💓പ്രാണസഖി 1

കഴിഞ്ഞ കഥയ്ക്ക് നിങ്ങൾ നൽകിയ അളവറ്റ പ്രോൽസാഹനങ്ങൾക്കും അഭിപ്രായങ്ങൾക്കും ആദ്യമേ നന്ദി പറഞ്ഞു കൊണ്ട് ഒരു പുതിയ കഥ ഞാനിവിടെ അവതരിപ്പിക്കുകയാണ്. നിങ്ങളുടെ അഭിപ്രായങ്ങൾ കമന്റുചെയ്യാൻ മറക്കരുത്….

കമന്റു ബോക്സിൽ ശ്രദ്ധയിൽപ്പെട്ട ചില കാര്യങ്ങൾ ഞാനിവിടെ പറയുകയാണ്/

എന്റെ പേര് vichu എന്നാണെങ്കിലും ഞാൻ എഴുതിയ കഥകൾ തിരിച്ചറിയാൻ വേണ്ടി ഓരോ കഥയുടെ പേരിനൊപ്പവും ” ചെകുത്താനെ സ്നേഹച്ച മാലാഖ ” എന്ന റ്റൈറ്റിൽ കൂടി ചേർത്തിട്ടുണ്ട്. ” ഒരു പ്രണയ കഥ ” എന്ന കഥ ഞാനല്ല എഴുതിയത് അതെഴുതിയത് വേറെ ഒരാളാണ് . ഞാൻ എഴുതിയ ഒരു കഥയും പാതിയ്ക്ക് വച്ച് നിർത്തിയിട്ടില്ല. ഒരു തെറ്റിധാരണ മാറാൻ വേണ്ടിയാണ് ഞാനിത് ഇവിടെ പറഞ്ഞത് മറ്റൊന്നും കൊണ്ടല്ല 🙏🙏🙏 ..

ഞാൻ തൊട്ട് മുൻപ് എഴുതിയ ” കാലം കരുതിവച്ച പ്രണയം ” എന്ന കഥയ്ക്ക് ഒരു പാർട്ട് കൂടെ വേണമെന്ന് ഒരു സുഹൃത്ത് കമന്റു ചെയ്യുകയുണ്ടായി. അതിനെ അനുകൂലിച്ച് പത്ത് കമന്റുകൾ കിട്ടിയാൽ ആ കഥയുടെ ഒരു പാർട്ടു കൂടെ ഞാൻ എഴുതുന്നതായിരിക്കും. നിങ്ങളുടെ അഭിപ്രായം ഈ കഥയുടെ കമെൻറ് ബോക്സിൽ എഴുതിയാൽ മതി…..

എന്നാൽ തുടങ്ങട്ടെ………. ,

💓 💓പ്രാണസഖി – 1💓💓 [ ചെകുത്താനെ സ്നേഹിച്ച മാലാഖ ]

………….

ഒരു പ്രൈവറ്റ് ഹോസ്പിറ്റലിലെ മൂന്നാമത്തെ ബിൽഡിങിലെ വിസിറ്റേഴ്സ് ഏരിയയിൽ ഇരിക്കുമ്പോൾ എന്റെ നെഞ്ച് പിടയ്ക്കുകയാണ് . അവളേക്കാൾ വേദന മാനസികമായി അനുഭവിക്കുന്നത് ചിലപ്പോൾ ഞാനായിരിക്കും. അവൾ അനുഭവിക്കുന്ന ശാരീരിക വേദനയെക്കാൾ എത്രയോ ഇരട്ടി എന്റെ ഹൃദയം വേദനിക്കുന്നു.

മുകളിൽ നിന്ന് ഒരു വിവരവും ലഭിക്കുന്നില്ല , ആരും ഒന്നും വന്ന് പറയുന്നുമില്ല. ഗതികെട്ട് ഞാൻ രണ്ടാമത്തെ നിലയിലേക്കുള്ള സ്റ്റെപ്പ് കയറി. മുകളിൽ തന്നെ നിൽപ്പുണ്ട് ഒരു അൻപത് വയസ്സ് തോന്നിക്കുന്ന ലേഡി സെക്യൂരിറ്റി . എന്നെ കണ്ടതും അവർ കണ്ണും മിഴിച്ച് നോക്കി.

” തന്നോടല്ലേ നേരത്തെ പറഞ്ഞത് താഴെയിരിക്കാൻ …. എന്തെങ്കിലും ആവശ്യം ഉണ്ടെങ്കിൽ നഴ്സ് വന്ന് വിളിക്കും. താൻ പോയി താഴെ ഇരിക്ക് ….. ”

ഞാൻ എന്തെങ്കിലും പറഞ്ഞ് തുടങ്ങുന്നതിന് മുൻപ് തന്നെ അവർ എടുത്തടിച്ച പോലെ എന്നോട് പറഞ്ഞു. താഴെ നിന്ന ചിലർ അത് കേട്ടു എന്ന് എനിക്ക് മനസ്സിലായി. ഞാൻ വീണ്ടും തിരിച്ച് പഴയ സ്ഥലത്ത് വന്നിരുന്നു. എന്റെ ഉള്ളിലെ ആദി അവർക്ക് അറിയില്ലല്ലോ . ജീവിതത്തിൽ കൂടുതലും ദു:ഖമനുഭവച്ച എനിക്ക് ഓരോ നിമിഷവും പേടിയാണ് കാരണം എന്നെ സ്നേഹിച്ചിട്ടുള്ളവരെല്ലാം എന്നെ വിട്ട് പോയിട്ടേ ഉള്ളൂ……

എന്തോ ആലോചിച്ച് ഇരുന്നപ്പോഴാണ് ഒരു ആംബുലൻസിന്റെ നിലവിളി ശബ്ദം എന്നെ ഉണർത്തിയത്.

ആ ആംബുലൻസ് തൊട്ടപ്പുറത്തുള്ള ക്യാഷുവാലിറ്റിക്കു മുന്നിൽ നിർത്തി. എന്താണ് കാര്യം എന്നറിയാൻ ഞാൻ എണീറ്റ് അങ്ങോട്ടേക്ക് ചെന്നു. ഒരു ചെറുപ്പക്കാരനെ ആംബുലൻസിൽ നിന്ന് എടുത്ത് വീൽചെയറിൽ ഇരുത്തി അകത്തേക്ക് കൊണ്ടു പോകുന്നു , ആ ചെറുപ്പക്കാരന്റെ ശരീരം ചിലയിടത്തൊക്കെ മുറിഞ്ഞിട്ടുണ്ട് .

“ആക്സിഡന്റാണ് . കുടിച്ചോണ്ട് ബൈക്ക് ഓടിച്ചതാ , നല്ല ഫിറ്റാ ….. എന്തോ ഭാഗ്യത്തിന് വലിയ പരിക്കില്ല ..”

ആംബുലൻസ് ഓടിച്ചിരുന്ന ചേട്ടൻ ഹോസ്പിറ്റലിലെ സെക്യൂരിറ്റിയോട് വിളിച്ചു പറഞ്ഞത് എന്റെ ചെവികളിൽ മുഴങ്ങി.

ഞാൻ തിരിച്ച് പഴയ സ്ഥലത്തു വന്നിരുന്നു .

മദ്യപാനം ജീവിതം നശിപ്പിക്കുമെന്ന് ഒരുപാട് തവണ കേട്ട വ്യക്തിയാണ് ഞാൻ . പക്ഷെ എന്റെ ജീവിതം ഇപ്പോൾ ഇങ്ങനെ സന്തോഷകരമായിരിക്കാൻ ഒരു തരത്തിൽ കാരണക്കാരനായത് മദ്യം എന്ന വിഷം തന്നെയാണ്.

കസേരയിൽ ചാരി ഇരുന്ന് ഞാൻ ഒന്ന് കണ്ണടച്ചു . എന്റെ മനസ്സിൽ പഴയ നിമിഷങ്ങൾ വന്നു നിറഞ്ഞു , ഞാൻ കുറച്ച് മാസങ്ങൾ പുറകിലോട്ട് പോയി , എന്റെ ഭൂതകാലത്തിലേക്ക് ……

…………………………….

“ചേട്ടാ …… ചേട്ടോ …….. ഇതുവരെ എണീറ്റില്ലേ.. ഹലോ ……. ഇന്നെങ്ങാനും എണീക്കോ……..?”

വീടിന്റെ മുൻവശത്തെ കതകിൽ തട്ടിയുള്ള ശ്രീവിദ്യയുടെ വിളികേട്ട് ഞാൻ ഉറക്കത്തിൽ നിന്ന് മെല്ലെ ഉണർന്നു.

“ദാ വരുന്നു ……”

ഞാൻ അതും വിളിച്ച് പറഞ്ഞ് കട്ടിലിൽ നിന്ന് പതിയെ കണ്ണും തിരുമ്മികൊണ്ട് എണീറ്റു. ഞാൻ എണീറ്റ സമയം കട്ടിലിന്റെ അരികിൽ ഇരുന്ന കാലിയായ മദ്യകുപ്പി കാല്തട്ടി നിലത്ത് വീണ് കുറച്ചു ദൂരം ഉരുണ്ട് പോയി. മുറിയാകെ അലങ്കോലമായി കിടക്കുകയാണ് . മുറി മാത്രമല്ല വീട് മുഴുവനും വൃത്തികേടായി വലയും പൊടിയും കൊണ്ട് നിറഞ്ഞിരിക്കുന്നു. എന്റെ ജീവിതത്തിലും ഇപ്പോഴത്തെ അവസ്ഥ ഇതു തന്നെയാണ്.

റൂമിലെ ചുവരിൽ തറച്ചു വച്ചിരിക്കുന്ന ക്ലോക്കിലേക്ക് എന്റെ കണ്ണുകൾ പോയി.

‘സമയം 11 മണിയായിരിക്കുന്നു . ‘

കട്ടിലിൽ അഴിഞ്ഞ് കിടന്ന പേശയും വലിച്ച് ചുറ്റി ഞാൻ റൂമിന് പുറത്തേക്ക് നടന്നു. ഇന്നലെ കഴിച്ചതിന്റെ കറക്കം ഇനിയും തലയിൽ നിന്ന് വിട്ട് പോയിട്ടില്ല . ഞാൻ പതിയെ വീടിന്റെ മുൻവശത്തെ കതക് തുറന്നു . ഇടുപ്പിൽ രണ്ട് കയ്യും കൊടുത്ത് എന്നെ കാത്ത് നിൽക്കുന്ന ശ്രീവിദ്യയെയാണ് ഞാൻ കണ്ടത്.

“ആ കൊള്ളാം ഇപ്പൊ എണീറ്റതേ ഉള്ളൂ സമയം 11 മണിയായി. ഇതെന്തോന്നാ… കോലം കുളിയും നനയുമൊന്നുമില്ലേ……? ”

അവൾ ഒരു പുഞ്ചിരിയോടെ ചോദിച്ചതിന് ഒരു ചെറുപുഞ്ചിരിയായിരുന്നു എന്റെയും മറുപടി.

“ഇന്നലെയും അടിച്ച് പൂക്കുറ്റിയായി ആണല്ലേ വന്നത് …… പിന്നെ ഇതിപ്പം പതിവ് കാഴ്ചയായല്ലോ. രാവിലെ കാപ്പി കൊണ്ടുവന്ന പാത്രം എടുക്കാൻ വന്നതാ ഞാൻ . ഇതിപ്പം തണുത്ത് ഒരു പരുവമായിക്കാണും. സ്വയം എണീക്കും എന്ന് കരുതിയാ ഞാൻ വിളിക്കാതെ പോയത്. ”

സിറ്റ് ഔട്ടിലെ കസേരയിൽ അടച്ചുവച്ചിരിക്കുന്ന പാത്രത്തിലേക്ക് നോക്കിക്കൊണ്ട് അവൾ പറഞ്ഞു.

” അത് കുഴപ്പമില്ല ശ്രീ ഞാൻ അത് കഴിച്ചോളാം ”

അവളുടെ മുഖത്തെ സങ്കടഭാവം കണ്ട് ഞാൻ പറഞ്ഞു.

” ആ ചോറ് കഴിക്കാൻ സമയമാവാറായി ഇനിയാ കാപ്പി കുടിക്കുന്നേ …… എന്നാൽ നടക്കട്ടേ ഞാൻ പിന്നീട് വന്ന് പാത്രം എടുത്തോളാം പുറത്ത് വച്ചിരുന്നാൽ മതി. ചായ ചൂടാക്കി തരണോ ? .”

“വേണ്ട ശ്രീ …. ഞാൻ ചൂടാക്കി കുടിച്ചോളാം ”

” എന്നാൽ ശരി ഞാൻ പോകുവാ . ”

” അവൻ വീട്ടിലുണ്ടോ? ”

അവൾ ഗേറ്റ് കടന്നു പോകുന്നതിന് മുൻപ് ഞാൻ വിളിച്ചു ചോദിച്ചു.

” വിസയുടെ കാര്യത്തിന് ആരെയോ കാണാൻ പോയിരിക്കുവാ…… ”

അവൾ അതും വിളിച്ച് പറഞ്ഞു കൊണ്ട് അവളുടെ വീട്ടിലേക്ക് ഓടി…..

ഇനി എന്നെ പറ്റി പറയാം…. എന്റെ പേര് ഹരി കൃഷ്ണൻ (27). ജീവിതത്തിൽ ചിലപ്പോൾ എന്റെ അറിവിൽ ഏറെ ദുഃഖം അനുഭവിച്ച വ്യക്തി ഞാൻ തന്നെയായിരിക്കും , അത് എന്തെന്ന് നിങ്ങൾക്ക് വഴിയെ മനസ്സിലാകും .

വിനോദ് എന്റെ ഉറ്റസുഹൃത്ത് അല്ല എന്റെ സഹോദരൻ എന്നു തന്നെ പറയാം അവന്റെ പെങ്ങളാണ് ശ്രീവിദ്യ . എനിക്കവൾ കുഞ്ഞ് പെങ്ങൾ തന്നെയാണ് . എല്ലാ കുറുമ്പും ഒപ്പിക്കുന്ന ഒരു കൊച്ച് കുറുമ്പി , ഇപ്പോൾ പ്ലസ് ടു വിന് പഠിക്കുന്നു. വിനോദ് വിദേശത്തായിരുന്നു. എന്തോ പ്രശ്നം കാരണം ഇപ്പോൾ നാട്ടിലാണ് . അവന്റെ അച്ഛനും അമ്മയ്ക്കും ഏറെ കാര്യമാണ് എന്നെ , ഒരു മകന്റെ സ്ഥാനം തന്നെയാണ് എനിക്ക് അവർ തന്നിട്ടുള്ളത് .

എന്റെ അച്ഛന്റെ ഉറ്റകൂട്ടുകാരനായിരുന്നു വിനോദിന്റെ അച്ഛൻ അങ്ങനെ തുടങ്ങിയ ബന്ധം രണ്ടു കുടുംബത്തെയും ഒന്നാക്കി നിർത്തി. എന്റെ വീടിന്റെ കുറച്ച് അപ്പുറത്താണ് അവരുടെ വീട്….

………

ഞാൻ ശ്രീ കൊണ്ടു വച്ചിരുന്ന പാത്രവുമെടുത്ത് അകത്തു കയറി. ബാത്ത് റൂമിൽ പോയി പല്ല് തേപ്പും കുളിയുമൊക്കെ കഴിഞ്ഞു. രാവിലെ തന്നെ കൈ വിറയ്ക്കുകയാണ് . റൂമിലെ ഷെൽഫിൽ ഇരുന്ന കുപ്പിയിലെ ബാക്കി കുറച്ച് അകത്താക്കി . അല്ലാതെ എനിക്ക് ഇന്നിനി ഒന്നും ചെയ്യാൻ പറ്റില്ല അതാണ് ഇപ്പോഴത്തെ എന്റെ അവസ്ഥ. അതിനു ശേഷം അവൾകൊണ്ടു വന്ന ഭക്ഷണം കഴിച്ചു.

എന്റെ ജീവിതം മാറി മറഞ്ഞിട്ട് ആറു മാസം കഴിഞ്ഞു . ഇത്രയും ദിവസമായിട്ടും ആ ദു:ഖത്തിൽ നിന്ന് കരകയറാൻ എനിക്ക് സാധിച്ചിട്ടില്ല. അങ്ങനെ തുടങ്ങിയതാണ് മദ്യപാനം ഇപ്പോൾ അതില്ലാതെ ഒരു നിമിഷം തള്ളി നീക്കാൻ പറ്റാത്ത അവസ്ഥയാണ് എനിക്ക്… ഈ അവസ്ഥയിൽ നിന്നൊക്കെ പുറത്ത് വരണം എന്ന് ആഗ്രഹമുണ്ടെങ്കിലും എന്തോ അതിന് സാധിക്കുന്നില്ല.

വീടിനുള്ളിൽ സ്വബോധത്തോടെ ഇരിക്കുന്ന ഒരോ നിമിഷവും എന്നിൽ ഭ്രാന്തമായ ഒരു അനുഭൂതി സൃഷ്ടിക്കും. ഞാൻ ഡ്രസ് മാറി ഒരു ജീൻസ്പാന്റും ഷർട്ടും ധരിച്ചു. ശ്രീ ആഹാരം കൊണ്ടു വന്ന പാത്രങ്ങൾ പുറത്തുവച്ച് മുൻവശത്തെ ഡോറ് ലോക്ക് ചെയ്തു . ബൈക്കിന്റെ കീ എടുത്ത് പോക്കറ്റിലിട്ടു.

മുറ്റത്തേക്ക് ഇറങ്ങി വീടിന്റെ വടക്കു വശത്തേക്ക് ഞാൻ നടന്നു. ചെന്ന് നിന്നത് മൂന്ന് അസ്ഥിതറകൾക്ക് മുന്നിലാണ്. എന്റെ കണ്ണുകൾ അറിയാതെ തന്നെ നിറഞ്ഞു. അസ്ഥിതറകളിലെ അണഞ്ഞ വിളക്കുകൾ കത്തിച്ച ശേഷം ഞാൻ ഒരു നിമിഷം കണ്ണുകളടച്ചു.

“മാപ്പ് ….. ”

ഞാൻ മനസ്സിൽ പറഞ്ഞു . എന്റെ കണ്ണിൽ നിറഞ്ഞു തുളമ്പിയ കണ്ണു നീർ ഒഴുകാൻ തുടങ്ങി. മാപ്പ് പറയനല്ലാതെ എന്ത് ചെയ്യാനാകും എനിക്ക് . എല്ലാത്തിനും കാരണക്കാരൻ ഞാനല്ലേ ….. നൊന്ത് പെറ്റ അമ്മയെയും ജന്മം തന്ന അച്ഛനെയും ജീവൻ തന്ന് സ്നേഹിച്ച കുഞ്ഞനുജനെയും ഞാൻ കുരുതി കൊടുത്തില്ലേ …… അവരുടെ മരണത്തിന് ഞാനല്ലേ കാരണക്കാരൻ …. അറിഞ്ഞ് കൊണ്ടല്ലങ്കിൽ പോലും ഞാനല്ലേ എല്ലാത്തിനും …. മനസ്സിനെ വേട്ടയാടുന്ന ചില കുറ്റബോധമാണ് ഇപ്പോഴത്തെ എന്റെ അവസ്ഥയ്ക്ക് കാരണം. എന്റെ മനസ്സ് നീറാൻ കാരണം……

ഇനിയും ഇവിടെ നിൽക്കാൻ എനിക്ക് സാധിക്കില്ല. പഴയ ഓർമ്മകൾ എന്നെ ഭ്രാന്തനാക്കും അതുകൊണ്ട് ഞാൻ ബൈക്ക് സ്റ്റാർട്ടാക്കി മുന്നോട്ടെടുത്തു. ഗേറ്റ് കടന്നതും എന്നെ ലക്ഷ്യമാക്കി നടന്നു വരുന്ന വിനോദിന്റെ അച്ഛൻ ദിനേശൻ മാമനെയാണ് ഞാൻ കണ്ടത്..

“എങ്ങോട്ടാടാ ……. ഇപ്പൊ പോകുന്നേ ?”

ബൈക്കിലിരുന്ന എന്നെ കണ്ട് ദിനേശൻ മാമൻ കാര്യം തിരക്കി…. ഞാൻ ബൈക്ക് ഓഫാക്കി സ്റ്റാന്റിൽ ഇട്ടശേഷം അതിൽ നിന്ന് ഇറങ്ങി.

“അത്… ഒന്ന് പുറത്തേക്ക് ”

” നീ ഇന്നലെയും കുടിച്ചിട്ടാണോ വന്നേ , എന്നിട്ട് ഉറക്കമെണീറ്റത് ഇപ്പോ അല്ലേ … നീ എന്തിനുള്ള പുറപ്പാടാ…… നശിക്കാൻ തന്നെ തീരുമിച്ചോ …..? ”

ദിനേശൻ മാമന്റെ ആ ചോദ്യത്തിന് ഞാൻ ഒന്നും മിണ്ടാതെ തലയും കുനിച്ച് നിന്നു .

“എടാ മോനേ ഹരി , എങ്ങനെ ജീവിച്ചതാടാ നീ . നീ എല്ലാം മറക്കാൻ ശ്രമിക്ക് ഇനിയെങ്കിലും . എല്ലാം കഴിഞ്ഞിട്ട് മാസം ഇവിടെ ആറ് ആയില്ലേ ”

എന്റെ തോളിൽ കൈവച്ചു കൊണ്ട് ദിനേശൻ മാമൻ പറഞ്ഞു.

” എല്ലാം അറിയാവുന്ന മാമൻ തന്നെ എന്നോടിങ്ങനെ പറയണം ….. ഞാൻ കാരണമല്ലേ അന്ന് അങ്ങനെ സംഭവിച്ചത് . എനിക്ക് ഈ ജീവിതത്തിൽ അത് മറക്കാൻ പറ്റുമെന്ന് മാമന് തോന്നുന്നുണ്ടോ ?”

അത് പറഞ്ഞപ്പോഴേക്കും എന്റെ കണ്ണുകൾ നിറഞ്ഞിരുന്നു.

“എടാ നീ എന്ത് ചെയ്തെന്നാ ഈ പറയുന്നേ …..നീ വെറുതേ ചിന്തിച്ച് കൂട്ടുന്ന ഈ കുറ്റബോധമാണ് നിന്നെ നശിപ്പിക്കുന്നത്……. എടാ എല്ലാം വിധിയാണ് . നീ ഇങ്ങനെ കുടിച്ച് നശിക്കുന്നത് കാണുന്ന നിന്റെ അച്ഛന്റെയും അമ്മയുടെയും ആത്മാവ് എത്ര മാത്രം വേദനിക്കുന്നുണ്ടാവും എന്ന് നീ ചിന്തിച്ചിട്ടുണ്ടോ? പറയാനെ ഞങ്ങൾക്കാകൂ അനുസരിപ്പിക്കാനുള്ള പ്രായമൊക്കെ കഴിഞ്ഞു. ”

ദിനേശൻ മാമൻ അത്രയും പറഞ്ഞ് തിരിച്ച് വീട്ടിലേക്ക് നടന്നു.

ഉപദേശങ്ങൾ എനിക്ക് എന്റെ പഴയ ജീവിതം തിരിച്ച് തരില്ല. എല്ലാവരും ഉണ്ടായിരുന്നിട്ട് പെട്ടെന്ന് അവരെയൊക്കെ നഷ്ടപ്പെടുമ്പോഴുള്ള വേദന അത് അനുഭവിക്കുമ്പോഴേ അതിന്റെ ആഴം മസ്സിലാകൂ……..

ഞാൻ ബൈക്ക് സ്റ്റാർട്ടാക്കി മുന്നോട്ട് പാഞ്ഞു. വീട്ടിൽ നിന്നും ഒരു 10 കിലോമീറ്റർ മാറി ഒരു ബീച്ച് ഉണ്ട് അതാണ് എന്റെ ഇപ്പോഴത്തെ സ്ഥിരം സ്ഥലം. അവിടെ പോയി വെറുതേ തിരകളെണ്ണി ഇരിക്കും വൈകുന്നേരം ആകുമ്പോൾ നാലുകാലിൽ വീട്ടിലെത്തും അതാണ് ഇപ്പോഴത്തെ സ്ഥിരം കലാപരിപാടി. ഇടയ്ക്ക് വിശക്കുമ്പോൾ ഏതെങ്കിലും ഹോട്ടിലിൽ കയറി കഴിക്കും ……..

ബൈക്ക് റോഡിൽ നിന്ന് മാറി ഒരിടത്ത് ഒതുക്കിവച്ച് ഞാൻ തീരത്തേക്ക് നടന്നു. അവിടെയുള്ള ഒരു മണൽ തിട്ടയിൽ സ്ഥാനം ഉറപ്പിച്ചു. ബീച്ചു കാണാനും സൂര്യ അസ്തമനം കാണാനും ഇവിടെ ഒരുപാട് പേർ വരാറുണ്ട് . ഇന്നും ആവശ്യത്തിന് തിരക്കുണ്ട്.

ഞാൻ അവിടെ ഇരുന്നപ്പോഴാണ് ഒരു കാഴ്ച എന്റെ ശ്രദ്ധയിൽപെട്ടത്. ഒരു

അച്ഛനും രണ്ട് ആൺകുട്ടികളും തിരയിൽ കിടന്ന് ചാടി മറിയുകയാണ്. ആ കുട്ടികളുടെ അമ്മ ഇതെല്ലാം കണ്ട് സന്തോഷത്തോടെ ചിരിച്ചുകൊണ്ട് അൽപം മാറിനിൽക്കുന്നു. ആ അച്ഛന്റെയും മക്കളുടെയും മുഖത്ത് അളവില്ലാത്ത സന്തോഷം നിറഞ്ഞ നിൽക്കുന്നു . പക്ഷെ ആ കാഴ്ച എന്റെ കണ്ണുകളെ ഈറനണിയിച്ചു.. പഴയ ചില ഓർമ്മകൾ മനസ്സിലൂടെ മിന്നി മാഞ്ഞ് പോയി.

ഇനിയും ഇവിടെ ഇരുന്നാൽ ഞാൻ പൊട്ടിക്കരയും . ആൾക്കാർക്കു മുന്നിൽ ഒരു കാഴ്ച വസ്തുവായിമാറും … ഞാൻ അവിടെ നിന്ന് എണിറ്റു , പാന്റിൽ പറ്റിയിരുന്ന മണൽ തട്ടി കളഞ്ഞ് തിരിഞ്ഞ് നടന്നു .

നേരെ പോയത് ഞാൻ കുറച്ച് മാസങ്ങളായി സ്ഥിരം പോകാറുള്ള സ്ഥലത്തേക്കാണ്. ബീച്ച് റോഡിലുള്ള ഒരു ബാറിലേക്ക് . എന്നിട്ട് സ്ഥിരം കലാപരിപാടി ആരംഭിച്ചു. ബോധമില്ലാതെ വീട്ടിൽ ചെന്നുകയറണം. സ്വബോധത്തോടെ ആ വീട്ടിൽ ഇരിക്കുന്ന സമയം എന്റെ ചെവിയിൽ മുഴങ്ങുന്നത് ഒരു നിലവിളിയാണ്. പക്ഷെ എന്തൊക്കെ വന്നാലും അവരെ അടക്കം ചെയ്ത മണ്ണ് വിട്ട് എനിക്ക് എങ്ങോട്ടും പോകാനുമാവില്ല..

……………..

സമയം കടന്നു പോയി ……. എന്നും ഇറങ്ങുന്ന സമയമായപ്പോൾ ഞാൻ ബാറിൽ നിന്നും ഇറങ്ങി…

ഞാൻ പതിയെ ബൈക്കിരിക്കുന്ന സ്ഥലം ലക്ഷ്യമാക്കി നടന്നു. സമയം വൈകുന്നേരം 5 മണിയായിരിക്കുന്നു. ബീച്ചിൽ പതിവിലും തിരക്ക് കുറേ കോളേജ് വിദ്യാർത്ഥിളൊക്കെ നിൽക്കുന്നുണ്ട് . കുറച്ച് അപ്പുറത്ത് ഒരു ടൂറിസ്റ്റ് ബസും ഒതുക്കി ഇട്ടിരിക്കുന്നു.

“ഏതെങ്കിലും കോളേജിൽ നിന്ന് ടൂർ വന്നതായിരിക്കു . ” ഞാൻ മനസ്സിൽ വിജാരിച്ചു.

ബൈക്കിനടുത്തേക്ക് നടന്നു പോയ ഞാൻ എന്തോ ആവശ്യത്തിന് നിലത്തുകൂടെ വലിച്ചു കെട്ടിയിരിക്കുന്ന ഒരു കയർ അത് എന്റെ ശ്രദ്ധയിൽപ്പെട്ടില്ല. എന്റെ കാല് ആ കയറിൽ തട്ടി വീഴാൻ പോയ ഞാൻ അറിയാതെ കയറി പിടിച്ചത് ഒരു പെൺകുട്ടിയുടെ ദേഹത്താണ് . അവളും ഞാനും കൂടെ ബാലൻസ് തെറ്റി നിലത്തേക്ക് മലർന്നടിച്ചു വീണു. ഞാൻ അടിയിലും അവൾ എന്റെ പുറത്തും , ആദ്യമായാണ് എനിക്കിങ്ങനെ ഒരനുഭവം . ഒരു പഞ്ഞിക്കെട്ട് എന്റെ ദേഹത്തേക്ക് വീണ അനുഭവമായിരുന്നു എനിക്ക് …. അവൾ ചാടി വീണ് എണീറ്റു. എണീറ്റ അവൾ നിന്നു കരുകയാണ് , അപ്പേഴാണ് എനിക്ക് മനസ്സിലായത് അവളുടെ കൂട്ടുകാരികളെല്ലാം ഇത് കണ്ടു കൊണ്ട് നിൽക്കുകയായിരുന്നു എന്ന് . അവൾക്കിത് നാണക്കേടായി തോന്നി എന്നുള്ളത് ഉറപ്പ്.

ഉടനെ തന്നെ നിലത്തു കിടന്ന എന്നെ അവിടെ നിന്ന കുറച്ച് പയ്യന്മാർ നിലത്തിട്ട് ചവിട്ടാനും തൊഴിക്കാനും തുടങ്ങി ….. മണലിൽ കിടന്ന് അടിവാങ്ങിക്കാനല്ലാതെ തിരിച്ച് പ്രതികരിക്കാനുള്ള അവസ്ഥയിലല്ലായിരുന്നു ഞാൻ.

” ഞങ്ങടെ ക്ലാസ്സിലെ പെൺകുട്ടിയെ കേറി പിടിക്കുന്നോ ടാ നീ ….. എടാ നിന്നെ .. മൈ################₹”

എന്നെ തൊഴിക്കുന്നതിനടയ്ക്ക് അവർ വിളിച്ചു പറയുന്നത് ഞാൻ കേട്ടു.

” എടാ ഇവൻ വെള്ളമടിച്ച് കോൺ തെറ്റി കിടക്കുവാ …..”

അതിലെ ഒരു പയ്യൻ മറ്റുള്ളവരോട് പറഞ്ഞു.

ഉടനെ തന്നെ ബീച്ചിൽ പട്രോളിങ്ങിനു വന്ന പോലീസുകാർ അവരെ പിടിച്ചു മാറ്റി . ഒരു പോലീസുകാരൻ എന്നെ വലിച്ച് എണീപ്പിച്ചു.

” നിർത്തെ ടാ….. ഇവന് എന്തെങ്കിലും പറ്റിയാൽ നിയൊക്കെ ഉത്തരം പറയോ…. ഞങ്ങൾ ഈ യൂണിഫോമും ഇട്ടോണ്ട് കാണാനല്ല നിൽക്കുന്നേ …. ഏവനെയെങ്കിലും കിട്ടിയാൽ എടുത്തിട്ട് പെരുമാറാൻ നിൽക്കുന്നു…”

കൂട്ടത്തിലുള്ള ഒരു പോലീസുകാരൻ എന്നെ തല്ലിയ വിദ്യാർത്ഥികളോട് ആക്രോശിച്ചു. അയാൾ C I ആണെന്ന് എനിക്ക് മനസ്സിലായി

“നല്ല വെള്ളമാണല്ലോ ടാ … ഇത്ര ചെറുപ്പത്തിലേ കുടിച്ച് ചാവാൻ എന്താടാ നിനക്ക് ഇത്രയ്ക്ക് പ്രശ്നം …നിന്റെ സൂക്കേട് ഇന്ന് മാറ്റിത്തരാം പെൺപിള്ളേരെ കേറി പിടിക്കുന്നോ ….. ?”

എന്നെ പിടിച്ച് എണീപ്പിച്ച പോലീസുകാരൻ എന്റെ ഷർട്ടിന്റെ കോളറിൽ പിടിച്ചു കൊണ്ട് എന്നോട് ചോദിച്ചു …..

” സാറേ …… ഞാനൊന്നും ചെയ്തില്ല കാല് തെറ്റി വീണതാ ഞാൻ …….

ആ അവസ്ഥയിലും ഞാൻ എങ്ങനെയോ പറഞ്ഞൊപ്പിച്ചു ..

“മിണ്ടാതെ നിൽക്കെടാ അവിടെ ……. ദേ കൊച്ചേ….. ഒരു പരാതി എഴുതി താ ഇവന്റെ സൂക്കേട് ഞങ്ങൾ മാറ്റി കൊടുക്കാം …. ”

ആ C I കരഞ്ഞുകൊണ്ട് നിന്ന ആ പെൺകുട്ടിയോട് പറഞ്ഞു…..

“വേണ്ട സർ ഇതൊരു പെൺകുട്ടിയല്ലേ ഇഷ്യു ആക്കണ്ട ഇയാൾ ആ കയറിൽ തട്ടി ഇവളുടെ പുറത്തേക്ക് വീണെന്നാ കണ്ടുകൊണ്ട് നിന്ന മറ്റു പെൺകുട്ടികൾ എന്നോട് പറഞ്ഞത്. ”

അവരുടെ അദ്യാപകനാണെന്ന് തോന്നുന്നു ഒരു നാല്പത് നാല്പത്തഞ്ച് വയസ്സു തോന്നിക്കുന്ന ഒരു പുരുഷൻ ആ പോലീസുകാരോട് പറഞ്ഞു.

ഒരു സ്ത്രീ ആ പെൺകുട്ടിയെ സമാധനിപ്പിക്കുകയാണ്. അത് അവരുടെ ടീച്ചർ ആണെന്ന് എനിക്ക് മനസ്സിലായി.

” കൊച്ചേ… നിനക്ക് പരാതി ഉണ്ടോ ?”

ആ C I അവളോട് ചോദിച്ചു.

“ഇല്ല സർ ”

അവൾ കണ്ണുനീർ തുടച്ചുകൊണ്ട് അയാളോട് പറഞ്ഞു .

“എടോ…. ഇവനെ എടുത്ത് ജീപ്പിലിട് . ഈ അവസ്ഥയിൽ ഇവിടെ വിട്ടാൽ ഇവൻ വീടെത്തില്ല അത് പിന്നെ നമ്മുടെ തലയിലാകും .”

” സാറെ എന്റെ ബൈക്ക് ദേ ഇരിക്കു വാ….”

” ആഹാ കുടിച്ചോണ്ട് ബൈക്ക് ഓടിക്കാനുള്ള പരിപാടി ആയിരുന്നു അല്ലേടാ … ഏതെങ്കിലും പാവപ്പെട്ടവന്റെ പെടലിക്ക് കൊണ്ട് കേറ്റാൻ . ആ താക്കോല് അങ്ങോട്ട് കൊട് , എടോ താൻ ആ ബൈക്ക് എടുത്തോണ്ട് വാ ……”

ആ C l കൂട്ടത്തിലുള്ള ഒരു കോൺസ്റ്റബിളിനോട് പറഞ്ഞു ….

മുൻപിൽ വന്ന് നിന്ന ജീപ്പിൽ എന്നെ ആ പോലീസുകാർ പിടിച്ച് കേറ്റി … ജീപ്പിനുള്ളിൽ കയറിയിരുന്ന ഞാൻ അവസാനമായി ആ പെൺകുട്ടിയുടെ മുഖത്തേക്ക് ഒന്ന് നോക്കി ….. അവൾ കരഞ്ഞ് ചുവന്ന കണ്ണുകളോടെ എന്നെ നോക്കുകയാണ്.. പക്ഷെ അതൊരു തുടക്കമായിരുന്നു . എല്ലാത്തിന്റെയും……

‘ അങ്ങനെ ജീവിതത്തിൽ ആദ്യമായി പോലീസ് സ്റ്റേഷനിൽ കേറാനുള്ള ഭാഗ്യവും എനിക്ക് കിട്ടി. അറിഞ്ഞു കൊണ്ടല്ലങ്കിൽ പോലും ഞാൻ ചെയ്തത് തെറ്റാണ്. ആ കൊച്ച് പരാതി കൊടുത്തിരുന്നെങ്കിൽ ഇന്ന് ഇവന്മാർ എന്റെ ദേഹത്ത് കേറി മേയുമായിരുന്നു ..അല്ലെങ്കിലും ശരീരം മുഴുവൻ നല്ല വേദനയാണ് . വിശന്ന് ചാവാറായി കിടന്ന പട്ടിക്ക് എല്ലും കഷ്ണം കിട്ടിയ അവസ്ഥയായിരുന്നു ആ പിള്ളേർക്ക് . പോലീസുകാർ വന്നില്ലായിരുന്നെങ്കിൽ ഞാനിന്ന് തന്നെ ഉടലോടെ സ്വർഗ്ഗത്തിലെത്തുമായിരുന്നു.’

സ്റ്റേഷനിലുള്ളിലെ ബഞ്ചിൽ ഇതൊക്കെ ചിന്തിച്ചു കൊണ്ട് ഞാനിരിക്കുമ്പോൾ കുറച്ചൊക്കെ സ്വബോധം തിരിച്ച് കിട്ടിയിരുന്നു. ആ പ്രശ്നം നടന്നപ്പോൾ തന്നെ എന്റെ തലയിലെ കറക്കമൊക്കെ എവിടെയോ പോയി , കുടിച്ച സാധനമൊക്കെ ഉള്ളിൽ നിന്ന് ആവിയായി പോയാലെ ….

” സാറെ ഇവനെ ഇവിടെ ഇങ്ങനെ എന്തിനാ വെറുതെ ഇരുത്തിയിരിക്കുന്നേ ….”

നേരത്തെ എന്നെ വലിച്ചെണീപ്പിച്ച കോൺസ്റ്റബിൾ C I യോട് ചോദിച്ചു….

“എടാ നിന്നെ വേണമെങ്കിൽ കുടിച്ചോണ്ട് വണ്ടിയോടിച്ചെന്നും പറഞ്ഞ് എടുത്ത് അകത്തിടാം . പക്ഷെ വേണ്ട പോട്ടെ കണ്ടിട്ട് നീ ഒരു പാവമാണെന്ന് എനിക്ക് തോന്നുന്നു . നീ ആരെയെങ്കിലും വിളിച്ച് പറ നിന്നെ വന്ന് കൂട്ടികൊണ്ട് പോകാൻ . ”

C I അത്രയും പറഞ്ഞ് അയാളുടെ റൂമിലേക്ക് കയറി പോയി . ഞാൻ ഫോണെടുത്ത് വിനോദിനെ വിളിച്ചു …

“ഹലോ , ടാ … വിനോദേ …..”

” ഹരീ…… നീ എവിടെയാ….. ഞാൻ നിന്റെ വീടിന്റെ മുൻപിൽ നിൽക്കുവാ നിന്നെ വിളിക്കാൻ ഫോണെടുത്തപ്പോഴേക്കും നീ ഇങ്ങോട്ട് വിളിച്ചു . ഇപ്പൊ എങ്ങാനും വരുമോ ? ”

കോൾ എടുത്ത ഉടൻ വിനോദ് ചോദിച്ചു.

” എടാ ഞാനിപ്പൊ പോലീസ് സ്റ്റേഷനിലാ….”

”എന്താടാ എന്താ കാര്യം. നീ കുടിച്ചോണ്ട് വണ്ടി ഓടിച്ചതിനാണോ പോലീസ് പൊക്കിയത് ? ”

” എടാ അതൊക്കെ പറയാം നീ ഇങ്ങോട്ട് വാ … പിന്നെ നീ നിന്റെ ബൈക്കിൽ വരണ്ട ഏതെങ്കിലും വണ്ടി പിടിച്ച് വാ എന്റെ ബൈക്ക് ഇവിടെ ഇരിക്കുവാ അതെടുക്കണം….”

“എടാ വേറെ പ്രശ്നമൊന്നുമില്ലല്ലോ …..?”

“എടാ ഒന്നുമില്ല ആരെങ്കിലും വന്നാൽ ഇവർ എന്നെവിടും പ്രശ്നമൊന്നുമില്ല…”

” ആ ശരി ഞാൻ ഇപ്പൊ വരാം… ”

അവൻ അതും പറഞ്ഞ് കോൾ കട്ട് ചെയ്തു…. പല പോലീസുകാരും എന്നെ ഒരു നികൃഷ്ട ജീവി കണക്കെ നോക്കുകയാണ്. എന്റെ കോലവും അങ്ങനെ തന്നെ .

അൽപം കഴിഞ്ഞപ്പോഴേക്കും വിനോദ് എത്തി.

” എടാ എന്താ പ്രശ്നം ? ഇതെന്താടാ മുഖം ചുവന്ന കിടക്കുന്നേ . ഷർട്ട് മുഴുവൻ അഴുക്കാണല്ലോ നീ ആരെങ്കിലുമായി തല്ല് ഉണ്ടാക്കിയോ ? ”

അവന്റെ ആ ചോദ്യങ്ങൾക്ക് നടന്ന കാര്യങ്ങൾ ഞാനവനോട് പറഞ്ഞു.

“നിന്റെ ഒരു ഒടുക്കത്ത വെള്ളമടി . ഞാനിത് ഉടനെ നിർത്തിക്കും നോക്കിക്കോ , ഇപ്പൊ പോലീസ് സ്റ്റേഷനിൽ കൂടെ കയറിയപ്പൊ നിനക്ക് സാമാധാനമായല്ലോ ? ”

അവൻ ചെറിയ ദേഷ്യത്തിൽ എന്നോട് പറഞ്ഞ ശേഷം C I യുടെ റൂമിലേക്ക് അനുവാദം ചോദിച്ച ശേഷം കയറി പോയി.

കുറച്ച് കഴിഞ്ഞ് അവൻ പുറത്ത് വന്നു.

” വാ പോവാം . നിനക്ക് ഹോസ്പിറ്റലിൽ പോണോ…. ?”

പുറത്തേക്ക് വന്ന വിനോദ് എന്നോട് ചോദിച്ചു.

“വേണ്ടടാ … ഒന്ന് ഉറങ്ങി എണീക്കുമ്പോഴേക്കും മാറും കുഴപ്പമില്ല. ”

“നിനക്ക് വിശക്കുന്നില്ലേ ? ”

” ഇല്ലാ ഞാൻ നേരത്തെ കഴിച്ചു. ”

“നാളെയും പോയി എവിടെന്നെങ്കിലും തല്ലും വാങ്ങിച്ചോണ്ട് വാ ഒരു കാര്യവുമില്ലാതെ …”

അവനതും പറഞ്ഞ് മുന്നേ നടന്നു . അവന്റെ ദേഷ്യം മാറ്റിയിട്ടില്ല എന്ന് എനിക്ക് മനസ്സിലായി.

അവിടെ നിന്നും എന്റെ ബൈക്കിന്റെ താക്കോൽ അവൻ വാങ്ങിച്ച് പുറത്തിറങ്ങി ബൈക്കെടുത്തു ഞാൻ പുറകിൽ കയറി..

” എടാ നിന്റെ ദേഷ്യം ഇതുവരെ മാറിയില്ല …. ? ”

അവൻ ബൈക്ക് ഓടിക്കുന്നതിനിടെ ഞാനവന്റെ തോളിൽ എന്റെ തലവച്ച് ചേർന്നിരുന്നു കൊണ്ട് ചോദിച്ചു.

” എടാ എനിക്ക് നിന്നോട് ദേഷ്യപ്പെടാൻ പറ്റുമെന്ന് നിനക്ക് തോന്നുന്നുണ്ടോ ? പിന്നെ ഞങ്ങളെത്ര പ്രാവിശ്യം പറഞ്ഞതാ നിന്റോടെ കുടി നിർത്താൻ . ഇവിടെ ഇപ്പോ പെൺപിള്ളേരെ ഒന്ന് അറിയാതെ നോക്കിയാൽ തന്നെ കേസാ …..ആ കൊച്ച് പരാതി കൊടുത്തിരുന്നേൽ മോനേ നീ ഉണ്ട തിന്നുമായിരുന്നു ജയിലിൽ കിടന്ന്…”

അവൻ അത് പറഞ്ഞപ്പോ എനിക്ക് ചിരിയാണ് വന്നത്

“എടാ പൊട്ടാ ജയിലിൽ ഇപ്പൊ ഉണ്ട ഇല്ല . നല്ല അടിപൊളി ഭക്ഷണമാ… ചപ്പാത്തിയും ചിക്കനും പിന്നെ ആഴ്ചയിൽ മട്ടനും ഉണ്ടെന്നാ കേട്ടത് ആഹാ….. ”

ഞാനതും പറഞ്ഞ് വീണ്ടും ചിരിച്ചു.

” ഓ ഇനി അതിനും കൂടി നീ എനിക്കിട്ട് താങ്ങിക്കോ..അത്രയ്ക്ക് കൊതിയാണെങ്കിൽ പോയി കിടക്ക് ജയിലിൽ കുറച്ച് കാലം. അവിടെയാകുമ്പോ നിനക്ക് സുബോധത്തോടെ കിടക്കാം . ”

അവനത് പറഞ്ഞപ്പോഴേക്കും വീടെത്തിയിരുന്നു. അവൻ ബൈക്ക് എന്റെ വീടിന്റെ കാർ പോച്ചിൽ ഒതുക്കി വച്ചശേഷം തിരിഞ്ഞ് പുറത്തേക്ക് നടന്നു.

. “എടാ നീ പോകുവാണോ ?”

ഞാനവനോട് ചോദിച്ചു.

” ആ പോകുവാ എന്തെങ്കിലും ആവശ്യമുണ്ടെങ്കിൽ വിളിച്ചാൽ മതി….”

അവൻ അത്രയും പറഞ്ഞ് പുറത്തിറങ്ങി ഗേറ്റ് ലോക്ക് ചെയ്ത ശേഷം നടന്നു പോയി …

ശരീരം മുഴുവൻ ചെറിയ വേദനയുണ്ട് ബാത്ത്റൂമിൽ കയറി ഫ്രഷായി . കട്ടിലിൽ ഉറക്കം കാത്ത് കടക്കുമ്പോഴും പഴയ ഓർമ്മകളാണ് മനസ്സിൽ നിറഞ്ഞത് അത് കണ്ണുനീർ ആയി പുറത്തുവന്നു. എപ്പോഴോ പതിയെ നിദ്രാ ദേവി എനിക്ക് അനുഗ്രഹമേകി …

………

“എടാ ഹരി എണീറ്റില്ലേ….”

രാവിലെ തന്നെ വിനോദിന്റെ ശബ്ദം എന്നെ ഉറക്കത്തിൽ നിന്ന് ഉണർത്തി.

” ദാ വരുന്നു . ”

മുൻവശത്തെ കതക് തുറന്നപ്പോൾ സിറ്റൗട്ടിലെ കസേരയിൽ ഇരിക്കുകയാണ് വിനോദ്… എന്നത്തെയും പോലെ കാപ്പിയും കൊണ്ടാണ് അവന്റെ വരവ്. ഞാൻ അവന്റെ അടുത്തുള്ള മറ്റൊരു കസേരയിൽ ചെന്നിരുന്നു..

” എന്താടാ .. രാവിലെ തന്നെ . അല്ലെങ്കിൽ ശ്രീ അല്ലെ കാപ്പി കൊണ്ട് വരുന്നേ ….”

“എടാ ഞാനൊരു തീരുമാനം എടുത്തിട്ടുണ്ട് , അച്ഛനാണ് എന്നോട് ഈ ആശയം പറഞ്ഞത്. ”

വിനോദ് അത് പറഞ്ഞപ്പോൾ എന്തോ ഗൗരവമേറിയ കാര്യമാണെന്ന് എനിക്ക് തോന്നി.

“എന്താടാ എന്ത് കാര്യം ”

” വിഷയം നിന്റെ കുടി മാറ്റുക എന്നതു തന്നെ … അതിന്റെ ഭാഗമായി നമ്മൾ രണ്ടു പേരും കുറച്ച് ദിവസം മറ്റൊരിടത്തേക്ക് താമസം മാറ്റുന്നു. ”

വിനോദ് അത് പറഞ്ഞപ്പോൾ എനിക്ക് ചെറിയ ദേഷ്യമാണ് വന്നത്

” നീ എന്താ എന്നെ വല്ല ധ്യാനത്തിനും കൊണ്ടു പോകുവാണോ അല്ലാ ഡി അഡിക്ഷൻ സെന്ററിലേക്കോ ? ഒരിടത്തേക്കും ഞാനില്ല . ഇവിടം വിട്ട് പോകാൻ പറ്റാത്തതു കൊണ്ടാ ആശിച്ച് മോഹിച്ച് കിട്ടിയ നല്ല ഒരു ജോലി പോലും ഞാൻ വേണ്ട എന്നു വച്ചത്. ”

എന്റെ ഉള്ളിലെ ദേഷ്യം വാക്കുകളായി പുറത്തുവന്നു.

” എടാ നിന്നെ ഞാൻ ഡി അഡിക്ഷൻ സെന്ററിൽ കൊണ്ട് തള്ളുമെന്ന് നിനക്ക് തേന്നുന്നുണ്ടോ ? എനിക്ക് അറിയാം നിന്റെ ഉള്ളിന്റെ ഉള്ളിൽ പഴയ ഹരിയിലേക്ക് മടങ്ങണമെന്ന ആഗ്രഹമുണ്ട്. ഇവിടുത്തെ കാര്യമൊക്കെ അമ്മയും അച്ഛനും നോക്കിക്കൊള്ളും . ഇത്രയും കാലമായിട്ട് ഞാൻ നിന്നോട് ഒന്നും ആവശ്യപ്പെട്ടിട്ടില്ല , ഇനി നിന്നെ തോന്നിയ വഴിക്ക് ഞാൻ വിടുകയുമില്ല . നാളെ രാവിലെ നമ്മൾ ഇവിടുന്ന് പുറപ്പെടും . ആവശ്യമുള്ള തുണിയും സാധനവുമൊക്കെ പാക്ക് ചെയ്തോ ഈ തീരുമാനത്തിൽ മാറ്റമില്ല. അല്ലെങ്കിൽ പിന്നെ ഇങ്ങനെ ഒരു കൂട്ടുകാരനുള്ള കാര്യം നീ മറന്നേക്ക് ”

വിനോദിന്റെ ദൃഢമായ വാക്കുകൾ എന്റെ ചെവിയിൽ മുഴങ്ങി . ഒരു തീരുമാനം എടുത്താൽ അതിൽ നിന്നു മാറുന്നവനല്ല അവൻ അതിനു വേണ്ടി ഏതറ്റം വരെയും അവൻ പോകും .

” എടാ നീ എന്താ പറഞ്ഞേ ….. ”

” നീ ഒരു പ്രാവിശ്യം ഞാൻ പറഞ്ഞത് കേട്ടില്ലേ അത് തന്നെ….. നീ ഇന്നലെ പോലീസ് സ്റ്റേഷനിൽ കയറേണ്ടി വന്നു എന്ന് അറിഞ്ഞപ്പോൾ എന്റെ അച്ഛൻ പറഞ്ഞത് എന്താ എന്ന് നിനക്ക് അറിയോ ….

അച്ഛൻ ആദ്യമേ പറഞ്ഞ് വിലക്കിയിരുന്നുവെങ്കിൽ നീ ഇങ്ങനെ ആകുമായിരുന്നില്ല എന്ന് . തെറ്റ് മുഴുവൻ അച്ഛന്റെ ഭാഗത്താണെന്ന്. ആത്മാർത്ഥ സുഹൃത്തിന്റെ മകനെ ഈ അവസ്ഥയിൽ നിന്ന് കരകയറ്റാൻ പറ്റുന്നില്ലല്ലോ എന്ന് പറഞ്ഞ് ഇന്നലെ എന്റെ അച്ഛന്റെ കണ്ണു നിറഞ്ഞത് ഞാൻ കണ്ടു ആദ്യമായിട്ട് . ഇനി പറ എന്താ നിന്റെ തീരുമാനം.”

” ഞാൻ വരാം . ”

മറ്റു വഴികളില്ലാതെ എനിക്ക് സമ്മതിക്കേണ്ടിവന്നു കാരണം അവനും കൂടെ പിണങ്ങിയാൽ പിന്നെ എനിക്ക് ഈ ലോകത്ത് ആരുമില്ല…..

” അങ്ങനെ വഴിക്ക് വാടാ, നാളെ രാവിലെ പോണം പറഞ്ഞത് മറക്കണ്ട ആവശ്യമുള്ള സാധനങ്ങൾ എടുത്തോണം… ”

“എടാ എങ്ങോട്ടാ പോകുന്നത് എന്നെങ്കിലും പറ . ”

” ആ പറയാം സമാധാനപ്പെട് ”

അവൻ അതും പറഞ്ഞ് വീടിനുള്ളിലേക്ക് വന്നു.

” എടാ നമ്മൾ നാളെ എന്റെ അമ്മയുടെ നാട്ടിലേക്കാ പോകുന്നേ …ഞാനും അങ്ങോട്ടൊക്കെ പോയിട്ട് കുറച്ച് വർഷമായി …. അമ്മയുടെ പേരിൽ അവിടെ ഒരു വീടുണ്ട് , തൊട്ടുത്ത് ചെറിയമ്മയുടെ വീട് അവരാ വീട് സൂക്ഷിക്കുന്നത് . ചെറിയച്ചൻ ഗൾഫിലാ …. തനി ഗ്രാമപ്രദേശം കണാൻ ഇഷ്ടം പോലെ സ്ഥലങ്ങളും പിന്നെ നല്ല ക്ലൈമറ്റും. നിനക്ക് ആ സ്ഥലം ഓക്കെയാകും , നിനക്ക് പഴയ അവസ്ഥയിലേക്ക് തിരിച്ച് വരാൻ ഈ യാത്ര ഉപകരിക്കുമെന്ന് എന്റെ മനസ്സ് പറയുന്നു. പിന്നെ ഇവിടുന്ന് എട്ട് , ഒമ്പത് മണിക്കൂർ യാത്രയുണ്ട് അതുകൊണ്ട് നാളെ നീ നേരത്തെ എണീക്കണം റെഡിയാകണം . ”

” എടാ വിനോദേ … നീ പറയുന്നതൊക്കെ ശരി , പക്ഷെ ചില സമയം മദ്യം കുടിക്കാതിരുന്നാൽ എനിക്ക് കയ്യൊക്കെ വിറയ്ക്കും തലവേദന എടുക്കും അതിന് നീ എന്തു ചെയ്യും.”

” എടാ ഹരി…. ഈ മദ്യപാനശീലം ഒറ്റ ദിവസം കൊണ്ട് എടുത്ത് മാറ്റാൻ പറ്റില്ല അതിന്റെ ഡോസ് പതിയെ കുറച്ച് കൊണ്ടുവന്ന് പിന്നീട് നിർത്തണം. അത് എനിക്ക് വിട് ഞാൻ നോകികൊള്ളാം . പിന്നെ ഇന്ന് നീ കഴിക്കുന്നുണ്ടേൽ ഓവറാവരുത് ആവശ്യത്തിന് മാത്രം , നിന്റെ അവസ്ഥ എനിക്ക് മനസ്സിലാകും. നാളെത്തൊട്ട് നിന്റെ ഫുൾ കൺട്രോൾ എന്റെ കയ്യിലായിരിക്കും. എന്നാൽ ശരിയെടാ ഞാൻ ഇറങ്ങുവാ , നീ പോവാൻ സമ്മതിച്ചെന്ന് അച്ഛനോട് പറയട്ടെ പിന്നെ ചെറിയമ്മയുടെ വീട്ടിലും വിളിച്ച് പറയണം നിൽക്കാൻ ചെല്ലുന്നെന്ന് അപ്പൊ ശരി”

വിനോദ് അത്രയും പറഞ്ഞ് പോയി . ആ ദിവസവും അങ്ങനെ കടന്നു പോയി. ഈ യാത്ര എന്റെ ജീവിതത്തിൽ ഒരു മാറ്റം വരുത്തണേ എന്ന് ഉള്ള് കൊണ്ട് ഞാൻ ആഗ്രഹിച്ചു.

………

പിറ്റേന്ന് രാവിലെ അവൻ പറഞ്ഞത് പോലെ ഞാൻ നേരത്തെ എണീറ്റ് കുളിയൊക്കെ കഴിഞ്ഞ് റെഡിയായി. റെഡിയാക്കിയ ബാഗും എടുത്ത് ഞാൻ പുറത്തിറങ്ങി. ബാഗ് ഒരിടത്തു വച്ച് ഞാൻ ആ അസ്ഥിതറകൾ ലക്ഷ്യമാക്കി നടന്നു.

” ഇവിടം വിട്ട് പോകാൻ ആഗ്രഹമുണ്ടായിട്ടല്ല. പക്ഷെ പോണം അവസ്ഥ അങ്ങനെയാണ്.. ഞാൻ വരും പഴയ ഹരിയായി . നിങ്ങൾ എന്റെ ഒപ്പം ഉണ്ടാവും എന്ന് എനിക്കറിയാം . ”

ഞാൻ ആ അസ്ഥിതറ നോക്കി പറഞ്ഞ ശേഷം ഒരു നിമിഷം കണ്ണുകളടച്ചു നിന്നു .

കുറച്ച് കഴിഞ്ഞപ്പോൾ വിനോദ് അവന്റെ ബുള്ളറ്റുമായി എന്റെ വീടിന്റെ മുൻപിൽ വന്നു.

” ആഹാ ഇപ്പൊ നിന്റെ മുഖത്ത് പഴയ ലുക്ക് വന്നിട്ടുണ്ട് . ”

എന്നെ കണ്ടപാടെ വിനോദ് പറഞ്ഞു . ഞാൻ പാക്ക് ചെയ്ത് വച്ച ടൂറിസ്റ്റ് ബാഗുമെടുത്ത് ചുമലിലിട്ട് ബൈക്കിന്റെ പുറകിൽ കയറി. നേരെ അവന്റെ വീട്ടിലേക്ക് ചെന്നു. അവിടുന്ന് ഭക്ഷണമൊക്കെ കഴിച്ച് യാത്രയും പറഞ്ഞ് ഞങ്ങൾ പുറത്തിറങ്ങി.

” ഹരീ…. തിരിച്ച് വരുമ്പോ നിന്റെ പഴയ സ്വഭാവവുമായി വേണം വരാൻ . ”

ഇറങ്ങാൻ നേരം ദിനേശൻ മാമൻ പറഞ്ഞു.

“ശ്രമിക്കാം ….. ഉറപ്പ് പറയാൻ എനിക്കാകില്ല. ”

ഞാൻ ദിനേശൻ മാമനോട് പറഞ്ഞു.

” നീ ഒരു കാര്യം ശ്രമിക്കാം എന്നു പറഞ്ഞാൽ അതു നടത്തും എന്ന് എനിക്കറിയാം പോയി..വാ..”

ദിനേശൻ മാമൻ എന്റെ കൈകൾ പിടിച്ചു കൊണ്ട് പറഞ്ഞു .

“പോട്ടേ … ശ്രീ , ശരി പോയി വരാം ….

” എടാ എങ്ങനെയാ പോകുന്നേ. ബസിലാണോ…”

ഞാൻ വിനോദിനോട് ചോദിച്ചു.

” എടാ നമുക്ക് ഈ ബുള്ളറ്റിൽ പോകാം ”

” ഇത്രയും ദൂരമോ ”

” അതിനെന്താ … നമുക്ക് മാറിമാറി ഓടിക്കാം. ബൈക്ക് കൊണ്ടു പോയില്ലെങ്കിൽ ശരിയാകില്ലെടാ നമുക്ക് അവിടെയും ബൈക്ക് വേണമല്ലോ. ”

” ആ അതു ശരിയാ……”

അവൻ പറഞ്ഞോഴാണ് ഞാനും അത് ഓർത്തത്

അവൻ ബൈക്കെടുത്തതും ഞാൻ പുറകിൽ കയറി …..

“എന്നാൽ വിട്ടോ….”

ഞങ്ങൾ അങ്ങനെ യാത്ര തിരിച്ചു. പല ജില്ലകളിലൂടെയും പല നാടുകളിലൂടെയും ഞങ്ങൾ യാത്ര ചെയ്തു. ഞങ്ങൾ മാറി മാറിയാണ് ബൈക്ക് ഓടിച്ചത്. ഉച്ചയ്ക്ക് നല്ല നാടൻ ഊണ് ഒരു ഹോട്ടലിൽ കയറി കഴിച്ചു.

“എടാ എനിക്ക് തലവേദനക്കുന്നു എന്തോ പോലെ കയ്യൊക്കെ വിറയ്ക്കുന്നു. ”

എന്റെ ശരീരത്തിൽ അസ്വസ്ഥത തോന്നിയപ്പോൾ ഞാൻ ബുള്ളറ്റ് റോഡരുകിൽ നിർത്തി.

“എടാ നീ രാവിലെ കുടിച്ചില്ല അല്ലേ ”

” ഇല്ല നിനക്കെങ്ങനെ മനസ്സിലായി ”

“എടാ നിന്റെ ബോഡി റിയാക്ട് ചെയ്തത് കണ്ടില്ലേ …നീ ഇനി ബൈക്ക് ഓടിക്കണ്ട .”

അവർ അതും പറഞ്ഞ് ബൈക്കെടുത്തു. ഞാൻ പുറകിൽ കയറി.

” എടാ നിന്റെ വിസയുടെ കാര്യം എന്തായി ”

ഞാൻ വിനോദിനോട് ചോദിച്ചു.

” എടാ ഇനി അത് പറഞ്ഞിട്ടൊന്നും കാര്യമില്ല എന്റെ അവിടുത്തെ പണി പോയി .”

“നീ എന്താ പറയുന്നേ എങ്ങനെ പോയന്നാ ”

” ഓ … അത് പിന്നെ പറയാം. ”

അവൻ അതും പറഞ്ഞ് ഡ്രൈവിങ്ങിൽ ശ്രദ്ധ കൊടുത്തു.

ബൈക്ക് സിറ്റിയിൽ നിന്നു ഒരു ഗ്രാമത്തിലേക്ക് പ്രവേശിച്ചു . ഒരു ചെറിയ റോഡും ഇരുവശത്തും തെങ്ങുകൾ തിങ്ങി നിൽക്കുന്നു . കുറച്ചു കൂടി മുന്നോട്ട് പോയപ്പോൾ ഇരു വശത്തും നെൽപ്പാടങ്ങൾ പ്രത്യക്ഷപ്പെട്ടു . അരികിലൂടെ ഒഴുകുന്ന ചെറിയ തോടിലൂടെ നീന്തി തുടിക്കുന്ന ചെറു മത്സ്യങ്ങളും അവയെ പിടിക്കാൻ വെള്ളത്തിലൂടെ മുങ്ങാം കുഴിയിടുന്ന താറാവിൻ കൂട്ടങ്ങളും . ശബ്ദമുണ്ടാക്കി പറന്ന് പോകുന്ന പലതരം പക്ഷികളും ഇരയെ സൂക്ഷ്മമായി വീക്ഷിച്ച് വേഗത്തിൽ കൊത്തിയെടുത്ത് പറക്കുന്ന പൊൻമാനും ഒറ്റക്കാലിൽ നിൽക്കുന്ന കൊക്കുകളും അങ്ങനെ കാഴ്ചകൾ പലതുണ്ട് കാണാൻ , കണ്ണിന് കൗതുകമേകാൻ. ഇതൊക്കെ കണ്ടപ്പോഴാണ് കേരളത്തിന്റെ ഗ്രാമഭംഗി പൂർണ്ണമായും നശിച്ചിട്ടില്ല എന്ന് എനിക്ക് മനസ്സിലായത് .

ബൈക്ക് നേരെ മറ്റൊരു ചെറു മൺ റോഡിൽ പ്രവേശിച്ചു. കാണാൻ ഭംഗിയേകുന്ന കാഴ്ചകൾ ഏറെ നൽകുന്ന സ്ഥലം.

വിനോദ് ബുള്ളറ്റ് ബ്രേക്കിട്ട് നിർത്തിയപ്പോഴാണ് കണ്ടു കൊണ്ടിരുന്ന കാഴ്ചകളിൽ നിന്ന് ഞാൻ സ്വബോധത്തിലേക്ക് എത്തിയത്.

“എത്തി ഇറങ്ങ് .നിന്റെ തലവേദന മാറിയോ”

അവൻ അതു പറഞ്ഞപ്പോൾ ഞാൻ ബൈക്കിൽ നിന്ന് താഴേക്ക് പുറത്തിറങ്ങി. ഭംഗിയേകുന്ന കാഴ്ചകൾ എന്റെ ശാരീരിക അസ്വസ്തതയെ മാറ്റിയിരിക്കുന്നു. ഞാൻ ആ കാര്യം പോലും മറന്നിരിക്കുന്നു.

“ഇപ്പൊ കുഴപ്പമില്ല ….”

ഞാൻ വിനോദിനോട് പറഞ്ഞ ശേഷം ചറ്റുപാടും നിരീക്ഷിച്ചു.

അടുത്തടുത്തായി നില കൊള്ളുന്ന അത്യാവശ്യം വലിപ്പമുള്ള രണ്ട് ഓടിട്ട പഴയ വീടുകൾ അതാണ് എന്റെ കാഴ്ചയിൽ പെട്ടത്.

“എങ്ങനെയുണ്ട് സ്ഥലം ”

” ഒരു രക്ഷയും ഇല്ല അടിപൊളി ”

എന്റെ മനസ്സിലെ സന്തോഷം വാക്കുകളിലൂടെ പുറത്തുവന്നു. സത്യത്തിൽ മാസങ്ങൾക്ക് ശേഷം ഇന്നാണ് ഞാൻ മനസ്സ് തുറന്ന് പ്രകൃതി സൗന്ദര്യം ആസ്വദിക്കുന്നത് , മനസ്സിൽ ഇത്രയ്ക്ക് സന്തോഷം തോന്നുന്നത്.

” ഹരീ വാ….”

അവൻ എന്നെ വിളിച്ച ശേഷം മുന്നേ നടന്നു . വീടിന്റെ മുൻപിൽ സ്ഥാപിച്ചിരിക്കുന്ന കോളിങ് ബെല്ലിൽ വിരൽ അമർത്തി.

ഒരു സ്ത്രീ വന്ന് കതക് തുറന്നു . കാണാൻ ഏകദേശം വിനോദിന്റെ അമ്മയെപോലെയുണ്ട്. അത് അവന്റെ ചെറിയമ്മയാണെന്ന് എനിക്ക് മനസ്സിലായി. തൊട്ടുപിന്നിൽ ഒരു ഹാഫ്സാരി ഉടുത്ത ഒരു സുന്ദരി വന്ന് നിൽക്കുന്നത് ഞാൻ കണ്ടു . അവൾ വിനോദിനെ നോക്കിയ ശേഷം അവന്റെ പുറകിൽ നിന്ന എന്നെ സൂക്ഷ്മമായി നോക്കുകയാണ്.

ഞാൻ എവിടെയോ കണ്ട മുഖം , നല്ല പരിചയം. ഞാൻ എന്റെ ഓർമ്മയിൽ ഒന്നു ചികഞ്ഞ് നോക്കി . അതെ അന്ന് കരഞ്ഞ് കലങ്ങിയ കണ്ണുകളുമായി എന്നെ നോക്കിയ ആ പെൺകുട്ടി . അന്ന് ഞാൻ കാരണം ബീച്ചിൽ വച്ച് നാണക്കേട് അനുഭവിക്കേണ്ടി വന്നവൾ . ഒരു ഇടി മിന്നൽ തലയിൽ വീണപോലെ തോന്നി എനിക്ക് , ഞാനവളെ തന്നെ നോക്കി നിന്നു പോയി……

തുടരും ….🤔🤔🤔🤔🤔…………….