിന്റെ പടിക്കെട്ടിൽ ഇരുന്ന് കൊണ്ട് താഴെ വെള്ളത്തിൽ കിടന്ന് നീന്തി കുളിക്കുന്ന വിനോദിനോട് ചോദിച്ചു.

” എടാ ഒരു മാസം അതിനകം എല്ലാം ശരിയാക്കാവെന്നാ അയാൾ പറഞ്ഞത് . മുൻപത്തെ പണി തന്നെ ഐ റ്റി കമ്പനിയിൽ ….. ”

അവൻ അതും പറഞ്ഞ്  വീണ്ടും വെള്ളത്തിൽ നീന്താൻ തുടങ്ങി.

…………

അങ്ങനെ ഒന്നരയാഴ്ച വേഗം കടന്നു പോയി ഞാൻ ആ നാടും സ്ഥലവുമൊക്കെ മനസ്സിലാക്കി. കൂടുതലും സന്തോഷം നൽകിയത് ലക്ഷ്മിയുമായി സംസാരിച്ച് ഇരിക്കുമ്പോഴാണ് . ഞാൻ പൂർണ്ണമായും മദ്യപാനത്തിൽ നിന്ന് കരകയറി . ഇടയ്ക്ക് ചില ശാരീരിക പ്രശ്നങ്ങൾ ഉണ്ടാകുമെങ്കിലും ഞാനത് കാര്യമാക്കാറില്ല .

ഒരു ദിവസം ഞാനും വിനോദും ലക്ഷ്മിയും കൂടെ ടി.വി കണ്ടിരിക്കുമ്പോഴാണ് എന്നെത്തേടി ആ ഫോൺ കോൾ വന്നത് .

” ആരാടാ ഹരീ ”

ഞാൻ തിരിച്ച് കസേരയിൽ വന്നിരുന്നപ്പോൾ തന്നെ വിനോദ് കാര്യം തിരക്കി .

” എടാ ഞാൻ മുൻപ് വർക്ക് ചെയ്തിരുന്ന കമ്പനിയിൽ നിന്നാ . ജോലി കിട്ടി , പഴയപോസ്റ്റിലേക്ക് രണ്ടാഴ്ചയ്ക്കകം വിസയും ടിക്കറ്റും എത്തും . ”

ഞാനത് പറഞ്ഞപ്പോൾ എനിക്ക് ഒട്ടും സന്തോഷം ഇല്ലായിരുന്നു.

” ആഹാ കൊള്ളാല്ലോ നിനക്ക് എന്താ ഒരു സന്തോഷം ഇല്ലാത്ത പോലെ … ”

വിനോദ്  എന്നോട് തിരക്കി ..

” എടാ നാളെ നമുക്ക് നാട്ടിലേക്ക് മടങ്ങി പോകേണ്ടി വരും അവരുടെ കമ്പനിയുടെ ഇവിടത്തെ സ്റ്റാഫിന്റെ എന്തോ ഒരു വെരിഫിക്കേഷൻ .  ഞാൻ ലീവിന് വന്നിട്ട് മടങ്ങി പോയില്ലല്ലോ അതു കൊണ്ട്    . ”

” ഓ അതാണ് കാരണം നിനക്ക് ഈ നാട് കണ്ടപ്പോഴേ ഇഷ്ടപ്പെട്ടതല്ലേ അതുകൊണ്ടാ . എടാ നീ ആശിച്ച് കിട്ടിയ ജോലി അത് പോയിട്ടും വീണ്ടും കിട്ടിയില്ലേ അതോർത്ത് സന്തോഷിക്ക്. ”

വിനോദ് അതും പറഞ്ഞ് വീണ്ടും റ്റി വി യിലേക്ക് ശ്രദ്ധതിരിച്ചു.

ലക്ഷ്മി ഒന്നും മിണ്ടാതെ ഞങ്ങൾ സംസാരിക്കുന്നതും നോക്കി ഇരിക്കുകയാണ്.

” കൺഗ്രാറ്റ്സ് .  ”

ഞാനവളെ നോക്കിയതും ഉടനെ ചിരിച്ച് കൊണ്ട് പറഞ്ഞു.

……….

രാത്രി ഉറങ്ങാൻ കിടന്നപ്പോൾ വീണ്ടും പഴയ അവസ്ഥ , ഉറങ്ങാൻ പറ്റുന്നില്ല . മനസ്സ് മുഴുവൻ കലങ്ങി മറിയുന്ന അവസ്ഥ .

‘ അവളോട് ഇഷ്ടമാണെന്ന് തുറന്ന് പറഞ്ഞാലോ …. വേണ്ട ചിലപ്പോൾ അവൾ എന്നെ ഒരു സഹോദരനെ പോലെയാണ് കാണുന്നതെങ്കിൽ അവളിൽ നിന്നും ഇതുവരെ എന്നോട് പ്രണയമാണ് എന്ന തരത്തിലുള്ള ഒരു ഇടപെടലും ഉണ്ടായിട്ടുമില്ല …. വേണ്ട ‘

ഞാൻ അവസാനം തീരുമാനത്തിലെത്തി. രാവിലെ തന്നെ എണീറ്റ് കുളിച്ച് റെഡിയായി ഞാനും വിനോദും ലക്ഷ്മിയുടെ വീട്ടിലേക്ക് ചെന്നു . ഞങ്ങൾക്ക് അവൾ വിളമ്പി തന്ന കാപ്പിയും കുടിച്ച് പാക്ക് ചെയ്ത് വച്ച ബാഗും എടുത്ത് ഞങ്ങൾ ഇറങ്ങി.

” പോട്ടേ ആന്റി ”

” പോയിട്ട് വരാമെന്ന് പറ മോനേ ”

ഞാൻ ലക്ഷ്മിയുടെ മുഖത്ത് നോക്കി ചിരിച്ചു പറയാൻ എന്റെ കയ്യിൽ വാക്കുകൾ ഇല്ലായിരുന്നു. ഒരു മറുപടി കണക്കെ അവളും പുഞ്ചിരിച്ചു .

ബൈക്കിൽ ഞങ്ങൾ ദൂരത്തേക്ക് പോകുമ്പോഴും ആ കണ്ണുകൾ എന്നെ വീക്ഷിക്കുന്നുണ്ടായിരുന്നു.

………….

അങ്ങനെ ദിവസങ്ങൾ കഴിഞ്ഞു പോയി . അവിടുന്ന് വന്നതിൽ പിന്നെ ലക്ഷ്മിയുടെ ഓർമ്മകൾ മാത്രം ബാക്കിയായി . വിസയും ടിക്കറ്റും കമ്പനി അയച്ചു തന്നു. വീടും സ്ഥലവും വിനോദിന്റെ അച്ഛന്റെ കയിൽ ഏൽപ്പിച്ച് ഞാൻ വിണ്ടും ഫ്ളൈറ്റിൽ കയറി. അപ്പോഴൊക്കെയും ഒരു ചെറിയ പ്രതീക്ഷ എനിക്കുണ്ടായിരുന്നു  അവൾ എനിക്കുള്ളതാണെന്ന്  .

അങ്ങനെ വീണ്ടും ഞാൻ ആ കമ്പനിയിൽ ജോയിൻ ചെയ്തു . കുറച്ച് വർഷം ചെയ്ത ജോലി ആയതു കൊണ്ട് പ്രയാസമൊന്നും തോന്നിയില്ല . പൂർണ്ണമായും ഞാൻ ആ പഴയ ഹരിയായി മാറി .

അങ്ങനെ വീണ്ടും ജീവിതത്തിലെ ഒരു വർഷം കൂടി കടന്നുപോയി  ………..

ഒരു ദിവസം ഉച്ചയ്ക്ക് മൊബൈൽ ബെല്ലടിച്ചപ്പോൾ ഞാൻ ഫോണെടുത്ത് നോക്കി വിനോദാണ്, വാട്സാപ്പ് വഴി വീഡിയോ കോൾ വിളിച്ചതാണ്.

” എന്താടാ പതിവില്ലാതെ ഈ നേരത്ത് ”

ഞാനവനോട് തിരക്കി . ഇതിനിടയ്ക്ക് അവനും ഗൾഫിൽ ജോലി കിട്ടി അങ്ങോട്ട് പോയിക്കഴിഞ്ഞിരുന്നു.

” എടാ ഒരു കാര്യം പറയാൻ വിളിച്ചതാ  ലക്ഷ്മിയുടെ കല്യാണം ഉറപ്പിച്ചു. അടുത്ത മാസം നീ ഒഴിവൊന്നും പറയരുത് നിർബന്ധമായും ലീവെടുത്ത് വരണം ബാക്കി ഡീറ്റെയിൽസ് പിന്നീട് അറിയിക്കാം വിവരം അറിഞ്ഞപ്പോൾ വിളിച്ചറിയിച്ചതാ ബൈ അല്പം    തിരക്കുണ്ട്. ”

വിനോദ് അതും പറഞ്ഞ് കോൾ കട്ടു ചെയ്തു . എനിക്കെന്തോ ഒരു മരവിപ്പായിരുന്നു അത് കേട്ടപ്പോൾ …. ജീവിതത്തിലെ അവസാന പ്രതീക്ഷയും നശിച്ചതുപോലെ ഒരു തോന്നൽ……

തുടരും  ………..