💝💝കാലം കരുതിവച്ച പ്രണയം

എല്ലാവർക്കും നമസ്കാരം,

കഴിഞ്ഞ കഥകൾക്ക് നിങ്ങൾ നൽകിയ പ്രോൽസാഹനങ്ങൾക്കും അഭിപ്രായങ്ങൾക്കും ആദ്യമേ നന്ദി പറഞ്ഞു കൊണ്ട് ഒരു പുതിയ പ്രണയ കഥ ഞാനിവിടെ അവതരിപ്പിക്കുകയാണ്. ഇതിന്റെ അടുത്ത പാർട്ട് വരാൻ അൽപം താമസിക്കും വേറെ ചില തിരക്കുകൾ ഉള്ളതാണ് കാരണം ഇത് എഴുതാൻ താമസിച്ചതും അതുകൊണ്ടാണ്. എങ്കിലും അധികം വൈകിപ്പിക്കില്ല ഒരു പത്ത് ദിവസം കാത്തിരിക്കണം.

എല്ലാവർക്കും ഹൃദയം നിറഞ്ഞ ഓണാശംസകൾ നേരുന്നതോടൊപ്പം അകലങ്ങളിലായിരുന്ന് ഗവൺമെന്റിന്റെ എല്ലാ നിർദ്ദേശങ്ങളും പാലിച്ചു കൊണ്ട് ഈ ഓണം ആഘോഷിക്കുക … 🙏🙏🙏🙏🙏

എന്നാൽ തുടങ്ങട്ടെ ……,

…………………

അങ്ങ് ദൂരെ നിന്ന് തീവണ്ടിയുടെ ചൂളം വിളി കേൾക്കുന്നു. ഞാൻ ആ ട്രെയിൻ വരുന്ന പാളത്തിലൂടെ നടന്നുനീങ്ങുകയാണ് കരഞ്ഞ് കലങ്ങിയ കണ്ണുകളുമായി. നിമിഷങ്ങൾക്കകം ഞാൻ ഈ ലോകത്തോട് വിടപറയും , അത്രയ്ക്ക് സങ്കടം എന്റെ മനസ്സിൽ ഉണ്ട്. നാളത്തെ ദിവസം അവളുടെ കഴുത്തിൽ മറ്റൊരാൾ താലികെട്ടുന്നത് കാണാൻ എനിക്ക് കഴിയില്ല. അതിന് മുൻപ് എനിക്ക് ഈ ലോകത്തോട് വിട പറയണം . ഒരു പെണ്ണിന്റെ സ്നേഹം കിട്ടാത്തതിൽ ആത്മഹത്യ ചെയ്യുന്ന ഒരു വിഢിയല്ല ഞാൻ. കാലം കരുതി വച്ച എന്റെ പെണ്ണ്, മൂന്ന് വർഷം മനസ്സിൽ കൊണ്ട് നടന്ന് ഇരുവരും സ്വയം അറിഞ്ഞ് പ്രണയിച്ചിട്ട് ഒടുവിൽ അവൾക്ക് എന്നെ വേണ്ട എന്നു പറഞ്ഞപ്പോൾ തളർന്നതാണ് എന്റെ മനസ്സ് . ഇനി ജീവിക്കുന്നതിനെക്കാൾ മരിക്കുന്നതാണ് നല്ലതെന്ന് തോന്നി. ഒരു ഭ്രാന്തമായ അവസ്ഥയിലാണ് ഞാൻ ഇപ്പോൾ .

‘ർർർർർർ ……..ർർർർർർ ………….’

വൈബ്രേഷൻ കൊണ്ട് മുഴങ്ങിയ എന്റെ മൊബൈൽ ഞാൻ പോക്കറ്റിൽ നിന്ന് എടുത്തു നോക്കി. ‘അരുൺ’ എന്ന പേര് മൊബൈലിന്റെ ഡിസ്പ്ലേയിൽ തെളിഞ്ഞ് നിൽക്കുന്നു. ഞാൻ ഫോൺ കോൾ കട്ടുചെയ്ത് റെയിൽവേ പാളത്തിന്റെ അല്പം അകലെയായി തറയിൽ വച്ച ശേഷം റെയിൽവേ പാളത്തിൽ കയറി നിന്നു . നിമിഷങ്ങൾക്കകം എന്റെ ശരീരം ചിന്നി ചിതറും അപ്പോൾ ഇതാരുടെ ശരീരമെന്ന് തിരിച്ചറിയാൻ ഈ മൊബൈൽ ഫോൺ ഉപകരിക്കുമെന്ന് എനിക്ക് തോന്നി. ട്രേയിനിന്റെ ചൂളം വിളി അടുത്ത് വരുന്നു അതിന്റെ ശബ്ദ തീവ്രത വർദ്ധിച്ച് വരുന്നു.

‘ർർർർർർ ………..ർർർർർർ ………….’

തറയിൽ കിടന്ന ഫോൺ വീണ്ടും വൈബ്രേഷൻ കൊണ്ട് നിരങ്ങി നീങ്ങുന്നത് കേട്ട് ഞാൻ മൊബൈലിന്റെ ഡിസ്പ്ലേയിലേക്ക് നോക്കി . അതിൽ എഴുതിയിരുന്ന പേര് കണ്ട് എന്റെ കരഞ്ഞ് കലങ്ങിയ കണ്ണുകൾ വിടർന്നു ,

” ആരതി ”

ഞാൻ വേഗം പാളത്തിന് പുറത്ത് ചാടി മൊബൈൽ ഫോൺ കയ്യിലെടുത്തു.

അപ്പോഴേക്കും ഞാൻ കാത്തു നിന്ന എന്റെ മരണത്തിന്റെ ദൂതൻ ചൂളം വിളിച്ച് പാഞ്ഞ് പോയി. വെറും ഒരു നിമിഷത്തിന്റെ വ്യത്യാസത്തിൽ എന്റെ മരണ സമയം മാറ്റി എഴുതപ്പെട്ടു.

ഞാൻ ഫോണിൽ വന്ന കോൾ എടുത്തു.

“ഹലോ……ഹലോ ….. ആരതി ….. ”

ഞാൻ വിറയാർന്ന ശബ്ദത്തിൽ അവളെ വിളിച്ചു.

മറുവശത്ത് പൊട്ടികരയുന്ന അവളുടെ ശബ്ദമാണ് ഞാൻ കേട്ടത്.

“എന്താ …..എന്തിനാ എന്നെ വിളിച്ചത്. ”

അവളിൽ നിന്നും എനിക്ക് അനുകൂലമായ ഒരു മറുപടി കിട്ടുമെന്ന പ്രതീക്ഷയിൽ ഞാൻ ചോദിച്ചു.

“മാപ്പ് ……….ഒരായിരം മാപ്പ് …………എന്റെ അച്ഛൻ സ്വയം ആത്മഹത്യ ചെയ്യുമെന്ന് പറഞ്ഞ് എന്നോട് ഭിഷണി മുഴക്കിയപ്പോൾ എനിക്ക് ചേട്ടനെ തള്ളി പറയേണ്ടി വന്നു ……….ഈ കല്യാണത്തിന് സമ്മതിക്കേണ്ടി വന്നു , മാപ്പ് ……….എനിക്ക് ഏട്ടനില്ലാതെ ജീവിക്കാനാകില്ല .ഞാൻ ഇറങ്ങി വരാം എന്നെ വന്ന് വിളിക്ക്. എന്റെ അച്ഛനു വേണ്ടി ചേട്ടനെ ഉപേക്ഷിക്കാൻ എന്റെ മനസ്സും മനസാക്ഷിയും സമ്മതിക്കുന്നില്ല. എനിക്ക് ഏട്ടനില്ലാതെ പറ്റില്ല….”

അവളുടെ ആ വാക്കുകൾ ഒരു കുളിർ കാറ്റായി എന്റെ തിളച്ചുമറിഞ്ഞ മനസ്സിനെ തണുപ്പിച്ചു. അവളുടെ കരച്ചിൽ ഫോണിന്റെ മറുവശത്ത് നിന്ന് അപ്പോഴും കേൾക്കുന്നുണ്ടായിരുന്നു.

“ഞാൻ …… ഞാൻ വരാം …… ഞാൻ വരാം ……നിന്നെ കൊണ്ട് പോകാൻ …. നീ കരയാതെ .”

ഞാൻ അത്രയും പറഞ്ഞ് ഫോൺ കോൾ കട്ടുചെയ്തു. എന്റെ മനസ്സിൽ ആകെ മൊത്തം ഒരു വല്ലാത്ത അവസ്ഥ. എന്ത് ചെയ്യണമെന്ന് ഒരു എത്തുംപിടിയുമില്ല.

‘അപ്പോൾ അവൾ അന്ന് എന്നോട് പറഞ്ഞത് നുണയായിരുന്നു , അവളുടെ അച്ഛന്റെ ഭീഷണിക്കു മുന്നിൽ അവൾക്ക് പിടിച്ച് നിൽക്കാനായിട്ടുണ്ടാവില്ല , പാവം ….. ഈ ഇരുപത്തിഒന്നാം നൂറ്റാണ്ടിലും ജാതിയും മതവും മനസ്സിൽ കൊണ്ടു നടക്കുന്ന ഒരു പരനാറിയാണ് അയാൾ.’

ഞാൻ മനസ്സിൽ വിജാരിച്ചു.

ഞാൻ വേഗം റെയിൽവേ പാളത്തിന്റെ അടുത്തുള്ള കുറ്റിക്കാടിന്റെ ഇടയിലൂടെ ചാടി ഓടി ഒരു ഇടവഴിയിൽ ഒതുക്കി വച്ചിരുന്ന എന്റെ ബൈക്കിന്റെ അടുത്ത് വന്നു.

‘നേരെ അരുണിന്റെ വീട്ടിൽ പോകാം . അവൻ സ്ഥലം SI അല്ലേ , അതു മാതമല്ല എന്റെ ഉറ്റ ചങ്ങാതിയും അവൻ ഇതിന് ഒരു പരിഹാരം കണ്ടുപിടിച്ച് തരും ഉറപ്പ്.’

ഞാൻ അതും മനസ്സിലാലോചിച്ച് ബൈക്ക് എടുക്കാൻ തുനിഞ്ഞതും വീണ്ടും മൊബൈൽ ഫോൺ റിങ് ചെയ്തു . അത് അവനായിരുന്നു എന്റെ സുഹ്യത്ത് അരുൺ . ഞാൻ കോൾ എടുത്തു.

” എടാ നീ എവിടെയാ , ഒന്നും പറയാതെ വീട്ടിൽ നിന്ന് നീ ഇറങ്ങിപ്പോയെന്നും ഫോൺ വിളിച്ചിട്ട് എടുക്കുന്നില്ലെന്നും നിന്റെ അനിയത്തി വിളിച്ച് പറഞ്ഞു. അവർ ആകെ സങ്കടത്തിലാ . ഈ നട്ടപാതിരായ്ക്ക് നീ എവിടെ പോയതാ ?”

ഫോൺ എടുത്ത പാടെ അരുൺ അതും പറഞ്ഞ് എന്നോട് ചൂടായി.

“എടാ അത്…….. എനിക്ക് നിന്നെ അത്യാവശ്യമായി ഒന്ന് കാണണം നീ വീട്ടിലുണ്ടോ ?, നിന്റെ ഒരു ഹെല്പ് വേണം.”

“ഞാൻ വീട്ടിലാണ് നീ നേരെ ഇങ്ങ് പോര് . എന്താടാ ? എന്താ കാരണം.?”

“എടാ ആരതി വിളിച്ചു കുറച്ച് നേരത്തെ. അവൾ അന്ന് അങ്ങനെയൊക്കെ പറഞ്ഞത് അവളുടെ അച്ഛന്റെ ഭീഷണി കാരണമാണ് .അവള് എന്നോട് പറഞ്ഞു വിളിച്ചാൽ ഇറങ്ങിവരാമെന്ന് ”

“എടാ സത്യമാണോ, എന്തായാലും നീ കുറച്ച് ദിവസമായി വട്ട് പിടിച്ച പോലെയല്ലേ നടന്നത് . നീ വേഗം വാ നമുക്ക് ഇന്ന് തന്നെ ഇതിന് തീരുമാനമുണ്ടാക്കാം അവുടെ അച്ഛൻ ഉടക്കിയാൽ അങ്ങേരെ ഞാൻ ശരിയാക്കും എനിക്ക് അത്രക്ക് ദേഷ്യമുണ്ട് അങ്ങേരോടെ , നീ താമസിക്കണ്ട വേഗം വാ……”

അവൻ അത് പറഞ്ഞതും ഞാൻ കോൾ കട്ട് ചെയ്ത് ബൈക്കെടുത്ത് മുന്നോട്ട് ചലിപ്പിച്ചു. അല്പം സ്പീഡിലാണ് എന്റെ ബൈക്ക് പോകുന്നത്. എവിടെ നിന്നോ വന്ന ഒരു കുളിർ കാറ്റ് എന്നിൽ ഒരു വലിയ ആശ്വാസം സമ്മാനിച്ചു , അത് എന്റെ മനസ്സിനെ തണുപ്പിച്ചു. മനസ്സിൽ മുഴുവനും അവളുടെ ചിരിവന്ന് നിറഞ്ഞു. അത് എന്നെ പഴയ ഓർമ്മകളിലേക്ക് കൊണ്ട് പോയി , മൂന്ന് വർഷം മുൻപുള്ള ഒരു ദിവസത്തിലേക്ക്…..

………………………………………………….

ഒരു ഡിഗ്രി കോളേജിന്റെ ഓപ്പോസിറ്റുള്ള ഒരു വെയിറ്റിംഗ് ഷെഡിന്റെ മുൻപിൽ എന്റെ KTM Duke ബൈക്ക് നിർത്തി ഹെൽമറ്റ് തലയിൽ നിന്ന് ഊരി മാറ്റി മുടിയൊക്കെ ഒന്ന് ബൈക്കിന്റെ കണ്ണാടിയിൽ നോക്കി വിരലുകൾ കൊണ്ട് ശരിയാക്കിയ ശേഷം ബൈക്കിൽ തന്നെ ഇരിക്കുകയാണ് ഞാൻ . സമയം വൈകുന്നേരം 4:30 ആയി. കോളേജിന്റെ മെയിൻ ഗേറ്റിലേക്ക് നോക്കിയതും ക്ലാസ്സ് കഴിഞ്ഞ് കുറച്ച് വിദ്യാർത്ഥികൾ പുറത്തേക്ക് വരുന്നുണ്ട് . ചില പയ്യന്മാർ തങ്ങളുടെ ബൈക്കിൽ ചീറിപാഞ്ഞ് പുറത്തേക്ക് വരുന്നു. നടന്നു വരുന്നവർ അങ്ങോട്ടു ഇങ്ങോട്ടും കളി പറഞ്ഞ് ചിരിച്ച് രസിച്ച് വരുകയാണ് ,

‘ ആഹാ ……ജീവതത്തിലെ ഏറ്റുവും സുന്ദരമായ നിമിഷങ്ങൾ കിട്ടുന്നത് കോളേജ് ലൈഫിൽ നിന്നാണ്.’

ഞാൻ മനസ്സിൽ വിജാരിച്ചു.

കോളേജ് ലൈഫ് ,അത് എല്ലാ വിദ്യാർത്ഥികളും ആസ്വദിക്കുന്നുണ്ടെന്ന് അവരുടെ മുഖം കണ്ടാൽ തന്നെ അറിയാം. രണ്ട് പെൺകുട്ടികൾ റോഡ് ക്രോസ് ചെയ്ത് വരുന്നത് കണ്ട് എന്റെ ശ്രദ്ധ അവരിലേക്ക് പോയി. അതിൽ ഒരു പെൺകുട്ടിയെ വ്യക്തമായി കണ്ടതും എന്റെ മനസ്സിൽ ഐസ് കട്ട വാരിയിട്ട അവസ്ഥ ആയിരുന്നു , മുഴുവൻ തണുപ്പും മരവിപ്പും.

ഒരു കറുത്ത ചുരിദാറാണ് അവളുടെ വേഷം. പക്ഷെ അവളുടെ സ്വർണ്ണ നിറമുള്ള സൗന്ദര്യം ആ കറുത്ത ചുരിദാറിനെപ്പോലും പ്രകാശ പൂരിതമാക്കുന്നു. അരവരെ എത്തുന്ന അവളുടെ കാർകൂന്തൽ വിടർത്തി പുറകിലൂടെ ഇട്ടിരിക്കുന്നു. നെറ്റിയിൽ ഒരു ചെറിയ ചന്ദനകുറി . തോളിൽ ഒരു ചെറിയ കോളേജ് ബാഗും . മുഖത്ത് വശ്യതയേറിയ സൗന്ദര്യം. ഞാനവളെ തന്നെ നോക്കിയിരുന്നു. എന്തോ ഒരു കാന്തിക ശക്തിയാൽ എന്നെ അവൾ ആകർഷിക്കുന്നതായി എനിക്ക് തോന്നി . ഞാനവളെ ശ്രദ്ധിക്കുന്നത് അവൾ കണ്ടു.

” ഇവന്മാർക്ക് വേറെ പണിയൊന്നുമില്ലേ , കൃത്യമായി ക്ലാസ്സ് കഴിയുന്ന സമയത്ത് തന്നെ ബൈക്കുമായി കോളേജിന്റെ മുൻപിൽ കാണും പെൺപിള്ളേരെ വായ്നോക്കാൻ . ”

അവൾ ഞാൻ കേൾക്കേ ഉച്ചത്തിൽ ഇതും പറഞ്ഞ് കൊണ്ട് ഒരു പുശ്ച ഭാവത്തിൽ എന്നെ നോക്കിയ ശേഷം എന്റെ ബൈക്കിന് മുന്നിലൂടെ നടന്ന് വെയിറ്റിംഗ് ഷെഡിനുള്ളിൽ കൂട്ടകാരിയുമൊത്ത് കയറി നിന്നു.

എന്റെ പുഞ്ചിരി നിറഞ്ഞു നിന്ന മുഖത്ത് ഒരു ദേഷ്യം കലർന്ന ഭാവം വന്നു നിറഞ്ഞു . ആ ഭാവത്തിൽ ഞാൻ അവളെ ഒന്ന് നോക്കിയ ശേഷം കോളേജിന്റെ മെയിൻ ഗേറ്റിലേക്ക് വീണ്ടും ശ്രദ്ധ തിരിച്ചു.

അപ്പോഴാണ് ഞാൻ കാത്ത് നിന്ന ആൾ റോഡ് ക്രോസ് ചെയ്ത് വരുന്നത് കണ്ടത്.

“നിനക്ക് നേരത്തേ വന്നാലെന്താ എന്നെ ഇട്ട് ബുദ്ധിമുട്ടിക്കാനായിട്ട് .”

കണ്ടപാടെ ഞാനവളോട് ചൂടായി…

” എന്താ ചേട്ടാ നല്ല കലിപ്പിലാണല്ലോ , വല്ല പെൺപിള്ളേരും കരണത്ത് അടിവല്ലതും തന്നോ ? ”

അവൾ അതു പറഞ്ഞതും ഞാനവളുടെ മുഖത്തേക്ക് ദേഷ്യഭാവത്തിൽ സൂക്ഷിച്ച് നോക്കി.

“എന്റെ പൊന്നോ ഞാൻ ചുമ്മാ പറഞ്ഞതാ ……., വീട്ടിൽ ചേട്ടന് ഒരു പണിയുമില്ലാതെ വെറുതേ ഇരിക്കുകയല്ലേ അതുകൊണ്ടാ എന്നെ പിക്ക് ചെയ്യാൻ വരാൻ പറഞ്ഞത്. ഇനി ഈ ആവശ്യം ഞാൻ പറയില്ല , ഞാൻ എന്നത്തെയും പോലെ ബസിൽ വന്നോളാം. ”

ഒരു കുറുമ്പ് ദേഷ്യത്തോടെ ഇത്രയും പറഞ്ഞ് ബാഗ് എന്റെ കയ്യിൽ തന്ന ശേഷം അവൾ ബൈക്കിന്റെ പുറകിൽ കയറി ഇരുന്നു. ഞാൻ ബാഗ് മുൻപിൽ വച്ച ശേഷം ഞങ്ങൾ സംസാരിച്ചതെല്ലാം കേട്ട് നിന്ന ആ സുന്ദരിയെ ഒന്നുകൂടെ ദേഷ്യഭാവത്തിൽ നോക്കിയ ശേഷം ഹെൽമറ്റ് തലയിൽ വച്ച് ബൈക്ക് സ്റ്റാർട്ട് ചെയ്ത് മുന്നോട്ട് എടുത്തു. അവൾ അപ്പോൾ എന്നെ ഏതോ അന്യഗ്രഹജീവിയെ നോക്കുന്ന മട്ടിൽ കണ്ണും മിഴിച്ച് നോക്കി നിൽക്കുയാണ്.

“എന്തിനാ ചേട്ടാ ആ ചേച്ചി ചേട്ടനെ കണ്ണും മിഴിച്ച് നോക്കി നിന്നത് , ഞാൻ കണ്ടു. അവളാണോ ചേട്ടന്റെ ദേഷ്യത്തിന് കാരണം. ”

ഞാൻ ബൈക്ക് ഓടിക്കുന്നതിനിടയിൽ അവൾ എന്നോട് ചോദിച്ചു.അവൾ അതു ചോദിച്ചപ്പോൾ ഞാൻ തൊട്ട് മുൻപ് നടന്ന കാര്യം അവളോട് പറഞ്ഞു.

“അപ്പൊ ചേട്ടനെ പൂവാലനെന്ന് ആ പെൺകുട്ടി തെറ്റിദ്ധരിച്ചതാണ് ഈ കലിപ്പിന് കാരണം .അല്ലേ …………….”

അവൾ ഇതും പറഞ്ഞ് കുടുകുടാ പൊട്ടിചിരിച്ചു അവളുടെ ആ ചിരി കേട്ട എന്റെ മുഖത്ത് വീണ്ടും പുഞ്ചിരി നിറഞ്ഞു.

ഇനി എന്നെ പറ്റി പറയാം. എന്റെ പേര് നീരജ് ജോസഫ് (25), കുറച്ച് കോഴ്സുകൾ കംപ്ലീറ്റ് ചെയ്ത് ജോബ് റാങ്ക് ലിസ്റ്റിൽ കോളേജ് ലച്ചറർ പോസ്റ്റിൽ പേര് വന്നിട്ട് കുറച്ച് മാസങ്ങളായി. ഏതെങ്കിലും ഒരു കോളേജിൽ അപ്പോയിൻമെന്റിനായി കാത്തിരിക്കുന്നു. എന്റെ ബൈക്കിന്റെ പുറകിൽ ഇരിക്കുന്നത് എന്റെ അനിയത്തിക്കുട്ടി നീനു ജോസഫ് അവൾ ഈ കോളേജിൽ ഫസ്റ്റ് ഇയറിന് പഠിക്കുന്നു. അവൾ എനിക്ക് അനിയത്തി മാത്രമല്ല എല്ലാ കാര്യങ്ങൾക്കും കുരുത്തക്കേടിനും എന്റെ കൂടെ നിൽക്കുന്ന ബെസ്റ്റ് ഫ്രണ്ടും കൂടെയാണ് . പപ്പ ഒരു ഹൈസ്കൂൾ പ്രിൻസിപ്പാൾ ആണ് ജസ്റ്റിൻ ജോസഫ് . പപ്പയുടെ പിടിവാശി കാരണമാണ് ഞാൻ ഈ പ്രൊഫഷൻ തിരഞ്ഞെടുത്തത് അല്ലെങ്കിൽ ഞാൻ ഏതെങ്കിലും ഐ.റ്റി കമ്പനിയിൽ എപ്പോഴേ കയറി കൂടുമായിരുന്നു. കമ്പ്യൂട്ടർ എജിനീയറിംഗ് പഠിക്കാൻ പോകണമെന്ന് പറഞ്ഞപ്പോൾ പപ്പ എന്നോട് പറഞ്ഞത് ഇതാണ്.

“എന്റെ പപ്പയും ഞാനും അദ്യാപകരായിരുന്നു നീയും അത് തിരഞ്ഞെടുത്താൽ മതി.”

പപ്പയുടെ വാക്ക് ഒന്നൊന്നര വാക്കാണ് എനിക്ക് അത് എതിർക്കാനുള്ള ദൈര്യം ഇല്ലായിരുന്നു. പിന്നെ കമ്പ്യൂട്ടർ സയന്സിനോട് താല്പര്യം ഉള്ളത് കൊണ്ട് TTC ക്ക് അത് തന്നെ ഞാൻ തിരഞ്ഞെടുത്തു. പിന്നെ അമ്മ ,മേരി ജസ്റ്റിൻ ജോസഫ് . മകൻ അദ്യാപകനാവണമെന്ന് പറയുന്ന പപ്പ സ്വന്തം ഭാര്യയുടെ കാര്യത്തിലും ആ കർകശ ബുദ്ധി തന്നെ ഉപയോഗിച്ചു , അമ്മ അടുത്തുള്ള ഒരു സ്കൂളിൽ ടീച്ചറാണ്.

ഓരോന്നാലോചിച്ചപ്പോഴേക്കും വീടെത്തിയിരുന്നു. ഞാൻ മെയിൻ ഗേറ്റ് കടന്ന് പോർച്ചിൽ ബൈക്ക് നിർത്തിയതും അവൾ ചാടി ഇറങ്ങി വീടിന് അകത്തേക്ക് ഓടി .

“നിനക്ക് ബാഗ് വേണ്ടേ ………… ”

” ഒന്ന് കൊണ്ടു വാ , വലിയ ഭാരമൊന്നുമില്ലല്ലോ ”

ഓടുന്നതിനിടയ്ക്ക് അവൾ വിളിച്ച് പറഞ്ഞു.

‘കോളേജിൽ പഠിക്കുകയാണ് സ്വഭാവം LP സ്കൂൾ പിള്ളേരുടേതും ‘.

ഞാൻ അതും മനസ്സിൽ വിചാരിച്ച് ബാഗുമെടുത്ത് അകത്ത് കയറി. ഹാളിലെ ടേബിളിൽ ബാഗ് വച്ച ശേഷം റൂമിൽ കയറി ഫ്രഷായി. കുളിക്കുന്ന നേരം കണ്ണടയ്ക്കുമ്പോൾ മുഖത്ത് വരുന്നത് അവളുടെ മുഖമാണ് ആ സൂക്ഷിച്ചുള്ള നോട്ടമാണ്.

‘ ഞാൻ എന്തിനാ അവളെ കുറിച്ച് ആലോചിക്കുന്നത്. എന്തിനാ അവളുടെ മുഖം മനസ്സിൽ വരുന്നത് , ഈ ഇരുപത്തിഅഞ്ചാം വയസ്സിലാണോ ഇതുവരെ ആരോടും തോന്നാത്ത പ്രേമം തോന്നുന്നത്. അതും അവളോട് , ഹോ അതിനെയൊക്കെ കെട്ടിയാൽ എന്റെ ജീവിതം കട്ട പുകയാകും. ‘

ഞാൻ കുളിച്ച് ഒരു ട്രോക്ക് പാന്റും റ്റി ഷർട്ടും ഇട്ട് നേരെ ബഡിൽ കയറി ഇരുന്ന് മൊബൈൽ ഫോൺ കയ്യിലെടുത്ത് അതും നോക്കി ഇരുന്നു. അപ്പോഴാണ് റൂമിന്റെ കതകു തുറന്ന് ഒരാൾ വരുന്നതായി തോന്നിയത് വേറാരുമല്ല എന്റെ കുറുമ്പി പെങ്ങൾ തന്നെ . ഓടി വന്ന് ബഡിൽ കയറി എന്റെ മടിയിൽ തലവച്ചു കിടന്നു.

“എന്താ ….എന്ത് സോപ്പിടാനുള്ള ഭാവമാ ?”

ഞാൻ അവളോട് ചോദിച്ചു.

” അത് ………. നാളെയും വരുമോ എന്നെ കൂട്ടാൻ കോളേജിൽ . ബസ്സിലെ തിരക്കിൽ നിന്ന് മടുത്തു. രാവിലെ ഇത്രയും തിരക്കില്ല സീറ്റു കിട്ടും. വൈകിട്ട് ഭയങ്കര തിരക്കാ കോളേജിൽ നിന്ന് കേറുന്ന പിള്ളേരെക്കൊണ്ട് . തൂങ്ങി പിടിച്ച് നിന്നാ ഞാൻ വരുന്നത് അറിയോ ?”

അവൾ ഇത്രയും എന്റെ മുഖത്തേക്ക് നോക്കി ഒരു കുസ്യതിയോടെ പറഞ്ഞു.

“ആ നോക്കട്ടെ പറ്റുമെങ്കിൽ വരാം.”

” ഓ ഇവിടെ മലമറിക്കുന്ന ജോലിയല്ലേ…….പിന്നെ ആ ചേച്ചിയെ ഇഷ്ടമായോ, കോളേജിൽ സീനിയറാ വേറെ ഡിപ്പാർട്ട്മെന്റ് .ഞാൻ കോളേജിൽ വച്ച് കണ്ടിട്ടുണ്ട്. വേണമെങ്കിൽ ചേട്ടന് വേണ്ടി കല്യാണം ആലോചിക്കാം . പക്ഷെ ഒരു കുഴപ്പമുണ്ട് പുള്ളിക്കാരി ഹിന്ദുവാണ്, നെറ്റിയിൽ കിടക്കുന്ന ചന്ദനക്കുറി കണ്ട് മനസ്സിലാക്കിയതാണ്. അത് പ്രശ്നമില്ല നമുക്ക് മതില് ചാടിക്കാം . ”

അവൾ അത്രയും ചിരിച്ചു കൊണ്ട് പറഞ്ഞ് ബഡിൽ എഴിച്ചിരുന്നു.

“നീ ആള് കൊള്ളാമല്ലോ? നമ്മൾ തമ്മിൽ ആറ് വയസ്സിന്റെ വ്യത്യാസമുണ്ട് . ഞാൻ നിന്റെ ചേട്ടനാ അല്ലാതെ നീ എന്റെ ചേച്ചിയല്ല കേട്ടോ …..അവള് കല്യാണം ആലോചിക്കാൻ വന്നിരിക്കുന്നു.”

ഞാൻ അവളുടെ ചെവിയിൽ ചെറിയ ഒരു നുള്ള് കൊടുത്തു കൊണ്ട് പറഞ്ഞു.

“കാലമാടൻ, ഒരു വലിയ ചേട്ടൻ വന്നിരിക്കുന്നു. പോടാ പൂവാലാ……… വായിനോക്കി……”

അവൾ അതും പറഞ്ഞ് റൂമിന്റെ പുറത്തേക്ക് ഓടി ഇനി ഇവിടെ നിന്നാൽ വീണ്ടും നുള്ള് കിട്ടുമെന്ന് അവൾക്ക് തോന്നിയിട്ടുണ്ടാകും…

“എടാ ഇത് ഇപ്പോ മൂന്ന് നാല് മാസമായില്ലേ ലിസ്റ്റിൽ പേര് വന്നിട്ട് . ഇനി എന്നാണോ ഒരു കോളേജിൽ കയറികൂടാൻ പറ്റുക . ”

ഞങ്ങൾ രാത്രി അത്താഴം കഴിക്കുന്നതിനടയ്ക്ക് പപ്പ എന്നോട് ചോദിച്ചു.

“ഉടനെ ഉണ്ടാകും പപ്പ , ഞാൻ അനേഷിച്ചപ്പോൾ അങ്ങനെയാ അറിഞ്ഞത് . ”

” ചേട്ടനെ ആർക്കും വേണ്ടായിരിക്കും പപ്പാ . ചേട്ടൻ പഠിപ്പിക്കുന്ന പിള്ളേരുടെ കാര്യമോർത്ത് സങ്കടം വരുന്നു.”

അപ്പൊതന്നെ അവൾ കമന്റടിച്ചു.

“എടി നിന്നെ . ”

ഞാൻ അവളെ നുള്ളാനായി കയ്യെടുത്തതും കയ്യിലിരുന്ന പ്ലേറ്റ് അവിടെ വച്ച് അവൾ കൈകഴുകാനായി ഓടി .

” അനുഭവിച്ചോ …… കുഞ്ഞ് പെങ്ങൾ എന്നും പറഞ്ഞ് കൊഞ്ചിച്ച് വഷളാക്കിയതല്ലേ നീ …”

അമ്മ അതും എന്നോട് പറഞ്ഞ് അവൾ കഴിച്ചിട്ട് വച്ച പ്ലേറ്റുമെടുത്ത് അടുക്കളയിലേക്ക് പോയി.

……..

സൂര്യന്റെ ചെറിയ കിരണങ്ങൾ ജനാല വഴി എന്റെ മുഖത്ത് പതിച്ചപ്പോൾ ഞാൻ പുതപ്പ് തലവഴി മൂടി തിരിഞ്ഞ് കിടന്നു.

” ഇതുവരെ എണീറ്റില്ലേ , ഇത്രയും വയസ്സായിട്ടും പോത്തു പോലെ കിടന്നുറങ്ങുന്നു സമയം 8:30 ആയി , കോഴി കൂവിയതൊന്നും കേട്ടില്ലേ എന്റെ പുന്നാര ചേട്ടൻ .”

നീനു അതും പറഞ്ഞ് ഞാൻ തലവഴി മൂടിയ പുതപ്പ് വലിച്ചെടുത്തു.

“കഷ്ടമുണ്ട് കേട്ടോ ഞാൻ കുറച്ച് കൂടെ ഉറങ്ങട്ടെ നീനു …….”

“ഉറങ്ങിയതൊക്കെ മതി.”

അവൾ അതും പറഞ്ഞ് എന്നെ ബെഡിൽ നിന്ന് പിടിച്ച് എണീപ്പിച്ചു.

“ഞാൻ കോളേജിൽ പോകുവാ വൈകുന്നേരം ഇന്നലത്തെപ്പോലെ കോളേജിന്റെ മുൻപിൽ ഉണ്ടാകണം. ”

അവൾ ഉത്തരവിടുന്ന ഭാവത്തിൽ എന്നോട് പറഞ്ഞ് റൂമിന്റെ പുറത്തേക്ക് പോയി . ഞാൻ എഴുന്നേറ്റ് എന്റെ കാര്യങ്ങളിലേക്കും തിരിച്ചു.

………

വൈകിട്ട് ഇന്നലത്തെ സമയത്തിന് ഞാൻ കോളേജിന്റെ ഫ്രണ്ടിൽ എത്തി ആ സ്ഥലത്തു തന്നെ ബൈക്ക് നിർത്തി അതിൽ ഇരുന്നു. കോളേജിന്റെ മെയിൻ ഗേറ്റിലൂടെ നോക്കിയപ്പോൾ ഇന്നലെ കണ്ട ആ സുന്ദരിയും കൂട്ടുകാരിയും അകത്ത് നിന്ന് നടന്നു വരുന്നത് കണ്ടു.

‘ഇനിയും അവളെ നോക്കിയാൽ ഇന്നലെ കേട്ടതുപോലെ കേൾക്കേണ്ടിവരും . എന്തിനാ വെറുതേ പുലിവാല് പിടിക്കുന്നേ …..’

എന്ന് ഞാൻ മനസ്സിൽ വിജാരിച്ച് പോക്കറ്റിൽ നിന്ന് മൊബൈൽ ഫോൺ എടുത്ത് അതിലേക്ക് നോക്കി കൊണ്ടിരുന്നു. കുറച്ച് കഴിഞ്ഞപ്പോൾ ഒരു കൈ എന്റെ തോളിൽ വന്ന് പതിച്ചു. മറ്റാരുമല്ല എന്റെ കുറുമ്പി പെങ്ങൾ തന്നെ.

“എന്താ ഫോണിൽ ഇത്രയ്ക്ക് തിരയാൻ ആരെങ്കിലും നമ്പർ വല്ലതും തന്നോ .”

ഞാൻ തിരിഞ്ഞു നോക്കിയ പാടെ നീനു എന്റോടെ ചോദിച്ചു.

“ഒന്നു പോടി….. ”

ഞാനതും പറഞ്ഞ് അവളുടെ കയ്യിൽ നിന്ന് ബാഗ് വാങ്ങിച്ചു.

“അപ്പൊ എന്നെ അനുസരിക്കാനൊക്കെ അറിയാം അല്ലെ .”

നീനു അതും പറഞ്ഞ് ബൈക്കിന്റെ പുറകിൽ കയറി. ഞാൻ ഹെൽമറ്റ് തലയിൽ വച്ച് നേരെ ബൈക്ക് എടുത്തു . ഇന്ന് ആ സുന്ദരിയെ ഞാൻ മൈന്റ് പോലും ചെയ്തില്ല.

“ചേട്ടാ ആ ചേച്ചി ഇന്നലത്തെ പോലെ ചേട്ടനെ നോക്കുന്നുണ്ടല്ലോ എന്താ വല്ല ഉടക്കും ഉണ്ടായോ? ”

” ഞാൻ അവളുടെ മുഖത്ത് പോലും നോക്കിയില്ല പിന്നെയല്ലേ ഉടക്ക്, നീ ഇന്നലെ തൊട്ട് തുടങ്ങിയതാണല്ലോ ഈ കാര്യത്തിന്റെ പിന്നാലെ, ഒന്നു വിട്ട് കള എന്റെ നീനു .

ഞാൻ ബൈക്ക് ഓടിക്കുന്നതിനിടയ്ക്ക് അവളോട് പറഞ്ഞു. കുറച്ച് മുന്നോട്ട് പോയപ്പോൾ ഒരു പോലീസിന്റെ ബൊലേറൊ എന്റെ ബൈക്കിനെ ഓവർട്ടേക്ക് ചെയ്ത് ബൈക്കിന് കുറുകെ നിർത്തി. ഞാൻ ബ്രേക്കിട്ട് ബൈക്ക് പെട്ടെന്ന് നിർത്തി. സത്യത്തിൽ ഞാനൊന്ന് പേടിച്ചു കാരണം സിനിമയിൽ മാത്രം കണ്ടിട്ടുള്ള സീൻ ദാ എന്റെ റിയൽ ലൈഫിലും .

“എന്താ ചേട്ടാ പ്രശ്നം ”

ചെറിയ ഒരു പേടിയോടെ നീനു ചോദിച്ചു.

” അറിയില്ല നീ ഇറങ്ങ് ”

നീനു ഇറങ്ങിയതും ഞാനും ബൈക്കിൽ നിന്ന് ഇറങ്ങി.

ബൊലേറയുടെ മുൻപിൽ നിന്ന് ഇറങ്ങിയ ആളിലെ കണ്ടപ്പോൾ എനിക്ക് ചിരിയാണ് വന്നത്.

അരുണായിരുന്നു അത്. ഡിഗ്രി കോളേജ് ലൈഫിൽ എന്റെ ഉറ്റ ചങ്ങാതി . കോളേജ് കഴിഞ്ഞിട്ടും ഫ്രണ്ട്ഷിപ്പ് കട്ടാവാതെ നിന്നത് ഇവനുമായിട്ട് മാത്രമാണ്. കാരണം അത്രയ്ക്ക് കൂട്ടായിരുന്നു ഞങ്ങൾ. പഠിക്കുന്ന സമയത്ത് ക്ലാസ്സ് കട്ട് ചെയ്ത് സിനിമയ്ക്ക് പോകാനും കോളേജിൽ ആവശ്യമുള്ളതിനും ഇല്ലാത്തതിനും ഒക്കെ അടിയുണ്ടാകാനും ഞങ്ങൾ ഒരുമിച്ചായിരുന്നു.

” അളിയാ ……”

അവൻ അതും വിളിച്ച് ഓടി വന്ന് എന്നെ കെട്ടിപ്പിടിച്ചു.

“മൊട്ടെ നീയായിരുന്നോ സത്യത്തിൽ ഞാൻ പേടിച്ചു പോയി. മനുഷ്യനെ വണ്ടീന്ന് തള്ളിയിട്ട് കൊല്ലുമോ നീ ..” (കോളേജിലെ അരുണിന്റെ വട്ടപ്പേരാണ് മൊട്ട)

“എടാ എന്നെ നാണം കെടുത്താതെ . നീ എന്നെ ഇനി മൊട്ട എന്ന് വിളിക്കരുത് ഞാനിവിടത്തെ സ്ഥലം S I ആയിട്ട് ചാർജ് എടുത്തതേ ഉള്ളൂ ….”

” ഇല്ലടാ …… ഇനി ഞാനങ്ങനെ വിളിക്കില്ല. പെട്ടെന്ന് കണ്ടപ്പോ നാവില് അതേ വന്നുള്ളൂ. പിന്നെ നിന്റെ ലക്ക് തന്നെ ആദ്യ പോസ്റ്റിംഗ് സ്വന്തം നാട്ടിൽ .പിന്നെ നീ എന്താ ഇത് എന്നെ വിളിച്ച് പറയാത്തെ . ”

“എടാ സർപ്രൈസ് കൊടുക്കുന്നത് എന്റെ വീക്കനസ് ആയിപ്പോയി അത് വിട്. പെങ്ങളെ സുഗം തന്നെ. ” അവൻ നീനുവിന്റോടെ ചോദിച്ചു.

” അതെ, ചേട്ടാ ”

” എടാ പിന്നെ നിങ്ങൾ വിട്ടോ പിന്നെ കാണാം ഞാൻ ഒരു ദിവസം വീട്ടിലോട്ട് വരാം. നീ പോകുന്നത് കണ്ടപ്പോൾ ഒരു സർപ്രൈസ് ആയിക്കോട്ടെ എന്ന് കരുതി ചെയ്തതാ , ഇത്തിരി തിരക്കുണ്ട് ഡ്യൂട്ടിയിലാ അപ്പൊ ശരി കാണാം , .”

അവൻ അതും പറഞ്ഞ് വണ്ടിയിൽ കേറി സ്ഥലം വിട്ടു. ഞങ്ങൾ ബൈക്കിൽ കയറി വീട്ടിലേക്കും.

“കണ്ടോ കൂടെ പഠിച്ചവർക്കൊക്കെ ജോലി കിട്ടി. എന്റെ ചേട്ടൻ മാത്രം വീട്ടിൽ ഇരുന്ന് ഈച്ച അടിക്കുന്നു.”

ബൈക്ക് ഓടിക്കുന്നതിനിടയ്ക്ക് ഒരു പരിഭവം കണക്കെ നീനു എന്നോട് പറഞ്ഞു.

“എനിക്കും ഒരു ദിവസം വരും നീനു. ”

വീട്ടിലെത്തിയതും പപ്പ വീടിന്റെ ഫ്രണ്ടിൽ തന്നെ ഉണ്ടായിരുന്നു.

“എന്താ പപ്പാ നേരത്തെ വന്നോ .”

ഞാൻ ബൈക്ക് നിർത്തി ഇറങ്ങിയതും പപ്പ വന്ന് എന്റെ നെറ്റിയിൽ ഒരുമ്മ തന്ന ശേഷം ഒരു രജിസ്റ്റേഡ് ലെറ്റർ എന്റെ കയ്യിൽ തന്നു.

കവറ് പൊട്ടിച്ച് പപ്പനേരത്തെ വായിച്ചിരുന്നുവെന്ന് കവർ പൊട്ടിച്ചിരിക്കുന്നത് കണ്ടപ്പോൾ മനസ്സിലായി . ഞാനത് തുറന്ന് വായിച്ചു.

“എന്താ ചേട്ടാ ഇതില് …. ഇട്ട് ടെൻഷനടിപ്പിക്കാതെ ഒന്ന് പറ . ”

നീനു കാര്യമറിയാൻ തിരക്ക് കൂട്ടി.

“അപ്പോയിൻമെന്റ് ലെറ്ററാ ……. ഫസ്റ്റ് പോസ്റ്റിംഗ് നിന്റെ കോളേജിൽ . ”

ഞാനത് പറഞ്ഞതും തുള്ളിച്ചാടുന്ന നീനുവിനെയാണ് ഞാൻ കണ്ടത് . വേറൊന്നുമല്ല ‘ എന്റെ ചേട്ടൻ ഇവടത്തെ ലക്ചററാ’ എന്ന് ഗമയിൽ കൂട്ടുകാരികളോട് പറഞ്ഞ് ഷൈൻ ചെയ്യാമല്ലോ .

” കൺഗ്രാറ്റ്സ് ചേട്ടാ .”

അവൾ അതും പറഞ്ഞ് ഓടി വന്ന് എനിക്ക് ഒരു ഷേക്കന്റ് തന്ന് എന്നെ കെട്ടിപ്പിടിച്ചു.

“ഉച്ചയ്ക്ക് പോസ്റ്റോഫീസിലെ രാഘവേട്ടൻ വിളിച്ചിരുന്നു. വിവരം അറിഞ്ഞപ്പോൾ ഞാൻ ഇങ്ങ് പോന്നു. നന്നായി നീ ഒരു കര പറ്റിയല്ലോ …. ”

പപ്പ അതും പറഞ്ഞ് എന്റെ തോളിൽ തട്ടി വീടിന്റെ അകത്ത് കയറി പോയി.

…………

“ജോയിൻ ചെയ്യാൻ ഒരാഴ്ച സമയമുണ്ട് നീ താമസിക്കാതെ നാളെ തന്നെ കേറിക്കോ . എന്തിനാ വെറുതേ വീട്ടിൽ ഇരുന്ന് സമയം കളയുന്നേ…”

രാത്രി ഭക്ഷണം കഴിക്കുന്ന സമയത്ത് പപ്പ പറഞ്ഞു. പപ്പ അത് പറഞ്ഞപ്പോൾ ഞാൻ ഞെട്ടി നാളെ തൊട്ട് കോളേജിൽ, എന്താവുമോ …..എന്തോ ……..?

“നിനക്ക് അവിടെ തന്നെ കിട്ടിയത് നന്നായി നാളെ തൊട്ട് രണ്ട് പേർക്കും ഒരുമിച്ച് പോയി വരാമല്ലോ. അതു മാത്രമല്ല ഇനിതൊട്ട് ഇവൾ കോളേജിൽ എന്തൊക്കെ കുരുത്തക്കേടാണ് ഉണ്ടാക്കുന്നത് എന്ന് പെട്ടെന്ന് മനസ്സിലാക്കാനും പറ്റും. ”

അമ്മ അത് പറഞ്ഞപ്പോൾ കഴിച്ചു കൊണ്ടിരുന്ന നീനുവിന്റെ മുഖത്ത് ഒരു കള്ള ചിരി വന്നു.

“എന്താടി ചിരിക്കുന്നേ? ”

ഞാൻ അവളോട് ചോദിച്ചു.

“വേറെയൊന്നുമല്ല എന്റെ ചേട്ടൻ കോളേജിൽ ഒപ്പിക്കുന്ന കുരത്തക്കേട് എനിക്കും കണ്ടുപിടിക്കാൻ പറ്റും. ”

“നിന്നെ ഞാൻ ”

ഞാൻ കൈ പൊക്കിയതും നീനു പ്ലേറ്റും ടേബിളിൽ വച്ചിട്ട് അവിടുന്ന് ഓടി.

…………..

രാവിലെ എന്റെ റൂമിൽ വരുന്ന നീനു കാണുന്നത് റെഡിയായി നിൽക്കുന്ന എന്നെയാണ്.

“എന്റെ കർത്താവേ …… ഞാൻ എന്താ കാണുന്നേ അപ്പൊ എന്റെ ചേട്ടന് നേരത്തെ എഴുന്നേറ്റ് റെഡിയാവനൊക്കെ അറിയാം അല്ലെ .”

ഞാൻ അവളുടെ തലയിൽ ഒരു കൊട്ടും കൊടുത്ത് എന്റെ ഹാന്റ്ബാഗും എടുത്ത് ഹാളിലേക്ക് പോയി പിന്നാലെ നീനുവും വന്നു. ഞങ്ങൾ ഒരുമിച്ച് ബ്രേക്ഫാസ്റ്റ് കഴിച്ച ശേഷം ഞാൻ പപ്പയുടെയും അമ്മയുടെയും അനുഗ്രഹവും വാങ്ങി നേരെ പുറത്തേക്ക് ഇറങ്ങി.

“എടാ കാറിൽ പൊയ്ക്കോ ”

ഇങ്ങിയപാടെ പപ്പ പറഞ്ഞു.

“അപ്പൊ പപ്പയും അമ്മയും എങ്ങനെ പോകും. ഞങ്ങൾ ബൈക്കിൽ പോവാം അതാ രസം .”

“എന്നാൽ ശരി”

ഞാൻ ബൈക്ക് എടുത്തതും നീനു ഓടി വന്ന് പുറകിൽ കയറി. ഞങ്ങൾ കോളേജിലേക്ക് തിരിച്ചു.

” ഇങ്ങനത്തെ മോഡേൺ ബൈക്കിൽ കാേളേജിൽ വരുന്നതിൽ സാറുമ്മാരിൽ ചേട്ടൻ മാത്രമേ കാണൂ. ”

കോളേജ് എത്താറായപ്പോൾ നീനു പറഞ്ഞു. അങ്ങനെ കോളേജെത്തി. പുറത്തു നിന്നു കണ്ടിട്ടുള്ളതല്ലാതെ ഞാൻ ഇതുവരെ ഇതിന്റെ ഉള്ളിൽ കയറിയിട്ടില്ല. ഞാൻ ഡിഗ്രിക്ക് കുറച്ച് അകലെയുള്ള കോളേജിലാണ് അഡ്മിഷനെടുത്തത്. അടുത്ത് ഇത്രയും വലിയ കോളേജുണ്ടായിട്ട് കയറാൻ പറ്റിയത് ഇപ്പോഴാണ് .

ഞാൻ നേരെ സ്റ്റാഫുകളുടെ പാർക്കിംഗ് ഏരിയയിൽ ബൈക്ക് ഒതുക്കി.

” ഇവിടെ പറ്റില്ല കുട്ടികൾക്ക് അപ്പുറത്താപാർക്കിംഗ് .”

ഒരു അറുപത് വയസ്സ് പ്രായം തോന്നിക്കുന്ന കോളേജ് സെക്യൂരിറ്റി എന്റോടെ പഞ്ഞു.

“അങ്കിളെ , ഞാൻ ഇവിടെ പുതുതായി വന്ന സാറാ .”

“ക്ഷമിക്കണം കണ്ടിട്ട് തോന്നിയില്ല , ഈ കുട്ടി ഇവിടെ പഠിക്കുന്നതല്ലേ ?”

അയാൾ നീനുവിനെ ചൂണ്ടി ചോദിച്ചു.

” അതെ , എന്റെ അനിയത്തിയാ..”

ഞാൻ മറുപടി നൽകി.

” ആ ശരി ”

അയാൾ അതും പറഞ്ഞ് അടുത്തുള്ള സെക്യൂരിറ്റി റൂമിലേക്ക് പോയി. ഞങ്ങൾ നേരത്തെയാണ് വന്നത്, ഓഫീസിലുള്ള ഫോർമാലിറ്റീസ് തീർക്കണമല്ലോ, കുട്ടികളൊക്കെ വരുന്നതേ ഉള്ളൂ.

” നീനു എവിടെയാ ഓഫീസ് റൂം ”

“വാ … കാണിച്ചു തരാം ”

നീനു അതുപറഞ്ഞ് മുന്നേ നടന്നു ഞാൻ അവളെ അനുഗമിച്ചു.

” നീനൂ…………….”

അപ്പോഴാണ് പുറകിൽ നിന്ന് ഒരു പെൺകുട്ടിയുടെ വിളികേട്ടത്. ഞാനും നീനുവും തിരിഞ്ഞ് നോക്കി. അത് നീനുവിന്റെ കൂട്ടുകാരിയായിരുന്നു.

” നീ എന്താ നേരത്തെ ….., ഇതാരാ ….. ”

ഓടികിതച്ചു വന്ന ആ പെൺകുട്ടി കിതപ്പ് മാറാതെ ചോദിച്ചു.

“ആ … ഇതെന്റെ ചേട്ടനാ , നീരജ് . ഇന്ന് ഇവിടെ ജോയിൻ ചെയ്യുകയാ . ലച്ചറർ പോസ്റ്റിൽ …”

“ഗുഡ് മോണിംഗ് സർ , ഏതാ ഡിപ്പാർട്ട്മെന്റ് ”

” കമ്പ്യൂട്ടർ സയൻസ് ”

ആ പെൺകുട്ടി ചോദിച്ചതിന് ഞാൻ ഉത്തരം നൽകി.

“ഞാൻ ചേട്ടനെ ഓഫീസ് റൂമിൽ ആക്കീട്ട് വരാം , ”

നീനു ആ പെൺകുട്ടിയോട് പറഞ്ഞ് മുന്നേ നടന്നു ഞാനും പിന്നാലെ നടന്നു.

“ചേട്ടൻ എന്റെ ഡിപ്പാർട്ട്മെന്റിൽ ആയിരുന്നെങ്കിൽ എനിക്കൊന്ന് ഷൈൻ ചെയായിരുന്നു. ”

നീനു നടക്കുന്നതിനിടയ്ക്ക് എന്നോട് പറഞ്ഞു.

” അതിന് ഞാൻ ആദ്യമേ നിന്റോടെ പറഞ്ഞതല്ലേ ഇവിടെ CS എടുത്ത് പഠിക്കാൻ , നീ വേറെ എടുത്തത് എന്റെ കുറ്റമല്ലല്ലോ.”

“അത് എന്റെ ഇഷ്ടം …….”

ഞാൻ പറഞ്ഞ ഉടനെ നീനു അതും പറഞ്ഞ് എന്നെ തിരിഞ്ഞ് നോക്കി.

“ദാ ……… അതാ ഓഫീസ് റും, ഞാൻ ഇന്റർവെല്ലിന് ചേട്ടന്റെ ഡിപ്പാർട്ട്മെന്റിൽ വരാം അപ്പൊ ശരി, ഉം..ഗുഡ് ലക്ക് . ”

അവൾ അതും പറഞ്ഞ് ഒരു ഷേക്കന്റും തന്ന് വന്ന വഴിയേ തിരിച്ചു പോയി.

ഞാൻ ഓഫീസിൽ കയറി അവിടുത്തെ സ്റ്റഫിനെ കണ്ടു.

“സർ പ്രിൻസിപ്പാൾ ഇപ്പോ എത്തും അദ്ദേഹം വന്നാലെ രജിസ്റ്ററിൽ പേര് ചേർക്കാൻ പറ്റൂ ഒന്ന് വെയ്റ്റ് ചെയ്യുമോ ……

അവിടെ ഉണ്ടായിരുന്ന ഒരു മെയിൽ സ്റ്റാഫ് എന്നോട് പറഞ്ഞു. ഞാൻ അടുത്തുള്ള വിസിറ്റിറ്റേഴ്സ് ഏരിയയിലെ ചെയറിൽ സ്ഥാനം പിടിച്ചു.

കുറച്ച് കഴിഞ്ഞപ്പോൾ ഒരു മദ്യവയസ്കനായ വ്യക്തി പ്രിൻസിപ്പാളിന്റെ റൂമിൽ കയറി പോകുന്നത് ഞാൻ കണ്ടു. ഡ്രസിംഗും മറ്റും വായിച്ചെടുത്തപ്പോൾ അത് പ്രിൻസിപ്പാൾ ആണെന്ന് എനിക്ക് മനസ്സിലായി. എന്റോടെ സംസാരിച്ച ഓഫീസ് സ്റ്റാഫ് പ്രിൻസിപ്പാളിന്റെ റൂമിൽ പോയ ശേഷം തിരിച്ചു വന്നു.

“സർ അകത്തേക്ക് പോയിക്കൊള്ളൂ പ്രിൻസിപ്പാൾ വിളിക്കുന്നു . ”

അയാൾ അത് പറഞ്ഞതും ഞാൻ പ്രിൻസിപ്പാളിന്റെ റൂമിലേക്ക് ചെന്നു.

“മെ ഐ കമിഗ് സർ ”

” യെസ് , പ്ലീസ് കമിഗ് ”

ഞാൻ അകത്തു കയറി അപ്പോയിൻ മെന്റ് ലെറ്റർ അദ്ദേഹത്തിന്റെ കയ്യിൽ കൊടുത്ത ശേഷം മുൻപിലുള്ള ചെയറിൽ ഞാൻ ഇരുന്നു.

” അപ്പൊ ഫസ്റ്റ് കോളേജ് അല്ലേ ”

“അതെ സർ ”

” എനിവെ കൺഗ്രാറ്റ്സ് ഈ ജോബ് തിരഞ്ഞെടുത്തതിന് , ആന്റ് ഗുഡ് ലക്ക് . പ്യൂണ് താങ്കളെ ഡിപ്പാർട്ട്മെന്റിൽ എത്തിക്കും. സുനിത ടീച്ചറാണ് നിങ്ങളുടെ ഡിപ്പാർട്ട്മെന്റിന്റെ HOD, ടീച്ചറെ കണ്ടാൽ മതി. രജിസ്റ്ററിൽ ഒപ്പ് വച്ച ശേഷം പൊയ്ക്കോളൂ ……”

“ശരി സർ ”

ഞാൻ പുറത്തിറങ്ങി രജിസ്റ്ററിൽ ഒപ്പുവച്ചു. ശേഷം പ്യൂണ് എന്നെയും കൂട്ടി ഡിപ്പാർട്ട്മെന്റിലേക്ക് നടന്നു.

ഉള്ളിലേക്ക് നടന്നു പോകുന്തോറും ഈ കോളേജ് എത്രത്തോളം വലുതാണെന്ന് എനിക്ക് മനസ്സിലായി. പുറത്ത് നല്ല വലിയ തണൽ മരങ്ങൾ. കുറച്ച് കുട്ടികൾ പുറത്ത് അങ്ങിങ്ങായി ചിതറി നിൽക്കുന്നു. ക്ലാസ്സ് തുടങ്ങി കഴിഞ്ഞു എന്ന് എനിക്ക് മനസ്സിലായി. പ്യൂണ് എന്നെയും കൂട്ടി ഡിപ്പാർട്ട്മെന്റിന്റെ മുൻപിലെത്തി.

“സർ ഇതാണ് സറിപ്പാർട്ട്മെൻറ് , എന്നാൽ ശരി സർ . ”

അയാൾ എന്നെ ഡിപ്പാർട്ട്മെന്റിന്റെ മുൻപിൽ എത്തിച്ച ശേഷം തിരിച്ച് പോയി. ഡിപ്പാർട്ട്മെന്റിന്റെ വാതിലിന്റെ മുകളിൽ വലുതായി ‘ഡിപ്പാർട്ട്മെന്റ് ഓഫ് കമ്പ്യൂട്ടർ സയൻസ് ‘ എന്ന് എഴുതിയിരിക്കുന്നു. ഞാൻ അകത്തു കയറി HOD യുടെ സീറ്റിനു മുന്നിൽ പോയി ..

“മാം ”

ഞാൻ എന്റെ അപ്പോയിൻമെന്റ് ലെറ്റർ അവരുടെ കയ്യിൽ കൊടുത്തു. അവർ അത് വാങ്ങി വായിച്ചു നോക്കി.

“ആ പുതിയ സാറാണല്ലേ . ഞങ്ങൾ വിജാരിച്ചു മാറി വരുന്നത് വല്ല പ്രായമുള്ള അധ്യാപകനായിരിക്കുമെന്ന് . എനിവെ വെൽകം ”

” താങ്ങ്സ് ,മാം ”

” ഓ ഫസ്റ്റ് കോളേജ് ആണല്ലേ ?”

“അതെ മാം ”

“എല്ലാവരും ഒന്ന് ശ്രദ്ധിക്കൂ … നമ്മുടെ ഡിപ്പാർട്ട്മെന്റിൽ നിന്നും മാറിപോയ സെബാസ്റ്റ്യൻ സാറിനു പകരം വന്ന സാറാണ് ഇത് , പേര് നീരജ് ജോസഫ് . ”

ടീച്ചർ അത് പറഞ്ഞതും ഡിപ്പാർട്ട്മെന്റിലെ ബാക്കിയുള്ള അദ്യാപകർ ഒരു ക്ലാപ്പോടെ എന്നെ സ്വീകരിച്ചു.

“സർ നിങ്ങളുടെ ടേബിൾ അതാണ് ”

ഒഴിഞ്ഞ ഒരു ടേബിൾ കാണിച്ച് സുനിത മാം പറഞ്ഞു . ഞാൻ ആ സീറ്റിൽ സ്ഥാനം പിടിച്ചു.

ഓരോരോ അധ്യാപകരായി എന്നെ പരിചയപ്പെടാൻ വന്നു. മൂന്ന് ടീച്ചർമാരും എന്നെയും കൂട്ടി നാല് സാറുമാരുമാണ് ഇവിടെ ഉള്ളത്. പെട്ടെന്ന് തന്നെ ഞാനെല്ലാപേരുമായി കമ്പനിയായി. അപ്പോഴേക്കും ഇന്റർവെല്ലായി . നോക്കിയപ്പോഴാണ് നീനു പുറത്ത് നിന്ന് തല എത്തി അകത്തേക്ക് നോക്കുന്നത് കണ്ടു.

“നീനു കയറി വാ ”

ഞാൻ വിളിച്ചതും അവൾ ഓടി അകത്തു വന്നു.

“ഇതാണല്ലേ സാറിന്റെ സിസ്റ്റർ ”

അപ്പുറത്തെ ടേബിളിൽ ഇരുന്ന ഷീബ ടീച്ചർ ചോദിച്ചു.

“അതെ ടീച്ചർ. ”

” ചേട്ടാ എതെങ്കിലും ക്ലാസ്സിൽ കയറിയോ ? ”

” ഇല്ല ഇനിയേ പോകൂ ..”

” എന്നാൽ ശരി ഞാൻ പോകുവാ , ഉച്ചയ്ക്ക് കാണാം. വെറുതെ ഒന്ന് വന്നതാ ”

“ശരി”

അതും പറഞ്ഞ് നീനു അവിടുന്ന് പോയി

“പിന്നെ നീരജ് സാറെ സബ്ജക്ടൊക്കെ മാറിപോയ സാർ എടുത്തത് എടുക്കേണ്ടിവരും അടുത്ത സെമസ്റ്റർ തൊട്ട് നമുക്ക് ചെയിൻജ് ചെയ്യാം”

“അത് കുഴപ്പമില്ല മാം, ഞാൻ നോക്കി കൊള്ളാം ”

സുനിത മാം പറഞ്ഞ കാര്യത്തിന് ഞാൻ മറുപടി നൽകി.

……..

“ഈ പിരീഡ് സെക്കന്റിയറിന് സാറിന്റെ സബ്ജക്ടാ … ഒന്ന് കയറി പിള്ളേരെയൊക്കെ പരിചയപ്പെട്ടിട്ട് വാ… അല്ലാതെ പിള്ളേരൊന്നും ഡിപ്പാർട്ട്മെന്റിലേക്ക് വരുകയുമില്ല സാറ് വന്ന വിവരം അറിയുകയുമില്ല .”

ഇന്റർവെൽ കഴിഞ്ഞും ബിജു സാർ പറഞ്ഞു.

“ആ ശരി സർ , ക്ലാസ്സെവിടയാ ”

“നേരെ പോയി ഇടത്തേക്ക് തിരിഞ്ഞിട്ട് മൂന്നാമത്തെ ക്ലാസ്സ് . ”

ഞാൻ എണീറ്റ് സാറ് പറഞ്ഞ സ്ഥലം ലക്ഷ്യമാക്കി നടന്നു. പുസ്തകമൊന്നുമെടുത്തില്ല നാളെത്തൊട്ട് ക്ലാസ്സ് തുടങ്ങാമെന്ന് വച്ചു. കയിൽ ക്ലാസ്സ് രജിസ്റ്റർ ഉണ്ട് ഹാജർ എടുക്കാനായി.

ക്ലാസ്റ്റിന്റെ കുറച്ച് അടുത്തെത്തിയപ്പോഴേ നല്ല ബഹളം കേൾക്കുന്നുണ്ട്. എനിക്ക് അപ്പോൾ എന്റെ കോളേജ് ലൈഫ് ആണ് ഓർമ്മ വന്നത്.

‘ഇപ്പോഴല്ലാതെ പിള്ളേർ പിന്നെ എപ്പൊ ബഹളം വയ്ക്കാനാണ്. ‘

ഞാൻ മനസ്സിൽ വിജാരിച്ചു. ഞാൻ ക്ലാസ്സിൽ കയറി പക്ഷെ ഇരിക്കുന്ന ചിലരല്ലാതെ ബാക്കിയുള്ളവർ അത് കണ്ടില്ല. അവർ എണിറ്റ് നിന്ന് തകർത്ത് ബഹളം വയ്ക്കുകയാണ്.

“‘സൈലൻസ് …….. ”

ഞാൻ ശക്തിയായി ഫ്രണ്ടിൽ കിടന്ന ടേബിളിൽ അടിച്ച ശേഷം പറഞ്ഞു. ക്ലാസ്സിന്റെ വിവിധ കോണുകളിൽ നിന്ന ആൺകുട്ടികളും പെൺകുട്ടികളും സീറ്റുകളിൽ ഓടിപിടച്ചിട്ട് വന്നിരുന്നു. അപ്പോഴാണ് ആ പെൺകുട്ടിയെ ഞാൻ കണ്ടത്. എന്നെ വായിനോക്കി എന്ന് വിളിച്ച അവൾ ഓടി വന്ന് പെൺകുട്ടികളുടെ സെക്കന്റ് ബഞ്ചിൽ ഇരിക്കുന്നത്. അവൾ എന്നെ സൂക്ഷിച്ച് നോക്കുന്നുണ്ട്. അവളുടെ മുഖത്ത് എന്തോ പല ഭാവങ്ങൾ മിന്നിമറയുന്നു ,ഭയം ഉൾപ്പടെ . അത് കണ്ടപ്പോൾ എന്റെ മനസ്സിൽ ചിരിയാണ് വന്നത്.

‘ദൈവമേ ഈ കുരിശ് ഈ ക്ലാസ്സിലാണോ ?’

ഞാൻ മനസ്സിൽ വിജാരിച്ചു.

“ഞാൻ നിങ്ങളുടെ പുതിയ അദ്യാപകനാണ്. നിങ്ങളുടെ ഡിപ്പാർട്ട്മെന്റിൽ നിന്ന് മാറിപ്പോയ സാറിനു പകരം വന്നതാണ്. ”

“എന്താ സർ പേര് ”

ഒരു പെൺകുട്ടി അപ്പോഴേക്കും എണീറ്റ് ചോദിച്ചു.

” നീരജ് ജോസഫ് ”

“സർ സ്ഥലം ”

ഞാൻ സ്ഥലം പറഞ്ഞു കൊടുത്തു.

ഞാൻ ഇടയ്ക്ക് നോക്കിയപ്പോൾ എന്തോ പോയ അണ്ണാനെ കണക്കെ എന്നെ നോക്കി ഇരികുകയാണ് അവൾ.

” ഇത് എന്റെ ഫസ്റ്റ് കോളേജാണ് , ലക്ചററായുള്ള ഫസ്റ്റ് പോസ്റ്റിംഗ് . അപ്പൊ ഞാൻ പഠിപ്പിക്കുമ്പോൾ എന്തെങ്കിലും മനസ്സിലാകാതെ വന്നാൽ ദൈര്യമായി ചോദിക്കാം . നിങ്ങൾ എന്നെ ഒരു ഫ്രണ്ടായി കണ്ടാൽ മതി കാരണം നിങ്ങൾക്ക് ഇത്തിരിക്കൂടുതൽ ഫ്രീഡം നൽകുന്നതാണ് എനിക്കിഷ്ടം . എന്റെ ഭാഗത്ത് നിന്ന് എന്തെങ്കിലും മിസ്റ്റേക്ക് വന്നാൽ നിങ്ങൾക്ക് ദൈര്യമായി എന്നോട് പറയാം. അപ്പൊ നമുക്കൊന്ന് പരിചയപ്പെടാം .”

ഞാനത് പറഞ്ഞതും ഒരോരുത്തരായി എണീറ്റ് അവരവരെ സ്വയം പരിച്ചയപ്പെടുത്തി. അങ്ങനെ അവളുടെ ഊഴമെത്തി ….

‘ ആരതി ‘ അതാണ് അവളുടെ പേര്

കുറച്ച് സമയം കൊണ്ട് തന്നെ ക്ലാസ്സിലെ പിള്ളേരുമായി ഞാൻ കമ്പനിയായി.

“സാറിന്റെ കല്യാണം കഴിഞ്ഞതാണോ ”

എല്ലാവരും സ്വയം പരിചയപ്പെടുത്തി കഴിഞ്ഞ ഉടനെ ബാക്ക് ബഞ്ചിലെ ഒരു പെൺകുട്ടി എണീറ്റ് ചോദിച്ചു.

“ഇല്ല ”

“അതെന്താ സാർ ”

അവൾ അത് ചോദിച്ചപ്പോൾ ക്ലാസ്സിലെ എല്ലാ പേരും പൊട്ടിചിരിച്ചു. അവൾക്ക് ഇത്തിരി തന്റേടം കൂടുതലുണ്ടെന്ന് എനിക്ക് ആ സംസാരത്തിൽ നിന്നു മനസ്സിലായി.

“നിങ്ങൾക്ക് ഓവർ ഫ്രീഡം തന്നാൽ അത് മിസ് യൂസ് ചെയ്യുമെന്ന് എനിക്ക് മനസ്സിലായി. ”

“സാർ ഒഴിഞ്ഞ് മാറരുത് കാരണം പറ . വല്ല കണക്ഷനും ഉണ്ടോ? ”

ഉടനെ തന്നെ അവൾ വീണ്ടും ചോദിച്ചു.

” ഇതൊരുമാതിരി കടിക്കുന്ന പട്ടിയെ പൈസ കൊടുത്തു വാങ്ങിയ അവസ്ഥ ആയല്ലോ ദൈവമേ…..എന്റെ പെന്ന് പിള്ളേരെ എനിക്കൊരു കണക്ഷനും ഇല്ല. ജോലി കിട്ടി രണ്ടുമൂന്ന് വർഷം കഴിഞ്ഞ മതി എന്നായിരു എന്റെ പ്ലാൻ …… എന്നെ ഒന്ന് വെറുതേ വീടുവോ ……. ”

ഞാനത് പറഞ്ഞ രീതി കേട്ടതും എല്ലാവരും പൊട്ടി ചിരിച്ചു കൂട്ടത്തിൽ ആരതിയും . അവളുടെ ആ ചിരികണ്ടപ്പോൾ തന്നെ എന്തോ നല്ല സന്തോഷം തോന്നി ……….

തുടരും(🤔🤔🤔🤔🤔) ………………….?