💖💖കലിപ്പന്റെ കാന്താരി 2

എല്ലാവർക്കും നമസ്കാരം,

കഥയുടെ ആദ്യ ഭാഗത്തിന് നിങ്ങൾ നൽകിയ സപ്പോർട്ടിന് ആദ്യമേ നന്ദി പറയുന്നു. ഈ കഥ എഴുതി തുടങ്ങിയപ്പോൾ രണ്ട് പാർട്ടായി എഴുതാം എന്നാണ് വിജാരിച്ചത് എന്നാൽ അത് മൂന്ന് പാർട്ടിയി മാറ്റിയിരിക്കുകയാണ്. നിങ്ങളുടെ അഭിപ്രായങ്ങൾ തീർച്ചയായും കമന്റു ചെയ്യണം എന്നാൽ തുടങ്ങട്ടെ ,

“വേണ്ടടാ ആദി ,……..ഞാൻ ചെയ്ത തെറ്റിന് എന്റെ പാസ്റ്റ് ആണ് തനിക്ക് അറിയേണ്ടതെങ്കിൽ ഞാനത് പറയാം ”

ഞാനത്രയും ഗീതുവിന്റെ മുഖത്തേക്ക് നോക്കി പറഞ്ഞു. അവളുടെ മുഖത്ത് ഗൗരിയെ പറ്റി അറിയാൻ അതിലുപരി എന്നെ പറ്റി അറിയാൻ ഉള്ള ആകാംഷ ഞാൻ കണ്ടു.

അത് എന്നെ കുറച്ച് വർഷം പിന്നോട്ട് ചിന്തിപ്പിച്ചു.

……………………………..

പ്ലസ്ടു കഴിഞ്ഞ് ഞാനും ആദിത്യനും ഒരേ കോളേജിൽ ഒരേ കോഴ്സിനു തന്നെ ചേർന്നു. കാരണം ഞാനും അവനും ഫ്രണ്ട്സ് ആയ നാൾ തൊട്ട് ഞങ്ങളുടെ ഇഷ്ടങ്ങൾ ഒന്നു തന്നെയാണ്. ജീവിതത്തിൽ എന്നും ഓർമ്മയിൽ സൂക്ഷിക്കാൻ കഴിയുന്ന നിമിഷങ്ങൾ ലഭിക്കുന്നത് കോളേജ് കാലഘട്ടത്തിലാണല്ലോ. ഒരു പാട് സ്വപ്നങ്ങളും പ്രതീക്ഷകളുമായാണ് ഞാനും ആദിയും കോളേജിലെത്തിയത്.

സ്വാഭാവികമായും ഏകദേശം കോളേജുകളിലും ഫസ്റ്റ് ഇയറിന് കേളേജിൽ വലിയ റോൾ ഒന്നും ഇല്ലല്ലോ. സിനിയേഴ്സ് പറുയുന്നതിന് അപ്പുറം പോകാൻ ആരും ഒന്ന് ഭയക്കും .വീട്ടിൽ അച്ഛനെയും അമ്മയെയും അനുസരിക്കാത്ത ആദി പോലും സീനിയേഴ്സിന്റെ റാഗിങിന് മുന്നിൽ പേടിച്ച് നിൽക്കുന്നത് കണ്ടപ്പോൾ സത്യത്തിൽ എനിക്ക് ചിരിവന്നു. ആകെ ഫസ്റ്റ് ഇയറിൽ ഉണ്ടായ സന്തോഷം കുറച്ച് കൂട്ടുകാരെ കിട്ടി എന്നുള്ളത് മാത്രമാണ്. പക്ഷെ ആരൊക്കെ എന്റെ ജീവിതത്തിൽ കൂട്ടുകാരായി വന്നെങ്കിലും ആദിയോടെപ്പം എത്താൻ ആർക്കും ആയില്ല . അങ്ങനെ കോളേജ് ലൈഫിലെ ആദ്യവർഷം ഒന്നുമില്ലാതെ തീർന്നു.

……………………………

“എടാ ആദി വന്ന് നിൽക്കുന്നു , നീ ഇന്ന് കോളേജിൽ പോകുന്നില്ലേ എത്ര നേരമായി കുളിക്കാൻ കേറീട്ട് . ”

കുളിമുറിയിൽ തല തുവർത്തിക്കൊണ്ട് നിന്ന ഞാൻ അമ്മയുടെ ശബ്ദം കേട്ട് പുറത്തിറങ്ങി.

“ഇവൻ എന്താ ഇന്ന് നേരത്തെ ”

ഞാൻ അതും ആലോചിച്ച് അടുക്കള വഴി വീടിന്റെ അകത്തു കയറി. മൂന്ന് മുറിയും ഒരു കൊച്ച് ഹാളും അടുക്കളയും ഉള്ള ഒരു ചെറിയ ഓടിട്ട വീടാണ് എന്റേത്. അമ്മ എനിക്ക് കൊണ്ടുപോകാനുള്ള ചോറ് എടുക്കുന്ന ദൃതിയിലാണ്.

ഞാൻ ഹാളിൽ കയറിയപ്പോൾ ആദി എന്നെയും കാത്ത് ഹാളിൽ കസേരയിൽ ഇരുപ്പുണ്ട്. ഞാൻ നേരെ പുറത്തേക്ക് ഇറങ്ങി ആകാശത്തേക്ക് നോക്കി.

“എന്താടാ നീ മാനത്ത് വായും നോക്കി നിൽക്കുന്നേ? ”

ആദിത്യൻ ഞാൻ നോക്കുന്നത് കണ്ട് ചോദിച്ചു.

“അല്ലടാ ! കാക്ക വല്ലതും മലർന്ന് പറക്കുന്നോ എന്ന് നോക്കിയതാ .”

ഞാൻ അതും പറഞ്ഞ് ചിരിച്ചു.

“നീ എന്താ എന്നെ കളിയാക്കുകയാണോ ?”

ആദി അൽപം പരിഭവത്തോടെ ചോദിച്ചു.

“അല്ലാതെ പിന്നെ , അല്ലെങ്കിൽ ഞാൻ വീട്ടിൽ നിന്ന് ഇറങ്ങി ഒരു പത്ത് പതിനഞ്ച് വട്ടം വിളിച്ചാൽ മാത്രം ബൈക്കും കൊണ്ട് വരുന്നവൻ ഇന്ന് നേരത്തെ എത്തിയാൽപിന്നെ അത് വലിയ കാര്യമല്ലേ ?”

ഞാനതും പറഞ്ഞ് റൂമിൽ കയറി ഡ്രസ് മാറി . ശേഷം അമ്മ തന്ന ചോറെടുത്ത് ബാഗിൽ വച്ചു.

“എടാ വാ വേഗം പോണം .”

ആദി തിരക്ക് കൂട്ടി.

“ഇവന് എന്തോന്നാ ഇത് , എടാ സമയമായിട്ടില്ല.”

ഞാൻ അവനോട് പറഞ്ഞു.

“എടാ ഇന്ന് നേരത്തെ പോണം .”

ആദി അതും പറഞ്ഞ് പുറത്തിറങ്ങി. ഞാൻ ബാഗുമെടുത്ത് അമ്മയോട് യാത്രും പറഞ്ഞ് പുറത്തിറങ്ങി. അവന്റെ ബൈക്ക് ഞാനെടുത്തു അവൻ പുറകിൽ കയറി.

“എന്താടാ ഇന്ന് നേരത്തെ പോണം എന്ന് പിടിവാശി ,അല്ലെങ്കിൽ താമസിച്ച് പോകാന്നല്ലേ നീ പറഞ്ഞോണ്ടിരുന്നത് .”

ഞാൻ ബൈക്ക് ഓടിക്കുന്നതിനിടയിൽ ആദിയോട് തിരക്കി

” എടാ ഇന്ന് കോളേജിലെ എല്ലാ എണ്ണവും നേരത്തെ എത്തും. ”

“അതെന്താ ?

“എടാ പൊട്ടാ ഇന്നാണ് കോളേജിൽ ഫസ്റ്റ് ഇയറിന് ക്ലാസ്സ് തുടങ്ങുന്നത് . നീ അത് മറന്നോ ?”

അവൻ അതും പറഞ്ഞ് ഒരു കള്ള ചിരി ചിരിച്ചു.

“എടാ ആദി അപ്പൊ പുതിയ പെൺപിള്ളേരെ വായ്നോക്കണം അതാണല്ലേ നിന്റെ ലക്ഷ്യം. ഫസ്റ്റ് ഇയറിന് ഇന്നാണ് ക്ലാസ്സ് തുടങ്ങുന്നത് എന്നുള്ള കാര്യം ഞാൻ ഓർത്തില്ല.”

ഞാനതും പറഞ്ഞ് ചിരിച്ചു.

“ഓ , നീ കൂടുതലൊന്നും ചിരിക്കണ്ട ഫസ്റ്റ് ഇയറിൽ വച്ച് പറഞ്ഞതൊന്നും മറന്നിട്ടില്ലല്ലോ?”

“എന്ത് പറഞ്ഞെന്ന് ?”

ഞാനൊന്നും അറിയാത്ത പോലെ ചോദിച്ചു.

“എടാ അജയ് നീ കൂടുതൽ ഉരുണ്ട് കളിക്കല്ലേ . നീയല്ലേ പറഞ്ഞത് സെക്കന്റ് ഇയർ ആകുമ്പോൾ ഫസ്റ്റ് ഇയറിൽ വരുന്ന ഒരു പെണ്ണിനെ വളയ്ക്കാമെന്ന് അല്ല പ്രേമിക്കാമെന്ന് . ആ കാര്യത്തിന് ഞാൻ ഇന്ന് ഒരു തീരുമാനമാനം ഉണ്ടാക്കും. ”

ആദി ഒരു വാശിയോടെ എന്നോട് പറഞ്ഞു.

” ഒന്നു പോടാ നിങ്ങളെല്ലാം കൂടെ ഫസ്റ്റ് ഇയറിൽ വച്ച് എനിക്ക് പെൺകുട്ടികളുടെ മുഖത്ത് നോക്കി ഇഷ്ടമാണ് എന്ന് പറയാൻ പേടിയാണ് , ഞാനൊരു പേടിത്തൊണ്ടനാണ് അതുകൊണ്ട് ഞാൻ പ്രേമിച്ചേ തീരു എന്നൊക്കെ പറഞ്ഞപ്പോൾ ഞാൻ വെറുതേ രക്ഷപ്പെടാൻ പറഞ്ഞതല്ലേടാ ആദീ . ”

ഞാനതും പറഞ്ഞ് ചിരിച്ചു.

” നീ കളിയായിട്ടായിരിക്കും പറഞ്ഞത് പക്ഷെ അഖിലം നന്ദുവുമൊക്കെ അത് സീരിയസ്സായി എടുത്തിട്ടുണ്ട് . നിനക്കുള്ള പണി അവൻമാർ ഇന്ന് തന്നെ തരും . ”

അതും പറഞ്ഞ് ആദി ഒന്ന് ഇരുത്തി ചിരിച്ചു. എന്റെ നെഞ്ചിൽ ഒരു ഇടിമിന്നൽ പാസ് ചെയ്ത ഫീൽ .

“ദൈവമേ ഇന്ന് അവന്മാർ എന്നെ തീർക്കും ”

ഞാനത് മനസ്സിൽ പറഞ്ഞതും കോളേജ് എത്തിയിരുന്നു.

പതിവില്ലാത്ത ചില കാഴ്ചകൾ ഞാൻ കോളേജിന്റെ മുൻപിൽ കണ്ടു. കുളിക്കാതെയു നനയ്ക്കാതെയും സമയത്ത് കോളേജിൽ വരാത്തവൻമാർ ഇന്ന് അണിഞ്ഞ് ഒരുങ്ങി കോളേജിന്റെ ഫ്രണ്ടിൽ തന്നെ സ്റ്റാച്ച്യു ആയി നിൽപ്പുണ്ട്. എനിക്കത് കണ്ടപ്പോൾ ചിരിയാണ് വന്നത്. ഞാൻ നേരെ ബൈക്ക് കോളേജ് ക്യാമ്പസിനകത്തെ പാർക്കിംഗ് ഏരിയയിൽ ഒതുക്കി.

ഞാനും ആദിയും നേരെ ക്ലാസ്സിലേക്ക് പോയി. പിന്നെയാണ് അത് അബന്ധമായിപ്പോയി എന്ന് തോന്നിയത്. കാരണം ഞാൻ വരുന്നതും കാത്ത് നന്ദുവും അഖിലും അമലും ക്ലാസ്സിൽ ഉണ്ടായിരുന്നു.

” ഇവനെ നേരത്തെ എത്തിക്കാമെന്ന് പറഞ്ഞിട്ട് ഇപ്പോഴാണാ കൊണ്ട് വരുന്നേ?”

ആദിത്യനെ കണ്ടപാടെ നന്ദു തിരക്കി.

” അപ്പൊ ഇതൊക്കെ പ്ലാനിങ് ആണ് അല്ലേ ”

ഞാൻ ആദിയുടെ മുഖത്ത് നോക്കി ചോദിച്ചു.

“എടാ പ്ലാനനെല്ലാം ഞങ്ങളുടേതാ.”

അതും പറഞ്ഞ് എന്നെ വലിച്ചോണ്ട് മൂന്നുപേരും കൂടെ കോളേജിന്റെ ഫ്രണ്ട് ഏരിയയിൽ ബൈക്ക് പാർക്ക് ചെയ്യുന്നിടത്ത് എന്നെ കൊണ്ട് നിർത്തി.

ഒന്നും അറിയാത്ത ഭാവത്തിൽ ആദിത്യനും പിന്നാലെ വന്നു.

“ഇവന്മാർ എന്തായാലും എന്നെ വിടുന്ന ലക്ഷണമില്ല, ദൈവമേ തല്ല് പാഴ്സലാക്കി ഇവന്മാർ എനിക്ക് വാങ്ങിച്ച് തരുമോ ?”

എന്ന് മനസ്സിലാലോചിച്ച് തൊട്ടടുത്ത് സ്റ്റാന്റിൽ ഇട്ട് വച്ചിരുന്ന അമലിന്റെ ബുള്ളറ്റിന്റെ പുറത്ത് ഞാൻ കയറി ഇരുന്നു.

ചറ്റും നിരീക്ഷിച്ചപ്പോൾ ഉള്ളിൽ ചിരിയാണ് വന്നത്. പുതുതായി വരുന്ന പെൺപിള്ളേരെ വായിനോക്കുന്ന ഒരുകൂട്ടം പേർ, സീനിയേഴ്സ് എന്ന അധികാരത്തോടെ വരുന്ന പിള്ളേരെ പേടിപ്പിച്ച് വിരട്ടുന്ന മറ്റൊരു കൂട്ടം . ഒന്നാലോചിച്ചപ്പോൾ എന്റെ ചങ്കുകളും ഞാനും ഇതിൽ പങ്കാളിയല്ലേ എന്ന് മനസ്സിലായപ്പോൾ എനിക്ക് എന്നോട് തന്നെ അമർഷം തോന്നി.

” നീ എന്താലോചിക്കുവാ ? വരുന്ന ഏതെങ്കിലും ഒരു പെൺകുട്ടിയുടെ അടുത്ത് നീ ഇന്ന് ഇഷ്ടമാണെന്ന് പറയണം .”

എന്റെ തലയ്ക്കിട്ട് ഒരു കൊട്ടും തന്ന് നന്ദു ഇത് എന്നോട് പറഞ്ഞപ്പോൾ ഞാനറിയാതെ മെയിൻ ഗേറ്റിലേക്ക് നോക്കി. എന്റെ കണ്ണ് എവിടയോ ഉടക്കി.

എന്റെ കണ്ണു പോയി നിന്നത് ഒരു പെൺകുട്ടിയിലാണ് .വെളത്ത അത്യാവശ്യത്തിന് വണ്ണവും പൊക്കവുമുള്ള ഒരു പെൺകുട്ടി . മഞ്ഞ ടോപ്പും ജീൻസും ഷോളുമാണ് വേഷം, തോളിൽ ഒരു ചെറിയ ബാഗും . അരവരെ എത്തുന്ന അവളുടെ കാർകൂന്തൽ ബാഗിനടിയിലൂടെ കിടക്കുന്നു. ഐശ്വര്യം തുളുമ്പുന്ന അവളുടെ മുഖത്ത് ഒരു ചെറിയ പുഞ്ചിരിയുണ്ട്.

” ഷി വാസ് സോ ബ്യൂട്ടിഫുൾ ”

ഞാൻ എന്റെ മനസ്സിൽ പറഞ്ഞതാണെങ്കിലും അത് ശബ്ദമായി എന്റെ നാവിലൂടെ പുറത്തു വന്നു. എന്നെയും ഞാൻ നോക്കിയ പെൺകുട്ടിയെയും മാറി മാറി നോക്കുന്ന എന്റെ കൂട്ടുകാരെയാണ് ഞാൻ കണ്ടത്. അവന്മാർ ഞാൻ പറഞ്ഞത് കേട്ടു എന്നുള്ളത് ഉറപ്പ്.

“അപ്പൊ ആ പെൺകുട്ടി ഫിക്സ് . ”

ഉടനെ തന്നെ നന്ദു പറഞ്ഞു.

“എടാ ഞാൻ ചുമ്മാതെ പറഞ്ഞതാ . ”

അവന്മാരുടെ മുൻപിൽ നിന്ന് രക്ഷപ്പെടാൻ ഞാൻ പറഞ്ഞ് നോക്കി.

” ഓ ചുമ്മാ നുണ പറയാതെടാ , നീ ആദ്യമായിട്ടാണ് ഒരു പെൺകുട്ടിയെ കണ്ടിട്ട് ഇങ്ങനെ പറയുന്നത് ഞങ്ങൾ ഇത് ഫിക്സ് ചെയ്തു .അവളോട് നീ ഇഷ്ടമാണ് എന്ന് പറഞ്ഞില്ലെങ്കിൽ നിന്നെ ക്ലാസ്സിലിട്ട് ഞങ്ങൾ നാറ്റിക്കും. ”

അമൽ ഒരു വാശിയോടെ പറഞ്ഞു. നല്ല കൂട്ടുകാർ ,കഴിഞ്ഞ വർഷം ഞാൻ അവൻമാർക്ക് കൊടുത്ത പണികൾക്ക് കൂലിയായി എനിക്കിട്ട് അവന്മാർ ഒരു ഉഗ്രൻ പണിയാണ് തന്നത് എന്ന് ഞാനാലോചിച്ചു. ആദിത്യൻ എന്തോ പോയ അണ്ണാനെ പോലെ നിൽക്കുകയാണ്.

ഞാൻ മറുപടി പറയുന്നതിനു മുൻപ് തന്നെ ഞങ്ങളുടെ മുൻപിൽ കൂടി നടന്നു പോയ ആ പെൺകുട്ടിയെ നന്ദു വിളിച്ചു. അവൾ എന്താണെന്ന് അറിയാനായി ഞങ്ങളുടെ അടുത്ത് വന്നു.

“എന്താ ചേട്ടാ !…….”

അവൾ ഒരു ഭയവും കൂടാതെ ചിരിച്ചു കൊണ്ട് നന്ദുവിന്റെ അടുത്ത് കാര്യം തിരക്കി.

“ദാ ഇവന് തന്നോട് എന്തോ പറയാനുണ്ടെന്ന് . ”

എന്നെ ചൂണ്ടികാണിച്ച് കൊണ്ട് നന്ദു ഉടനെ തന്നെ മറുപടി പറഞ്ഞു.

അവൾ എന്റെ മുഖത്ത് നോക്കി. എന്റെ ശക്തി മൊത്തം ചോർന്ന് പോകുന്നതുപോലെ എനിക്ക് തോന്നി.

“എടാ ചോദിക്ക് . ”

അമൽ എന്നോട് പറഞ്ഞപ്പോഴാണ് ഞാൻ തിരിച്ച് സ്വബോധത്തിലെത്തിയത്.

ഒരു ദീർഘശ്വാസം വലിച്ച് ഞാൻ ശക്തി ശേഖരിച്ചു..

“എന്താ തന്റെ പേര് ? ”

“ഗൗരി .”

അവൾ ഒരു പുഞ്ചിരിയോടെ പറഞ്ഞു.

അപ്പോഴേക്കും എന്റെ മുതുകിൽ കൈ മുറുക്കിയുള്ള ഒരു ഇടി കിട്ടി അത് നന്ദുവാണ്. ഞാൻ അവളോട് ഇഷ്ടമാണ് എന്ന് പറയണം എന്ന് ഓർമ്മപ്പെടുത്താൻ ഇടിച്ചതാണ്.

ഞാൻ എന്റെ പോക്കറ്റിൽ ഇരുന്ന ഒരു പേന എടുത്ത് നിലത്തിട്ടു.

” അതിങ്ങ് എടുക്ക്. ”

ഞാൻ ഗൗരിയോട് പറഞ്ഞു.

അവൾ ചിരിച്ചു കൊണ്ട് ആ പേന എടുക്കാനായി കുനിഞ്ഞതും അവളുടെ തലമുടിയിൽ വച്ചിരുന്ന ഒരു ചുവന്ന റോസാപ്പൂ ഞാൻ കൈകൾ കൊണ്ട് വലിച്ചെടുത്തു.

അവൾ അവളുടെ തലമുടിയിൽ കൈകൾ കൊണ്ട് പിടിച്ച് വേദനയോടെ എന്നെ നിവർന്ന് നോക്കി.

” “ഐ ലവ് യു” ”

ഞാൻ ആ റോസാ പൂവ് അവളുടെ നേരെ നീട്ടി അവളോട് പറഞ്ഞു.അവളുടെ മുഖത്തെ പുഞ്ചിരി മാറി മറ്റേതോ ഭാവം വന്നു അത് ചെറിയ ദേഷ്യം കലർന്ന ഭാവമായിരുന്നു. എന്റെ കയിൽ നിന്നും ബലമായി ആ റോസാപ്പൂ പിടിച്ച് വാങ്ങിയ ശേഷം അവൾ തിരിഞ്ഞ് കോളേജിനകത്തേക്ക് നടന്നു. അവൾ നടന്ന് കോളേജ് ബിൽഡിംഗിനകത്ത് കയറുന്നതിനു മുൻപ് അവൾ ദേഷ്യം കലർന്ന ഭാവത്തിൽ എന്നെ ഒന്നുകൂടെ നോക്കി. ഭാഗ്യത്തിന് കോളേജിലുള്ള ബാക്കി കുട്ടികൾ അവരുടെ തിരക്കുകളിൽ മുഴുകി ഇരുന്നതു കൊണ്ട് നടന്നതൊന്നും കണ്ടില്ല. ഞാൻ എന്റെ കൂട്ടുകാരെ നോക്കിയപ്പോൾ വായിൽ കൈ പൊത്തി ചിരിക്കുന്നതാണ് കണ്ടത്.

“എടാ പട്ടികളെ എന്നെ അവളുടെ മുൻപിൽ നാണം കെടുത്തിയപ്പോൾ സന്തോഷമായല്ലോ? ”

ഞാൻ ചെറിയ സങ്കടത്തോടെ അതും പറഞ്ഞ് ബൈക്കിൽ നിന്ന് താഴെ ഇറങ്ങി കോളേജിനകത്തേക്ക് നടന്നു. അവന്മാർ അപ്പോഴും ഞാൻ ചമ്മിയത് ഓർത്ത് ചിരിച്ചു കൊണ്ട് നിൽക്കുകയാണ്.

“എടാ അജയ് നിൽക്ക് ഞാനും വരുന്നു. ”

ആദി അതും പറഞ്ഞ് ഓടി വന്ന് എന്റെ തോളിൽ കയ്യിട്ടു.

“എടാ എന്നാലും നീയും ഇതിന് കൂട്ട് നിന്നല്ലേ ? . ”

ഞാൻ വിഷമത്തോടെ ആദിയോട് ചോദിച്ചു.

“എടാ ഞാൻ ഒന്നും അറിഞ്ഞതല്ല. നിന്നെ നേരത്തെ എത്തിക്കാൻ അവന്മാർ പറഞ്ഞു എന്നുള്ളത് ശരിയാണ് പക്ഷെ അത് ഇങ്ങനെ ഒരു പണിയാകുമെന്ന് ഞാൻ കരുതീല. എടാ സോറി .”

അവൻ ഒരു സങ്കടത്തോടെ പറഞ്ഞു.

“നീ എന്റോടെ സോറി പറയുന്നോ ? ഒന്നു പോടാ ”

ഞാൻ എന്റെ സങ്കടമെല്ലാം മാറ്റി ചിരിച്ചു കൊണ്ട് അവനോട് പറഞ്ഞു.

“സത്യം പറ നിനക്ക് അവളെ ഒത്തിരി ഇഷ്ടമായി അല്ലേ ? ”

ഒരു കള്ള ചിരിയോടെ ആദി എന്നോട് ചോദിച്ചു.

“നിനക്ക് എങ്ങനെ മനസ്സിലായി?”

“എടാ അജയ് നിന്നെ ഇന്നോ ഇന്നലയോ കണ്ടു തുടങ്ങിയതല്ലല്ലോ ഞാൻ . നിന്റെ കൂടെ കൂട്ട് കൂടിയ ശേഷം നീ ആദ്യമായാണ് ഒരു പെൺകുട്ടിയെ കണ്ടിട്ട് അവൾ ബ്യൂട്ടിഫുൾ ആണെന്ന് പറയുന്നത് .”

” പക്ഷെ ഞാൻ അവളോട് ഇഷ്ടമാണ് എന്ന് പറഞ്ഞത് അവൾക്ക് ഇഷ്ടപ്പെട്ടില്ല എന്നു തോന്നുന്നു. ”

ഞാൻ ആദിയോട് പറഞ്ഞു.

” അത് സാരമില്ലടാ ! നിന്നെ ഏത് പെണ്ണാ ഇഷ്ടപ്പെടാത്തത് . ”

” എടാ ആദി ഒന്ന് പതുക്കെയൊക്കെ തള്ള് . ”

ഞാനതു പറഞ്ഞതും ഞാനും ആദിയും ഒരുമിച്ച് പൊട്ടി ചിരിച്ചു.

ഞങ്ങൾ ക്ലാസ്സിലെത്തിയപ്പോൾ ക്ലാസ്സിൽ പെൺകുട്ടികൾ മാത്രം ആൺകുട്ടികൾ ആരുമില്ല.

“നിങ്ങൾ എന്താ വായിൽ നോക്കാൻ പോകുന്നില്ലേ? ”

ക്ലാസ്സിൽ നിന്ന ടീച്ചർ ഞങ്ങളോട് ചോദിച്ചു.

“ഓ ഇന്നത്തേക്ക് മതിയാക്കി ടീച്ചർ ഇനി നാളെ ആവാം. ”

ഞാൻ അതും പറഞ്ഞ് എന്റെ സീറ്റിലിരുന്നു. ടീച്ചർ ഉൾപ്പെടെ പൊട്ടിചിരിക്കുന്നതാണ് ഞാൻ കണ്ടത്. ആദി വന്ന് എന്റെ അടുത്ത് ഇരുന്നു.

അങ്ങനെ ഇന്റർവെൽ ആയി. നോക്കിയപ്പോൾ ക്ലാസ്സിലെ ആൺപടമൊത്തം കൂട്ടമായി ക്ലാസ്സിൽ വന്ന് എന്റെ മുമ്പിൽ നിന്നു.. ഞാൻ എന്താണെന്ന് അറിയാൻ വേണ്ടി നോക്കി.

“എടാ അജയ് വാ ഫസ്റ്റ് ഇയർ ക്ലാസ്സിൽ കയറണം ഉച്ചവരെ സമയമുണ്ട് .”

വന്നപാടെ അമൽ എന്നോട് പറഞ്ഞു.

“എന്തിനാ റാഗിങിനാണോ ?”

ഞാൻ കാര്യം തിരക്കി

” എടാ റാഗിങിനൊന്നും അല്ല ജെസ്റ്റ് ഒന്ന് പരിചയപ്പെടൽ നീയില്ലാതെ എങ്ങനാ . ”

“എടാ ഞാൻ വരുന്നില്ല ,എനിക്ക് ഒരു മൂടില്ല ”

“എടാ ഒന്ന് വാ , നീയല്ലേ ക്ലാസ് റെപ്പ് അപ്പൊ നീ തന്നെ സംസാരിച്ച് തുടങ്ങണം.”

അമൽ അതു പറഞ്ഞപ്പോൾ ആദിത്യനും പോകാമെന്ന് ആംഗ്യം കാണിച്ചു.

“എന്നാൽ വാ പോയേക്കാം ”

ഞങ്ങൾ അങ്ങനെ ഫസ്റ്റ് ഇയർ ക്ലാസ്സിലേക്ക് പോയി . ഞങ്ങളുടെ ക്ലാസ്സ് കഴിഞ്ഞ് ആ വരിയിലെ മൂന്നാമത്തെ ക്ലാസ്സാണ് ഫസ്റ്റ് ഇയർ ക്ലാസ്സ് .

ഞങ്ങൾ ക്ലാസ്സിലെത്തിയപ്പോൾ അഞ്ചന ടീച്ചർ ഫസ്റ്റ് ഇയർ സ്റ്റുഡൻസിനോട് സംസാരിക്കുകയായിരുന്നു..

” ടീച്ചറെ ഇനി ഞങ്ങളുടെ ടൈമാ ” ഞാൻ ടീച്ചറോട് ക്ലാസ്സിന് പുറത്ത് നിന്ന് പറഞ്ഞു.

“എന്താടാ ആദ്യ ദിവസം തന്നെ തുടങ്ങിയോ റാഗിങ് ” .

ടീച്ചർ ചിരിച്ച് കൊണ്ട് ഞങ്ങളോട് ചോദിച്ചു.

” റാഗിങെന്നും അല്ല ടീച്ചർ ജെസ്റ്റ് ഒന്ന് പരിചയപ്പെടൽ.”

ഞാനതു പറഞ്ഞതും ടീച്ചർ പുറത്തേക്ക് ഇറങ്ങി.

“എങ്കിൽ നടക്കട്ടെ ഞാൻ പോകുവാ . ”

ടീച്ചർ അതും പറഞ്ഞ് ഡിപ്പാർട്ട്മെന്റിലേക്ക് പോയി.

ഞങ്ങൾ ക്ലാസ്സിനുള്ളിൽ കയറിയതും ഫസ്റ്റ് ഇയർ പിള്ളേർ പേടിച്ച് എണീറ്റു നിന്നു . പേടിക്കാൻ കാരണവുമുണ്ട് മുടിയും താടിയും നീട്ടി വളർത്തി കട്ടിമീശയൊക്കെ ഉള്ള ഫ്രീക്കന്മാരാണ് എന്റെ ക്ലാസ്സിൽ കൂടുതലും ഉള്ളത്. ആര് കണ്ടാലും ഒന്ന് പേടിക്കും.

ഞാൻ പെൺകുട്ടികളുടെ ഭാഗത്ത് നോക്കിയപ്പോൾ ഞാനൊന്ന് ഞെട്ടി, ഗൗരി അവൾ എന്നെ രാവിലെ നോക്കിയ അതേ ഭാവത്തിൽ തന്നെ എന്നെ നോക്കി നിൽക്കുകയാണ്.

“ദൈവമേ ഇവള് ഞങ്ങളുടെ ഡിപ്പാർട്ട്മെന്റാണോ ?”

ഞാൻ മനസ്സിലോർത്തു

“എടാ ആദി ഞാൻ മുങ്ങട്ടെ ദെ അവള് നിൽപ്പുണ്ട്.”

ഞാൻ പുറകിൽ നിന്ന ആദിയുടെ ചെവിയിൽ പതുക്കെ പറഞ്ഞു.

“ഏവള് ”

ആദി അതും പറഞ്ഞ് നോക്കിയപ്പോൾ ആണ് ഗൗരിയെ കണ്ടത്

“ഒന്ന് മരിയാതിക്ക് നിന്ന് സംസാരിച്ച് തുടങ്ങ് സീനിയേഴ്സിന്റെ മാനം കെടുത്താതെ . ”

അവൻ അതും പറഞ്ഞ് എന്നെ മുന്നിലേക്ക് തള്ളിവിട്ടു.

ഞാൻ ദൈര്യം സംഭരിച്ച് സംസാരിച്ച് തുടങ്ങി.

“ഞങ്ങൾ നിങ്ങളുടെ സീനിയേഴ്സ് ആണ് , സെക്കന്റിയർ ബാച്ച് .അപ്പൊ ഞങ്ങൾ നിങ്ങളെ ഒന്ന് പരിചയപ്പെടാൻ വന്നതാണ്. പിന്നെ ഈ ചേട്ടന്മാരും ചേച്ചിമാരും നിങ്ങളോട് എന്തെങ്കിലുമൊക്കെ ഇവിടെ അവതരിപ്പിക്കാൻ പറയും അത് റാഗിങായൊന്നും കണക്കാക്കണ്ട . അത് നിങ്ങളുടെ കഴിവുകൾ പുറത്തു കൊണ്ടുവരാനും പരസ്പരം പരിചയപ്പെടാനും മാത്രമാണ്. എന്നാൽ തുടങ്ങിക്കൊ ”

ഞാനത്രയും പറഞ്ഞ് ഫ്രണ്ട് ബഞ്ചിൽ ഒരു ഫസ്റ്റ് ഇയർ പയ്യന്റെ അടുത്ത് ഇരുന്നു.

“നീയില്ലേ .”

ആദിയാണ് എന്റടുത്ത് അത് കേട്ടത്.

“ഞാൻ ഇവിടെ ഉണ്ടല്ലോ,നിങ്ങൾ തുടങ്ങിക്കോ”

ഞാനതും പറഞ്ഞ് ഇരുന്നു.

എന്റെ ചങ്കുകൾ ഒരോരുത്തരെയും മുന്നിൽ വിളിച്ച് വരുത്തി പിള്ളേർക്ക് ഓരോ പണി കൊടുത്ത് തുടങ്ങി. ക്ലാസ്സിൽ മഴുവനും പൊട്ടിചിരിയും മുഴങ്ങി. പാട്ട് പാടലും കഥാപ്രസംഗവും ചവിട്ട് നാടകം ഉൾപ്പടെ ഫസ്റ്റ് ഇയർ പിള്ളേരെ കൊണ്ട് എന്റെ ചങ്കുകൾ ചെയ്യിപ്പിച്ചു. പക്ഷെ അതെല്ലാം നല്ല തമാശയിലാണ് അവസാനിച്ചത്. വൈകാതെ അവളുടെ ഊഴവും എത്തി ,ഗൗരിയുടേത്.

അവൾ ഒരു പേടിയും ഇല്ലാതെ പുഞ്ചിരിച്ചുകൊണ്ട് മുന്നിൽ വന്നു.

” നീ ഈ ചേട്ടന്റോടെ ‘ ഐ ലവ് യു ‘ എന്ന് പറഞ്ഞാൽ മാത്രം മതി .”

നന്ദു എന്നെ ചൂണ്ടികാണിച്ച് കൊണ്ട് പറഞ്ഞു. അവളുടെ മുഖത്ത് ഒരു ചെറിയ പേടി നിഴലിച്ചു.

“ഇവന്മാർ രാവിലെ തൊട്ട് എനിക്ക് പണി തരുവാണല്ലോ.” ഞാൻ മനസ്സിലോർത്തു.

” അതൊന്നും വേണ്ട താൻ പോയി സീറ്റിലിരിക്ക് ” ഞാൻ ഗൗരിയോട് പറഞ്ഞു.

” അത് പറ്റില്ല അവൾ ഇത് പറയണം . ” അമൽ തറപ്പിച്ചു പറഞ്ഞു.

” നിന്റെയോടെയൊക്കെ അല്ലേ ഞാൻ മലയാളത്തിൽ പറഞ്ഞത് അതൊന്നും വേണ്ട എന്ന് . ”

എന്റെ ഉയർന്ന ദേഷ്യം കലർന്ന ശബ്ദം ക്ലാസ്സ് മുഴുവനും മുഴങ്ങി. എന്റെ പുഞ്ചിരി കലർന്ന മുഖം മാറി ദേഷ്യം കലർന്ന ഭാവമായി മാറിയിരുന്നു. ക്ലാസ്സിലെ എല്ലാപേരും എന്നെ ശ്രദ്ധിക്കുകയാണ്.

“എന്താ നോക്കി നിൽക്കുന്നേ പോയി ഇരിക്കടി സീറ്റിൽ.”

ഞാൻ ഗൗരിയുടെ മുഖത്ത് നോക്കി പറഞ്ഞു. ഗൗരി ഒരു പേടിയോടെ പോയി സീറ്റിലിരുന്നു. അപ്പോഴേക്കും ആദി എന്റെ അടുത്ത് വന്നു.

“എടാ കൂൾ ,അവന്മാർ താമാശയ്ക്ക് പറഞ്ഞതല്ലേ വിട്ട്കള . ”

ആദി അത്രയും പറഞ്ഞപ്പോൾ ഞാൻ ക്ലാസ്സിന് പുറത്തുപോയി നിന്നു .അമലും നന്ദുവുമൊക്കെ ചെയ്തത് തെറ്റായിപ്പോയി എന്ന ഭാവത്തിൽ നിൽക്കുകയാണ്. അവന്മാർ വീണ്ടും പരിചയപ്പെടൽ തുടർന്നു.

കുറച്ച് കഴിഞ്ഞ് ആദി എന്റെ അടുത്ത് വന്നു.

“എടാ പരിചയപ്പെടലൊക്കെ കഴിഞ്ഞു. നീ അടുത്ത കാര്യങ്ങൾ അവരോട് പറ വാ . ”

ആദി അതും പറഞ്ഞ് എന്നെ വലിച്ചോണ്ട് ഫസ്റ്റ് ഇയർ ക്ലാസ്സിൽ കയറി.

” അപ്പൊ പരിചയപ്പെടൽ എല്ലാവർക്കും ഇഷ്ടപ്പെട്ടു എന്നു വിചാരിക്കുന്നു. ഈ കോളേജിൽ മൂന്ന് യൂണിയനുകൾ ഉണ്ട് അതിൽ ഏതിൽ ചേരണമെന്നുള്ളത് നിങ്ങളുടെ ഇഷ്ടം അതിൽ ആരും കൈ കടത്തില്ല. യൂണിയനുകൾ ഇലക്ഷൻ സമയത്ത് മാത്രമേ ആക്ടീവ് ആകുകയുള്ളൂ. നിങ്ങൾക്ക് എന്ത് പ്രശ്നമുണ്ടെങ്കിലും ഞങ്ങളുടെ അടുത്ത് ധൈര്യമായി വന്നു പറയാം ഒരു പേടിയും വേണ്ട. എന്നാൽ ശരി, താങ്ക്സ് ”

ഞാനതും പറഞ്ഞ് പുറത്തിറങ്ങി . ആദിയും എന്റെ ഒപ്പം വന്നു. സമയം ഉച്ചയായി എന്ന് അറിയിക്കാൻ വയറിനുള്ളിൽ വിശപ്പ് ആളി കത്തുന്നുണ്ട്.

“എടാ സോറി ” അപ്പോഴേക്കും നന്ദു എന്റെ മുൻപിൽ വന്നു പറഞ്ഞു.

“എടാ കുഴപ്പമില്ല. പരിചയപ്പെടാൻ പോയിട്ട് പെൺകുട്ടികളെ ശല്യം ചെയ്താൽ അവർ എന്ത് വിജാരിക്കും അതുകൊണ്ടാ ഞാൻ നിന്റോടെ ദേഷ്യപ്പെട്ടത്. ” ഞാൻ ചിരിച്ച് കൊണ്ട് മറുപടി കൊടുത്തു.

ഞാനും ആദിയും ചോറു പൊതിയും എടുത്ത് ക്യാമ്പസിനു പുറത്തെ മരച്ചുവട്ടിലുള്ള സ്ഥിരം സ്ഥലത്ത് ഇരുപ്പ് പിടിച്ചു. എന്റെയും അവന്റെയും ചോറ് ഒരു പൊതിയൽ തട്ടി ഒരുമിച്ചാണ് ഞങ്ങൾ കഴിക്കുന്നത്. അത് ഞങ്ങൾ ഫ്രണ്ട്സ് ആയ നാൾ തൊട്ടുള്ള കലാപരിപാടിയാണ്.

“എടാ നീ അവളോട് സംസാരിക്കുന്നില്ലേ . ”

ചോറ് കഴിക്കുന്ന സമയത്ത് ആദി എന്നോട് ചോദിച്ചു.

” ആരോട് ?”

” ഗൗരിയോട് ”

“എന്തിനാടാ വെറുതേ അവളെ കണ്ടാൽ തന്നെ അറിയാം ഒരു പണച്ചാക്കിന്റെ മകളാണെന്ന് . എന്നെപ്പോലെ അന്നന്നുള്ള വകയ്ക്ക് അർദ്ധരാത്രി വരെ കഷ്ടപ്പെടുന്ന പാവങ്ങളെയൊന്നും പെണ്ണുങ്ങൾക്കൊന്നും ഇഷ്ടമാകില്ല. അത് വിട്. നിന്റെ പെണ്ണ് എന്തു പറയുന്നു. ” ഞാൻ ആദിയോട് ചോദിച്ചു.

“ഓ അത് വേറെ പുകില് മുറപ്പെണ്ണാണെന്നൊന്നും പറഞ്ഞിട്ട് കാര്യമില്ല എന്നെ നിന്ന് തിരിയാൻ സമ്മതിക്കില്ല. ” ആദി അതും പറഞ്ഞ് ചിരി തുടങ്ങി.

“എടാ അജയ് നിന്റെ ഹോട്ടല് മുതലാളി നൈറ്റ് തട്ടുകട തുടങ്ങിയിട്ട് എന്തായി. ” ആദി എന്നോട് തിരക്കി.

“നല്ല ലാഭമുണ്ട് ഞാനിപ്പോൾ ആ തട്ടുകടയിലാ രാത്രി നിൽക്കുന്നത് അതുകൊണ്ട് എനിക്ക് ഇപ്പോൾ കൂലി കൂട്ടി തരുന്നുണ്ട് . ” ഞാൻ അവനോട് പറഞ്ഞ് ചോറ് കഴിക്കൽ തുടർന്നു.

“എടാ നോക്ക് ഗൗരി ”

ആദി അത് പറഞ്ഞപ്പോൾ ഞാൻ തിരിഞ്ഞ് നോക്കി അവളും കൂട്ടുകാരികളും കുറച്ച് അപ്പുറത്ത് കൂടെ നടന്നു പോകുകയാണ് ആദിയെ നോക്കി ചിരിച്ചെങ്കിലും എന്നെ കണ്ടപ്പോൾ ആ പഴയ ഭാവം മുഖത്ത് വന്നു.

എനിക്ക് ചിരിയാണ് വന്നത് . ഞങ്ങൾ കഴിച്ച് കഴിഞ്ഞ് ക്ലാസ്സിൽ കയറി . ആ ദിവസം അങ്ങനെ പോയി .രാത്രി ഉറങ്ങാൻ നേരം അവളുടെ മുഖം മനസ്സിൽ വന്നു . സത്യത്തിൽ അവളുടെ ചിരിക്കുന്ന മുഖത്തേക്കാൾ ദേഷ്യം ചുവക്കുന്ന മുഖമാണ് കാണാൻ കൂടുതൽ ചന്തം എന്ന് ഞാൻ മനസ്സിൽ ഓർത്തു.

പിറ്റേന്ന് പതിവു പോലെ ഞാനും ആദിയും കോളേജിൽ എത്തി. ഇന്റർവെല്ലിന് ഞാനും ആദിയും ക്ലാസ്സിൽ ഇരിക്കുമ്പോഴാണ് ക്ലാസ്സിന് പുറത്ത് നിന്ന് നന്ദു ഞങ്ങളുടെ അടുത്ത് വന്നത്.

“എടാ ഒരു കുഴപ്പമുണ്ട്. ” നന്ദു വന്നപാടെ എന്റോടെ പറഞ്ഞു.

“എന്താടാ എന്താ പ്രശ്നം ” ഞാൻ കാര്യം തിരക്കി

“എടാ നമ്മുടെ ഫസ്റ്റ് ഇയറിലെ ഒരു പെൺകുട്ടിയെ വേറെ ഏതോ ക്ലാസ്സിലെ ഒരു പയ്യൻ തല്ലിയെന്ന് ആ കൊച്ച് അവിടെ ഇരുന്ന് കരയുകയാ . നമുടെ ഫസ്റ്റ് ഇയറിലെ ഒരു പയ്യനാണ് എന്റെ അടുത്ത് ഈ കാര്യം പറഞ്ഞത് . ”

നന്ദു അത്രയും പറഞ്ഞ് തീർന്നതും ഞാൻ എന്നീറ്റു .

“വാടാ”

എനിക്ക് ദേഷ്യം ഇരച്ചുകയറാൻ തുടങ്ങിയിരുന്നു. ഞാൻ വേഗം നടന്ന് ഫസ്റ്റ് ഇയർ ക്ലാസ്സിലെത്തി .പിന്നാലെ ആദിത്യനും നന്ദുവും വരുന്നുണ്ടായിരുന്നു.

ഞാൻ ക്ലാസ്സിൽ പെട്ടെന്ന് കയറി വരുന്നത് കണ്ട് ഫസ്റ്റ് ഇയറിലെ സ്റ്റുഡൻസ് എന്നെ നോക്കുകയാണ് ഞാൻ നോക്കിയപ്പോൾ ഗൗരിയുടെ അടുത്ത് ഇരിക്കുന്ന ഒരു പെൺകുട്ടി കരയുകയാണ് ഗൗരി അവളെ സമാധാനിപ്പിക്കാൻ ശ്രമിക്കുന്നുണ്ട്. ഞാൻ നേരെ ആ പെൺകുട്ടിയുടെ അടുത്ത് പോയി.

“എന്താ നടന്നത് ”

ഞാൻ തിരക്കി .പക്ഷെ അവൾ ഒന്നുകൂടെ കരയുകയാണ് ചെയ്തത്.

“പെങ്ങളെ എന്താ നടന്നെന്നാണ് ചോദിച്ചത് .” എന്റെ ശബ്ദം ഉയർന്നു.

” അത് ! അപ്പുറത്തെ ക്ലാസ്സിലെ ഒരുത്തൻ എന്നോട് ഇഷ്ടമാണെന്ന് പറഞ്ഞു. ഞാൻ തിരിച്ച് ഇഷ്ടമല്ല എന്നു പറഞ്ഞു. അവന്റെ കൂട്ടുകാർ അടുത്ത് നിൽപ്പുണ്ടായിരുന്നു അവർ അവനെ കളിയാക്കിയപ്പോൾ ആ ദേഷ്യത്തിന് അവൻ എന്റെ കരണത്തടിച്ചു. ”

ആ പെൺകുട്ടി കണ്ണുനീർ തുടച്ചു കൊണ്ട് പറഞ്ഞു.

“എന്താ തന്റെ പേര് ”

ഞാൻ അവളോട് ചോദിച്ചു.

” അപർണ്ണ ”

” താൻ വാ ”

ഞാനതും പറഞ്ഞ് അവളുടെ കയ്യിൽ പിടിച്ച് എണീപ്പിച്ച് അപ്പുറത്തെ ക്ലാസ്സിൽ പോയി അവളെയും കൊണ്ട് അകത്ത് കയറി.

“ഏതവനാടാ ഇവളെ അടിച്ചത് ”

എന്റെ ഉയർന്ന ശബ്ദം ക്ലാസ്സിൽ മുഴങ്ങി.

“ഞാനാ ,എന്ത് വേണം ”

അവളെ അടിച്ചവനും കൂട്ടുകാരും മുന്നിൽ വന്നു.

ഞാൻ ആഞ്ഞ് അവന്റെ നെഞ്ചിൽ ചവിട്ടി അവൻ തെറിച്ച് നിലത്ത് വീണു. അവന്റെ ഒരു കൂട്ടുകാരൻ അടിക്കാനായി കൈ പൊക്കിയതും അവന്റെ ആ കയിൽ പിടിച്ച് ബാക്കിലോട്ട് വലിച്ച് വച്ച് എന്റെ കൈമുട്ട് അവന്റെ മുതുകിൽ കേറ്റി. എന്നെ അടിക്കാനായി വന്ന അവന്റെ ബാക്കി കൂട്ടുകാർ എന്റെ പെട്ടന്നുള്ള റിയാക്ഷൻ കണ്ട് പേടിച്ച് ഒന്നു പിന്തിരിഞ്ഞു. അപ്പോഴേക്കും ചവിട്ട് കൊണ്ട് വീണവൻ എന്നെ അടിക്കാനായി എണീറ്റ് ചാടി വന്നു. ഞാൻ വെട്ടി തിരിഞ്ഞ് അവന്റെ മുതുകിൽ ചവിട്ടി ,അവൻ മലന്നടിച്ച് തറയിൽ വീണു. ഞാൻ അവന്റെ വലതു കൈ പിടിച്ച് ഞെരിച്ച ശേഷം എന്റെ കൈമുറുക്കി അവന്റെ കൈയ്യുടെ നടുഭാഗത്ത് നല്ല ഒരു പ്രഹരം കൊടുത്തു. (കളരിയിലെ ഒരു അടിനട പ്രയോഗം ) അവന്റെ കൈയുടെ എല്ല് പൊട്ടുന്ന ശബ്ദം കേട്ടു.

” മേലാൽ ഇനി ഒരു പെണ്ണിന്റെയടുത്തും നിന്റെ ഈ കൈപൊങ്ങരുത്. നീ വല്ല പരാതിയും പ്രിൻസിക്ക് കൊടുത്താൽ നീ അഴി എണ്ണും . വുമൺ വയലേഷന് ഞാനിവളെക്കൊണ്ട് പോലീസിൽ പരാതി കൊടുപ്പിക്കും കേട്ടല്ലോ. പിന്നെ ആരെങ്കിലും കേട്ടാൽ ബൈക്കിൽ നിന്ന് വീണതാണ് എന്ന് പറഞ്ഞാൽ മതി. തന്റെ വലത്തെ കയിലെ എല്ല് രണ്ടായി പൊട്ടിയിട്ടുണ്ട് രണ്ട് മാസം

പ്ലാസ്റ്ററിടേണ്ടിവരും തൽക്കാലം ഇതുകൊണ്ട് തൃപ്തിപ്പെടണം .നിന്റെ കാല് കൂടെ തല്ലി ഒടിക്കാൻ അറിയാമേലാഞ്ഞിട്ടല്ല പുറത്തറിഞ്ഞാൽ ഈ കുട്ടിക്കാ നാണകേട്.”

ഞാനതും പറഞ്ഞ് നടന്നതെല്ലാം പേടിയോടെ നോക്കി നിന്ന അപർണ്ണയെയും വിളിച്ച് ക്ലാസ്സിന് പുറത്തിറങ്ങി. ആദിയും നന്ദുവും ഞങ്ങളുടെ ഫസ്റ്റ് ഇയറിലെ കുറച്ച് കുട്ടികളും ഇതെല്ലാം കണ്ടു കൊണ്ട് പുറത്ത് നിൽക്കുന്നുണ്ടായിരുന്നു , കൂട്ടത്തിൽ എന്റെ കാന്താരിഗൗരിയും. അവളുടെ മുഖത്ത് ഒരു പുഞ്ചിരിയുണ്ട് അത് എന്നെ നോക്കി തന്നെയാണ് . എന്റെ മനസ്സിലൂടെ ഒരു കുളിർ തെന്നൽ പാഞ്ഞ് പോയി. പക്ഷെ അവൾ എന്നോടൊന്നും സംസാരിച്ചില്ല , ഞാനും .

” നന്ദി ചേട്ടാ ”

അപർണ്ണ അതു പറഞ്ഞപ്പോൾ എന്റെ കണ്ണുകൾ അറിയാതെ തന്നെ നിറഞ്ഞു.

” എന്റെ പെങ്ങളെ ഏവനെങ്കിലും തൊട്ടാൽ ഈ ചേട്ടൻ വെറുതെ ഇരിക്കുമോ ?”

ഞാനതും ചിരിച്ചു കൊണ്ട് പറഞ്ഞ് ആദിയെയും കൂട്ടി ക്ലാസ്സിലേക്ക് നടന്നു. രണ്ട് കണ്ണുകൾ എന്നെ വീക്ഷിക്കുന്നത് ഞാൻ ശ്രദ്ധിച്ചു എന്റെ കാന്താരിയുടെ കണ്ണുകൾ.

കോളേജിൽ നിന്ന് വീട്ടിൽ എത്തി കുളിച്ച് പതിവു പോലെ ഞാൻ തട്ടുകടയിലേക്ക് എന്റെ ഉപജീവനത്തിനായി പോയി. ആ നശിച്ച ദിവസമാണ് എന്റെ ജീവിതത്തിന്റെ താളം തെറ്റിക്കാൻ തുടക്കം കുറിച്ചത് . ഞാൻ പാർട്ട് ടൈം ജോലിക്ക് നിന്ന ഹോട്ടലിലെ ഓണർ രാജൻ ചേട്ടൻ രാത്രി തട്ട് കട തുടങ്ങിയ നാൾ തൊട്ട് ഞാനും അവിടെയുള്ള ജോലി നോക്കി തുടങ്ങിയിരുന്നു..

രാത്രി ഒരു ഒൻപത് മണി ആയിക്കാണും. തട്ടുകടയിൽ തിരക്ക് ഒക്കെ കുറഞ്ഞു. തട്ടുകടയുടെ അൽപം ദൂരെ ഒരു ഒമിനി വാൻ നിർത്തി അതിൽ നിന്നും മൂന്നു പേർ ഇറങ്ങി തട്ടുകടയിൽ വന്ന് ഭക്ഷണം ചോദിച്ചു ഞാൻ അവർക്ക് ഭക്ഷണം വിളിമ്പികൊടുത്തു.

“എന്താ ചേട്ടാ ഇവിടെ വണ്ടി ഒതുക്കാൻ ഇത്രയും സ്ഥലം ഉണ്ടായിട്ടും ഇവർ ദൂരെ വണ്ടി നിർത്തി നടന്ന് ഇങ്ങോട്ട് വന്നത്, അതു മാത്രമല്ല മൂന്നുപേർക്കും ഒരു കള്ള ലക്ഷണം, സിനിമയിൽ കാണുന്ന ഗുണ്ടകളുടെ സ്റ്റൈൽ മൂന്നുപേർക്കും ഉണ്ട്. ”

ഞാനിത്രയും രാജൻ ചേട്ടന്റെ ചെവിയിൽ പതുക്കെ പറഞ്ഞു.

“നീ പറഞ്ഞത് ശരിയാടാ ഇവന്മാർ കൊട്ടേഷൻ ഗ്യാങ്ങിലുള്ളതാ സിറ്റിയിൽ . കൊലക്കേസ്സിൽ വരെ ഉള്ള പ്രതികളാ ഇവന്മാർ പക്ഷെ നല്ല പിടിപാടുള്ളത് കൊണ്ട് ഊരിപ്പോരും ”

രാജൻ ചേട്ടൻ പറഞ്ഞത് കേട്ടപ്പോൾ ഞാനൊന്ന് ഞെട്ടി ,

“അപ്പോൾ ഞാൻ വിജാരിച്ചതൊക്കെ ശരിയായിരുന്നു .”

ഞാൻ മനസ്സിൽ ഓർത്തു.

ആ വന്നവർ ആഹാരം കഴിക്കുന്നതോടൊപ്പം ഇടയ്ക്കിടക്ക് നിർത്തി ഇട്ടിരുന്ന അവരുടെ ഒമിനി വാനിലേക്ക് നോക്കുന്നത് ഞാൻ കണ്ടു അത് എന്നിൽ സംശയം വർദ്ധിപ്പിച്ചു. അത് മാത്രമല്ല ഞാൻ അവരുടെ അപ്പുറത്ത് ഇരുന്ന ഒരാൾക്ക് ആഹാരം വിളമ്പുന്നതിനിടയ്ക്ക് ക്യാഷിന്റെയും പെണ്ണിന്റെയുമൊക്കെ എന്തോ കാര്യങ്ങൾ അവർ പതിയെ പറയുന്നത് ഞാൻ കേട്ടു പക്ഷെ ഒന്നും വ്യക്തമല്ലായിരുന്നു. എന്നിൽ അത് സംശയം കൂട്ടി.

ഞാൻ രാജൻ ചേട്ടന്റെയടുത്ത് ഇപ്പോൾ വരാമെന്ന് പറഞ്ഞ് ഒരിടവഴി വഴി ഞാൻ അവർ നിർത്തിയിരുന്ന ഒമിനി വാനിന്റെ പുറകിൽ എത്തി. അവർക്ക് ഞാൻ പുറകിൽ നിന്നാൽ എന്നെ കാണാൻ പറ്റുമായിരുന്നില്ല. മാത്രമല്ല ചെറിയ ഇരുട്ടും ഉണ്ട്.ഞാൻ ഡോറിലെ ഗ്ലാസ്സിലൂടെ ഉള്ളിലേക്ക് നോക്കിയപ്പോൾ കൈകാലുകൾ കെട്ടിയ നിലയിൽ ഒരു പെൺകുട്ടി അബോധ അവസ്ഥയിൽ കിടക്കുന്നു.

എന്റെ കൈകാലുകൾ ഒരു നിമിഷത്തേക്ക് എങ്കിലും വിറച്ചു. എന്ത് ചെയ്യണമെന്ന് ഒരു ഊഹവും ഇല്ലായിരുന്നു. ഞാൻ വേഗം എന്റെ ഫോണെടുത്ത് അടുത്തുള്ള പോലീസ് സ്റ്റേഷനിലേക്ക് വിളിച്ചു.

” സർ ഇത് പോലീസ് സ്റ്റേഷനല്ലേ ”

“അതെ എന്താ കാര്യം ”

ഞാൻ കണ്ട കാര്യങ്ങളും കൃത്യ സ്ഥലവും അവർക്ക് പറഞ്ഞ് കൊടുത്തു.

“ഞങ്ങൾ ദാ വരുന്നു അവർ അവിടെ നിന്ന് പോകാതെ നോക്കിക്കോ”

ഞാൻ പതിയെ തിരിച്ച് ആരും കാണാതെ തട്ടു കടയിലെത്തി.

” നീ എവിടെ പോയതാ ”

ഞാൻ വന്നതു കണ്ട് രാജൻ ചേട്ടൻ ചോദിച്ചു

ഞാൻ നടന്ന കാര്യങ്ങൾ എല്ലാം രാജൻ ചേട്ടനോട് പറഞ്ഞു തീർന്നതും റോഡിന്റെ ഇരുവശത്തു നിന്നും പോലീസ് ജീപ്പുകൾ കുതിച്ച് പാഞ്ഞ് വന്നു. ഭക്ഷണം കഴിച്ച് കൊണ്ടിരുന്ന അവർക്ക് മറ്റൊന്നും ആലോചിക്കാനുള്ള സമയം കൊടുക്കാതെ തന്നെ ജീപ്പിൽ നിന്ന് പോലീസുകാർ ചാടി ഇറങ്ങി അവരെ കീഴ്പ്പെടുത്തി.

ജീപ്പിന്റെ ഫ്രണ്ടിൽ നിന്നും SI ഇറങ്ങി എന്റെ അടുത്ത് വന്നു.

” താനെല്ല ഫോൺ ചെയ്തത് ” തട്ടുകടയുടെ ഉള്ളിൽ നിന്ന എന്നോട് അയാൾ ചോദിച്ചു.

“അതേ സർ ”

“വാൻ എവിടെയാണ് ”

“സാർ ദാ അവിടെ ”

ഞാൻ ഒമിനി കിടക്കുന്ന സ്ഥലം ചൂണ്ടികാണിച്ച് പറഞ്ഞു. ഞാനും SI യും കുറച്ച് പോലീസുകാരുമായി അങ്ങോട്ട് പോയി വാനിന്റെ ഡോർ തുറന്ന് പെൺകുട്ടിയെ പുറത്തെടുത്തു. അപ്പോഴേക്കും ഒരു ആംബുലൻസ് അവിടെ എത്തിയിരുന്നു. ആ പെൺകുട്ടിയെ അതിൽ കയറ്റി ഹോസ്പിറ്റലിലേക്ക് വിട്ടു.

“താൻ ചെയ്തത് ഒരു വലിയ കാര്യമാണ്. ആ കുട്ടിയെ മയക്കുമരുന്ന് കൊടുത്ത് മയക്കിയതാണെന്ന് തോന്നുന്നു. കാശിന് വേണ്ടി തട്ടിക്കൊണ്ട് പോയതായിരിക്കാം ഇനിയുള്ള കാര്യം ഞാൻ നോക്കിക്കൊള്ളാം താൻ പേടിക്കണ്ട.”

ആ SI എന്റെ തോളിൽ തട്ടി ഇത്രയും പറഞ്ഞ ശേഷം ജീപ്പിൽ കയറി. അവന്മാരെ ജീപ്പിന്റെ പിറകിൽ കയറ്റിയിരുന്നു . ജീപ്പ് മുന്നോട്ട് പോയപ്പോൾ ആ മുന്ന് പേരിൽ ഒരുത്തൻ എനിക്ക് നേരെ കൈ ചൂണ്ടി , അത് ഒരു ഭീഷണിയായിരുന്നു .

തട്ടുകടയിൽ ഭക്ഷണം കഴിച്ച് കൊണ്ടിരുന്നവരും റോഡിലൂടെ പോയവരും നോക്കി നിൽക്കുകയാണ്.

“നീ ചെയ്തത് നല്ല കാര്യമാണ് പക്ഷെ നീ സൂക്ഷിക്കണം ,അവന്മാർ അത്രയ്ക്ക് മോശം ടീമാണ് . അവന്മാർ നിന്നെ എന്തെങ്കിലും ചെയ്യുമോ എന്നാ എന്റെ പേടി. ”

രാജൻ ചേട്ടൻ എന്റെ തോളിൽ കൈവച്ച് കൊണ്ട് വിഷമത്തോടെ ഇത് പറഞ്ഞു. പക്ഷെ എനിക്ക് പേടിയൊന്നും തോന്നിയില്ല പകരം സന്തോഷമാണ് തോന്നിയത് ഒരു പെൺകുട്ടിയുടെ ജീവനും ജീവിതവും രക്ഷിച്ചതിലുള്ള അഭിമാനമോർത്ത്.

ഒരു പത്ത് മണിയൊക്കെ ആയപ്പോൾ ഞാൻ വീട്ടിലെത്തി രാജൻ ചേട്ടനാണ് എന്നെ എന്നും ബൈക്കിൽ വീട്ടിൽ എത്തിക്കുന്നത്. ഞാൻ നടന്ന കാര്യങ്ങൾ അമ്മയോട് പറഞ്ഞു.

” നിനക്ക് നിന്റെ അച്ഛന്റെ അതേ സ്വഭാവും അതോടൊപ്പം അതേ ദേഷ്യവും തന്റേടവും കിട്ടിയിട്ടുണ്ട് ”

അമ്മ ചിരിച്ചു കൊണ്ട് പറഞ്ഞു പക്ഷെ താമസിയാതെ അമ്മയുടെ മുഖം മങ്ങി , കാരണം എനിക്ക് മനസ്സിലായി .അവന്മാർ എന്നെ എന്തെങ്കിലും ചെയ്യുമോ എന്നോർത്തുള്ള പേടിയാണ്.

രാവിലെ പതിവു പോലെ ഞാൻ കോളേജിലേക്ക് പോകാൻ റെഡിയായി വീടിന് പുറത്തിറങ്ങി ആദിയെ ഫോണിൽ വിളിച്ചു .അൽപം കഴിഞ്ഞപ്പോൾ ആദി ബൈക്കുമായി എത്തി. കോളേജിലേക്ക് പോകുന്ന വഴി കഴിഞ്ഞ ദിവസം നടന്ന കാര്യങ്ങൾ ആദിയോട് ഞാൻ പറഞ്ഞു.

” അജയ് പൊളിച്ചെടാ അവന്മാർക്ക് അങ്ങനെ തന്നെ വേണം. പിന്നെ നീ പറഞ്ഞതനുസരിച്ച് അവന്മാർ കുഴപ്പക്കാരന്മാണെന്നാ തോന്നുന്നേ ”

ആദി അത്രയും പറഞ്ഞ് നിർത്തി . ഞങ്ങൾ കോളേജിലെത്തി ക്ലാസ്സിൽ കയറി. നന്ദു അപ്പോഴേക്കും ഞങ്ങളുടെ അടുത്ത് വന്നു.

“എടാ അജയ് നാളെ ഏതാ ദിവസമെന്ന് അറിയോ .”

അവൻ എന്റോടെ ചോദിച്ചു.

“ഇല്ല എന്താടാ , എന്താ വിശേഷം . ”

“എടാ നാളെയാണ് വാലെന്റൈൻസ് ഡേ . ”

നന്ദു ചിരിച്ചു കൊണ്ട് പറഞ്ഞു.

“എന്തിനാ എനിക്ക് അടുത്ത പണി തരാനുള്ള ഭാവമാണോ ?”

ഞാനവനോട് ചോദിച്ചു.

“ഒന്നു പോടാ അന്ന് അങ്ങനെയൊക്കെ പറ്റി എന്ന് പറഞ്ഞ് എന്നെ ഇങ്ങനെ പറയാതെ . ”

“പിന്നെന്താ കാര്യം ”

“എടാ നമ്മൾ ഫസ്റ്റ് ഇയറിൽ വന്നപ്പോൾ ഈ ദിവസം നടത്തിയ പ്രോഗ്രാം നമുക്ക് നടത്തണ്ടേ?” നന്ദു ഒരു ആകാക്ഷയോടേ ചോദിച്ചു.

” അത് വേണോ ?”

“വേണം നീ എതിർ പറയരുത് നമുക്ക് ഇന്റർവെല്ലിന് ഫസ്റ്റ് ഇയർ ക്ലാസ്സിൽ കയറി കാര്യം പറയാം”

നന്ദു അത് പറഞ്ഞപ്പോൾ ഞാൻ പിന്നെ എതിർക്കാൻ പോയില്ല.

അങ്ങനെ ഇന്റർവെല്ലിന് ഞങ്ങൾ കുറച്ച് പേർ ഫസ്റ്റ് ഇയർ ക്ലാസ്സിൽ കയറി. ഗൗരി എന്നെ എന്തോ ഒരു ഭാവത്തിൽ നോക്കുന്നുണ്ട്.

“ഒരു കാര്യം പറയാനാണ് ഞങ്ങൾ വന്നത്. നാളത്തെ ദിവസം ഏതാണെന്ന് അറിയാമല്ലോ? വാലന്റൈൻസ് ഡേ ആണ് ,അപ്പൊ ഒരു ചെറിയ പരിപാടിയുണ്ട്. ആർക്കെങ്കിലും കോളേജിലെ ആരോടെങ്കിലും ഇഷ്ടമുണ്ടെങ്കിൽ അത് തുറന്ന് പറയാൻ പേടിയാണെങ്കിൽ അങ്ങനെ ഉള്ളവർക്കുള്ള ഒരു ചെറിയ പരിപാടിയാണ് ഇത്. നിങ്ങൾ ഒരു പേപ്പറ് മടക്കി പേപ്പറിന്റെ അകത്ത് നിങ്ങളുടെ പേരും ക്ലാസ്സും പുറത്ത് നിങ്ങൾക്ക് ഇഷ്ടമുള്ള ആളിന്റെ പേരും ക്ലസ്സും എഴുതി ഡിപ്പാർട്ട്മെന്റിന്റെ മുൻപിൽ ഒരു ബോക്സ് കാണും അതിൽ ഇടുക. ഇന്ന് ഉച്ച തൊട്ട് നാളെ രാവിലത്തെ ഇന്റർവെൽ വരെ സമയമുണ്ട് .അത് ഞങ്ങൾ ഇഷ്ടം അറിയാനുള്ള ആളിന്റെ കയ്യിൽ എത്തിക്കും. നിങ്ങൾ നാണക്കേടൊന്നും കരുതണ്ട. ഞങ്ങൾ ഫസ്റ്റ് ഇയറിൽ വന്നപ്പോഴും നടത്തിയ പരുപാടിയാണ് ഇത്. ആരും ആരെയും പറ്റിക്കാനൊന്നും വെറുതേ ചെയ്യരുത് അത് നിങ്ങൾക്ക് തന്നെ പണിയാകും. അപ്പോ ശരി . ”

ഞാനത്രയം പറഞ്ഞ് പുറത്തിറങ്ങി. അവൾ ഇപ്പോഴും എന്നെ നോക്കുകയാണ് പക്ഷെ ആ കാന്താരിയുടെ മുഖഭാവം മനസ്സിലാക്കാൻ എനിക്ക് സാധിച്ചില്ല.

“ഇതൊരുമാതിരി ബ്രോക്കറ് പരിപാടിയാണ് , അല്ലേടാ അജയ് ”

ആദി എന്നോട് പറഞ്ഞു.

“ശരിയാ പക്ഷെ തുറന്ന് പറയാൻ പറ്റാത്തതു കൊണ്ട് ഒരു ഇഷ്ടവും പട്ട് പോകരുത്. അതുകൊണ്ട് നമ്മൾ അവരെ സഹായിക്കുന്നു. അത്രേ ഉള്ളൂ. ഈ നന്ദു വരെ ഹരിതയെ വളച്ചത് ഈ പരിപാടിയിലൂടെ അല്ലേ .അല്ലങ്കിൽ ഇവൻ ഇപ്പോഴും നിരാശാ കാമുകൻ കണക്കേ നടന്നേനെ .”

ഞാൻ ചിരിച്ച് കൊണ്ട് പറഞ്ഞതും നന്ദു ഒന്ന് ചമ്മി

” എടാ ഗൗരി നിന്നെ ശ്രദ്ധിക്കുന്നത് കണ്ടല്ലോ ” നന്ദു എന്നോട് തിരക്കി.

“അതെ പക്ഷെ അവളുടെ മുഖം വായിക്കാൻ എനിക്ക് കഴിയുന്നില്ല സത്യത്തിൽ അവളുടെ മുഖത്ത് നോക്കാൻ പോലും പറ്റുന്നില്ല. ”

ഞാനവനോട് പറഞ്ഞു. ഉച്ചയ്ക്ക് ഡിപ്പാർട്ട്മെന്റിനു മുന്നിൽ ബോക്സ് ഒക്കെ സെറ്റ് ചെയ്തു.

……. പിറ്റേന്ന് ഇന്റർവെല്ലിന് ആ ബോക്സും പൊക്കി കൊണ്ട് ഞങ്ങൾ കുറച്ച് പേർ കോളേജിലെ ഒരു ഭാഗത്ത് ഇരുപ്പ് പിടിച്ചു. ഞങ്ങൾ ബോക്സ് ഓപ്പൺ ചെയ്തു.

“എടാ ഇതൊരുമാതിരി മൂഞ്ചിയ പരിപാടി ആയിപ്പോയി നാലോ അഞ്ചോ പേപ്പറേ ഉള്ളൂ. ” ആദി എന്റെയടുത്ത് പരിഭവം കണക്കെ പറഞ്ഞു.

” ഒരു കണക്കിന് നല്ലതാ ഇല്ലെങ്കിൽ കോളേജ് മുഴുവൻ പേപ്പറ് കൊടുക്കാൻ വലയേണ്ടി വരും.” ഞാനവനോട് പറഞ്ഞു.

“എടാ ദേ ഇതിൽ ചെറിയ ഒരു പൊതി കിടക്കുന്നു.”

നന്ദു അതും പറഞ്ഞ് ആ പേപ്പറ് കൊണ്ട് പൊതിത്ത പൊതി എടുത്തു.

“എടാ ഇത് നിനക്കാ അജയ് . നിന്റെ പേരും ക്ലാസ്സും ഇതിൽ ഉണ്ട് . ”

ഞാനൊന്ന് ഞെട്ടി , ഞാൻ വേഗം ആ പൊതി അവന്റെ കയ്യിൽ നിന്നും വാങ്ങി .അവൻ പറഞ്ഞത് ശരിയാണ് ഇതിന്റെ പുറത്ത് എന്റെ പേരുണ്ട്. ഞാൻ അത് തുറന്നു നോക്കി. അതിൽ ഒരു ചുവന്ന റോസാപ്പൂ ആണ് ഉണ്ടായിരുന്നത് ആ പേപ്പറിൽ ‘ഐ ലവ് യു’ എന്ന എഴുതിയിട്ടുമുണ്ട് എന്നാൽ എഴുതിയ ആളിന്റെ പേരില്ല.

“ഇതാരാടാ നിനക്ക് പേര് എഴുതാതെ റോസാപ്പൂ മാത്രം അയച്ചിരിക്കുന്നത് .”

ആദി എന്നോട് ചോദിച്ചു. എന്റെ മനസ്സിൽ ഗൗരിക്ക് അന്ന് ചുവന്ന റോസാപ്പൂ കൊടുത്ത രംഗം ഓർമ്മ വന്നു.

“എടാ ഗൗരി ”

എന്റെ മുഖം സന്തോഷം കൊണ്ട് നിറഞ്ഞു . ഞാൻ എണിറ്റ് ഫസ്റ്റ് ഇയർ ക്ലാസ്സിലേക്ക് നടന്നു ആദിയും എന്റെ ഒപ്പം വന്നു. ക്ലാസ്സിൽ കയറി ഞാൻ ചുറ്റും നോക്കി എന്നാൽ ഗൗരിയെ ഞാൻ ഒരിടത്തും കണ്ടില്ല എന്റെ മുഖം വാടി .ഞാൻ ക്ലാസ്സിന് പുറത്തിറങ്ങി അപ്പോഴേക്കും അപർണ്ണ എന്റെ അടുത്ത് വന്നു.

“ചേട്ടാ, ഗൗരി നിങ്ങൾ ഉച്ചയ്ക്ക് ഭക്ഷണം കഴിക്കാൻ ഇരിക്കുന്ന ആ മരച്ചുവട്ടിൽ കാണും എന്ന് ചേട്ടനോട് പറയാൻ പറഞ്ഞു. ”

എന്റെ ഉള്ളിൽ എന്തോ ഒരു സന്തോഷം പടർന്നു. ഞാൻ ആദിയുടെ മുഖത്ത് നോക്കി.

“നീ ചെല്ല് എന്റെ ആവശ്യം ഇല്ല ” അവൻ ചിരിച്ചു കൊണ്ട് എന്നോട് പറഞ്ഞു.

ഞാൻ വേഗം ആ മരച്ചുവട്ടിനടുത്തേക്ക് ഓടി അവൾ ഞാൻ വരുന്നതും കാത്ത് നിൽപ്പുണ്ടായിരുന്നു. ഞാൻ അവിടേക്ക് ചെന്നു.

“എന്താ താൻ എന്നെ കാണണമെന്ന് പറഞ്ഞെന്ന് അപർണ്ണ എന്നോട് പറഞ്ഞു .” ഞാൻ അവളെ കുഴപ്പിക്കനായി ചോദിച്ചു.

“കത്ത് കിട്ടിയില്ലേ ? ” അവൾ തെല്ല് സങ്കടത്തോടെ എന്നോട് ചോദിച്ചു.

” കിട്ടി, ഒരു ചുവന്ന റോസാപ്പൂ തന്റെ മുഖം പോലെ മനോഹരമായത് . ”

“ഐ ലവ് യു”

അവൾ അവുടെ നാണം നിറഞ്ഞ മുഖം കൊണ്ട് എന്നെ നോക്കി പറഞ്ഞു.

തുടരും ……….