എന്റെ ഡോക്ടറൂട്ടി 03

ഞാൻ പതിയെ മിന്നൂസിനെയും നെഞ്ചിലേയ്ക്കമർത്തിക്കൊണ്ട് ബാൽക്കണിയിലെ ചൂരൽ കസേരയിലേയ്ക്കിരിപ്പുറപ്പിച്ചു… അവളെന്റെ മടിയിൽ, രണ്ടു കാലുകളും ഒരു വശത്തിട്ട്  ചെരിഞ്ഞെന്റെ നെഞ്ചിലേയ്ക്കു മുഖം പൂഴ്ത്തിയിരിയ്ക്കുമ്പോൾ..   എന്റെ മനസ്സുമുഴുവൻ ഭൂതകാല സ്മൃതികളെ ചേർത്തു നിർത്താനായി വെമ്പൽ കൊണ്ടിരുന്നു…. മറുവാക്ക് മിണ്ടാതെ അതിനെയനുസരിയ്ക്കാനേ എന്റെ തലച്ചോറിനുമപ്പോൾ കഴിയുമായിരുന്നുള്ളൂ………!!

പതിയെ ഊളിയിട്ടലഞ്ഞ ചിന്തകൾക്കിടയിൽ മിന്നൂസ് പറഞ്ഞയാ ദിവസത്തെ ഞാൻ കോർത്തു പിടിച്ചു…. അന്നത്തെയാ ദിവസത്തെ മനസ്സിലേയ്ക്കാവാഹിയ്ക്കുമ്പോൾ ഇപ്പോഴും നെഞ്ചിലൊരു പിടപ്പുണ്ട്….. അതു പേടി കൊണ്ടാണോ അതോ മറ്റെന്തെങ്കിലും കാരണം കൊണ്ടാണോ അറിയില്ല….. അതെന്തിനായിരുന്നെന്ന്  പറഞ്ഞറിയിയ്ക്കാൻ ഇപ്പോഴും  സാധിയ്ക്കുന്നില്ല……..!!

പറഞ്ഞാൽ, ഒൻപതാം ക്ലാസ്സിൽ പഠിയ്ക്കുമ്പോഴുള്ള സ്കൂളിലെ ഓണാഘോഷ ദിനം……..!!

രാവിലെ തന്നെ എന്നെക്കൂട്ടാനായി വീട്ടിലേയ്ക്ക് കെട്ടിയെടുത്ത എന്റെ ഉറ്റചങ്ങാതിയും ചെറിയമ്മയുടെ മൂത്ത മോനുമായ ശ്രീനാഥ് എന്ന ശ്രീക്കുട്ടനൊപ്പം,  വെളുപ്പിനേയിറങ്ങി ശേഖരിച്ചു വെച്ചിരുന്ന പൂക്കളും കൂടയിലാക്കിയിറങ്ങുമ്പോൾ മനസ്സ് പൂർണ്ണമായും ഒരു ലക്ഷ്യത്തിൽ അധിഷ്ടിതമായിരുന്നു… ക്ലാസ്സിൽ  അത്തപ്പൂക്കളമിടുന്നവരുടെ കൂട്ടത്തിൽ ശ്രീക്കുട്ടനുമുള്ളതിനാൽ അവനന്ന് മുണ്ടും ഷേർട്ടുമൊക്കെയിട്ടാണ് വന്നത്…. സ്കൂളിലേയ്ക്ക് നടക്കുന്നതിനിടയിൽ അവൻ  പലയാവർത്തി ലാലേട്ടൻ സ്റ്റൈലിൽ മുണ്ടു മടക്കിക്കുത്തുന്നതും അസൂയയോട് നോക്കിക്കൊണ്ട് പാന്റ്സിന്റെ പോക്കറ്റിലിട്ടിരുന്ന ലവ് ലെറ്റർ ഉണ്ടോയെന്നു ഞാൻ ഇടയ്ക്കിടെ തപ്പി നോക്കി ഉറപ്പു വരുത്തിക്കൊണ്ടേയിരുന്നു……..!!

“””എന്ത്രാ ഇവടെ നിക്കുന്നേ…?? പെട്ടെന്നു വാ…!!”””

സ്കൂളിന്റെ ഗേറ്റിനു മുന്നിലെത്തിയപ്പോൾ എന്റെ നടത്തത്തിന്റെ വേഗം കുറഞ്ഞതു കണ്ടവൻ ധൃതിപ്പെട്ടു……..!!

“””നീ പൊക്കോ…!! ഞാൻ രാഹൂലൂടി വന്നിട്ടു വരാം…!!”””

അവനെ ഒഴിവാക്കാനുള്ള ഉദ്ദേശമായിരുന്നു അപ്പോളെനിക്ക്…….!!

“””അതെന്ത്രാ യിപ്പ രാഹുലിനോടൊരു കൂട്ട്…??”””

“””കൂട്ടൊന്നൂല്ല….!! നീ പൂക്കളമിടാമ്പോയാപ്പിന്നെ ആരാനിക്ക് മിണ്ടാനൊളേള…??  അതാ ഞാൻ…!!”””

ഞാൻ പറഞ്ഞതിൽ കാര്യമുണ്ടെന്ന് തോന്നിയതിനാലാവണം പിന്നെയൊന്നും മിണ്ടാതെ എന്റെ കൈയിലിരുന്ന പൂക്കൂടയും വാങ്ങിയവൻ ക്ലാസ്സിലേയ്ക്ക് നടന്നു……..!!

ഏതാണ്ട് ഒരരമണിക്കൂറോളം ഗേറ്റിനു മുന്നിൽ നിന്നപ്പോഴാണ്  എതിരെ നിന്നും റോഡ് ക്രോസ്സ് ചെയ്തുകൊണ്ട് അവളു വരുന്നത് കാണുന്നത്… അന്നത്തെ മീനുവേച്ചി….

ഇപ്പോഴെന്റെ നെഞ്ചിൽ മുഖം പൂഴ്ത്തിക്കിടക്കുന്ന എന്റെ മിന്നൂസ്……..!!

ത്രീഫോർത്ത് കൈയോടു കൂടിയ ചുവന്ന ചുരിദാർ ടോപ്പും ചന്ദന നിറത്തിലുള്ള ബോട്ടവുമായിരുന്നു അപ്പോഴവളുടെ വേഷം… ബോട്ടത്തിനു മാച്ചായിട്ടുള്ള ചന്ദനനിറത്തിലെ ഷോള് ആർച്ചു മോഡലിൽ ഞൊറിവെടുത്ത് രണ്ടു ഷോൾഡറിലുമായി പിൻചെയ്ത്,  ഇടതു തോളിലായി ബാഗുമിട്ട് അതേ കൈയിൽ തന്നെ വെയിലു തട്ടാതെയൊരു വയലറ്റ് കുടയും പിടിച്ച് വലതു കൈയിലൊരു പ്ലാസ്റ്റിക് കവറുമായി ആടിയാടി വരുന്നതും നോക്കി ഞാൻ പിന്നിലെ മതിലിലേയ്ക്ക് ചാരി……!!

അപ്പോഴും നനവൊഴിയാത്ത മുടിയിഴകളെ രണ്ടു തോളിലൂടെയുമായി മുന്നിലേയ്ക്ക്  പിന്നിയിട്ട് എന്റടുത്തെത്തിയ മീനാക്ഷിയെ ഞാനൊന്നുറ്റു നോക്കി… സാധാരണയിൽ നിന്നും വ്യത്യാസമായി അന്ന് കറുത്ത കുഞ്ഞു പൊട്ടിന് മീതെയായി ഒരു ചന്ദനക്കുറി തൊട്ടിട്ടുണ്ടെന്നതൊഴിച്ചാൽ മറ്റെല്ലാം പഴയപടി തന്നെ…….!!

അവളടുത്തു വന്നതോടെ അത്രയും സമയമുള്ളിലുണ്ടായിരുന്ന ധൈര്യം മുഴുവൻ വിയർപ്പിനോടൊപ്പം ചോർന്നു പോകുന്നതു പോലൊരു തോന്നൽ…….!!

“””എന്താ സിദ്ധൂ…??  എന്തിനാവിടെ നിക്കണേ…??”””

“””മ്ച്ചും….!!”””

മുട്ടുകാല് കൂട്ടിയിടിച്ചു ബോധം വീണപ്പോൾ ഞാൻ ഒന്നുമില്ലയെന്ന അർത്ഥത്തിൽ ചുമൽ കൂച്ചി…….!!

“””മ്മ്മ്…!! അല്ലെവിടെയിന്റേച്ചി…?? ഞാങ്കുറേ നേരങ്കാത്തു നിന്നു…!! കാണാത്തോണ്ടിറങ്ങീതാ…!!”””

“””ആ… ??  അറീല…!!”””

“””കൊള്ളാം… നല്ല ചേച്ചീമനിയനും…!!”””

അവളൊന്നു ചിരിച്ചുകൊണ്ട് ഗേറ്റ് കടന്നു പോയതും ഞാൻ പിന്നാലെ നടന്നു……..!!

“””മീനുവേച്ചീ… നിക്കൊരു കാര്യമ്പറേണം…!!”””

പിന്നിൽ നിന്നും അമർത്തിയ സ്വരത്തോടെ പറഞ്ഞതും അവൾ തിരിഞ്ഞു……..!!

“””എന്താടാ…??”””

അവള് മുഖത്തു നോക്കി ചോദിച്ചതും ഞാൻ മൂത്രം പോയ അവസ്ഥയിലെത്തി……..!!

“””അത്… അതു ചേച്ചീ…!!”””

“””മ്മ്മ്….!! പറഞ്ഞോടാ…!!”””

ഉള്ളിലുള്ളതൊന്നും പുറത്തേയ്‌ക്കു ചാടാതെ മടിച്ചു നിന്നപ്പോൾ അവളെന്നെ പുഞ്ചിരിച്ചു കൊണ്ട്  പ്രോത്സാഹിപ്പിച്ചു……..!!

“””മ്മ്മ്…!!”””

അവളുടെ പ്രോത്സാഹനത്തിലൂടെ കിട്ടിയ ധൈര്യത്തിൽ ഞാൻ പോക്കറ്റിൽ നിന്നും തലേദിവസമുറങ്ങാതെ- യിരുന്നെഴുതിയ പ്രണയലേഖനം തലകുമ്പിട്ടു പിടിച്ചുകൊണ്ടവൾക്കു നേരേ നീട്ടി……..!!

അവള് കയ്യിൽ നിന്നും കത്തു വാങ്ങിയതും പറഞ്ഞറിയിയ്ക്കാൻ കഴിയാത്തൊരനുഭൂതിയായിരുന്നു എനിക്ക്….. കത്തു തുറന്നു നോക്കുന്നതും അതിലെയക്ഷരങ്ങളിലൂടെ കണ്ണോടിയ്ക്കുന്നതുമെല്ലാം ഞാൻ പാളി നോക്കിക്കൊണ്ടുനിന്നു…….!!

മുഴുവൻ വായിയ്ക്കുന്നതിനു മുന്നേ തന്നെ അവളതിൽ നിന്നും കണ്ണുകളടർത്തി…. പിന്നെ രൂക്ഷമായൊരു നോട്ടത്തോടെയായിരുന്നു മറുപടി……

“””മൊട്ടേന്നു വിരിഞ്ഞില്ല… അതിന് മുന്നേ തൊടങ്ങിയോ ചെക്കന് പ്രേമം…?? അതും ചേച്ചീടെ പ്രായമുള്ള പെണ്ണിനോട്…. ങാ..ഹാ… നിന്റെ ചേച്ചീനെ ഞാനൊന്നു കാണട്ടേ….!!”””

“””മീനുവേച്ചീ….!!”””

പ്രതീക്ഷിച്ച മറുപടിയ്ക്കു പകരം മാറ്റൊരു പണിയായിട്ട് അതു  തിരിച്ചു വന്നപ്പോൾ മറ്റൊന്നുമാലോചിക്കാതെ ഞാൻ പിന്നാലെയോടി………!!

“””മീനുവേച്ചീ… പ്ലീസ്… ചേച്ചീനോട് പറയല്ലേ……!!”””

“””ഞാനേ… ഞാനിതിപ്പന്തന്നെ നിന്റെ ചേച്ചീടെ കയ്യിക്കൊണ്ടോയി കൊടുക്കും…!! നോക്കിയ്‌ക്കോ…!!”””

കത്തെന്റെ മുഖത്തിനു നേരേ രണ്ടു പ്രാവശ്യമുയർത്തി കാട്ടിയ ശേഷം അവളെന്നെ കണ്ണുരുട്ടി ഭീഷണിപ്പെടുത്തി….. ഞാനാണെങ്കിൽ നിന്ന നിൽപ്പിൽ കരയോന്നുള്ള അവസ്ഥയിലുമായി……..!!

“””മീനുവേച്ചീ…. പ്ലീ..സ് മീനുവേച്ചീ… ചേച്ചീന്റടുക്കെ പറയല്ലും….!! പറഞ്ഞാ ചേച്ചി വീട്ടിപ്പോയിപ്പറയും….!! പിന്നെന്നെ കളിയ്ക്കാമ്മിടൂല…..!!”””

സ്കൂൾ കോംപൗണ്ടിനുള്ളിലെ മതിലിനോട് ചേർന്ന് നിലത്തു പാകിയ സിമന്റിന്റെ നടപ്പാതയിലൂടെ നടന്നു നീങ്ങിയ മീനാക്ഷിയുടെ പിന്നാലെ ഞാനോടിക്കൊണ്ട് കെഞ്ചി…….!!

“””എന്നാലിനി മുതല് നീ കളിയ്ക്കാമ്പോണ്ട…..!!”””

ഒരു ദാക്ഷിണ്യവുമില്ലാതെ പറഞ്ഞു കൊണ്ടവൾ നടന്നു നീങ്ങിയപ്പോൾ അതുകണ്ടു നിസ്സഹായനായി നോക്കി നിൽക്കാനേ എനിക്കപ്പോൾ കഴിഞ്ഞുള്ളൂ…….!!

ചേച്ചിയറിയുവാണെങ്കിൽ പണി പാലും വെള്ളത്തിൽ കിട്ടുമെന്നുറപ്പുള്ളതു കൊണ്ടാണോ അവൾക്കെന്നെ ഇഷ്ടമല്ലെന്ന് തോന്നീതു കൊണ്ടാണോയെന്നറിയില്ല ഞാൻ മൊത്തത്തിൽ സെഡായി……..!!

വയസ് പതിമൂന്നായെങ്കിലും ആ പ്രായത്തിൽ വേണ്ടത്ര പൊക്കമന്നെനിക്കുണ്ടായിരുന്നില്ല… പോരാത്തേന് ആവശ്യത്തിലധികം തടിയും…. ഞാനും ശ്രീക്കുട്ടനും കൂടി നടന്നു പോകുമ്പോൾ “പത്ത്” നടന്നു പോകുന്ന പോലിരിയ്ക്കും…. അന്നും ക്രിക്കറ്റിനോട് നല്ല താല്പര്യമായിരുന്നെങ്കിലും ശരീരഘടനയിതായതു കൊണ്ടാരുമെന്നെ ടീമിലെടുക്കുകയുമില്ലായിരുന്നു…. മൊത്തത്തിൽ എങ്ങോട്ടു തിരിഞ്ഞാലും വെറുമൊരു കോമഡി പീസാവാനായിരുന്നു യോഗം…..!!

ക്ലാസ്സിൽ ശ്രീക്കുട്ടനുൾപ്പെടെ ഒരുവിധമെല്ലാപേർക്കും അഫെയറുള്ളപ്പോൾ അവർക്കൊപ്പം പിടിയ്ക്കാൻ ഞാനും പല പെൺപിള്ളാരുടെയും പിന്നാലെയിഷ്ടവും പറഞ്ഞു ചെന്നു….. ക്ലാസ്സിലെ കോമഡി പീസിനെയൊക്കെയാരാ പ്രേമിയ്ക്കുവ…??  പ്രേമിയ്‌ക്കുന്ന പോയിട്ടൊന്നു മിണ്ടാൻ കൂടിയാരും അടുത്തേയ്ക്ക് വരാറില്ലാത്ത ഞാൻ അവസാനം കണ്ടുപിടിച്ച പോംവഴിയാണ് മീനാക്ഷി….!! മറ്റാരുമല്ല, എന്റെ ചേച്ചീടെ ആത്മാർഥ സുഹൃത്ത്… സർവോപരി എന്നെക്കണ്ടാൽ ഒരിക്കലും കളിയാക്കിച്ചിരിക്കാത്ത, എന്നോട് ഏറ്റവുമധികം ഇഷ്ടമുണ്ടെന്നു ഞാൻ തന്നെ ഗവേഷണത്തിൽ കണ്ടെത്തിയ എന്റെ മീനുവേച്ചി…….!!

സംഗതിയുടെ കിടപ്പിപ്പോൾ ഏകദേശം മനസ്സിലായി കാണോലോ…  അടിവയറ്റീന്നു വന്ന പ്രേരണയോ ഇടനെഞ്ചിലെ പിടപ്പോ കണ്ണിലെ തിരയിളക്കോ… ഒരു മണ്ണാങ്കട്ടേമല്ല… ക്ലാസ്സിലെല്ലാർക്കും കൊഞ്ചിക്കുഴയാനാളുണ്ട്…  അപ്പോളെനിക്കും വേണം അതായിരുന്നു മനസ്സിലിരിപ്പ്….!! അന്നു മീനാക്ഷി മാത്രമേ കണ്ടാമിണ്ടൂ…  അതുകൊണ്ടാണ് അവളെ ചൂസെയ്തതും….  കിട്ടിയാലൂട്ടി അല്ലെങ്കിൽ ചട്ടി അതായിരുന്നു അന്നു നമ്മടെ ലൈൻ….!! പക്ഷേ…  അതിങ്ങനെയൊരു ഏണിയാവോന്ന് ഞാനും കരുതീല…. പാവം ഞാൻ….!!

അങ്ങനെ പേടിച്ച് കിടുമ്പനടിച്ച് വിയർത്തൊഴുകി നാശമായി ക്ലാസ്സിൽ ചെല്ലുമ്പോൾ അവിടെയതിലും വലിയ അടി…. ഞാൻ കാര്യമെന്താണെന്ന് കൂടി ചോദിയ്ക്കാൻ നിൽക്കാതെ അവരുടെയിടയിലൂടെ പൂക്കളത്തിന്  സ്ഥലമുണ്ടാക്കാനായി പിന്നിലേയ്ക്ക് മാറ്റിയിട്ടിരുന്നതിലെ മുന്നിലെ ബെഞ്ചിനടുത്തേയ്ക്ക് നടന്നു………!!

ക്ലാസ്സ് റൂമിന്റെ ഒത്ത മധ്യത്തിൽ,  ഒരു ചെറിയ കോലിൽ നൂല് കെട്ടി അതിന്റെ മറ്റേ അഗ്രത്തിലെ ചോക്ക് കൊണ്ട് വലിയ വൃത്തവും വരച്ചിട്ട് ബാക്കിയെന്ത് ചെയ്യണമെന്നറിയാതെ നിന്ന ശ്രീക്കുട്ടനെയും നോക്കി ഞാൻ  ബെഞ്ചിലിരിപ്പുറപ്പിച്ചു……..!!

വൃത്തത്തിന്റെ വലിപ്പം കൂടിപ്പോയെന്നും അതിനു വേണ്ടിയുള്ള പൂക്കളില്ലെന്നും പറഞ്ഞ് ക്ലാസ്സ്‌ ലീഡറ് ഒരു പെണ്ണ്…  ആ… ??  പേരൊക്കെ മറന്നു പോയി…!! അവള് ഫുൾ കലിപ്പ്…!! അവൾക്കപ്പോൾ അതു മായ്ക്കണം…  ശ്രീക്കുട്ടനാണെങ്കിൽ കൊന്നാലും സമ്മതിയ്ക്കില്ലെന്ന മട്ടും…….!!

ക്ലാസ്സിലെ ഗേൾസൊക്കെ ക്ലാസ്സ്‌ ലീഡറ് പെണ്ണിന്റെ സൈഡ്…!! ബോയ്സിൽ അലമ്പ് ടീംസ് മുഴുവൻ ശ്രീക്കുട്ടനൊപ്പവും…  ചില പഠിപ്പികൾ രണ്ടിലും തൊടാതെ നിന്ന് താളം ചവിട്ടുന്നുമുണ്ട്……..!!

അവളുമായി തലകീറി തല്ലുപിടിയ്ക്കുന്നതിനിടയിലും ശ്രീയുടെ കണ്ണുകൾ പലപ്രാവശ്യം എന്നെ തേടിയെത്തിയിരുന്നു…. പക്ഷേ അതൊരു സഹായാഭ്യർത്ഥനയായിരുന്നില്ല… മറിച്ച് അമ്പരന്നുള്ള നോട്ടമായിരുന്നു… എല്ലാ ഉടായിപ്പിനും കട്ടയ്ക്ക് കൂടെയുണ്ടായിട്ടുള്ള ഞാനവിടെ നോക്കുകുത്തിയായി ഇരിക്കുന്നതിനുള്ള കാരണം അവന് അജ്‌ഞമായിരുന്നല്ലോ…….!!

“””സിത്താർത്തേ… ദേ നിന്നെ നിന്റെ ചേച്ചി വിളിയ്ക്കണു….!! പെട്ടെന്നങ്ങോട്ട് ചെല്ലാമ്പറഞ്ഞു…!!”””

ക്ലാസ്സിലെ തല്ലുപിടുത്തത്തിനിടയിൽ കൂടി അകത്തേയ്ക്ക് വന്നൊരു പെൺകുട്ടിയത് പറഞ്ഞതും നെഞ്ചൊന്നു കാളി…  ശരീരം മൊത്തത്തിലൊന്നുലഞ്ഞു…….!!

“””ന്നെയോ…?? എ… എന്തിന്…??”””

ഞാൻ പതറിക്കൊണ്ട് കാര്യം തിരക്കിയപ്പോൾ അവൾ  കൈമലർത്തിക്കൊണ്ട് മാറിപ്പോയി…….!!

ഒറ്റ നിമിഷം കൊണ്ട് നാടുവിട്ട് പോയി അധോലോകത്തിൽ ചേർന്നാലോ എന്നുപോലും ഞാനപ്പോൾ ആലോചിച്ചു… കുറേക്കാലം കഴിയുമ്പോൾ കുറെ പൈസയുമായി കാറിൽ കൂളിംഗ് ഗ്ലാസൊക്കെ വെച്ചു തിരിച്ചുവന്നാൽ മതിയല്ലോ…….!! ശരീരം മുഴുവൻ വിയർത്ത് കുളിച്ച അവസ്ഥയിലും ഞാനൊന്ന് ചുറ്റും നോക്കി…. ക്ലാസ്സിലെ ഭൂരിപക്ഷം പേരും ചേരി തിരിഞ്ഞു നിന്ന് തല്ലു പിടിയ്ക്കുമ്പോൾ കുറച്ചു പേര് അത്തപ്പൂക്കളത്തിന്റെ ഡിസൈൻ കംപ്ലീറ്റ് ചെയ്യാൻ ശ്രെമിച്ചിരുന്നു…….!!

ആരുമെന്നെ ശ്രെദ്ധിയ്ക്കുന്നില്ലെന്ന് ഉറപ്പായതോടെ ഞാനിരിപ്പിടത്തിൽ നിന്നുമെഴുന്നേറ്റു… എന്തായാലും പോവുക തന്നെയെന്നുറപ്പിച്ചു കൊണ്ട് ഞാൻ ക്ലാസ്സിൽ നിന്നും പുറത്തേയ്ക്കിറങ്ങി…. ഞാൻ പോകുന്നത് കണ്ടതും ഒരുത്തി പരമ രഹസ്യമായി എന്റെയടുത്തേക്ക് വന്ന് എട്ടാം ക്ലാസ്സിന്റെയും പത്താം ക്ലാസിന്റെയും  പൂക്കളം എങ്ങനെയുണ്ടെന്നു നോക്കിവരണമെന്നുകൂടി ഉപദേശിച്ചു വിട്ടു…. വേറൊന്നുമല്ല, അവരോടാണ് ഞങ്ങളുടെ പ്രധാന മത്സരം……..!!

ഞങ്ങളുടെ മൂന്നു നില കെട്ടിടത്തിൽ നിന്നും മാറി അതേ കോംപൗണ്ടിൽ കുറച്ചു മാറിയാണ് ഹയർസെക്കന്ററിയുടെ ബിൽഡിംഗും…  കുറച്ചു നടക്കാനുണ്ടെന്ന് അർത്ഥം…!! സാധാരണ ചേച്ചിയെന്നെ അങ്ങോട്ടേയ്ക്ക് ക്ഷണിയ്ക്കാറോ എന്റെ ക്ലാസ്സിലേയ്ക്ക് വരാറോ പതിവുള്ളതല്ല… പക്ഷേ…  ഇന്നിപ്പോൾ എന്നെയങ്ങോട്ട് വിളിപ്പിച്ചെങ്കിൽ അതിനു കാരണം മീനാക്ഷിയാണ്…. അവള് ചേച്ചിയോടെല്ലാം പറഞ്ഞതുകൊണ്ട് കൂട്ടിച്ചോദിയ്ക്കാൻ വിളിയ്ക്കുന്നതാണെന്നു കരുതി തന്നെയാണ് ഞാനങ്ങോട്ടേയ്ക്ക് ചെന്നതും…..!!

ക്ലാസ്സിന്റെ വാതിലിൽ ചെന്നുള്ളിലേയ്ക്ക് നോക്കുമ്പോൾ അവരുടെ അത്തമൊക്കെ ഏതാണ്ട് പകുതിയായിരുന്നു…. ചേച്ചിയും മീനാക്ഷിയും അത്തപ്പൂവിടാനൊന്നും കൂടിയിട്ടില്ല…. രണ്ടും കൂടിയേറ്റവും പിന്നിലെ ബെഞ്ചിലിരുന്ന് വർത്താനം പറയുവാണ്…. കൈമുട്ട് ഡെസ്കിൽ കുത്തിപ്പൊക്കി സപ്പോർട്ടിങ് സ്റ്റാന്റു പോലാക്കി അതിന്റെ മേൽ തലയും ചാരിവെച്ച് ചേച്ചി പറയുന്നതും കേട്ടിരുന്ന മീനാക്ഷിയാണെന്നെ ആദ്യം കണ്ടത്….  ചെരിഞ്ഞിരുന്ന അവൾ എന്നെക്കണ്ടതും പെട്ടെന്നുയർന്നിരുന്നു കൊണ്ട് ചേച്ചിയോടെന്തോ രഹസ്യം പറഞ്ഞു…. അതോടെ ചേച്ചിയും വാതിൽക്കലേയ്ക്കു നോക്കി…….!!

ട്യൂബഴിച്ചു വിട്ടവസ്ഥയിൽ നിന്ന എന്നെ ചേച്ചി അകത്തേയ്ക്ക് കൈകാട്ടി വിളിയ്ക്കുക കൂടി ചെയ്തപ്പോൾ എനിക്ക് കരച്ചില് വന്നു….. ഓടിച്ചെന്നു ചേച്ചിയുടെ കാലു പിടിയ്ക്കാമെന്നു കരുതിയാണ് അകത്തേയ്ക്കു കയറിയതും……..!!

“””സിത്തൂ… ടാ നിങ്ങടവിടെ പായസം കൊടുക്കൂലേ…  അപ്പ ഞങ്ങക്കൂടി രണ്ടു ഗ്ലാസ്സിക്കൊണ്ടു വരാവോ…??”””

കാലേ വീഴുന്നേനു മുന്നേ ചേച്ചി വിളിച്ച കാര്യം ബോധിപ്പിച്ചപ്പോൾ എന്റെ കിളി പോയി…. അതിനൊപ്പം ആശ്വാസത്തിന്റെയൊരു നെടുവീർപ്പു കൂടി പുറത്തു വന്നപ്പോൾ ഞാനേറ്റു കൊണ്ട് തല കുലുക്കി……!!

തിരിഞ്ഞു നടക്കുന്നതിനിടയിൽ ഞാനൊരിയ്ക്കൽ കൂടി മീനാക്ഷിയെ പാളി നോക്കുമ്പോൾ അവൾ രൂക്ഷമായൊരു നോട്ടമാണ് മറുപടിയായി തന്നത്…. ഇപ്പൊ പറയുമെന്ന മട്ടിലവൾ കണ്ണുകാട്ടിയിട്ട് ചേച്ചിയോട് ചേർന്നിരുന്നതും ഞാൻ പറയല്ലേയെന്ന ഭാവത്തിൽ കണ്ണുകൾ കൊണ്ടവളുടെ കാലിൽ വീണു………!!

“””സിത്തൂ….!!”””

ചേച്ചിയുടെ ശബ്ദമമർത്തിയുള്ള അടുത്ത വിളി വന്നതും  നെഞ്ചിടിച്ചു പോയി… ക്ലാസ്സിന്നിറങ്ങാനൊരുങ്ങിയ ഞാൻ പേടിച്ചു വിറച്ചു കൊണ്ടവരുടെയടുത്തേയ്ക്ക് കാലടി വെയ്ക്കുമ്പോഴും മീനാക്ഷിയെന്നെ വല്ലാത്തൊരു ഭാവത്തോടെ നോക്കുന്നുണ്ടായിരുന്നു……..!!

“””ടാ… അവിടിവിടെ കറങ്ങി നിക്കാതെ പെട്ടെന്നെടുത്തിട്ട് വരണങ്കേട്ടല്ലോ….!!”””

ചേച്ചിയുടെ വാക്കുകേട്ടതും എനിക്കാശ്വാസമാണോ ദേഷ്യമാണോ തോന്നിയതെന്നറിയില്ല…. എന്തായാലും ഞാനൊന്നുകൂടി  തലകുലുക്കിക്കൊണ്ട് സ്ഥലം കാലിയാക്കി………!!

ക്ലാസ്സിൽ നിന്നുമിറങ്ങുന്നതിനു മുന്നേ മൂന്നു പ്രാവശ്യമെങ്കിലും ഞാൻ തിരിഞ്ഞു നോക്കിയിട്ടുണ്ടാവും അപ്പോഴെല്ലാം അവളെന്നെ തുറിച്ചു നോക്കിത്തന്നെ ഇരിപ്പുണ്ടായിരുന്നു…..!!

“””എടാ… നീയാ പത്തു ബീലെ അത്തങ്കണ്ടോ…??”””

ഞാന്തിരികെ ക്ലാസ്സിലേയ്ക്കു കയറാനാഞ്ഞതും ശ്രീക്കുട്ടനെന്നെ തടഞ്ഞിട്ട് ചോദിച്ചു………!!

“””ങ്… ഹൂം…!!”””

“””എങ്കി വാ… നമക്കോയി നോക്കാം…  സൂപ്പറാന്നെല്ലാരുമ്പറയണു….!!”””

അവൻ മുണ്ടൊന്നു കൂടി മടക്കിക്കുത്തിക്കൊണ്ട് എന്നെ പിടിച്ചു വലിച്ചു……..!!

“””ടാ… നീയപ്പ അത്തോടുന്നില്ലേ…??”””

“””ഇല്ലടാ….  എല്ലാരുങ്കൂടി പറഞ്ഞു ഞാനാണ് അലമ്പാക്കണേന്ന്…  അതോണ്ട് ഞാനിറങ്ങീങ്ങ് പോന്ന്…!!”””

അവൻ കുറച്ചു കലിപ്പിൽ പറഞ്ഞു കൊണ്ട് മുന്നേ നടന്നു… ഓരോ ക്ലാസ്സിലും കയറിയിറങ്ങി അവിടുള്ള അത്തപ്പൂക്കളത്തെയും കുറ്റം പറഞ്ഞു നടക്കുന്നതിനിടയിലാണ് ഞാൻ ചേച്ചി പറഞ്ഞ പായസത്തിന്റെ കാര്യമോർക്കുന്നത്……!!

“””ടാ നമക്കോയി പായിസായോന്നു നോക്കിയാലോ…??”””

“””ഇല്ല…. ഇപ്പഴേയാവൂല…!! കുറച്ചൂടി കഴിഞ്ഞിട്ട് പോവാം…!!”””

അവൻ എന്നെയും വലിച്ചു കൊണ്ട് അടുത്ത ക്ലാസ്സിലേയ്ക്കു നടക്കുന്നതിനിടയിൽ പറഞ്ഞു…….!!

അന്നു സ്കൂൾ വിട്ടതും ഞാൻ ശ്രീക്കുട്ടനെയും പിടിച്ചു വലിച്ചു കൊണ്ടോടി സ്കൂളിന്റെ പുറത്തിറങ്ങി…. ചേച്ചിയും മീനാക്ഷിയും കാണുന്നതിന് മുന്നേ വീട്ടിലെത്തുകയായിരുന്നു ഉദ്ദേശം….. പായസം കൊടുക്കാൻ ചെല്ലുമ്പോൾ മീനാക്ഷിയുടെ കാര്യം  അറിഞ്ഞിട്ട് ചേച്ചി തല്ലുമോയെന്നുള്ള പേടി കാരണം അത് ഞാൻ ശ്രീക്കുട്ടന്റെ കയ്യിൽ കൊടുത്തുവിടുകയാണ് ചെയ്തത്….. തിരിച്ചു വന്നപ്പോൾ നീയെന്ത്യേന്ന് കീത്തുവേച്ചി ചോദിച്ചൂന്നു കൂടെ കേട്ടപ്പഴേ ചേച്ചിയെല്ലാമറിഞ്ഞെന്നെനിക്ക് ഉറപ്പായി….. അതുകൊണ്ടാണ് നേരത്തേ വീടു പിടിയ്ക്കാൻ ഞാൻ പ്ലാനിട്ടതും……..!!

“””എന്ത്രാ…??  എന്തിനാ ഓടിയേ…??”””

അവൻ കിതച്ചു കൊണ്ടെന്റെ നേരേ നോക്കി……!!

“””ഒന്നൂലാ….  ഇന്ന് നേരത്തേ…. ചേച്ചിയൊക്കെ വരുന്നെനും മുന്നേ വീട്ടിപ്പോണം…!!”””

“””അതെന്താ…??”””

“””അറിഞ്ഞൂട…  സ്കൂള് വിട്ടാ നേരത്തേത്തണോന്നാ അമ്മ പറഞ്ഞേ….!!”””

ഞാൻ സ്കൂളിന്റെ ഗേറ്റിലേയ്ക്കു നോക്കി പറഞ്ഞുകൊണ്ട് വേഗത്തിൽ നടക്കാൻ തുടങ്ങി……!!

“””ദേ..ടാ… കീത്തുവേച്ചി വരണു….!!”””

ഗേറ്റിലേയ്ക്കു ചൂണ്ടിക്കൊണ്ടവൻ പറഞ്ഞതും ഞാൻ പെട്ടെന്നു തിരിഞ്ഞവന്റെ വിരൽ ചൂണ്ടിയ ഭാഗത്തേയ്ക്ക് തല വെട്ടിച്ചെരിച്ചു………!!

ചേച്ചിയെയും ചേച്ചിയുടെ പിന്നാലെയിറങ്ങിയ മീനാക്ഷിയെ കണ്ടപ്പോൾതന്നെ എന്റെ പാതി ബോധം പോയെന്നു തന്നെ പറയാം……..!!

“””ഓ…!! ഇവളൂണ്ടോ….??”””

മീനാക്ഷിയെ കണ്ടതും ശ്രീക്കുട്ടന്റെ മുഖം ചുളിഞ്ഞു…. പക്ഷേ ഞാനത് മൈന്റു ചെയ്തില്ല….  എന്റെ നോട്ടമപ്പോഴും ഒറ്റത്തോളിൽ ബാഗുമിട്ട് മറുകൈയിൽ കുടയും നിവർത്തിപ്പിടിച്ചു വരുന്ന മീനാക്ഷിയിലായിരുന്നു…..!!

“””ഹ…!! നിങ്ങള് പോയില്ലാർന്നോ…??”””

കീത്തുവേച്ചി ഞങ്ങളെ മാറി മാറി നോക്കി ചോദിച്ചപ്പോൾ എന്റെ കണ്ണുകൾ മുഴുവൻ മീനാക്ഷിയുടെ മുഖത്തായിരുന്നു….  അവളാണെങ്കിൽ എന്നെ രൂക്ഷമായി നോക്കി ഭീഷണിപ്പെടുത്തുവാനും മറന്നില്ല…….!!

“””അല്ലട ശ്രീക്കുട്ടാ… നിന്നെയിപ്പെന്താ വീട്ടിലോട്ടൊന്നും കാണുന്നില്ലല്ലോ….??”””

ചേച്ചിയവനോട് ചോദിച്ചപ്പോൾ ഞാൻ മീനാക്ഷിയുടെ മുഖത്തു നിന്നും കണ്ണെടുത്തു……..!!

“””ഞാൻ വരുന്നേക്കെയുണ്ട്…  കീത്തുവേച്ചി കാണാഞ്ഞിട്ടാ….!!”””

അവനൊരു ഒഴുക്കൻ മട്ടിൽ പറഞ്ഞു കൊണ്ട് മുന്നിലേ നടന്നു…. എന്തൊക്കെയോ ചോദിച്ചുകൊണ്ട് കീത്തുവേച്ചി പിന്നാലെയും….!! ചേച്ചിയുടെ മട്ടും ഭാവവും കണ്ട് ഒന്നുമറിഞ്ഞില്ലെന്നു തോന്നിയതോടെ ചേച്ചിയുടെ പിന്നിലായി നടന്ന മീനാക്ഷിയുടെ അടുത്തേയ്ക്ക് ഞാൻ വേഗത്തിൽ ചെന്നു……….!!

“””മീനുവേച്ചീ…  മറ്റേക്കാര്യമ്പറഞ്ഞില്ലേ….??”””

ഞാനാകാംഷയോടെ ചോദിച്ചതും അവളെന്നെ തുറിച്ചു നോക്കി…….!!

“””ഇല്ല… പറയട്ടേ…??”””

“””യ്യ്യോ…!! പറയല്ലേ….!!”””

ഞാൻ കണ്ണുയർത്തി അവളെ നോക്കിയെങ്കിലും അവളുടെ മുഖത്തൊരു ദാക്ഷിണ്യവുമില്ലായിരുന്നു…….!!

“””നീയെന്തൊക്കെ പറഞ്ഞാലും ഞാനിതവളോട് പറയും….!! നിനക്കൊക്കെ രണ്ടടി കിട്ടിയാലേ ശെരിയാവൂ….!!”””

അവളീർഷ്യയോടെ പറഞ്ഞു കൊണ്ട് നടത്തത്തിന്റെ വേഗത കൂട്ടി………!!

“””മീനുവേച്ചീ…  ന്റെ കത്തിങ്ങ് തിരിച്ചു താ…!!”””

പിന്നാലെയോടിക്കൊണ്ട് ഞാൻ കുറച്ചു ദേഷ്യത്തോടെ പറഞ്ഞതും അവള് കഴുത്തു വെട്ടിച്ചെരിച്ചു കൊണ്ട് എന്റെ നേരേ തിരിഞ്ഞു…….!!

“””ഇല്ല…. ഞാനിത് നിന്റെ ചേച്ചീടെ കയ്യിൽ കൊടുത്തോളാം….!! അവളൂടിയറിയട്ടേ  മൊട്ടേന്നു വിരിയണേനു മുന്നേ അനിയന്റെ കയ്യിലിരുപ്പിതാന്ന്…..!!”””

അവള് നേരേ നടന്നു കൊണ്ടാണ് അതു പറഞ്ഞത്……..!!

“””എന്റെ കത്തിങ്ങ് തിരിച്ചു തന്നെച്ചാ മതി…!!”””

“””ഞാനിത് അവളുടെ കയ്യിലേ കൊടുക്കൂ… അവൾടെയ്യീന്ന് മേടിച്ചോ….!!”””

അതുകൂടി കേട്ടപ്പോൾ എനിക്ക് ദേഷ്യം വന്നു….. ഞാനവളെ തുറിച്ചു നോക്കി……..!!

“””കീത്തൂ…!!”””

എന്റെ ഭാവം കണ്ടതും അവൾ കീത്തുവേച്ചിയെ നോക്കിയുറക്കെ വിളിച്ചു….  അതോടെ വീണ്ടുമെന്റെ ഗ്യാസ്സുപോയി….  ഞാനവളെ നോക്കി പറയല്ലേയെന്നർത്ഥത്തിൽ   കണ്ണു കാണിച്ചപ്പോഴേയ്ക്കും അവൾ വേഗത്തിൽ നടന്നു കൊണ്ട് കീത്തുവേച്ചിയോടൊപ്പം ചേർന്നു…. അതോടെ അവരു മൂന്നുപേരും ഒന്നിച്ചായി നടപ്പ്…. ഞാനാണെങ്കിൽ കുറച്ചു പിന്നാലെയും………!!

മീനുവേച്ചി ഒപ്പമെത്തിയതും ശ്രീക്കുട്ടൻ പതിയെ നടത്തത്തിന്റെ വേഗം കുറച്ചു….

“””എന്ത്രാ… നീ മീനുവേച്ചിയോടും മിണ്ടൂലേ….??”””

ഞാനവനൊപ്പം നടന്നുകൊണ്ടു ചോദിച്ചു…. അതിനു മറുപടിയായി  അവനെന്നെയൊന്നു നോക്കിയല്ലാതെ ഒന്നും പറഞ്ഞില്ല……..!!

“””കണ്ണനുമായെന്തേലും ദേഷ്യമുണ്ടെന്നു കരുതി മീനുവേച്ചിയെന്താ കാട്ടിയേ…??”””

“””ആ കണ്ണന്റെ ചേച്ചിയല്ലേ… അപ്പോളവനോടുള്ള ദേഷ്യമിവളോടും കാണും….!!”””

അവൻ എനിക്കു മുഖം തരാതെ പറഞ്ഞു നടന്നു………!!

കണ്ണൻ മീനാക്ഷിയുടെ അനിയനാണ്…. ഞങ്ങളു തമ്മിൽ വലിയ രസത്തിലല്ല…… നേർക്കു നേരേ കണ്ടാൽ തല്ലാണ്….  പക്ഷേ അതിനന്ന് പ്രത്യേകിച്ചു കാര്യമൊന്നുമില്ലായിരുന്നു….  ഗ്രൗണ്ടിലെ ചെറിയ ചെറിയ പ്രശ്നങ്ങൾ മതിയായിരുന്നു ഞങ്ങൾക്ക്…..!! അതിനും ഒരാഴ്ച മുന്നേ ഒന്നുരണ്ടു പറഞ്ഞ് ശ്രീക്കുട്ടനും കണ്ണനും സ്കൂളിൽ വെച്ചടിയായി….. അതിന്റെ പേരിൽ ഹെഡ്മാസ്റ്റർ വീട്ടിൽ നിന്നാളെ വിളിപ്പിയ്ക്കുകയും ശ്രീക്കുട്ടന് ചെറിയമ്മയുടെ കയ്യിൽ നിന്ന് നല്ല വീക്കും കിട്ടിയതോടെ അവന്മാർ ആജന്മ ശത്രുക്കളാവുകയായിരുന്നു…….!!

“””എടാ… നമ്മക്കിന്നിതിലേ പൂവാം…??”””

സ്ഥിരം പോകുന്ന വഴിയിലേയ്ക്കവൻ തിരിഞ്ഞതും ഞാൻ ചോദിച്ചു….

“””പോടാ…. അതു ചുറ്റാ…!!”””

“””എടാ ഇതിലേ പോവാണെങ്കി കീത്തുവേച്ചി മുട്ടായി വാങ്ങിത്തരും…. വാ…!!”””

ആ വളവു തിരിയാൻ സമ്മതിയ്ക്കാതെ ഞാനവന്റെ കൈയിൽ പിടിച്ചു വലിച്ചു കൊണ്ടവരുടെ പിന്നാലെ നടന്നു…. അത്രയും നേരമായിട്ടും പറയാത്തോണ്ട് ഇനിയും മീനുവേച്ചിയത് പറയില്ലെന്നൊരു തോന്നൽ അപ്പോഴേക്കും എന്റെയുള്ളിൽ ഉടലെടുത്തിരുന്നു….. ആ  വിശ്വാസമാണ് അതിലേ പോകാൻ എനിക്ക് ധൈര്യം തന്നത്…..!!

ശ്രീക്കുട്ടൻ ആദ്യം തിരിഞ്ഞ വഴിയേ പോകുവാണേൽ പത്തു മിനിറ്റ് മതി ഞങ്ങൾക്ക് വീട്ടിലെത്താൻ… എന്നിട്ടും അരമണിക്കൂർ ചുറ്റുന്നതിന്റെ കാരണം മീനാക്ഷിയുള്ളതു കൊണ്ടാണ്….. കൂട്ടത്തിൽ ചേച്ചിയുടെ കയ്യീന്ന് ചോക്ലേറ്റ് മുട്ടായിയും കിട്ടും…….!!

“””നിങ്ങളിതെങ്ങോട്ടാ…??”””

അവനോടു കഥയും പറഞ്ഞു പിന്നാലെ ചെല്ലുമ്പോൾ കീത്തുവേച്ചി തിരിഞ്ഞു നിന്ന് ചോദിച്ചു…..

“””വീട്ടിലോട്ട്….!!”””

കീത്തുവേച്ചി ചോദിയ്ക്കുന്നതു കേട്ടു തിരിഞ്ഞ മീനാക്ഷിയുടെ മുഖത്തു നോക്കിയാണ് ഞാനത് പറഞ്ഞത്……..!!

“””അതിനു നിങ്ങക്കതിലേ പോയാപ്പോരേ… ന്തിനാ വെറുതെ ചുറ്റണേ…??”””

“””അതു കീത്തുവേച്ചീ… ഇതിലേ വരുവാണേൽ ചേച്ചി മുട്ടായി മേടിച്ചു തരോന്നിവമ്പറഞ്ഞോണ്ടാ…!!”””

കീത്തൂന്റെ ചോദ്യത്തിന് എന്തു കള്ളമ്പറയണോന്നാലോചിച്ചു നിൽക്കുമ്പോഴേയ്ക്കും അവനങ്ങ് പറഞ്ഞു…. അതോടെ സംഗതിയുടെ കിടപ്പ് മീനാക്ഷിയ്ക്ക് പിടികിട്ടുകയും ചെയ്തു…. അതിനുള്ള മറുപടിയായി അവളെന്നെ തുറിച്ചു നോക്കിക്കൊണ്ട് ഭീഷണിയെന്നോണം തലയാട്ടി…..!!

“””അച്ചോടാ… മുട്ടായി തിന്നാമ്പറ്റിയ പ്രായം….!!”””

കീത്തുവേച്ചിയെന്നെ പുച്ഛിച്ചിട്ട് മീനാക്ഷിയെ നോക്കിയൊന്നമർത്തി ചിരിച്ചു…. അവളും തിരിച്ചു ചിരിച്ചെങ്കിലും കടിച്ചു പിടിച്ചു കൊണ്ട് എന്റെ നേരേയിട്ട നോട്ടം അപ്പോഴും മാറ്റിയില്ല………!!

“””നിക്കടീ… ഞാനിപ്പ വരാം…!!”””

വീട്ടിലേയ്ക്ക് സാധാരണയായി സാധനം മേടിയ്ക്കുന്ന പലചരക്കു കടയുടെ മുന്നിലെത്തിയതും മീനാക്ഷിയെ പിടിച്ചു നിർത്തിയിട്ട് കീത്തുവേച്ചി ബാഗിനുള്ളിലേയ്ക്ക് കയ്യിട്ടുകൊണ്ട് കടയിലേയ്ക്ക് നടന്നു…. റോഡിന്റെ വശത്തായൊതുങ്ങി കുടയും പിടിച്ചു നിന്ന മീനാക്ഷിയോട് ചെന്നെന്തെങ്കിലും മിണ്ടണോന്നൊക്കെയുണ്ടേലും ശ്രീക്കുട്ടൻ കൂടെയുള്ളതു കൊണ്ട് ഞാനതിന് മുതിർന്നില്ല…. മാത്രോമല്ല അവളെന്നെ നോക്കുന്നതേ കട്ടകലിപ്പിലുമാ…. എടുത്ത വായിലവളെന്തേലും ചേച്ചിയോട് പറയോന്നുള്ള പേടിയുമെനിയ്ക്കുണ്ടായിരുന്നു…..!!

“””ദാ..ടാ… പിടി….!!”””

കടയിൽ നിന്നും വാങ്ങിയ ചോക്ലേറ്റ് എന്റെ നേരേ നീട്ടിക്കൊണ്ട് കീത്തുവേച്ചി പറഞ്ഞു…. കേട്ടപാടെ ഞാനതെല്ലാം പിടിച്ചു വാങ്ങി രണ്ടോ മൂന്നോ എണ്ണം ശ്രീക്കുട്ടനും കൊടുക്കുമ്പോൾ കീത്തു തുടർന്നു….

“””കഴിയ്ക്കുന്നേക്ക കൊള്ളാം….  പക്ഷേ ഞാമ്മുട്ടായി വാങ്ങിത്തന്നെന്ന് വീട്ടിച്ചെന്നു പറയരുത് കേട്ടല്ലോ….!!”””

ചേച്ചിയെന്നെ ഓർമ്മിപ്പിച്ചപ്പോൾ ഞാൻ തലകുലുക്കി സമ്മതിച്ചു….

“””മീനുവേച്ചീ… മുട്ടായി….!!”””

ഞാനതിൽ നിന്നും രണ്ടു ചോക്ലേറ്റെടുത്ത് അവൾക്കു നേരേ നീട്ടിക്കൊണ്ട് പറഞ്ഞു……!!

“””നിയ്ക്കൊന്നുമ്മേണ്ട….!!”””

അവള് മുഖം വെട്ടിത്തിരിച്ചു കൊണ്ടു തിരിഞ്ഞതും ഞാനാകെ വല്ലാതായി……!!

“””ഒന്നൂല്ലേലും അവന്തന്നതല്ലേ…. മേടിച്ചോടീ….!!”””

എന്റെ മുഖത്തെ വിഷമം കണ്ടതും കീത്തുവേച്ചിയെന്റെ കയ്യിൽ നിന്നും ചോക്ലേറ്റു വാങ്ങിയവൾക്കു നേരേ നീട്ടി……!!

ചേച്ചി കൊടുത്തതു കൊണ്ടാകണം അവൾ മറുത്തൊന്നും പറയാതെ വാങ്ങി…. അതോടെ ഞാനൊന്നു പുഞ്ചിരിച്ചു….  അതിനും ദേഷ്യത്തോടെയുള്ളൊരു നോട്ടമായിരുന്നു മറുപടി…….!!

“””മുട്ടായി കിട്ടീലേ…. ഇനി തിരിച്ചു പൊക്കോ….  വെറുതെ വെയിലു കൊള്ളണ്ട…!!”””

ചേച്ചി പറഞ്ഞതും അതു കേൾക്കാൻ കാത്തു നിന്നതു പോലെ ശ്രീക്കുട്ടനെന്നെയും പിടിച്ചു വലിച്ചു കൊണ്ട് തിരിഞ്ഞു നടന്നു…….!!

“””എടാ….  മുട്ടായി വാങ്ങിത്തന്ന കാര്യം വീട്ടിപ്പറയല്ലേട്ടോ….!!”””

മീനാക്ഷിയെ ഒരിക്കൽ കൂടി നോക്കി തിരിഞ്ഞു നടന്ന എന്നെ ചേച്ചി ഓർമ്മിപ്പിച്ചു….  കൂടെ ചെല്ലാൻ സമ്മതിയ്ക്കാതിരുന്ന ദേഷ്യത്തിൽ ഞാനതിന് അമർത്തിയൊന്നു മൂളുക മാത്രമാണപ്പോൾ ചെയ്തത്…….!!

എന്നാൽ മീനാക്ഷിയെന്നെ മൈന്റുപോലും ചെയ്യാതെ നടന്നു നീങ്ങിയതോടെ എന്റെ വിഷമവും ഇരട്ടിച്ചു…….!!

“””സിത്തൂ… വാടാ ഉണ്ണിയപ്പം കഴിച്ചേച്ചു പോവാടാ…!!”””

ശ്രീക്കുട്ടന്റെ വീട്ടിനു മുന്നിലെത്തിയപ്പോൾ ചെറിയമ്മ വിളിച്ചെങ്കിലും ഞാൻ നിന്നില്ല…. സത്യത്തിലപ്പോൾ ഉണ്ണിയപ്പം കഴിയ്ക്കാനുള്ള മാനസികാവസ്ഥയി ലൊന്നുമായിരുന്നില്ല ഞാൻ…..!!

മീനാക്ഷി മൈന്റു ചെയ്യാതെ പോയ സങ്കടമൊരു വശത്ത്…. ഇനിയവളെല്ലാം ചേച്ചിയോട് പറയോന്നുള്ള പേടി മറുവശത്ത്…. അങ്ങനെയുള്ളതു കൊണ്ട് ഞാൻ ചെറിയമ്മ പറഞ്ഞതു കേട്ടെന്നു കൂടി നടിയ്ക്കാതെ ഞങ്ങടെ പറമ്പിലേയ്ക്കു കയറി…….!!

മുഖവും വലിച്ചു മുറുക്കിയ അവസ്ഥയിൽ വീട്ടിൽ ചെന്നു കയറി ബാഗും ഹോളിലെ സോഫയിലേയ്ക്കിട്ടു കൊണ്ട്  അടുക്കളയിലേയ്ക്ക് നടന്നു…….!!

“””ആഹാ…  ഇന്നു സാറ് നേരത്തെയാണല്ലോ…  എന്തുപറ്റി…??”””

അടുക്കളയിൽ ഏതൊക്കെയോ പലഹാരങ്ങളുണ്ടാക്കാനുള്ള പരിശ്രമത്തിലായിരുന്ന അമ്മ എന്നെക്കണ്ടതും ആക്കിയ ചോദ്യമിട്ടു….. ഞാനതിന് തിരിച്ചു മറുപടിയൊന്നും പറയാതെ അമ്മയുടെ അടുത്തു ചെന്ന് ബെഞ്ചിലിരുന്നു……!!

“””മ്മ്മ്…?? എന്തു പറ്റി…?? ഇവിടന്നുപോയപ്പോഴുള്ള  സന്തോഷോന്നുല്ലല്ലോ… തോറ്റുപോയോ….??”””

അമ്മ ചെറിയൊരു പുഞ്ചിരിയോടെ തിരക്കുമ്പോഴാണ് അത്തപ്പൂക്കളത്തിന്റെ കേസു തന്നെ ഞാനോർക്കുന്നേ…..!!

“””എന്നിട്ട് പറ ജയിച്ചോ…??”””

അമ്മ മാവിൽ ശർക്കരയും തേങ്ങയും ചേർത്തു കുഴയ്ക്കുന്നതിനിടയിൽ ഒരു കഷ്ണം ശർക്കരയെന്റെ കയ്യിൽ വെച്ചു തന്നു…….!!

“””മ്മ്മ്….!!”””

അമ്മയുടെ ചോദ്യത്തിന് മറുപടിയായി ഞാനൊന്നു മൂളി… അതിനൊപ്പം കയ്യിലിരുന്ന ശർക്കര വായിലേയ്ക്കിടുകയും ചെയ്തു……!!

“””ചുമ്മാ… നിങ്ങള് ജയിച്ചോ….??”””

അമ്മ വിശ്വാസം വരാത്ത പോലെയെന്നെ നോക്കി…..!!

“””അറിഞ്ഞൂടാ…!!”””

അപ്പോഴത്തെയെന്റെ മറുപടി കേട്ടതും അമ്മയ്ക്ക് ചിരി വന്നു……!!

“””ഒരു സംശയോമില്ല…. എന്റെ മോന്തന്നെ…!!”””

അമ്മ അമർത്തി ചിരിച്ചുകൊണ്ടെഴുന്നേറ്റു…..!!

“””സിത്തൂ ചോറെടുക്കട്ടേ…??”””

അമ്മ കൈകഴുകുന്നതിനിടയിൽ തിരിഞ്ഞു നോക്കി ചോദിച്ചു…..

“””ഇപ്പ വേണ്ട….!! പിന്നക്കഴിയ്ക്കാം…!!”””

“””നീയതിനെന്തേലുമിടയ്ക്ക് കഴിച്ചോ…??  ഇല്ലല്ലോ…??  പിന്നെ സമയത്തു വന്നാഹാരങ്കഴി ചെക്കാ….!!”””

പറഞ്ഞു കൊണ്ടമ്മ ചോറു വിളമ്പാനായി പ്ലേറ്റെടുത്തതും ഞാനെഴുന്നേറ്റോടി അടുത്തേയ്ക്ക് ചെന്നു……!!

“””ഇപ്പ വേണ്ടമ്മാ…!!”””

“””അതെന്താ…?? വരണവഴിക്ക്  എന്തേലുങ്കഴിച്ചോ….??”””

അമ്മ രൂക്ഷമായി ചോദിച്ചതും ഞാൻ ഉവ്വെന്നു തലകുലുക്കി……!!

“””എന്താ കഴിച്ചേ…??”””

“””മുട്ടായി….!!”””

ചോദ്യങ്ങൾക്കെല്ലാം കൃത്യമായി മറുപടി പറഞ്ഞതോടെ അമ്മയുടെ മുഖത്ത് വീണ്ടും ചിരി പടർന്നു….

“””എന്നിട്ടെനിക്കെവിടെ….??”””

അമ്മ കണ്ണുകളുയർത്തി…

“””തരാം… പക്ഷേ… ചേച്ചീനോട് പറയരുത്….!!”””

“””ഇല്ല… പറയൂല….!! താ….!!”””

അമ്മ പുഞ്ചിരിയോടെ ഉറപ്പു തന്നതും ഞാൻ പോക്കറ്റിൽ നിന്നും രണ്ടു ചോക്ലേറ്റെടുത്ത് അമ്മയ്ക്ക് കൊടുത്തു…..!!

“””അമ്മേ….  സിത്തുയിങ്ങെത്തിയോ…??”””

പുറത്തു നിന്നും വിളിച്ചു കൊണ്ട് കീത്തുവേച്ചി അകത്തേയ്ക്ക് കയറിയതും ഞാനൊന്നു ഞെട്ടി… പക്ഷേ വരുന്നത് ചിരിയോടെയാണെന്ന് കണ്ടതും ഒന്നുമറിഞ്ഞില്ലെന്ന ധൈര്യം വന്ന ഞാൻ അമ്മയോട് ചോക്ലേറ്റ് ഒളിപ്പിയ്ക്കാൻ ആംഗ്യം കാട്ടി…. അമ്മ അതേപടി കൈ പിന്നിലേയ്ക്ക് മാറ്റിപ്പിടിയ്ക്കുകയും ചെയ്തു……!!

“””ആ….  ഇങ്ങെത്തിയാരുന്നോ…?? പിന്നെ ചെറിയമ്മ വിളിച്ചിട്ട് നീ നിന്നില്ലെന്നു പറഞ്ഞല്ലോ…  എന്തുപറ്റി….??”””

കീത്തുവേച്ചി അടുക്കയിലേയ്ക്കു വന്നെന്നെ കണ്ടതും ചോദ്യമിട്ടു…..!!

“””ഞാ… ഞാങ്കേട്ടില്ല….!!”””

“””കള്ളമ്പറയല്ലേ സിത്തൂ… ചെറിയമ്മയ്ക്കെന്തോരം സങ്കടായെന്നോ…??  അല്ലെങ്കി അവരെന്നോടു പറയത്തില്ലാരുന്നു…!!”””

ചേച്ചി ശാസനയുടെ സ്വരത്തിൽ പറഞ്ഞു കൊണ്ട് ഡ്രെസ്സ് പോലും മാറാതെ അമ്മയെനിയ്ക്കായി എടുത്തു വെച്ച പ്ലേറ്റെടുത്ത് ചോറിടാനായി തുടങ്ങി…..

“””വന്നിട്ട് ചോറു കഴിച്ചാരുന്നോ…??”””

ചോറിലേയ്ക്കു തന്നെ കറിയൊഴിയ്ക്കുന്നതിനിടയിൽ അവളെന്നെ നോക്കി ചോദിച്ചു…..!!

“””ങ്…ഹൂം…!! വേണ്ട….!!”””

അവളുടെ ചോദ്യത്തിന് വിലങ്ങനെ തലയാട്ടുമ്പോഴും മനസ്സിനൊരാശ്വാസം തോന്നിയിരുന്നു….. ചേച്ചിയോട് മീനാക്ഷിയൊന്നും പറഞ്ഞിട്ടില്ല…..!!

“””അതെന്താ വേണ്ടേ….??”””

അവളെന്നെ നോക്കി പുരികമുയർത്തി…..!!

“””അവമ്പിന്നെ കഴിച്ചോളും….!! നീ നിന്റെ കാര്യന്നോക്ക്…!!”””

അമ്മയെന്റെ സഹായത്തിനായി മുന്നിൽ കേറിയതും ചേച്ചിയുടെ മുഖം ചുളിഞ്ഞു…..!!

“””അല്ല…. അമ്മയെന്താ കൈ പിന്നിൽ പിടിച്ചേക്കുന്നേ….??  കയ്യിലെന്താ….??”””

ചേച്ചി കയ്യിലിരുന്ന പ്ലേറ്റ് സ്ലാബിന് പുറത്തു വെച്ചിട്ട് അമ്മയുടടുത്തേയ്ക്കു ചെന്നു…..!!

“””എന്റേ… എന്റേലൊന്നൂല്ല….!!”””

പറഞ്ഞുകൊണ്ടമ്മ ചെരിഞ്ഞു നിന്നതും ചേച്ചിയ്ക്കു സംശയമടിച്ചു…. അവൾ നേരേ കൈപിന്നിലേയ്ക്കെടുത്ത് അമ്മയുടെ കൈ പിടിച്ചു വാങ്ങി….. മുറുകെ പിടിച്ചിരുന്ന കൈയ്ക്കുള്ളിൽ പുറത്തേയ്ക്കു തല നീട്ടിയിരുന്ന ചോക്ലേറ്റിനെ കണ്ടതും കീത്തുവേച്ചി തലതിരിച്ചെന്നെ നോക്കി……!!

“””ഞാനപ്പഴേ നിന്റടുക്കെ പറഞ്ഞയല്ലേ വീട്ടി വന്നു പറയല്ലെന്ന്…. എന്നിട്ട് വന്നപാടെ വിളമ്പികൊടുത്തല്ലേ….??  ഇനി നീ മുട്ടായി… കിട്ടായിന്നുമ്പറഞ്ഞെന്റടുക്കെ വാട്ടോ….!!”””

തുറിച്ചു നോക്കിക്കൊണ്ട് ചേച്ചി പറഞ്ഞപ്പോളെനിക്ക് നാവാട്ടമില്ലാത്ത അവസ്ഥയിലായി……!!

“””കീത്തുവേച്ചീ…  ഞാനമ്മ ചോയിച്ചപ്പ കൊടുത്തോയതാ…. സോറി….!!”””

“””സോറി…!! ഒന്നു പോടാ….!! ഇനിയെന്റോടെ മിണ്ടാമ്മരണ്ട….!!”””

അവള് കൈകഴുകിക്കൊണ്ട് പറഞ്ഞു…. അമ്മയാണെങ്കിൽ എന്റെ വിഷമം കണ്ട് ചിരി കടിച്ചു പിടിയ്ക്കുന്നുണ്ടായിരുന്നു……!!

“””പോടീ പട്ടീ….!!”””

ആകെ മൊത്തത്തിൽ സെഡായിരുന്ന ഞാൻ ചേച്ചിയുടെ പിണക്കവും അമ്മയുടെ കളിയാക്കലുമെല്ലാം കൂടിയായപ്പോൾ എന്റെ കയ്യിലിരുന്ന മുട്ടായിയെല്ലാംകൂടി വലിച്ചെറിഞ്ഞു കൊണ്ട് ഞാൻ അമ്മയോട് ചീറി…..!!

അതുകേട്ടതും ചേച്ചി തിരിഞ്ഞെന്റെ തോളിലൊരു തല്ലു തന്നു……!!

“””എന്തിനാടീ …ന്റെ കുഞ്ഞിനെ തല്ലിയേ….?? നീ ചേച്ചി കളിച്ചോ… പക്ഷേ കൊച്ചിന്റെ ദേഹത്തു തൊട്ടാലുണ്ടല്ലോ….!! ചോറുമെടുത്തപ്പറെ പോയിരുന്നു കഴിയ്ക്ക്…. പോ….!!”””

അത്രയും നേരം ഞങ്ങളെ മാറി മാറി നോക്കി നിന്ന അമ്മ, എന്നെ തല്ലിയതിഷ്ടപ്പെടാതെ ചേച്ചിയോട് ചീറി… പിന്നൊരക്ഷരം മിണ്ടാതെ പ്ലേറ്റും കൈയിലെടുത്ത് എന്നെയുമൊന്ന് ചെറഞ്ഞു നോക്കിക്കൊണ്ടവൾ ഹോളിലേയ്ക്ക് പോയി……!!

“””ഉണ്ണിയപ്പമുണ്ടാക്കാം…??”””

അമ്മ ചെറിയൊരു പുഞ്ചിരിയോടെ ചോദിച്ചു….  ഞാനതിന് വലിയ സന്തോഷമൊന്നുമില്ലാതെ തലയാട്ടി സമ്മതം മൂളുകയും ചെയ്തു……!!

അങ്ങനെ അമ്മയോട് ചേർന്നിരുന്ന് ഓണപലഹാരങ്ങളുണ്ടാക്കുന്ന തിരക്കിലകപ്പെട്ടപ്പോഴാണ് രണ്ടു കൈയിലുമായി ഓരോ ബക്കറ്റും തൂക്കിപ്പിടിച്ചു കൊണ്ട് ചെറിയമ്മ അടുക്കളപ്പുറത്തു കൂടി കയറി വരുന്നത്……!!

“””നീയിതെവിടെ പോയിരുന്നെടീ…??  ഈ പലഹാരങ്ങളുണ്ടാക്കാനൊക്കെ സഹായിയ്ക്കാന്നു പറഞ്ഞേച്ച് മുങ്ങിയല്ലേ….??”””

ചെറിയമ്മയെ കണ്ടതും അമ്മ പരിഭവപ്പെട്ടു…. അതുകണ്ടതും ഞാൻ ചെറിയമ്മയെ നോക്കിയൊന്നിളിയ്ക്കുകയും ചെയ്തു…..!!

“””അതേ…  നീയെന്നോടെ ചിരിയ്ക്കണ്ട….!! മിണ്ടാനുമ്മരണ്ട….!!”””

ചെറിയമ്മയെന്നെ നോക്കി മുഖം കെറുവിച്ചു….

“””സോറി…  ഞാങ്കേട്ടില്ല…. അതാ നിക്കാണ്ടിരുന്നേ….!!”””

“””പോടാ….!! നീ കേക്കൂല…!!”””

ചെറിയമ്മ അമ്മയോട് ചേർന്നിരുന്നു കൊണ്ടെന്നെ താറ്റി വിട്ടു……!!

“””അല്ല നീയെന്തോത്തിനാ ഇപ്പോളിങ്ങോട്ടെഴുന്നള്ളിയേ….??”””

“””അതേച്ചീ എനിക്കുറച്ച് വറുക്കാനും പൊടിയ്ക്കാനുമൊക്കെയുണ്ട്….!! അപ്പയിവനേന്ന് കൂട്ടുവിളിയ്ക്കാമ്മേണ്ടി വന്നതാ…!!”””

ചെറിയമ്മ ഇടയ്ക്കെന്നെയൊന്നു പാളി നോക്കിക്കൊണ്ട് പറഞ്ഞു…..!!

“””ശ്രീക്കുട്ടനാ…??”””

“””ഓ… അവൻ വരത്തൊന്നുല്ലേച്ചീ….!!”””

“””നിനക്കപ്പയെന്റെ കുഞ്ഞിനെ വഴക്കും പറയണം കൂടെക്കൊണ്ട് നടക്കേം വേണോല്ലേ….??  കൊള്ളാം….!!”””

“””അതേ… വഴക്കു പറഞ്ഞെങ്കി കാര്യമുള്ളോണ്ടാ…!! എങ്കിലും നമ്മള് നല്ല കൂട്ടാ…. അല്ലേ സിത്തൂ….?? വാടാ….  വന്നാ കടലമുട്ടായി മേടിച്ചു തരാം….!!”””

ചെറിയമ്മയൊന്നു കണ്ണു കാട്ടിയതും മറ്റെല്ലാംമറന്ന് ഞാൻ പെട്ടന്ന് ബെഞ്ചിൽ നിന്നുമെഴുന്നേറ്റു……!!

“””അഞ്ചിന്റെ മേടിച്ചു തരണം….!!””

ഞാൻ ഡിമാന്റ് വെച്ചു….

“””ആന്നേ… അപ്പ പൂവാം….??”””

ചെറിയമ്മയും ഇരിപ്പിടത്തിൽ നിന്നുമെഴുന്നേറ്റതും ഞാൻ തലകുലുക്കി സമ്മതമറിയിച്ചു….!!

ചെറിയമ്മ കൊണ്ടു വെച്ചതിൽ നിന്നൊരു ബക്കറ്റുമെടുത്ത് പുറത്തിറങ്ങിയപ്പോൾ മറ്റേ ബക്കറ്റും കയ്യിലേന്തി അവരും പിന്നാലെ വന്നു……!!

അമ്മയും ചെറിയമ്മയുൾപ്പെടെ അവരഞ്ചു മക്കളാ…  അതിൽ നാല് പെണ്ണും ഒരാണും….. ഏറ്റവും ഇളയതാണ് ചെറിയമ്മ അതിനു മേലെ ഒരമ്മാവനും അതിനുമേലെ അമ്മയുമാണ്….!! അതുപോലെ ഇവരു മൂവരുടെയും സ്വഭാവവും ഒരുപോലെയാ… അതേ സ്വഭാവം കറ തീർത്തു കിട്ടിയതെനിയ്ക്കായതു കൊണ്ട് അവരെല്ലാം എന്നെ തറയിൽ വെയ്ക്കാതെയാണ് കൊണ്ടു നടന്നതും….!!  ഇപ്പൊ മനസ്സിലായി കാണോലോ ഞാനിങ്ങനെ കാളകളിച്ചു നടക്കുന്നതിന്റെയൊക്കെ മൂലകാരണം മിന്നൂസ് മാത്രമല്ലെന്ന്……..!!

അന്നങ്ങനെ ചെറിയമ്മയ്‌ക്കൊപ്പം കഥയും പറഞ്ഞ് മില്ലിലേക്കു ചെല്ലുമ്പോൾ അവിടെ, ഇപ്പോൾ ബിവറേജിന്റെ മുന്നിലെ മാതിരി ക്യൂ….!! ഞാൻ മുന്നേ പറഞ്ഞല്ലോ നമ്മുടെ കുടുംബത്തോടുള്ള അവിടത്തുകാരുടെ ബഹുമാനോം മറ്റും….!! ആ പറ്റ് മുതലെടുത്ത് ചെറിയമ്മയെന്റെ കയ്യിലിരുന്ന ബക്കറ്റു കൂടി വാങ്ങി മുന്നിൽ കൊണ്ടു വെച്ചിട്ട് പിന്നെ വന്നെടുത്തോളാം എന്ന മട്ടിൽ എന്നെയും കൂട്ടിയിറങ്ങാനൊരുങ്ങുമ്പോഴാണ് മീനാക്ഷിയുടെ വരവ്…….!!

സത്യം പറഞ്ഞാൽ അവള് ചേച്ചിയോടൊന്നും പറഞ്ഞിട്ടില്ലെന്നറിഞ്ഞപ്പോൾ മനസ്സിനൊരു സമാധാനോക്കെ വന്നതായിരുന്നു…. പക്ഷേ വീണ്ടുമവളെ കണ്ടപ്പോൾ ഉള്ളിന്റെയുള്ളിലൊരു പേടി…. ഇനിയെല്ലാം ചെറിയമ്മയോടെങ്ങാനും പറയോ……??

“””ആ….  ഇതാര് മോളോ…?? ഓണായിട്ട് വറുക്കാനും പൊടിയ്ക്കാനുമായിട്ടിറങ്ങിയതാല്ലേ….??”””

ചെറിയമ്മ അവളോട് കുശലം ചോദിച്ചപ്പോൾ അവൾ ചിരിച്ചു കൊണ്ട് തലയാട്ടി…..!! അപ്പോഴേയ്ക്കും എന്റെ സ്ഥാനം ചെറിയമ്മയുടെ പിന്നിലായി…. സ്വാഭാവികം….!!

“””ആന്റീടെ കഴിഞ്ഞോ…??”””

അവള് തല ചെരിച്ചെന്നെ എത്തിനോക്കിയാണ് ചെറിയമ്മയോടത് ചോദിച്ചത്….!! സ്കൂളിൽ വന്നപ്പോളിട്ടിരുന്ന അതേ ചുരിദാറിലായിരുന്നു അപ്പോഴും… എന്നാൽ ഷോള് ഫ്രീയായി കഴുത്തിൽ കയറ്റിയിട്ടിരുന്നു എന്നു മാത്രം……..!!

“””ഇല്ല മോളേ…  അവിടെ വെച്ചിട്ടുണ്ട്….!! വൈകുന്നേരം കൈയൊഴിഞ്ഞിട്ട് വന്നെടുക്കാന്ന് കരുതി….!!”””

“””ശെരിയെന്നാ ഞാനങ്ങോട്ട് ചെല്ലട്ടേ…??”””

ഫോർമലായി ചോദിച്ചു കൊണ്ടൊന്നു പുഞ്ചിരിയ്ക്കുന്നതിനിടയിൽ അവളെന്നെ വീണ്ടുമൊന്ന് തുറിച്ചു നോക്കി കണ്ണുരുട്ടി.. ചെറിയമ്മോട് പറയട്ടേ എന്നമട്ടിൽ……!!

അതുംകൂടിയായപ്പോൾ ഞാനൊന്നും മിണ്ടാതെ ചെറിയമ്മയുടെ വശം ചേർന്നവൾക്കു മുഖം കൊടുക്കാതെ നടന്നു…. എങ്കിലും ഇടയ്ക്കവളെയൊന്നു തിരിഞ്ഞു നോക്കാതിരിയ്ക്കാൻ എനിയ്ക്കായില്ല…. ഞാൻ തിരിഞ്ഞു നോക്കുമ്പോഴേയ്ക്കും അവളെന്നെ മൈന്റ് ചെയ്യാതെ അകത്തേയ്ക്ക് കയറിപ്പോയിരുന്നു…….!!

ഞാൻ വീണ്ടും വിഷണ്ണനായി ചെറിയമ്മയ്‌ക്കൊപ്പം തിരിച്ചു പൊന്നു…….!!

പിന്നെ രണ്ടു ദിവസം കഴിഞ്ഞാണ് ഞാൻ മീനാക്ഷിയെ കാണുന്നത്…. പറയുമ്പോൾ അന്നൊരു തിങ്കളാഴ്ചയായിരുന്നു….. രാവിലെ തന്നെ കീത്തുവേച്ചി കുളിച്ചൊരുങ്ങി ഹോളിലിരിയ്ക്കുമ്പോഴാണ് ഞാനുറക്കമെഴുന്നേറ്റ് അങ്ങോട്ടേയ്ക്ക് ചെല്ലുന്നത്….. സമയമേകദേശം ഒൻപതു മണിയടുപ്പിച്ചായി കാണും….. അച്ഛൻ ക്ലിനിക്കിലെ ആദ്യ റൗണ്ട് ചെക് അപ്പും കഴിഞ്ഞു ഹോളിൽ വന്നിരുന്ന് പത്രമൊന്നോടിച്ചു നോക്കുവായിരുന്നു…….!!

“””കീത്തുവേച്ചിയെവിട പോവാ…??”””

കുളിച്ചൊരുങ്ങി പച്ചയിൽ സ്വർണ്ണനിറത്തിലുള്ള ബോർഡർ പിടിപ്പിച്ച പട്ടുപാവാടയും ടോപ്പുമിട്ടു നിന്ന ചേച്ചിയോട് ഞാൻ തിരക്കി…….!!

“””അമ്പലത്തിൽ എന്തേ….??”””

ചേച്ചിയൊരു സംശയഭാവത്തിലെന്നെ നോക്കി……

“””മ്ച്ചും….!!”””

ഞാനൊന്നുമില്ലെന്ന അർത്ഥത്തിൽ തലകുലുക്കി തിരിയുമ്പോൾ അമ്മ ഡയനിങ് ടേബിളിൽ ഭക്ഷണമൊരുക്കി വെയ്ക്കുന്നുണ്ടായിരുന്നു……..!!

“””സിത്തൂ…..!! പോയി പല്ലു തേച്ചേച്ചും വാ…. ചായ തരാം….!!”””

അമ്മയെന്നെ കണ്ടതും അവിടെ നിന്നു തന്നെ വിളിച്ചു പറഞ്ഞു……

“””എനിക്ക് കാപ്പി താ…. കാപ്പി കുടിച്ചേച്ചും ഞാമ്പല്ലു തേയ്ക്കാം….!!”””

അമ്മയുടെ അടുത്തേയ്ക്ക് തിരിഞ്ഞു നടക്കുന്നതിനിടയിൽ ഞാൻ പറഞ്ഞു…… ഓരോളത്തിനങ്ങ് പറഞ്ഞപ്പോൾ ശബ്ദം കൂടിപ്പോയതിനെ കുറിച്ചോ അച്ഛനിരിയ്ക്കുന്നതേ പറ്റിയോ ഞാൻ ചിന്തിച്ചില്ല…… എന്നാലടുത്ത നിമിഷം തന്നെ എനിക്കതേ കുറിച്ചു ചിന്തിയ്ക്കേണ്ടിയും വന്നു……!!

“””ഛീ…..!! പോയി ബ്രെഷെയ്യടാ…. വൃത്തികെട്ടത്…..!!”””

കയ്യിലിരുന്ന പത്രമൊന്നു കുടഞ്ഞു   കൊണ്ട് അച്ഛനൊന്നു ചീറിയതും കീത്തുവും അമ്മയും സ്വിച്ചിട്ട പോലെ ഒറ്റ ചിരിയായിരുന്നു…… ഞാനങ്ങ് അയ്യടാന്നായിട്ട് അടുക്കളയിലേയ്ക്ക് വലിഞ്ഞു….. അപ്പോഴും അമ്മയെന്നെ നോക്കി വാപൊത്തി ചിരിയ്ക്കുന്നുണ്ടായിരുന്നു…….!!

“””കീത്തൂ…..!! വാ….. വന്നു കഴി…..!! എന്നാലച്ഛനോടൊപ്പമങ്ങ് പോവാലോ….!!”””

അമ്മ അവിടെ നിന്നും വിളിച്ചു ചോദിച്ചതും കേട്ട് ഞാനലസനായി നടന്നു…….!!

“””വേണ്ടമ്മേ……!! മീനുവും വരണുണ്ട്….  ഞങ്ങളൊന്നിച്ചു പൊക്കോളാം…..!!”””

ചേച്ചിയുടെ മറുപടി വന്നതും എനിക്ക് വീണ്ടും കിരുകിരുപ്പ് തുടങ്ങി….. പല്ലുതേയ്ക്കാൻ പോയ ഞാൻ പിന്നെ റൂമിൽ  നിന്നിറങ്ങുന്നതുതന്നെ കുളിച്ച് ഓണക്കോടിയായിട്ടെടുത്ത ജീൻസും ഷേർട്ടുമൊക്കെയിട്ടാണ്…..!!

“””അല്ല… നീയിതെങ്ങോട്ടാ….??”””

റൂമിൽ നിന്നും സ്റ്റെയറിറങ്ങി വന്നു നിന്നത് അച്ഛന്റെ മുന്നിൽ…. അപ്പോൾ തന്നെ ചോദ്യവും വന്നു……!!

“””അമ്പലത്തിൽ….!!”””

ഞാൻ മുഖത്തു നോക്കാതെ മറുപടി കൊടുത്തു…….!!

“””കീത്തൂനൊപ്പം നീയുമ്പോണുണ്ടോ….??”””

“””മ്മ്മ്….!!”””

അച്ഛന്റെ അടുത്ത ചോദ്യത്തിനും നിലത്തു നോക്കി ഞാനൊന്നു മൂളി…. പക്ഷേയെന്തോ ഭാഗ്യത്തിന് അച്ഛൻ ചേച്ചിയോട് ചോദിയ്ക്കാതെ അകത്തേയ്ക്ക് പോയി……!!

“””മോനിതൊരുങ്ങിക്കെട്ടി യെങ്ങോട്ടാ….??”””

“””അമ്പലത്തിൽ…..!!”””

ഹോളിലേയ്ക്ക് ചെന്നയെന്നോട് കളിയാക്കിയ മട്ടിൽ കീത്തു ചോദിച്ചപ്പോൾ ഞാൻ കള്ളലെക്ഷണത്തിൽ മറുപടി പറഞ്ഞു………!!

“””അതെന്തായിപ്പൊ പെട്ടെന്നൊരമ്പലത്തി പോക്ക്…??”””

“””ചേച്ചി പോവുവല്ലേ….  അപ്പ കൂട്ടിന് വരാന്നു വെച്ചു….!!”””

“””അയ്യട….!! നടന്ന തന്നെ….!!”””

“””പ്ലീസേച്ചീ…  ഞാനും വരണു….!!”””

“””വേണ്ട…. എന്റൊപ്പം വരണ്ട…!! എനിക്കിനിയിപ്പ നിന്നേന്നോക്കി നടക്കാനൊന്നുമ്പറ്റില്ല….!!”””

അവൾ തീർത്തു പറഞ്ഞു……!!

“””വേണ്ട…!! എന്നെ നോക്കണ്ട…!! ഞാനും കൂടെ വന്നോളാം….!!”””

“””നിന്നോട് വേണ്ടെന്ന് പറഞ്ഞില്ലേ….!! വരണ്ടെന്നു പറഞ്ഞാ വരണ്ട….!!”””

അവള് കയർത്തു പറഞ്ഞിട്ട് എഴുന്നേൽക്കാനൊരുങ്ങീതും ഞാനും പ്ലേറ്റു മാറ്റി…..!!

“””ന്നെ കൊണ്ടോയില്ലേ ഞാനച്ഛനോട് പറഞ്ഞോടുക്കും….!!”””

“””എന്ത്….??”””

ചേച്ചി സംശയത്തോടെ നോക്കി ചോദിച്ചു……!!

“””മെനിഞ്ഞാന്ന്… മെനിഞ്ഞാന്നെനിക്ക് മുട്ടായി വാങ്ങിത്തന്ന കാര്യം….!!”””

ഞാൻ മടിച്ചു മടിച്ചു പറഞ്ഞതും കീത്തുവേച്ചിയുടെ ഭാവം മാറി….. അവളുടെ മുഖത്തപ്പോൾ ദേഷ്യമാണോ സങ്കടമാണോ എന്നൊന്നും നിശ്ചയമില്ല…….!!

“””കീത്തൂ…. നീ പോണില്ലേ….??”””

അമ്മ അകത്തു നിന്നും വിളിച്ചു ചോദിച്ചതും ഞാൻ പ്രതീക്ഷയോടെ ചേച്ചിയുടെ മുഖത്തു നോക്കിയിരുന്നു…….!!

“””ആ…  പോവുവാ….!! പിന്നെ ഞാനിവനെക്കൂടി കൊണ്ടുപോവുവാട്ടോ….!!”””

അവൾ വിളിച്ചു പറഞ്ഞു കൊണ്ടെഴുന്നേറ്റതും എന്റെ മുഖത്ത് സന്തോഷത്തിന്റെ പുഞ്ചിരി വിടർന്നു…….!!

“””വായെണീറ്റ്…  നാശം പിടിച്ചതേ….!!”””

പുറത്തേയ്ക്കു നടക്കുന്നതിനിടയിൽ ചേച്ചിയങ്ങനെ പറഞ്ഞപ്പോഴും  ഞാനൊന്നും മിണ്ടാതെ മര്യാദക്കുട്ടനായി അവളെ പിൻചെന്നു……!! ഇനിയെന്തേലും പറഞ്ഞാ തന്നെ അവളുടെ വായിലിരിയ്‌ക്കുന്ന കേൾക്കേണ്ടി വരുമെന്നത് മറ്റൊരു കാര്യം…..!!

അങ്ങനെ ഞങ്ങളിറങ്ങി പതിവു വഴിയെ റോഡിലേയ്ക്കു കയറുമ്പോൾ അവിടെ മീനാക്ഷി കാത്തുനിൽപ്പുണ്ടായിരുന്നു….  അവളും ഒരു ഇളംമഞ്ഞ പട്ടുപാവാടയും ടോപ്പുമായിരുന്നു വേഷം……..!!

എന്നെ കണ്ടതും മീനാക്ഷിയുടെ മുഖമൊന്നു ചുളിഞ്ഞു… അതിനൊപ്പം അവളെന്നെ ഉണ്ടക്കണ്ണുകൾ വിടർത്തിയൊന്നു സൂക്ഷിച്ചു നോക്കുകയും ചെയ്തു………!!

“””കീത്തൂ…. ഇവനെങ്ങോട്ടാ….??”””

എന്റെ മുഖത്തു നിന്നും കണ്ണുകൾ പറിച്ച് ചേച്ചിയുടെ മുഖത്തേയ്ക്ക് നട്ടുകൊണ്ടവൾ ചോദിച്ചു……!!

“””ഇവനെക്കൂടി കൊണ്ടാവാനമ്മ പറഞ്ഞു…. അതോണ്ട് കൂട്ടിയതാ….!! വാടാ….!!”””

പറഞ്ഞു കൊണ്ട് ചേച്ചി മുന്നേ നടന്നപ്പോഴുമെന്റെ കണ്ണുകൾ മുഴുവൻ മീനാക്ഷിയുടെ മുഖത്തായിരുന്നു…. എന്നാൽ അവളപ്പോഴുമെന്നെ നോക്കി പേടിപ്പിയ്ക്കാൻ മറന്നില്ല…..!!

അവളെന്നെ രൂക്ഷമായി നോക്കുമ്പോളൊക്കെ ഞാൻ പേടിച്ചെങ്കിലും അവളെ അങ്ങനെ വെറുതെ വിടാനെനിയ്ക്ക് ഉദ്ദേശിമില്ലായിരുന്നു….. വഴിപാടിനുള്ള രസീത് വാങ്ങാനും അകത്തുകയറി തൊഴുതിട്ടുവന്നപ്പോൾ കൂട്ടത്തിനിടയിൽ കാണാതെപോയ മീനുവേച്ചീടെ ചെരിപ്പു തപ്പിപ്പിടിച്ചു കൊടുക്കാനുമൊക്കെ ഞാനാണ് കൂടുതൽ ഉത്സാഹിച്ചതെങ്കിലും അവളെന്നോടൊന്നു മിണ്ടുക പോലും ചെയ്തില്ല….. എന്നിരുന്നാലും അവൾ ചേച്ചിയോടൊന്നും പറഞ്ഞില്ലന്നത് എനിക്ക് ആ വിഷമത്തിനിടയിലും ചെറിയൊരു ആശ്വാസമായി……!!

അന്ന് അമ്പലത്തിൽ പോയി വന്നതിൽ പിന്നെ മീനാക്ഷിയെ പലപ്രാവശ്യം കാണാൻ ശ്രെമിച്ചെങ്കിലും നടന്നില്ല……  സൈക്കിളുമെടുത്ത് അവളുടെ വീടിനു മുന്നിലൂടെ പലപ്രാവശ്യം റൗണ്ടടിച്ചെങ്കിലും അവളുടെ പൊടി പോലും കാണാൻ പറ്റിയില്ല…… ഓണാവധി ആയതുകൊണ്ട് അവള് വീട്ടിൽ നിന്നും പുറത്തിറങ്ങിയതുമില്ല…….!!

വീട്ടിലെ ഫോണിൽ നിന്നും കീത്തു അവളെ വിളിയ്ക്കുമ്പോൾ ഒന്നുമറിയാത്ത പോലെ ഞാനും അടുത്തൊക്കെ ചെന്നു ചുറ്റിപ്പറ്റി നിൽക്കും….. കാര്യമൊന്നും ഉണ്ടായിട്ടല്ല….. എങ്കിലും അതിലന്നെന്തോ സുഖമൊക്കെയുണ്ടായിരുന്നു…….!!

അങ്ങനെയിരിയ്ക്കേ ഒരുദിവസമാണ് ശ്രീക്കുട്ടിയുടെ പിറന്നാൾ വരുന്നത്….. ശ്രീക്കുട്ടിയെന്നു പറയുന്നത് ചെറിയമ്മയുടെ ഇളയ മോളാണ് കേട്ടോ…  അതായത് ശ്രീക്കുട്ടന്റെ അനിയത്തി…….!! ചെറിയച്ഛൻ ഗൾഫിലായതു കൊണ്ടും വീട്ടിൽ ചെറിയമ്മയും രണ്ടു കുട്ടികളും മാത്രമായതിനാലും മിക്കപ്പോഴും അവര് ഞങ്ങളുടെ വീട്ടിലായിരിയ്ക്കും….  പ്രത്യേകിച്ച് വിശേഷദിവസങ്ങളിൽ……!!

അന്ന് അമ്മയും ചെറിയമ്മയും കീത്തുവുമൊക്കെ ചേർന്ന് പായസത്തിലിട്ട് പണിത് ഒടുക്കം ഒരുരുളി പായസം ബാക്കി വന്നു….. അടുത്ത വീട്ടിലും മറ്റുമൊക്കെ അത് പകുത്തു കൊടുക്കുമ്പോളാണ് എനിക്കൊരു മഹത്തായ ഐഡിയ തോന്നിയത്…….!!

“””ചേച്ചീ….  നമ്മക്കു കൊറച്ചു പായിസം മീനുവേച്ചീട വീട്ടിക്കൂടി കൊണ്ടോയി കൊടുത്താലോ….??”””

നിഷ്കളങ്കമായ സന്മനസ്സിനെ കൂടിനിന്ന ജനം കയ്യടിച്ചു പ്രോത്സാഹിപ്പിയ്ക്കുമ്പോൾ അന്നവർക്കറിയില്ലാലോ ഉള്ളിലിരുപ്പെന്താണെന്ന്…….!!

അങ്ങനെ വലിയൊരു തൂക്കു പാത്രത്തിൽ തന്നു വിട്ട പായസവുമായി ഞാനോടി….. ചേച്ചി കൊണ്ടോയി കൊടുക്കാന്നു പറഞ്ഞിട്ട് സമ്മതിയ്ക്കാതെ കർത്തവ്യമേറ്റെടുത്തതാട്ടോ….. പാവം അന്നെനിക്ക് ഒടുക്കത്തെ നല്ല മനസ്സായിരുന്നേ…. അതൊക്കെയോർക്കുമ്പോൾ തന്നെ ഇപ്പോൾ ചിരി വരും…….!!

അന്നോടി പിടിഞ്ഞ് അവളുടെ വീട്ടിൽ ചെന്നു കയറിയപ്പോൾ രേവുആന്റി മുറ്റത്തുണ്ടായിരുന്നു….. മീനാക്ഷിയുടെ അമ്മയാ…. മുഴുവൻ പേര് രേവതിയെന്നായിരിയ്ക്കണം….  വലിയ പിടിയില്ല….  എല്ലാരും രേവൂന്നാ വിളിയ്ക്കാറ്… അതുകൊണ്ട് നമ്മളതിലൊരു ആന്റി കൂടിയങ്ങ് ചേർത്തു….  ദാറ്റ്‌സ് ഓൾ….!!

“””ആഹാ… ഇതെന്താ പതിവില്ലാണ്ടിങ്ങോട്ടൊക്കെ….??”””

അങ്ങറ്റമിങ്ങറ്റം കെട്ടിയ വലിയ വരാന്തയിൽ സ്റ്റെപ്പിന്റെ മുകളിലായിരുന്ന് ഏതോ മാഗസിനോ മറ്റോ വായിച്ചിട്ടിരുന്ന ആന്റയെന്നെ നോക്കി ചോദിച്ചു….. അച്ഛനെ നാട്ടില് മുഴുവൻ അറിയുമ്പോൾ സ്വാഭാവികമായും മകനെയും അറിയണമല്ലോ…. മാത്രോമല്ല കീത്തുവേച്ചിയ്‌ക്കൊപ്പം ഞാൻ പലപ്രാവശ്യം അവിടേയ്ക്കു പോയിട്ടുമുണ്ട്…. അതുകൊണ്ട് ആന്റിയ്ക്കെന്നെ നന്നായിട്ടറിയുവേം ചെയാം……..!!

“””പായിസന്തരാമ്മന്നെയാ….!!”””

കൈയിലിരുന്ന തൂക്കുപാത്രം അവരുടെ നേരേ നീട്ടിക്കൊണ്ട് പറയുമ്പോഴും കണ്ണുകൾ വീട്ടിനുള്ളിലായിരുന്നു………!!

“””മ്മ്മ്…??  എന്താ വിശേഷിച്ച്….??”””

“””ബെർത്ത് ഡേ….!!”””

“””ആരുടെ….??”””

അവരെന്നെ പുരികമുയർത്തി നോക്കി……!!

“””ശ്രീക്കുട്ടീടെ…..!! ഇവടെ  മീനുവേച്ചിയില്ലേ….??”””

അവര് മുട്ടുകാലിൽ കൈകൊടുത്തെഴുന്നേറ്റപ്പോൾ അടുത്ത ചോദ്യത്തിന് ഇടകൊടുക്കാതെ ഞാൻകേറി അങ്ങോട്ട് അറ്റാക്ക് ചെയ്തു…….!!

“””ഇല്ല….  മീനുവേച്ചി ഇവടെയില്ല… മോളിലാ….!!”””

അവരെന്നെ ആക്കിക്കൊണ്ട് ഒരു ഒഴുക്കൻ മട്ടിൽ പറഞ്ഞു…..

“””എന്താ മീനുവേച്ചീനെ വിളിയ്ക്കണോ….??”””

ഒന്നും മിണ്ടാതെ നിന്ന എന്റെ മുന്നിലേയ്ക്കവർ അടുത്ത ഇറക്കിറക്കി….. അതിനു മറുപടിയായി വേണോന്നോ വേണ്ടെന്നോ പറഞ്ഞില്ല…. വെറുതെ നോക്കി നിന്നു…….!!

“””മീനുവേച്ചീ…. മീനുവേച്ചീനെ തിരക്കി ദേയിവിടൊരാള് വന്നു നിക്കുന്നൂ…..!!”””

അവരകത്തേയ്ക്കെത്തിക്കൊണ്ട് ഉറക്കെ വിളിച്ചു പറഞ്ഞു…. എന്നിട്ടെന്നെ നോക്കിയൊരു ചിരിയും….. സംഭവം എന്നെ കളിയാക്കിയതാണെന്നൊക്കെ എനിക്ക് മനസ്സിലായി…. പക്ഷേ അന്ന് തിരിച്ചൊന്നും പറയാനുള്ള ഗട്ട്സ് നമുക്കില്ലാതെ പോയി……!! ആരാമ്മേന്നുള്ള മറുപടി മോളിലെവിടുന്നോ കേട്ടതും എന്റെ രോമങ്ങൾക്കൊക്കെയൊരു ഉണർവ് പോലെ……

“””അല്ല യെന്താ അവിടെത്തന്നെ നിന്നു കളഞ്ഞേ…. വാ…..!!”””

ആന്റി അകത്തേയ്ക്കു കയറുന്നതിനൊപ്പം എന്നെയും ക്ഷണിച്ചു……!!

ഞാനവർക്കൊപ്പം റെയിൽവേ സ്റ്റേഷനിലെ പ്ലാറ്റ്ഫോം പോലുള്ള ഹോളിലേയ്ക്കു കയറി……

“””മീനൂ…. നിന്നെ തിരക്കിയിതാരാ വന്നേക്കുന്നേന്ന് നോക്കിയേ….!!”””

മുകളിൽ നിന്നും സ്റ്റെയറിങ്ങി താഴേയ്ക്കു വന്ന മീനാക്ഷിയോട് ആന്റി പറഞ്ഞു…..

“””ഹ…!! ഇവനോ….??  ഇവനെ കാണിയ്ക്കാനാണോ മമ്മിയെന്നെ വിളിച്ചേ….??”””

അവള് താല്പര്യമില്ലാത്ത മട്ടിൽ ആന്റിയെ നോക്കി ചോദിച്ചപ്പോൾ ഞാൻ ഇളിഭ്യതയോടെ ഒന്നു ചിരിച്ചു….. ചിരിച്ചെങ്കിലും മനസ്സിൽ നല്ല പോലെ സങ്കടം വന്നു കേട്ടോ…..!! വെറുതെയെടുത്ത് കളയാനൊരുങ്ങിയ പായസം വലിയ ഐഡിയയൊക്കെ പറഞ്ഞ് കൊണ്ടു വരുമ്പോൾ അവൾക്കിഷ്ടമാവില്ലെന്ന് അറിയാമെങ്കിലും ഒന്നു കാണാനുള്ള കൊതിയായിരുന്നേ മനസ്സിൽ….!! അപ്പോൾ മുഖത്തു നോക്കിയങ്ങനെയൊക്കെ പറയുമ്പോൾ സ്വാഭാവികമായും  ചെറിയൊരു സങ്കടമൊക്കെ വരുമല്ലോ….!!

“””അല്ല…  നിന്റെ ചേച്ചിയെവിടെ….??”””

എനിക്ക് വിഷമമായെന്നു കണ്ടിട്ടാവണം അവളെന്നെ നോക്കി ചിരിച്ചു കൊണ്ട് ചോദിച്ചു…..!!

“””അമ്പലത്തിപ്പോയി…..!!”””

“””അമ്പലത്തിലോ…?? എന്നിട്ടവളെന്നെ വിളിച്ചില്ലല്ലോ….!!”””

ഞാൻ പറഞ്ഞത് വിശ്വാസം വരാത്തതു പോലെ എന്നെ നോക്കി……!!

“””ഇന്ന് ശ്രീക്കുട്ടീടെ ബെർത്ത് ഡേയാ…. അപ്പൊയെല്ലാരുങ്കൂടി പോയതാ…..!!”””

“””എന്നിട്ട് പായസമല്ലാതെ വേറൊന്നും വെച്ചില്ലേടാ വീട്ടിൽ…???”””

ചോദ്യം രേവുവാന്റിയുടെ വകയായിരുന്നു……

“””മ്ച്ചും…!!”””

ഞാൻ ഇല്ലെന്ന് ചുമൽകൂച്ചി….

അവര് പിന്നെന്തൊക്കെയോ ചോദിച്ചുകൊണ്ടിരുന്നു…. ഞാനതിനൊക്കെ ഒഴുക്കൻമട്ടിൽ എന്തൊക്കെയോ മറുപടിയും പറഞ്ഞു…. അതിനിടയിൽ ആന്റി പായസം പകർന്ന് മീനാക്ഷിക്ക് നീട്ടിയെങ്കിലും

“””നിക്കെങ്ങുമ്മേണ്ട….!!””” എന്നു പറഞ്ഞവളാ ഗ്ലാസ് നിഷ്കരുണം തള്ളുന്നത്കൂടിക്കണ്ടതേ എനിക്ക് സങ്കടമിരട്ടിച്ചു….. ഇത്രേം പാടുപെട്ട് കൊണ്ടു വന്നു കൊടുക്കുമ്പോൾ  ഒന്ന് ടേസ്റ്റ് ചെയ്തെങ്കിലും നോക്കാമായിരുന്നെന്നു തോന്നിയപ്പോൾ ആ സങ്കടം മൂത്തുമൂത്തുവന്നു….. അതോടെ എന്റെ കണ്ണുകളും നിറഞ്ഞു…..

പിന്നീടൊന്നും പറയാനോ കേൾക്കാനോ നിന്നില്ല…. കൊണ്ടുവന്ന തൂക്കു പാത്രം പോലും തിരികെ വാങ്ങാൻ നിൽക്കാതെ ഞാമ്പോകുവാ എന്നൊരു വാക്കും പറഞ്ഞ്  കരഞ്ഞും കൊണ്ട് ഞാനിറങ്ങി വീട്ടിലേക്കോടി………!!

തുടരും……!!