💞എന്റെ കൃഷ്ണ 08 💞

രാവിലെയുളള  തണുപ്പിലൂടെ  വണ്ടിയുടെ  ഗ്ലാസ്സ് തുറന്നിട്ട്‌ ഓടിക്കാൻ വല്ലാത്തൊരു സുഖമാണ്….

മെയിൻ റോഡിലേക്ക് കേറിയതും പതിവ് കാഴ്ചകൾ കണ്ടുതുടങ്ങി….

അജയൻ ചേട്ടൻ കട തുറന്ന്  പച്ചക്കറിയൊക്കെ നിരത്തുന്നുണ്ട്….

ബാലൻമാഷ് പ്രഭാതസവാരിക്ക് ഇറങ്ങി…….. അങ്ങേരുടെ  കൈവീശിയുളള വരവ്വ്  കണ്ടാൽ തന്നെ  എതിരെ വരുന്നവർ പേടിച്ചിട്ട്  സൈഡിലോട്ട് മാറിനിക്കും😆….

അങ്ങനെയാണ് പുളളിയുടെ നടപ്പ്……കൂടാതെ വായനശാല കൂടി തുറക്കാനുളള പോക്കാണ്…….

കോപ്പറേഷൻ ചേച്ചിമാർ  റോഡ്സൈഡ് ഒക്കെ അടിച്ചു വൃത്തിയാക്കിക്കൊണ്ടൊരിക്കുന്നു….

അങ്ങനെ കാഴ്ചകളൊക്കെ കണ്ട്   കൊടുങ്ങലൂർ ടൗണിൽ എത്തി…. ഒട്ടും തിരക്കില്ലാത്ത സമയമായതു കൊണ്ട് വേഗം വണ്ടി അമ്പലത്തിന്റെ ഗ്രൗണ്ടിലേക്ക് കയറ്റി……..

ആനകൾ ഒരു മൂന്നെണ്ണം പറമ്പിൽ  നിൽപ്പുണ്ട്……

കൊച്ചുമോനെ ആനയെ കാണിക്കാൻ കൊണ്ടുവന്ന അപ്പൂപ്പനും,  അമ്പലത്തിൽ തൊഴുകാൻ വന്നവരും ഒക്കെ ആനയുടെ ചൂരും പിടിച്ചു

നിൽപ്പുണ്ട്……..അത് മലയാളി ആണോ….. ചെണ്ടകൊട്ട് കേട്ടാൽ നോക്കും… ആനയെ കണ്ടാൽ നിൽക്കും…. അത് നമ്മുടെ രക്തത്തിൽ അലിഞ്ഞുപോയ കാര്യമാണ് 😌…..

ആഹ് അങ്ങനെ വണ്ടി പാർക്ക്‌ ചെയ്തതും,  ഞാനൊഴികെ

അമ്മയും, കിച്ചൂസും, അമ്മുവും  ചെരുപ്പൊക്കെ കാറിൽ തന്നെ ഊരിയിട്ടിട്ട്  നേരെ ക്ഷേത്രനടയിലേക്ക് നടന്നു….. അമ്മയാണ് ആദ്യം നടക്കുന്നത്….   അമ്മൂസ്  ആകട്ടെ  പാട്ടുപാവാട നിലത്തിഴയാതെ  ശ്രദ്ധിച്ചു  പിടിച്ചാണ് നടപ്പ്……..പിന്നാലെ മുടി ഒന്നുകൂടി വിടർത്തിയിട്ട്  എന്റെ കിച്ചുപെണ്ണും……. 😊

നമ്മൾ പിന്നെ എന്നും അവസാനം ആണല്ലോ…… വണ്ടി ലോക്ക് ചെയ്ത് ഒക്കെ വരുമ്പോ ടൈം എടുക്കും…..

എന്നെ ഒപ്പം കാണാത്തത്  കൊണ്ടാവണം കിച്ചു  തിരിഞ്ഞ്    എന്നെയൊന്ന്  നോക്കി…….😊

ഞാനാകട്ടെ അവളുടെ പിന്നഴകും നോക്കിയാണ് നടപ്പ്….. മുടി

അരക്കെട്ടിലും ഒരൽപ്പം കുറവേയുളളു പെണ്ണിന്……. വയറൊക്കെ നല്ലോണം മറച്ചാണ്‌ സാരിയുടുത്തിരിക്കുന്നത്…… പുലർച്ചെയുളള ഇളം വെയിലിൽ അവളുടെ മുടിയിഴകൾക്ക് ഒരു തിളക്കമൊക്കെയുണ്ട്………

കിച്ചുപെണ്ണിന്റെ  നോട്ടം കണ്ടിട്ട്

ഞാൻ ഒരു ചിരിയോടെ നടന്നു  അവൾക്കൊപ്പം  എത്തി….

എന്റെ ഇടത് വശത്തായാണ്

അവൾ  നടക്കുന്നത്….പയ്യെ ചെറുതായി മുട്ടിയുരുമിയുളള നടത്തം 😊…..

നടക്കുന്നതിനിടയിൽ കളളകണ്ണിട്ട്

രണ്ടുപേരും പരസ്പ്പരം നോക്കുന്നുണ്ട്….ഹിഹി….

. അതൊക്കെ പോരെ ചിരി വരാനായിട്ട്….

പിന്നൊന്നും നോക്കിയില്ല……

കിച്ചുവിന്റെ മുഖത്ത് നോക്കാതെ,

ഒരു കളളചിരി ഒളിപ്പിച്ചുകൊണ്ട്  പെണ്ണിന്റെ കൈയിൽ ഞാൻ പയ്യെ  കൈകോർത്ത് പിടിച്ചു…..

ആ ഒരു  നിമിഷം അവൾ  എന്റെ കൈയിലും   മുറുക്കെ പിടിക്കുന്നത്

ഞാനറിഞ്ഞു 😊

അമ്മയാകട്ടെ അമ്മൂസിനോട് ഐതീഹ്യങ്ങളും കഥകളും ഒക്കെ പറഞ്ഞാണ് നടക്കുന്നത്…..

കിച്ചു അത് ശ്രദ്ധിച്ചതും പിന്നെ പറയണോ…….എന്റെ കൈ വിട്ട്

ദേ അമ്മയുടെ അടുത്തേക്ക് ഒറ്റ ഓട്ടം..

ശോ ഇവളിത്…..പിന്നെ കൊച്ചു കുഞ്ഞല്ലേ   കഥ കേൾക്കാൻ  പോകാൻ 😑…….ഹ്മ്മ്മ് …

അതും മനസ്സിൽ ഓർത്തുകൊണ്ട്  ഞാനും കഥ കേള്ക്കാൻ ചെവിയോർത്തു😇

ഹിഹി  😆…..

എന്താണെന്ന് വെച്ചാൽ  അമ്മയുടെ കഥ കേൾക്കാൻ വല്ലാത്തൊരു രസമാണ്…….കഥയല്ല, ശെരിക്കും നടന്ന സംഭവങ്ങൾ ഒക്കെയാണ് അമ്മ പറയാറുളളത്‌…..അതിലൊരു കാര്യമാണ് അമ്മ ഇപ്പോൾ പറഞ്ഞുകൊണ്ടിരിക്കുന്നത്‌……

പണ്ട്   അമ്മയുടെ വീട്ടിൽ  നിക്കാൻ പോകുമായിരുന്നു…… അങ്ങനെ ഒരു ദിവസം എല്ലാരും  കിടന്നുറങ്ങിയപ്പോൾ, വെളുപ്പിനെ   വീടിനു ചുറ്റും ആരോ ചിലമ്പ് കെട്ടിയോടുന്ന ഒച്ച….. മണികിലുക്കവും,  അട്ടഹാസവും ഒക്കെയായി  വല്ലാത്തൊരു പേടിപ്പിക്കുന്ന അന്തരീക്ഷം….. ഞാനൊക്കെ ഉറക്കത്തിൽ നിന്ന്  ഞെട്ടിയെണീറ്റു…….അങ്ങനെ മാമനും, അപ്പൂപ്പനും ഒക്കെ എണീറ്റ് വാതിൽ തുറന്നപ്പോ കണ്ട കാഴ്ച…..

ഒരു വെളിച്ചപ്പാട്  ഉറഞ്ഞുതുളളികൊണ്ട് വാളുകൊണ്ട്  തല വെട്ടിപൊളിക്കുന്നു………..

നാക്കെല്ലാം കടിച്ചുപിടിച്ചു, കണ്ണൊക്കെ തളളി, ചോരയൊലിപ്പിച്ചൊരു രൂപം…..

ആ  കാഴ്ച   ഇപ്പോഴും കണ്ണിന്റെ മുന്നിൽ കാണുന്ന പോലെയാ……..

ആ സംഭവമാണ് അമ്മ  കിച്ചൂസിനോടും അമ്മുവിനോടും വെച്ച് കാച്ചുന്നത് 😁…..

കഥയൊക്കെ കേട്ട് ഞങ്ങൾ ക്ഷേത്രനടയിൽ എത്തി….നമുക്ക് പിന്നെ  വല്ല്യ  ഭക്തിയൊന്നും ഇല്ലാത്തോണ്ട് അവിടെയും ഇവിടെയും ഒക്കെ നോക്കിയാണ് നടപ്പ്…….നമ്മളെ സബന്ധിച്ചു അന്നം തരുന്നത് എന്താണോ അതാണ് നമ്മുടെ ദൈവം…എനിക്ക് എന്റെ  ലോറിയാണ്  ദൈവം…..അത് അത്രേ ഉളളു….😄

അമ്മ കളിപ്പാട്ടത്തിനു  കീ കൊടുത്ത പോലെയാണ് നടക്കുന്നത്😂…..

ചുറ്റമ്പലത്തിന് ഉളളിലേക്ക് കേറിയാൽ ഷർട്ട് അഴിക്കണം… അതോണ്ട് ഞാൻ നൈസ് ആയിട്ട് പിന്നാക്കം വലിഞ്ഞു….. മൂന്നുപേരും അകത്തേക്ക് കേറി… ഞാൻ പിന്നിലുണ്ടെന്ന് കരുതിയാകും കിച്ചു നടക്കുന്നത്……….

അവരൊന്നു ചുറ്റി വന്നതും കിച്ചു എന്നെ നോക്കി  കണ്ണുകൊണ്ട് അകത്തേക്ക് വരാൻ  ഒക്കെ ആക്ഷൻ കാണിക്കുന്നുണ്ട്….

ഏയ്യ് ഞാനില്ല എന്ന് ചിരിയോടെ  തോളുപൊക്കി കാണിച്ചതും  പുരികമുയർത്തിയൊന്ന് നോക്കികൊണ്ട്   അവൾ പിന്നെയും റൗണ്ട് അടി തുടങ്ങി….

പെണ്ണിന് ഞാൻ കൂടെ ചെല്ലാത്തത്‌ ഇഷ്ട്ടായിട്ടില്ല…. 😅

ഞാൻ  കുറച്ചുനേരമൊക്കെ അങ്ങോട്ടും ഇങ്ങോട്ടുമൊക്കെ  നടന്നു…….അതും  മടുത്തപ്പോ നേരെ ആൽത്തറയിലേക്ക് പോയിരുന്നു….

ഒരു അപ്പുപ്പൻ  ആൽത്തറയുടെ ഒരറ്റത്ത്  കിടന്ന്  നല്ല ഉറക്കം….

അപ്പോഴാണ് സൈക്കിളിൽ ചായപ്പാത്രം വെച്ച് ചായക്കാരൻ വരുന്നത്‌ കണ്ടത്…….. രാവിലെ ഒന്നും കഴിക്കാതെയിറങ്ങിയത് കൊണ്ട് വയറ്റിൽ ഒരു  കത്തൽ…..ഒരു ചായ കുടിക്കാമെന്ന് കരുതി അയ്യാളെ  അടുത്തേക്ക് വിളിച്ചതും ബെൽ അടിച്ചുകൊണ്ട് ആൾ പറന്നെത്തി……. അത് കേട്ട്  ഉറങ്ങിക്കിടന്നയാളും  എണീറ്റു……

ഒരു ചായ പറഞ്ഞ് പോക്കറ്റിൽ നിന്ന് പൈസയെടുത്തപ്പോഴാണ്  അപ്പുപ്പൻ നോക്കിയിരിക്കുന്നത് കണ്ടത്…..

ആകെ മുഷിഞ്ഞ വേഷം…..

ഒരിക്കൽ ആരുടെയൊക്കെയോ ആരെല്ലാമോ ആയിരുന്നിരിക്കണം….

ഇപ്പോ ആരുമില്ലാത്തവനായി ഇങ്ങനെ…. പാവം….

പുളളിക്ക് വേണോ എന്ന് പോലും ചോദിക്കാതെ, ഞാൻ വേഗം  ഒരു ചായയും കൂടി വാങ്ങി കാർന്നോരുടെ അടുത്തേക്ക് പോയി….

ചായ നീട്ടിയതും കുഞ്ഞുങ്ങളെക്കാൾ നിഷ്കളങ്കമായ  ചിരിയോടെ ,  നിറഞ്ഞ തൃപ്തിയോടെ പുളളിക്കാരൻ എന്റെ കൈയിൽ നിന്നും  ചായ വാങ്ങി കുടിക്കാൻ തുടങ്ങി……..

അത് കണ്ടപ്പോ എനിക്കും ഉളളിലൊരു സന്തോഷം…..

ഹോ ചായ അകത്തേക്ക് ചെന്നപ്പോ ഒരാശ്വാസം…

അങ്ങനെ ചായ കുടിച്ച് കഴിഞ്ഞ്  ആൽത്തറയിൽ  കുറച്ചു നേരം കണ്ണടച്ചിരുന്നു…….നല്ല  തണുത്ത കാറ്റും ഇളം വെയിലിന്റെ ചൂടുമേറ്റ് അങ്ങനെയിരിക്കാൻ വല്ലാത്ത സുഖം…..

ഇന്ന് ചെയ്യേണ്ട കുറച്ച് കാര്യങ്ങൾ മനസ്സിലേക്ക് വന്നു…….

തിങ്കളാഴ്ചത്തേക്ക് മാറ്റി വെച്ചതാണ്…..

തോമസ്സേട്ടന്റെ ഓഫീസിൽ പോയി   ഓട്ടം പോയതിന്റെ പൈസ വാങ്ങണം…..3 ഗോവ പോയതിന്റെ 87360 രൂപ  കിട്ടാനുണ്ട്…. ചെന്ന് വാങ്ങേണ്ട കാര്യമുളളു… അതിന് വരെ മടിയാണ്😅… പിന്നെ വണ്ടി  സർവീസിന് ഷോറൂമിൽ കേറ്റണം…

പിന്നെ  വൈകിട്ട് രണ്ടിനേം  ഒന്ന് ബീച്ചിൽ കൊണ്ടോണം…. അപ്പോ അങ്ങനെ കുറച്ച്  കാര്യങ്ങൾ 😊….

നെറ്റിയിൽ ഒരു തണുത്ത സ്പർശനം തോന്നിയതും ഒന്ന് ഞെട്ടിക്കൊണ്ട് ഞാൻ കണ്ണുതുറന്നതും പെട്ടെന്നായിരുന്നു……

ഒരു ചിരിയോടെ, കയ്യിൽ പ്രസാദവുമായി എന്നെ നോക്കി നിൽക്കയാണ് കിച്ചു…. അവൾ ചന്ദനം തൊട്ട് തന്നതാണ്…….

കുറച്ചു നേരം കണ്ണെടുക്കാതെ ഞാൻ നോക്കിയിരുന്നു പോയി എന്റെ പെണ്ണിനെ…….

പെട്ടെന്നായിരുന്നു കയ്യിൽ ഒരു പിച്ചു കിട്ടിയത്‌……

“ഡി  ഡീ….. വിട്…….എന്റമ്മേ…. ”

കിച്ചു കൈ എടുത്തതും, ഞാൻ തിരുമികൊണ്ട്….

ഹോ എന്തിനാടി ഇപ്പോ പിച്ചിയത്…..

“അതേയ് എന്താ എന്റെ കൂടെ വരാഞ്ഞേ…. “കിച്ചുവിന്റെ പിണക്കത്തോടെയുളള  ചോദ്യം…

ഡി  അതിനാണോ ഈ പിച്ചിയെടുത്തത്……

ഹിഹി… സാരില്ലാട്ടോ അച്ചേട്ടാ….

എന്നും പറഞ്ഞു ചിരിയോടെ നിൽക്കുന്ന പെണ്ണിനെ കണ്ടപ്പോ വേദനയിലും  എനിക്കും ഒരു ചിരി വന്നു…….

‘മ്മ്മ്മ്…. ഒറ്റയ്ക്ക് കിട്ടുമ്പോ തിരിച്ചു  താരാട്ടാ……’ ഞാൻ ചുവന്നു കിടക്കുന്ന കൈതണ്ടയിൽ തടകികൊണ്ടാണത്‌ പറഞ്ഞത്…..

മ്മ്മ്മ്…അല്ലെങ്കിലും ഒറ്റയ്ക്ക് കിട്ടുമ്പോ എന്നേം പിച്ചേo  മാന്തേo ഒക്കെ  ചെയ്യണതല്ലേ………അപ്പോ അതിന്റെ കൂടെ തന്നോ….. കിച്ചു വല്ലാത്തൊരു നാണത്തോടെയത് പറഞ്ഞത് കേട്ടപ്പോ ഞാനാകെ ചമ്മിപ്പോയി…. ഹിഹി….. അവൾ പറഞ്ഞതിലും കാര്യം ഇല്ലാതില്ല,😇

എന്റെ കളളചിരി മറച്ചുകൊണ്ട് അതൊക്കെ എന്റെ  അവകാശമാണെന്ന മട്ടിൽ ഞാനും ഇരുന്നു… 😇

ഒച്ചനെയുളള ചുമ കേട്ടപ്പോഴാണ്

കിച്ചു ആൽത്തറയിൽ കിടക്കുന്നയാളെ ശ്രദ്ധിച്ചത്…..

നെഞ്ച് തടകികൊണ്ട് അപ്പുപ്പൻ നല്ലോണം ചുമക്കുകയാണ്…..

ഡീ അമ്മയും, മോളും ഇറങ്ങിയില്ലേ..

എന്റെ ചോദ്യം കേട്ടപ്പോഴാണ് കിച്ചു അപ്പുപ്പനിൽ നിന്ന് നോട്ടം മാറ്റിയത്…..

അമ്മ ഇപ്പോ വരും അച്ചേട്ടാ….. അമ്മുവിന്റെ പേരിൽ എന്തോ വഴിപാട് കഴിപ്പിക്കാൻ നിൽക്കാ……

ഹിഹി…… അമ്മുവിനെ വിടാതെ അവിടെ നിർത്തിയേക്കാ…..

മ്മ്മ്….. അത് നന്നായി… കുറച്ച് നേരമെങ്കിലും നിന്നെയൊന്ന്  ഒറ്റയ്ക്ക് കിട്ടിയല്ലോ…. അല്ലേൽ അമ്മൂസ് എന്റെ മേത്ത് ഒട്ടിപിടിച്ച്

നിന്നാനെ…….

മ്മ്മ്…. അവൾക്ക് ഇപ്പോ എന്നെക്കാളും ഇഷ്ട്ടം അച്ചേട്ടനെയാ..

ഹിഹി… അത് പിന്നെ  അമ്മൂസ് എന്റെ  മോളല്ലേടി…… 😊

‘അച്ചേട്ടാ……..അതില്ലേ…’

കിച്ചു എന്തോ ചോദിക്കാനുളള പുറപ്പാടാണ്……

മ്മ്മ്…..അതുണ്ട്…. ഞാൻ കിച്ചുപെണ്ണിനെ കളിയാക്കുന്ന പോലെ തിരിച്ച് പറഞ്ഞു….

‘പോ ഏട്ടാ…. ‘അതില്ലേ…. അവൾ പിന്നെയും അത് തന്നെ പിടിക്കുകയാണ് 😅

ആഹ് ഡി… ഒന്ന് പറ പെണ്ണെ……

അത് കേട്ടതും കിച്ചുവിന് സമാധാനം.

അച്ചേട്ടാ, അന്ന് എന്തോ കാര്യം പിന്നെ പറയാന്ന് എന്നോട് പറഞ്ഞില്ലേ…. അതെന്താ….😇

ഏഹ്ഹ്… അതേത് കാര്യം…… ഇവളിത് ഏത് കാര്യമാണ് പറയുന്നതെന്നാവോ……

ഞാൻ അതും ആലോചിച്ച് ഇരിപ്പായി……

ശോ എന്റച്ചേട്ടാ… അന്ന് കോട്ടയിൽ പോയപ്പോ ഒരു കാര്യം ആലോചിച്ച് വെച്ചിട്ടുണ്ടെന്ന് പറഞ്ഞില്ലേ… ആ കാര്യം….ഇനിയെങ്കിലും അതൊന്ന് പറ …..

ആഹ്…….ഇപ്പോ ഓർമ വന്നു…….അത് ഇപ്പോ  അറിഞ്ഞിട്ട് എന്തിനാഡി …… നമുക്ക് തിങ്കളാഴ്ച ഒരിടം വരെ പോകാം ….. അപ്പോ അറിഞ്ഞമതിയെന്ന് പറഞ്ഞ് കിച്ചുവിന്റെ മൂക്കൊന്ന്  വലിച്ചു വിട്ടു  ……..കാര്യം വേറൊന്നുമല്ല…

കിച്ചൂനെ SET&NET എക്സാം എഴുതിക്കണം, അതിന് കൊടുങ്ങല്ലൂർ തന്നെയുളള കോഴ്സ് സെന്ററിൽ ചേർക്കണം….അല്ലാതെ ഏതെങ്കിലും ട്യൂഷൻ സെന്ററിൽ ജോലിക്ക് വിട്ടാൽ ശെരിയാകില്ല…

‘അച്ചേട്ടൻ അന്നും പറയില്ല…എന്നെ പറ്റിക്കും……’ കിച്ചു കളളപിണക്കം കാണിച്ചുകൊണ്ടൊന്ന് ചിണുങ്ങി……

ഹിഹി… ഇല്ലടി കിച്ചൂസ്സേ…….

അപ്പോഴാണ് അമ്മയും മോളും വരുന്നത്‌ കണ്ടത്….

കിച്ചുവേ ദേ അവർ എത്തിയെന്ന് പറഞ്ഞതും പെണ്ണ് കുറച്ച് ഗ്യാപ്പിട്ട് നിന്നു….. ഹിഹി… അമ്മയെ കാണുബോ മാത്രമുളള

നീങ്ങിനിക്കൽ 😅….

അമ്മയും അമ്മൂസും വരുന്നത് നോക്കി  ഞാൻ എണീറ്റു……..

അമ്മ ഇലയിൽ നിന്നും  ചന്ദനമെടുത്ത്‌ അടുത്തേക്ക് വന്നതും  എന്റെ നെറ്റിയിൽ  ചന്ദനം കണ്ടത്കൊണ്ടാകണം  കിച്ചൂസിനെയൊരു നോട്ടം…… 😊

ഹിഹി… കിച്ചു വേഗം നോട്ടം മാറ്റിക്കളഞ്ഞു…. 😅

മ്മ്മ്…. ഡാ വേഗം വണ്ടിയെടുക്കെന്ന് പറഞ്ഞ് ചന്ദനം ഇലയിൽ തന്നെയിട്ട്  അമ്മ ചിരിച്ചുകൊണ്ട് ആദ്യം  നടന്നു……

അമ്മു  അപ്പോഴേക്കും എന്റെ കൈയിൽ പിടുത്തമിട്ടു….. അങ്ങനെ ഞങ്ങൾ മൂന്നാളും കൂടി അമ്മയുടെ പിന്നാലെ നടന്നു ….പെട്ടെന്ന് കിച്ചു ഒന്ന് നിന്നതും ഞാൻ എന്താടി എന്ന് പുരികമുയർത്തി കാണിച്ചു ……

‘അച്ചേട്ടാ ഒരു 100 രൂപ തന്നെ…….’

നേർച്ചയിട്ട് കഴിഞ്ഞില്ലെടി  എന്നും ചോദിച്ച് ഞാൻ പോക്കറ്റിൽ നിന്ന് പൈസ എടുത്ത് കൊടുത്തു……..

പൈസ കിട്ടിയതും പെണ്ണ് ഞങ്ങൾ ഇരുന്നിടത്തേക്ക്  നടന്നു ….. ഇവളിത് എങ്ങോട്ടാണീ പോണത്……. ഞാനും അമ്മുവും അതും ആലോചിച്ച് നിന്നു…….

നേർച്ചയിടാൻ അല്ലായിരുന്നു അവൾ പൈസ വാങ്ങിയത്………

അച്ചേട്ടാ ആ അപ്പൂപ്പന് ഒട്ടും വയ്യന്നാ തോന്നണേ….. എന്ത് ചുമയാ…..

മരുന്ന്  വാങ്ങിക്കോന്ന്  പറഞ്ഞു പൈസ കൊടുത്തു…..

കിച്ചു പോയി തിരിച്ചു വന്നതും ഒരു സങ്കടത്തോടെയാണത് പറഞ്ഞത്….

കിച്ചു അത് പറഞ്ഞപ്പോ ചെറുതായി എന്റെ കണ്ണൊന്ന്  നിറഞ്ഞു….

‘കല്ലായാ ദൈവത്തിനു കാണിക്കയെന്തിന്’…….അല്ലേ….

കിച്ചുവിനൊപ്പം അമ്മുവിന്റെ കൈയും പിടിച്ചു നടക്കുമ്പോളും മനസ്സ് നിറയെ എന്റെ പെണ്ണ് ചെയ്ത നന്മയായിരുന്നു…..

നടന്നു കാറിനടുത്തെത്തിയതും പഞ്ചാബി ഹൗസിൽ ഹനീഫിക്ക പറയുന്ന പോലെ എന്താണൊരു സൈഡ് വലിവ്……😐

ഹിഹി…… ആഹാ അപ്പോ നീയാണല്ലേ ഇതിന്റെ ഡ്രൈവർ 😅……അമ്മു എന്നെയും വലിച്ചു കൊണ്ട് ആനയെ കാണാൻ പോകുന്ന പോക്കാണ്…….

അങ്ങനെ കുറച്ചുനേരം

കുളിപ്പിച്ച് കുറി തൊടിയിച്ച്  നല്ല കുട്ടപ്പനാക്കി നിർത്തിയിരിക്കുന്ന കൊമ്പൻമാരെ കണ്ടു നിന്നു…..

വിശപ്പിന്റെ വിളി വന്നത് കൊണ്ട് അധികനേരം അവിടെ നിന്നില്ല… വേഗം വണ്ടിയെടുത്തു….

പോകുന്ന വഴി  “അമ്മേ     ദേ     വയറു  മൂളണ ഒച്ച  കേട്ടാ 😐” എന്ന് അമ്മൂസ്  പറഞ്ഞത്‌ കേട്ട് ഞങ്ങൾ  ചിരിച്ചൊരു വഴിയായി😁…

വീട്ടിൽ എത്തട്ടെ എന്റെ മോളെ… അമ്മ പുട്ടും കടലയും  പപ്പടോം ഒക്കെയുണ്ടാക്കി വെച്ചിട്ടുണ്ടെന്ന് അമ്മ പറഞ്ഞതും അമ്മുവിനൊരു സമാധാനം…

മെയിൻ റോഡിൽ നിന്ന് വീട്ടിലേക്കുളള റോഡിലേക്ക് തിരിഞ്ഞതും  അച്ഛനും മുത്തശ്ശനും എന്റെ ലോറിയുടെ മുന്നിൽ നിൽക്കുന്നത് കണ്ടു…… വെറുതെ നടക്കാൻ ഇറങ്ങിയതാകും…….

രണ്ടും പിന്നെ പറ്റിയ കൂട്ടാണെന്ന് പറയണ്ടല്ലോ…..😅

വീട്ടിൽ എത്തിയതും

അമ്മയും കിച്ചുവും നേരെ  അടുക്കളയിലേക്ക് കേറി…….അപ്പോഴേക്കും ഞാനും അമ്മുവും വേഗം  കൈകഴുകി ഇരിപ്പായി….ഇനി  കഴിച്ചിട്ടേ ബാക്കി കാര്യമുളളു……..

ഫുഡ് എത്തിയതും  പിന്നൊന്നും നോക്കിയില്ല…. നല്ല താങ്ങു താങ്ങി….

അമ്മ കിച്ചുവിനെയും പിടിച്ചിരുത്തി വിളമ്പി തുടങ്ങി…….. അച്ഛനും മുത്തശ്ശനും വന്നിട്ടേ അമ്മ കഴിക്കു….

അമ്മയുടെ അച്ഛൻ മരിച്ചിട്ട് കുറച്ചു വര്ഷങ്ങളായി….. എന്നാലും അമ്മ ഇടക്ക് അപ്പുപ്പനെയോർത്ത് കരയുന്നത് കാണാം…..സ്വന്തം അച്ഛനോടെന്ന പോലെ  സ്നേഹത്തോടെയാണ് അമ്മ കിച്ചുവിന്റെ മുത്തശ്ശനെ ഇപ്പോ കാണുന്നത്……. അത് അമ്മയുടെ ‘അച്ഛാ’ എന്നുളള വിളി കേട്ടാൽ തന്നെ മനസ്സിലാകും….

ഞാൻ വേഗം കഴിച്ചെണീറ്റ് കൈകഴുകി മുറിയിൽ കേറി….  ടോയ്‌ലെറ്റിൽ പോയൊന്നു ഫ്രഷായി  കാക്കിഷർട്ടിട്ട്  പുറത്തേക്ക് വന്നു…

അപ്പോഴും അമ്മു  എണീറ്റിട്ടില്ല…. അമ്മയാണെങ്കിൽ അവളെ അടുത്തിരുത്തി കഴിപ്പിക്കുകയാണ്…..

കിച്ചുവിനെ കാണുന്നില്ലല്ലോ…..

അപ്പോഴാണ് അടുക്കളയിൽ  പാത്രത്തിന്റെ ഒച്ചപ്പാട് കേട്ടത്….. അത് പാവം പാത്രം കഴുകുന്ന പണിയിലാകും…….

കിച്ചുപെണ്ണ് അടുക്കളയിൽ ഒറ്റയ്ക്കാണെന്ന് മനസ്സിലായതും എന്റെയുളളിലെ  കളളത്തരം ഉണർന്നു……. 😇

ശോ, ഇപ്പോ എങ്ങനെയാ ഒന്ന് അടുക്കളയിലേക്ക് പോകാ 😐…

അങ്ങനെ ആലോചിച്ച് നിന്നപ്പോളാണ് ടേബിളിൽ വെച്ചിരുന്ന വെളളം ജഗ്ഗ് കാലിയായിരിക്കുന്നത് കണ്ടത്‌…..

എന്നിലെ  കുരുട്ട്ബുദ്ധി ചെറുതായിട്ട് പ്രവർത്തിച്ചു….

ഇതൊക്കെയൊന്ന്  നിറച്ചു വെച്ചൂടെ…. മനുഷ്യന് ദാഹിച്ചിട്ട് വയ്യ…..എന്ത് കഷ്ട്ടായിത്‌…… ശോ…

ഞാൻ  അങ്ങനെ  നൈസ് ആയിട്ടൊരു  നമ്പറിട്ട് ജഗ്ഗ് ആയിട്ട് അടുക്കളയിലേക്ക് നടന്നു….

ചെന്നപ്പോഴുണ്ട് കിച്ചു പാത്രം കഴുകുന്ന തിരക്കിലാണ്…….

എനിക്കാണേൽ രാവിലെ തൊട്ട് പെണ്ണിനെ  സാരിയിൽ കണ്ടിട്ട്  കൊതിയായിട്ട് വയ്യ……

ഒച്ചയുണ്ടാക്കാതെ  പയ്യെ അടുത്തേക്ക്

ചെന്നു……… കിച്ചൂസ്സിന്റെ  പിന്നിലെത്തിയതും ഞാൻ   പെട്ടെന്നാണ്  ചെവിയിൽ

ചുണ്ട് മുട്ടിച്ചുകൊണ്ട് ഇത്തിരി വെളളം എന്ന് പറഞ്ഞത്….

ഹിഹി…. പെണ്ണ് നിന്നനിൽപ്പിൽ  ഞെട്ടിപ്പോയി ….. പിന്നെ  തല ചരിച്ചു എന്നെയൊരു നോട്ടം……വല്ലാത്തൊരു കൊതി തോന്നി അവളുടെയാ നോട്ടം  കണ്ടപ്പോ…… 😇

ശോ പേടിച്ചു പോയെട്ടോ അച്ചേട്ടാ….

കിച്ചു ഒന്ന് ചിണുങ്ങിക്കൊണ്ട് പിന്നെയും പാത്രം കഴുകാൻ തുടങ്ങി………

ഹിഹി… ഡി പൊട്ടി.. അതിന് ഞാൻ പേടിപ്പിച്ചതല്ലല്ലോ…ഉമ്മ വെച്ചതല്ലേ…….. 😇.

അത് കേട്ടതും പെണ്ണിന്  നാണം വന്നിട്ട് ചിരി വരുന്നുണ്ട്……..അവളുടെ ചിരി കണ്ടിട്ട് എനിക്ക് പിന്നെയും കൊതി കൂടി എന്ന് വേണം പറയാൻ………

ഞാൻ പിന്നിൽ നിൽക്കുന്നത് കൊണ്ടായിരിക്കാം എന്റെ മുത്തിന് പിന്നെയും  കളളചിരി വരുന്നുണ്ട്…

കിച്ചു കൈ കഴുകികൊണ്ട്  തിരിഞ്ഞു നിന്ന്  എന്നെയൊന്നു തളളി നീക്കാൻ നോക്കി…… പക്ഷെ  ഞാൻ എവിടെ നീങ്ങാൻ….. രണ്ട് കയ്യും സ്ലാബിൽ പിടിച്ചുകൊണ്ട് ഒന്നുകൂടെ കിച്ചുവിനോട് ചേർന്ന് നിന്നു…..

അച്ചേട്ടാ വേണ്ടട്ടോ ………  മാറിക്കെ……ദേ അമ്മ വാരോട്ടോ….. വെപ്രാളത്തോടെയുളള   കിച്ചുവിന്റെ വർത്താനം കേട്ടതും ഒരു ചിരിയോടെ അവളുടെ കണ്ണുകളിലേക്ക് നോക്കികൊണ്ട് കിച്ചുവിനെ ഞാൻ  പയ്യെ എന്നിലേക്ക് ചേർത്തു……

‘മ്മ്മ് അച്ചേട്ടാ…….’  കിച്ചുവിന്റെയാ  വിളിയിൽ അടുക്കളയിലാണ് നിൽക്കുന്നതെന്ന കാര്യം പോലും ഞാൻ മറന്നു…..

പെണ്ണിന്റെ നെഞ്ചിടിപ്പ് കൂടുന്നത് ഞാനറിഞ്ഞു………ചെറുതായി കഴുത്തിൽ വിയർപ്പ് പൊടിഞ്ഞിരിക്കുന്നു……

എന്റെ ശ്വാസം കിച്ചു ശ്വസിക്കുന്ന അത്രയും എന്റെ ചുണ്ടുകൾ എത്തിയപ്പോൾ കിച്ചുവിന്റെ മിഴികൾ താനേയടഞ്ഞു പോയി…..

പതിയെ അവളുടെ കുഞ്ഞുചുണ്ടുകളെ നുണഞ്ഞതും എന്റെ പുറത്ത് അവളുടെ കൈകൾ പിടിമുറുക്കി……

എന്റെ ജീവന്റെ പകുതിയെയാണ് ഞാനിപ്പോ ചേർത്ത് പിടിച്ചിരിക്കുന്നത്‌…..

അത്രയും ജീവനാണ്  എനിക്ക് എന്റെ കിച്ചുവിനെ……..എത്ര നുണഞ്ഞിട്ടും മതി വരുന്നില്ല…. കൊതി കൂടുന്ന പോലെ……

ഒരു ഞെട്ടലോടെയാണ് ഹാളിൽ പാത്രം വീഴുന്ന ശബ്ദം കേട്ടത്……

കിച്ചു എന്നിൽ നിന്നും അകന്ന് മാറികൊണ്ട് വല്ലാതെ കിതയ്ക്കുന്നുണ്ട്……….

ശോ പാത്രം പിടിച്ചപ്പോ കൈ വിറയൽ……പ്രഷർ കുറഞ്ഞെന്ന് തോന്നണു…..

മോളെ ഇത്തിരി ഉപ്പിട്ട്  നാരങ്ങവെളളം എടുത്തെയെന്നും പറഞ്ഞാണ് അമ്മ അടുക്കളയിലേക്ക് വന്നത്…….

കിച്ചു വേഗം ചെന്ന് അമ്മയുടെ കൈയിൽ നിന്നും പത്രമൊക്കെ വാങ്ങി  കസ്സേര നീക്കിയിട്ട് കൊടുത്തു………

എന്താമ്മേ….. ഇതൊക്കെ ഞാൻ എടുക്കില്ലേ….. കിച്ചുവിന്റെ ശകാരം കേട്ട് അമ്മ കസ്സേരയിലേക്കിരുന്നു…

പെട്ടെന്ന് പ്രഷർ കുറഞ്ഞതാ മോളെ ..

സാരില്ല……. അല്ല നീ എങ്ങോട്ടാ….. ഇന്ന് ഓട്ടം ഉണ്ടോടാ………

കസ്സേരയിലേക്ക് ഒന്ന് ചാഞ്ഞിരുന്നുകൊണ്ട് അമ്മ എന്നോടായി ചോദ്യം…..

ഇല്ല ….. ഞാൻ ഉച്ചക്ക് വരും… വണ്ടി ഷോറൂമിൽ കൊണ്ടോണം………

അപ്പോഴേക്കും കിച്ചു ഉപ്പിട്ട് നാരങ്ങവെളളം  അമ്മക്ക് കൊടുത്തു…..

അല്ല നീ വെളളം കുടിച്ചോടാ……

വേണേൽ ഇതിത്തിരി കുടിച്ചോ………… അമ്മ ഒരുകവിൾ  കുടിച്ച് എന്നെ നോക്കികൊണ്ട് ചോദിച്ചു…..

എനിക്ക് വേണ്ടമ്മേ…….. ഞാൻ നല്ല മധുരമുളള വെളളം കുടിച്ചെന്ന്

കിച്ചുവിനെ നോക്കി പറഞ്ഞതും പെണ്ണിന്റെ മുഖമാകെ ചുവന്നു….എന്റെ നോട്ടം കണ്ടിട്ടാകാണം അവൾക്ക് ചിരി വന്നത് 😊…….

ഹിഹി…. ഇനിയും നിന്നാൽ എന്റേം കിച്ചൂന്റേം മുഖം കണ്ട് അമ്മക്ക് എന്തെങ്കിലും മനസ്സിലാകും…..

ഞാൻ പിന്നെ അവിടെ നിന്നില്ല…..

വേഗം ഹാളിലേക്ക് നടന്നു….

അമ്മു സോഫയിൽ ചാരിക്കിടന്ന് ടീവിയും കാണുന്നുണ്ട്, ഫോണിലും തോണ്ടുന്നുണ്ട്…….

ഇറയത്തേക്ക് നടക്കാൻ പോയ എന്നെ  അപ്പോഴാണ് അമ്മു കണ്ടത്…..

‘അച്ചുച്ചേട്ടാ………എപ്പോഴാ തിരിച്ച് വരാ………. ‘അതും ചോദിച്ച്  അമ്മു സോഫയിൽനിന്ന് എണീറ്റ് ഇറയത്തേക്ക് വന്നു….

എന്താടി……. എന്തേലും വാങ്ങണോ…

എനിക്കൊന്നും വേണ്ട….. എപ്പോഴാ വരായെന്ന് പറ…….അമ്മൂസ് ഇത്തിരി ആകാംഷയോടെ ചോദിച്ചപ്പോഴാണ് എനിക്ക് കാര്യം പിടികിട്ടിയത്……

ഇന്നലെ ബീച്ചിൽ കൊണ്ടുപോകാമെന്ന് പറഞ്ഞിരുന്നല്ലോ….എന്റെ  പട്ടികുഞ്ഞ് അത് ഓർത്ത് വെച്ചിരിക്കുകയാണ് 😅…..

ഹിഹി… ചേട്ടൻ വന്നിട്ട് വൈകിട്ട് കൊണ്ടുപോകാടി എന്ന് പറഞ്ഞതും അമ്മൂസിന് സന്തോഷം വന്നു….. രണ്ട് കൈയും അടിച്ചുകൊണ്ട് അവൾ നിന്നനിൽപ്പിലൊന്ന് ചാടി 😂….

ഇങ്ങനൊരു കൊച്ച്…….

ഞാൻ റ്റാറ്റയും കൊടുത്ത് വേഗം റോഡിലേക്ക് നടന്നു…….

വണ്ടിയുടെ അടുത്തെത്തിയതും അച്ഛനും മുത്തശ്ശനും ആരോടോ വർത്താനം പറഞ്ഞ്  നിൽക്കുന്നത് കണ്ടു……

എന്റമ്മോ ബാലൻമാഷാണ്….

അങ്ങേരുടെ മുന്നിൽ പെട്ടാൽ ഉപദേശിച്ച് കൊന്നുകളയും……

അതോണ്ട് ഞാൻ മൈൻഡ് ചെയ്യാതെ

വേഗംഡോർ തുറന്ന് കേറിയിരുന്നു….

ഒരു 10 മിനിറ്റ് സ്റ്റാർട്ട്‌ ചെയ്തിടണം….

മിററിലൂടെ നോക്കിയപ്പോൾ മാഷ് അടുത്തേക്ക് വരുന്നത് കണ്ടു…..

“മ്മ്മ്മ്മ് കിട്ടും, കിട്ടും…. എന്നെ ഇപ്പോ കിട്ടും” എന്ന പോലെയാ ഞാൻ വണ്ടിയെടുത്ത് വിട്ടത്…. 😂

നേരെ തോമസ്സേട്ടന്റെ ഓഫീസിലേക്ക്  പോയി……വണ്ടി ഒതുക്കിയിട്ട് നേരെ

വേണുവേട്ടന്റെ ക്യാബിനിലേക്ക് നടന്നു……. തോമസ്സേട്ടന്റെ  ക്യാബിനിൽ വരെ അനുവാദം ചോദിക്കാതെ കേറാൻ അധികാരമുളള ചുരുക്കം ചിലരിൽ ഞാനുമുണ്ട്….. പക്ഷെ കാക്കിയിട്ടാൽ നമ്മളെന്നും നിൽക്കേണ്ട സ്ഥാനത്തെ നിന്നിട്ടുളളു……വേണുവേട്ടനെ കണ്ട് പൈസയും വാങ്ങി, പൈസ വാങ്ങാൻ വരാൻ വൈകിയതിൽ സ്നേഹത്തിലുളള  നല്ല തെറിയും കേട്ട്

തൃപ്തിയോടെ  ഞാൻ തിരിച്ചിറങ്ങി😇.

ഇനി നേരെ ഷോറൂമിൽ പോണം…..

സമയം കളയാതെ അവിടേക്ക് വിട്ടു….

എന്റെ വണ്ടിയുടെ ഓണറും ഡ്രൈവറും ഞാൻ തന്നെയായത് കൊണ്ട്, വണ്ടി സർവീസ് ചെയ്യിക്കാൻ  ചെല്ലുമ്പോൾ അവരുടെ ഒരു കളിയും നടക്കില്ല…. എഞ്ചിൻ ഓയിലൊക്കെ നോക്കി നിന്ന് തന്നെ ഞാൻ മാറ്റിക്കുകയുളളു….

റോഡിൽ പറന്നു ജീവിക്കണവനെ തുരന്ന് തിന്നുന്ന തെണ്ടികളാണ് ഷോറൂമിൽ ഉളളത്‌….

വണ്ടി കേറ്റി  പരിചയക്കാരായിട്ടുളള ഡ്രൈവർമാരോടും, അപ്രന്റീസ് ചെയ്യാൻ വന്ന അപ്പുവിനോടും  സംസാരിച്ചു നിന്നപ്പോഴാണ്  ആശാന്റെ വരവ്വ്…….

ആള് അവിടത്തെ മെയിൻ പണിക്കാരനാണ്….. അതോണ്ട് തന്നെ എല്ലാവരും ആശാൻ എന്നെ വിളിക്കാറുളളു…. ‘വെളളാനകളുടെ  നാടെന്ന’ സിനിമയിലെ പപ്പു ചേട്ടന്റെ ചെറിയൊരു പകർപ്പ് 😅…

ആശാന്റെ തളള് ഒരു രക്ഷയില്ല… തളളി  തളളി  സ്റ്റാർട്ട്‌ ആവാത്ത വണ്ടി വരെ തളളി നീക്കും…അമ്മാതിരി  ഐറ്റമാണ് ആശാൻ…..

ആഹ് അച്ചുവേ…..  നിന്റെ ചെക്കന് എന്താടാ പറ്റ്യേ……പനി പിടിച്ചാ….

ആശാൻ എന്നെ കണ്ടപ്പോ  കളിയാക്കി ചോദിക്കുന്നതാണ്😉…

ഏയ് ഇല്ലാശാനെ…….ചെറിയൊരു വയറിളക്കം😅….. ഒന്ന് നോക്ക്യേ……

കൗണ്ടർ അടിയൊക്കെ അപ്പപ്പോ കൊടുക്കും……….

അങ്ങനെ ഡോക്ടർ പരിശോധിക്കാൻ തുടങ്ങി…. എല്ലാം ചെക്ക് ചെയ്യുന്നതിനിടയിൽ ആശാന്റെ തളള് തുടങ്ങി…….

‘ഡാ അച്ചുവേ……. ‘വണ്ടിയുടെ അടിയിൽ കിടന്ന് എഞ്ചിൻ സൈഡ് നോക്കികൊണ്ട് ആശാൻ വിളിച്ചു….

ആഹ് പറഞ്ഞോ ആശാനേ കേൾക്കുന്നുണ്ട്….ഞാൻ അപ്പ്രെന്റിസ് പിളേളരായി വർത്താനം പറയുന്നതിനിടയിൽ ആശാനോടായി വിളിച്ചു പറഞ്ഞു…….

വണ്ടിക്ക് ഒരു കുഴപ്പോം ഇല്ലടാ……എഞ്ചിൻ സൈഡ് ഒരു ബോൾട്ട് പോലും ലൂസ്സായിട്ടില്ല…..

അല്ല നീയിത് അനക്കാറില്ലേഡാ….

അത് ഞാൻ സൂക്ഷിക്കണതിന്റെയാണ് ആശാനേ…. പൊന്നുപൊലെയല്ലേ കൊണ്ട്നടക്കണേ……

അങ്ങനെ വേണം മോനെ…….. പിന്നെ ഇപ്പോ നല്ല ഹൈവേ  ഒക്കെയല്ലേ…..

അതൊക്കെ  ഞാൻ പണ്ട് തടിലോറി ഓടിച്ചിരുന്നപ്പോ…….. കാട്ടിൽ കൂടിയല്ലേ പെടക്കണേ……

ഉഫ്ഫ്ഫ്…….ആശാൻ തളളി തുടങ്ങി…

ഒപ്പം നിന്ന അപ്പു  പറഞ്ഞത് കേട്ട് എനിക്ക് ചിരി വന്നു…

ഡാ അച്ചു നീ കേൾക്കുന്നില്ലേ…….

എന്റെ പ്രതികരണം കിട്ടാത്തോണ്ട് ആശാൻ പിന്നെയും വിളിച്ചു ചോദിച്ചു….

ആഹ് പറഞ്ഞോ ആശാനേ…… വേറെ വഴിയില്ലാതെ ഞാൻ കേട്ട്  നിന്നുകൊടുത്തു..😐

ആഹ്…അപ്പോ തടിലോറി….

ഡാ ഞാൻ ഒരുദിവസം വയനാട്  കൂപ്പിൽ നിന്ന് തടിയും കേറ്റി കാട്ടിലൂടെ വരായിരുന്നു..കാടെന്നു പറഞ്ഞാ കൊടും കാട്……വഴിയുടെ ഒരു വശം 50 കോൽ താഴ്ചയാണ്..   ഒപ്പം കിളിയായിട്ടുളളതോ  ഒരു ചെക്കനും…….

ഹോ അവന്റെ വിധി…. ആശാനേ എങ്ങനെ സഹിച്ചെന്നാവോ😐.. അതും ഓർത്ത് ഞാൻ ഒന്ന് മൂളി കൊടുത്തു…

ആഹ് അങ്ങനെ  വന്നോണ്ടിരുന്നപ്പോ

കുറച്ച് മുന്നിലായിട്ട് നിൽക്കയാണ് ഒരുത്തൻ…… ആരാണ്…..

വീരപ്പൻ ആണാ ആശാനേ….

അപ്പുവിന്റെ ചോദ്യം കേട്ടിട്ട് ഞാൻ ചിരിച്ചൊരു വഴിയായി… അപ്പു ആശാനിട്ട്  നല്ല പ്ലിംഗ് കൊടുക്കാറുണ്ട് 😂……

‘ഏയ്യ് അത് സത്യമംഗലം കട്ടിൽ വെച്ചല്ലെടാ വീരപ്പനെ കണ്ടത്…. ഇത് വയനാട്ടിലെ കാര്യമല്ലേ പറയുന്നേ…’

പടച്ചോനെ… ഇങ്ങേരിത് വീരപ്പൻ വരെയെത്തിയാ 😐……

അപ്പു കളിയാക്കിയതാണെന്ന് മനസ്സിലാക്കാതെ ആശാൻ പിന്നേം തകർക്കുകയാണ്…….

അല്ലാശാനെ ആരാ മുന്നിൽ നിക്കുന്നത്….. തളള് ആണെന്ന് അറിയാമെങ്കിലും ഞാൻ ചോദിച്ചു…

എട മോനെ……അതാരാണെന്നറിയോ.

കാട് വിറപ്പിക്കണ ഒറ്റകൊമ്പൻ….

കൂപ്പിലെ പണിക്കാരുടെ പേടി സ്വപ്നം.

അവന്റെ മുന്നിൽ പെട്ടവർ പിന്നെ മരിച്ചെന്ന കണക്ക്……

ആനയെന്നു പറഞ്ഞാ ഒന്നൊന്നര ആന…. ഒറ്റകൊമ്പ് എന്നൊക്കെ പറഞ്ഞ അതാണ് കൊമ്പ്…..

ഇജ്ജാതി കൊമ്പ് പിന്നെ ഒരാനക്കും കണ്ടിട്ടില്ല…….

അങ്ങനെ  ലോറിയും  കൊമ്പനും നേർക്ക് നേർ അങ്ങനെ നിന്നു……

“എന്നിട്ട്…….”      കഥ ഏകദേശം തീരാറായെന്ന്  മനസ്സിലായ ഞാൻ അക്ഷമനാണെന്ന പോലെ ചോദിച്ചു… ഇതൊന്ന് കഴിഞ്ഞിട്ട് വേണം വണ്ടി  വാട്ടർ സർവീസിന് കേറ്റാൻ…. 😒

എന്നിട്ട് എന്താവാൻ….. സർവ്വദൈവങ്ങളെയും വിളിച്ചു ഒരൊറ്റ എടുക്കൽ…… അവനും ലോറി മറിച്ചിടാനുളള വരവാണെന്ന് മനസ്സിലാക്കിയ ഞാൻ ഒന്നും ആലോചിച്ചില്ല …. വണ്ടി ഇടത്തേക്ക് വെട്ടിച്ചു മാറ്റി…… അവൻ വണ്ടിയുടെ സൈഡിൽ എത്തിയതും വാക്കത്തിയെടുത്ത് തടി കെട്ടിയ കയർ ഒറ്റ വെട്ടിനു കണ്ടിച്ചു……

തടി പൊട്ടിയതും ആനയും തടിയും കൂടി താഴേക്ക് പോയി……. നോക്കുമ്പോ എന്താണ്  അവൻ ഒരു മരത്തിൽ തുമ്പികൈ  ചുറ്റി താഴേക്ക് പോകാതെ ചെരുവിൽ കിടക്കുന്നു….

അങ്ങനെ ഫോറെസ്റ്റ്കാര് താപ്പാനയെ കൊണ്ടുവന്ന് വലിച്ചു കേറ്റി അവനെ ആനക്കൊട്ടിലിലേക്ക് കൊണ്ടുപോയി

ഞാൻ ഇതൊക്കെ കേട്ട് കണ്ണുമിഴിച്ചു ഒരു നിൽപ്പായിരുന്നു….. 😐

എന്നിട്ട് അന്നത്തെ റേഞ്ച് ഓഫീസർ എന്റെ തോളിൽ തട്ടി പറഞ്ഞത് എന്താന്നറിയോടാ മോനെ…….

എന്താ ആശാനേ പറഞ്ഞെ…….

“ഒറ്റയാൻ  ഇവിടുളളപ്പോ  ഒറ്റക്കൊമ്പൻ  എന്തിനാണെന്ന് …..”

ഹോ  റേഞ്ചർ പറഞ്ഞ  കേട്ടിട്ട് എന്റെ  രോമം  വരെ എണീറ്റ് നിന്നുപോയി….

ശെരിയാ  ആശാനെ… ..ദേ  കണ്ട ആശാൻ പറഞ്ഞ കേട്ടിട്ട് എനിക്ക് വരെ  രോമാഞ്ചം  വന്ന്…….

അപ്പു  കയ്യിലെ  രോമം തടകി  നേരെയാക്കികൊണ്ട്  പറഞ്ഞ കേട്ട്  ചിരി കടിച്ചുപിടിച്ച്  ഞാൻ  നിന്നു…..

എന്റമ്മോ  വല്ലാത്ത സാധനം  തന്നെയാ ആശാൻ എന്ന് ഞാനും  പറഞ്ഞതോടെ  പുളളി ഒന്ന്  പൊങ്ങി ……ഇനിയും  നിന്ന വീരപ്പനെ താനാണ് പിടിച്ചുകൊടുത്തതെന്ന കഥ വരെ  തുടങ്ങുമെന്ന് തോന്നിയതോടെ  ഞാൻ  വണ്ടിയിൽ കേറി വാട്ടർ  സർവീസ് ചെയ്യാൻ ഇട്ട് കൊടുത്തു…..

സമയം ഒന്ന് കഴിഞ്ഞു…..

പുറത്ത് പോയി ഫുഡ് കഴിച്ചു വന്നപ്പോഴേക്കും ചെക്കനെ കുളിപ്പിച്ച് കുട്ടപ്പനാക്കി ഇട്ടിരിക്കുന്നു……..ആശാന് അഞ്ഞൂറും, അപ്പുവിന് ഒരു നൂറും ചായക്കാശ് കൊടുത്തു… അത് പതിവാണ്….പിന്നെ നേരെ വീട്ടിലേക്ക് വിട്ടു…..

ഒരു 2.30ആയപ്പോഴേക്കും  വീടെത്തി……ആരോക്കെയോ  വന്നിട്ടുണ്ടെന്ന് തോന്നുന്നു….. അകത്തേക്ക് ചെന്നപ്പോ എന്റെ മുറിയിൽ നിന്ന് പാട്ടൊക്കെ കേൾക്കുന്നുണ്ട്…… വാതിൽ പയ്യെ തുറന്ന് നോക്കിയപ്പോ അമ്മൂസും ജെസ്സിയും കട്ടിലിലിരുന്ന് വർത്താനം പറയുകയാണ്….. രണ്ടും കൂടി എന്റെ കമ്പ്യൂട്ടർ ഓണാക്കി സ്പീക്കറിൽ പാട്ടും  വെച്ച് തകർക്കുകയാണ്…..

രണ്ടിനേം ഒന്ന് പേടിപ്പിക്കാമെന്ന് വിചാരിച്ച് ചെറുതായിട്ട് ഒച്ചയെടുത്ത് ചാടി  അകത്തേക്ക് കേറി 😆…രണ്ടും ഒച്ചകേട്ട് പേടിച്ച് അലറിപ്പോയി 😂…..

രണ്ടും കിടന്ന് ഓടിയ കണ്ട് ഞാൻ ചിരിച്ചൊരു വഴിയായി……..

‘എന്താ അവിടെ……’ അടുക്കളയിൽ നിന്ന് അമ്മ വിളിച്ചുചോദിക്കുന്നുണ്ട്.

ഒന്നുല്ലമ്മേ…. ഞാൻ വിളിച്ചു പറഞ്ഞതും അമ്മ പിന്നൊന്നും ചോദിച്ചില്ല…….

പിന്നെ രണ്ടും കൂടി തലയിണയെടുത്ത് എന്നെ അറ്റാക്ക് ചെയ്യാൻ തുടങ്ങിയതും ഞാൻ ചാടി കട്ടിലിലേക്ക് കമഴ്ന്നു  കിടന്നു……

രണ്ടുപേരിൽ ആരോ ഒരാൾ കൈ വെച്ചും നല്ല താങ്ങ് താങ്ങി…. 😐…..തിരിഞ്ഞ് നോക്കാൻ പോയില്ല…..മുഖത്തിന്റെ ഷേപ്പ് മാറാൻ സാധ്യതയുണ്ട്…….

‘എന്തുവാ പിളേളരെ മൂന്നും കൂടി കാട്ടുന്നെ….’ലിസ്സിയാന്റിയുടെ ഒച്ച കേട്ടപ്പോഴാണ് ഒരു റസ്റ്റ്‌ കിട്ടിയത്….

‘ദേ ഇവറ്റകൾ രണ്ടും കൂടിയ ആന്റി എന്നെ കൊല്ലുന്നേ ‘ഞാൻ ഒന്നിനുമില്ലെന്ന പോലെ പറഞ്ഞൊഴിയാൻ നോക്കി…

ഉവ്വാഡാ….. പെണ്ണ്കെട്ടാനായി…. എന്നിട്ടവൻ പിളേളര് കളിക്കണ്‌…..

കൃഷ്ണമോൾക്ക് ഇത്തിരി കാര്യവിവരം ഉളളതുകൊണ്ട് കുഴപ്പമില്ലെന്ന് പറഞ്ഞ് ലിസിയാന്റി തിരികെ അടുക്കളയിലേക്ക് നടന്നതും

ഞാൻ കണ്ണുമടച്ചു ഒറ്റ കിടപ്പായിരുന്നു……

എന്റേം കിച്ചൂന്റേം കാര്യം ഇനി ആരൊക്ക അറിഞ്ഞെന്നാവോ…..

അമ്മൂസിന്റേം ജെസ്സിയുടെയും ചിരി കേട്ട് ഞാൻ ചെവി കൂടി പൊത്തിപിടിച്ചു………. അതോടെ രണ്ടും കുലുക്കി വിളിക്കാൻ തുടങ്ങി.. ഇനി രക്ഷയില്ലെന്ന് മനസ്സിലായതോടെ ഞാൻ ഒരു ചിരിയോടെ  എണീറ്റു…… 😇

എടാ അച്ചുച്ചേട്ടാ…… കിച്ചുചേച്ചിയെ അടിച്ചു മാറ്റിയല്ലേ…….. ജെസ്സി കണ്ണുമിഴിച്ചത്‌ പറഞ്ഞതും എനിക്ക് ചെറിയൊരു നാണം വന്നു 😅……..

‘ഹിഹി…… ഒരു ദുർബലനിമിഷത്തിൽ’

നിമിഷത്തിൽ 😐…..ഞാൻ പറഞ്ഞത് കേട്ട് ജെസ്സി കണ്ണുമിഴിച്ച് കൊണ്ട് ചോദിച്ചു……

ഹോ…. ഒരു ദുർബലനിമിഷത്തിൽ ഞങ്ങൾ സ്നേഹിച്ചു പോയെന്ന് പറഞ്ഞതാ എന്റ പൊന്നോ……

ഞാൻ അതും പറഞ്ഞ് പിന്നെയും കിടന്നു…..

എന്റെ സംസാരം കേട്ട് അമ്മൂസ് കിടന്ന് ചിരിക്കുകയാണ് 😅

അമ്മൂസ്സേ…. നമുക്ക് ഒരു 4 മണിയാകുമ്പോൾ ബീച്ചിൽ പോകാട…. ഡി ജെസ്സി…. നീ ഡ്രസ്സ്‌ ഒക്കെ മാറി വായോട്ട…… ബീച്ചിൽ പോകാം….അത് കേട്ടതും രണ്ടും ഹാപ്പി……കുറച്ചു നേരം രണ്ടിന്റേം വർത്താനം കേട്ട്കിടന്നു….. എപ്പോഴോ ഉറങ്ങിപ്പോയി………..

‘അച്ചുച്ചേട്ടാ….അച്ചുചേട്ടോ…  എണീക്ക് ……..ചായ എടുത്ത് വെച്ചിട്ടുണ്ട്…….’

അമ്മൂസ്  വന്ന് കുത്തി  പൊക്കിയപ്പോഴാണ്  എണീറ്റത്….

ബാത്‌റൂമിൽ പോയി ഫ്രഷ് ആയി ഹാളിലേക്ക് ചെന്നു….. നോക്കിയപ്പോ ജെസ്സി പോയി നല്ല ഡ്രസ്സ്‌ ഒക്കെയിട്ട് സോഫയിൽ ഇരിപ്പുണ്ട്…..

ഡി ഫെബി വീട്ടിൽ ഇല്ലേടി……

ഞാനും  ചെന്ന് സോഫയിൽ ഇരുന്ന്കൊണ്ട് ചോദിച്ചു…..

‘അതെവിടെയോ ബൈക്ക് എടുത്ത്  പോയതാ……’

മ്മ്മ്….രണ്ട് ദിവസമായി അവനെ കണ്ടിട്ട്…..ഡി പിന്നെ ലിസ്സിയാന്റി എന്തെങ്കിലും പറഞ്ഞോ?…..

‘ഏഹ്… എന്ത് പറഞ്ഞോന്ന്…….? ‘ അവൾക്ക്  ഞാൻ ചോദിച്ച കാര്യം മനസ്സിലായെങ്കിലും ഒന്നുമറിയാത്ത പോലെ ചോദിച്ചു…….

ഇതിനോടൊക്കെ പറഞ്ഞു നിക്കാൻ പറ്റില്ല …… ഞാൻ അതോണ്ട് കാര്യം നേരെയങ്ങ് ചോദിച്ചു….

“എന്റേം കിച്ചൂന്റേം കാര്യം …… ”

അയ്യടാ…. അറിയാൻ എന്താ തിടുക്കം

അതൊക്കെ ഞങ്ങൾ  മൂത്തവർ പറയും…. അപ്പോ എന്താന്ന് വെച്ച  അങ്ങോട്ട് അനുസരിച്ചാ മതി…. ഹും…

അതും പറഞ്ഞ് അവൾ ടീവിയും നോക്കിയിരുന്നു…..

അത് കേട്ടതും ഞാൻ അവളുടെ ചെവി പിടിച്ചൊന്ന് കറക്കി വിട്ടു…

ഇതിനെയൊക്കെ ചില നേരത്ത് നല്ല ചവിട്ട് ചവിട്ടാൻ തോന്നും….

ശെരിക്കും അതാണ് ചെയ്യേണ്ടത്…😅

അപ്പോഴേക്കും എനിക്കുളള ചായയും കൊണ്ട് കിച്ചു എത്തി……

ദേ കിച്ചുചേച്ചി….. ഇതിനെ മരിയാദക്ക് ഇരുത്തിക്കോ … ചെവി തിരുമ്മിക്കൊണ്ട് ജെസ്സി കിച്ചുവിനോട് പരാതി പറഞ്ഞു……

കിച്ചുപെണ്ണ് ജെസ്സിയുടെ വർത്താനം കേട്ട് ചിരിച്ചതല്ലാതെ ഒന്നും പറഞ്ഞില്ല……

അപ്പോഴാണ് അമ്മ ഇറയത്തുനിന്നും വന്നത്…..ഡാ വേഗം റെഡിയായിട്ട് പോകാൻ നോക്ക്…….. ഇന്ന് മഴപെയ്യുമെന്നു റേഡിയോയിൽ പറഞ്ഞു…….അതോണ്ട് ഇരുട്ട് ആവുന്നതിനുമുന്നേ ഇങ്ങേത്തിയേക്കണം……

ഞാൻ ചായ കുടിച്ച് കിച്ചുവിനോട് റെഡിയാകാൻ പറഞ്ഞ് മുറിയിലേക്ക് പോയി…..രാവിലെയിട്ട ബ്ലാക്ക് ഷർട്ടും പാന്റ്സും എടുത്തിട്ടു

കണ്ണാടിയുടെ മുന്നിൽ നിന്ന് മുടി ചീകാൻ തുടങ്ങി…….

ഇപ്പോ കുറച്ച് നാളായിട്ട് ഒരുക്കം കൂടുന്നുണ്ട് 😊…… മീശ എടുക്കണോ വേണ്ടയോ എന്നൊരു ചിന്ത…..

വേണ്ട….പണ്ടൊരിക്കൽ ക്ലീൻ ഷേവ് അടിച്ചിട്ട് കിട്ടിയ കളിയാക്കലൊന്നും മറന്നിട്ടില്ല…. 😐

പെട്ടെന്നാണ് അമ്മു മുറിയിലേക്ക് വന്ന് എന്നെ തളളി നീക്കി ഒരുക്കം തുടങ്ങിയത്…..

‘എന്തുവാടി ഇത്……. ‘ ഞാൻ ചോദിച്ചത്‌  അവൾ കേട്ടതായേ  ഭാവിച്ചില്ല…..

ഇനി എന്നാണാവോ ഞാൻ ഈ മുറിയിൽ നിന്ന് പുറത്താകുന്നത്😆…

അതും ആലോചിച്ച് ഞാൻ  പോർച്ചിൽ നിന്നും കാർ ഇറക്കിയിട്ടു….അപ്പോഴാണ് കിച്ചു ഒരുങ്ങി വന്നത്‌…… ഞാൻ വാങ്ങിക്കൊടുത്ത ലൈറ്റ് നീല ചുരിദാറാണ് ഇട്ടിരിക്കുന്നത്…… പെണ്ണിന്റെ വെളുപ്പ് കാരണം നെറ്റിയിലെ പൊട്ട് എടുത്ത് കാണുന്നുണ്ട്……

എന്റെ നോട്ടം കണ്ടിട്ട് പെണ്ണ് അടുത്തേക്ക് വന്ന് ഒരു ചിരിയോടെ നിന്നു…..

‘എന്തിനാ അച്ചേട്ടാ ഇങ്ങനെ നോക്കണേ…….’

ഹിഹി…. എന്റെ നോട്ടം കണ്ട് കിച്ചൂന് വല്ലാത്തൊരു നാണം……

എപ്പോഴും അതെ…. എന്നെ  കളളകണ്ണിട്ട് നോക്കിനിക്കലാ അച്ചേട്ടൻ ….😇അതും പറഞ്ഞ് അവളെന്നെ പയ്യെ പിച്ചി…..

ഹിഹി….. എന്നാ ഞാൻ വഴിയിൽ കൂടി പോകുന്ന പെൺപിള്ളേളരെ നോക്കട്ടേടി കിച്ചൂസ്സേ 😊…..

ദേ നല്ലത് കിട്ടോട്ടാ  എന്റെ കൈയീന്ന്…….😔

കിച്ചു പറഞ്ഞത് കേട്ട് എനിക്ക് ചിരി വന്നതും’ ഇനി ചിരിക്കോ’ എന്നും ചോദിച്ച് പിന്നെയും കിട്ടി ഒരെണ്ണം…

യ്യ്യോ പിച്ചല്ലെടി…….ഇതിനെല്ലാം ചേർത്ത് ഫസ്റ്റ് നൈറ്റ് ഞാൻ തരുമെന്ന് പറഞ്ഞതും കണ്ണുമിഴിച്ചൊരു നിൽപ്പായിരുന്നു കിച്ചു …… 😊

ഞാൻ ചുണ്ടുകൊണ്ട് ഉമ്മ കൊടുക്കുന്ന പോലെ കാണിച്ചതും പാവം

മുഖം പൊത്തി ചിരി തുടങ്ങി……..

അപ്പോഴേക്കും അമ്മുവും ജെസ്സിയും ഇറങ്ങി……അമ്മ പിന്നാലെ രണ്ടിനോടും എന്തോ പറഞ്ഞു നടക്കുന്നുണ്ട്…. ഞാൻ ഡ്രൈവിംഗ് സീറ്റിലേക്ക് കേറിയതിനൊപ്പം കിച്ചൂസിനോട് മുന്നിൽ കേറാൻ കണ്ണുകൊണ്ട് കാണിച്ചു…. അത് വേഗം വന്ന് മുന്നിലിരുന്നു…….

അവൾക്കെപ്പോഴും മുന്നിലിരുന്ന് പോകുന്നത് തന്നെയാ ഇഷ്ട്ടം… പക്ഷെ അമ്മൂസ് സമ്മതിക്കില്ലല്ലോ 😅….

അമ്മുവും ജെസ്സിയും പിന്നിൽ കയറിയതോടെ ഞാൻ കാർ  സ്റ്റാർട്ട്‌ ആക്കി….

ഡാ രണ്ടിന്റേം  കൈയിൽ പിടിച്ചു നിന്നോണം… കടലിലേക്കൊന്നും ഇറക്കരുത്……..അമ്മയുടെ പേടി 😒…

ആഹ് ഇല്ലമ്മേ  …….

പിന്നെ കടലിലിറങ്ങാതെ  കടപ്പുറത്ത് കപ്പലണ്ടി തിന്നാനല്ലേ പോണത്…. അതും മനസ്സിൽ പറഞ്ഞോണ്ട്  ഞാൻ വണ്ടിയെടുത്തു…..

നേരെ ചെറായി ബീച്ചിലേക്ക്  വിട്ടു…

രണ്ടും പിന്നിലിരുന്ന് ചിരിയും കളിയുമാണ്…..ഇടക്ക് കിച്ചൂസും കൂടും……അങ്ങനെ 4.30 ആയപ്പോ ബീച്ചിലെത്തി…….

ഒരുപാട് ഫാമിലീസും , കാമുകി കാമുകന്മാരും, ടൂർ വരുന്നവരും ഒക്കെ എത്തുന്ന ബീച്ചാണ്……

നാട്ടുകാരുടെ മാന്യമായ പെരുമാറ്റം തന്നെയാണ് അതിന്റെ കാരണം….. ഒരു നാട് നന്നാവണമെങ്കിൽ നാട്ടുകാരൻ നന്നാവണം എന്ന് പറയുന്നത് അതാണ്……..കപട സദാചാര നാറികൾ ഇല്ലാത്ത ഒരിടം…

ഒട്ടും  തിരക്കില്ലാത്ത സ്ഥലത്ത് ഒരു ചായക്കടയുടെ അരികിൽ  വണ്ടിയൊതുക്കിയിട്ട്  ബീച്ചിലേക്ക് നടന്നു…..അമ്മുവും ജെസ്സിയും ആദ്യം ഓടുകയാണ്…..ഞാനും കിച്ചൂസും പയ്യെ മണൽ പരപ്പിലേക്ക് കേറി  പിളേളരുടെ അടുത്തെത്തിയതും അമ്മു എന്നെയൊരു നോട്ടം…….. എനിക്ക് കാര്യം മനസ്സിലായി…… അമ്മ കടലിൽ  ഇറങ്ങരുതെന്ന്  പറഞ്ഞത് കൊണ്ട് അമ്മൂസിനൊരു മടി…..

അമ്മ പലതും പറയും…. നിങ്ങളിറങ്ങിക്കോ എന്ന് പറഞ്ഞതും എല്ലാ സന്തോഷവും കാണിച്ചു ചിരിച്ചുകൊണ്ട് ജെസ്സിയുടെ കയ്യും പിടിച്ചു കടലിലേക്ക് ഒറ്റ ഓട്ടമായിരുന്നു അമ്മു…..

ഡീ രണ്ടും നനഞ്ഞു കുളിക്കരുത് … മുട്ട് വരെ നനച്ചാ മതിയെന്ന് ഞാൻ  വിളിച്ചു പറഞ്ഞു ….കേട്ടോന്ന്  ആവോ…. 😐

മുട്ടോളം തിരയിലേക്കിറങ്ങി  കൈകോർത്തു   പിടിച്ചു കളിക്കാൻ  തുടങ്ങി ….ഞാനും കിച്ചൂസും അതൊക്കെ  നോക്കി മണലിൽ  ഇരിപ്പായി….

ഇരുന്നപ്പോൾ ഉണ്ടായ ഗ്യാപ്പ് ഇപ്പോ ഇല്ല……😇…..പെണ്ണ്  ഇപ്പോ എന്നോട് ഒട്ടിയാണ്  ഇരിക്കുന്നത്…..😊

കടലിൽ മഴക്കാർ വെച്ചിട്ടുണ്ട്….

വൈകുന്നേരത്തെ  വെയിൽ കൊണ്ട്  കിച്ചുപെണ്ണിനെ അടുത്തിരുത്തി  അമ്മൂസിന്റേം  ജെസ്സിയുടെയും  ചിരിയും  കാലുകൊണ്ട്  വെളളം  തെറിപ്പിക്കലും  ഒക്കെ കണ്ടിരിക്കാൻ  ഒരു രസം……എല്ലാവരുടെയും  ജീവിതത്തിൽ  ഒരിക്കൽ എല്ലാ  സന്തോഷവും തേടിവരും ….. ഇപ്പോൾ  എന്റെ ജീവിതത്തിലും അത് കടന്നുവന്നു….. ഇതൊക്കെയാണ് ഇപ്പോ  എന്റെ  സന്തോഷം……..

പെട്ടെന്നാണ് കിച്ചു എന്റെ തോളിലേക്ക്  തല ചായ്ച്ചത്….. കിച്ചൂന്റെ നീക്കത്തിൽ ആദ്യം ഞാനൊന്ന് മിഴിച്ചു…..

അമ്മുവിനെയും ജെസ്സിയെയും നോക്കിയപ്പോൾ ഇത്തിരി നീങ്ങിയാണ് നിൽക്കുന്നത്……

പതിയെ ഞാൻ എന്റെ കവിളുകൊണ്ട്  കിച്ചുവിന്റെ തലയിൽ  തഴുകി……..

എന്താടാ കിച്ചൂസ്സേ….. ദേ രണ്ടും കണ്ടാൽ തീർന്നു…. ഇതൊക്കെ മതി അവർക്ക് നമ്മളെ കളിയാക്കാൻ…..

ഞാൻ അങ്ങനെ പറഞ്ഞെങ്കിലും കിച്ചുവിന് അനക്കമൊന്നും ഉണ്ടായില്ല………….പെണ്ണിനിത് എന്ത്  പറ്റിയെന്നവോ ………

‘അച്ചേട്ടാ …. ‘എന്റെ കയ്യിന്റെ  ഉളളിലൂടെ  കൈകോർത്തു വെച്ച്  ഒന്നുകൂടി  തല  ചായ്ച്ചു കിച്ചു മെല്ലെ  വിളിച്ചു …..

മ്മ്മ്……. പോരട്ടെ …… എന്തോ  പറയാൻ പോകുകയാണെന്ന്  മനസ്സിലായ ഞാൻ മൂളികൊണ്ട് പറഞ്ഞു………. ഞാൻ അങ്ങനെ പോരട്ടെ എന്നൊക്കെ  പറഞ്ഞാൽ  കിച്ചു  പിന്നെ  റിലാക്സ് ആയി  കാര്യങ്ങൾ  പറയും……

കല്യാണം കഴിഞ്ഞിട്ട് നമ്മൾ  വഴക്കിട്ടാൽ എത്ര വേണേലും  എന്നോട്  ദേഷ്യപ്പെട്ടോട്ടാ….. എന്നാലും  എന്നോട് പിണങ്ങി  ഇരിക്കരുതെട്ടോ  അച്ചേട്ടാ …..

നിക്ക് അത്  സഹിക്കാൻ പറ്റില്ലാ ……

എന്താടാ ഇപ്പോ  ഇങ്ങനെ പറയാൻ….

കിച്ചു പറഞ്ഞത് കേട്ട് എനിക്ക് ചെറിയൊരു ആശ്ചര്യം തോന്നി ….

ഒന്നുല്ല ഏട്ടാ …പെട്ടെന്ന് അങ്ങനെ  തോന്നി…..

പിന്നെ, എന്നെ എത്ര വേണേലും നോക്കി  നിന്നോ…..വേറെ ആരെയും  നോക്കണ്ടാ……….

അത് തല പൊക്കി,  എന്നെ നോക്കിയാണ്  അത് പറഞ്ഞത്……..

ഹിഹി …പെണ്ണിന്റെ വർത്താനം  കേട്ടിട്ട് എനിക്ക് ചിരി വന്നുപോയി….

ഡി പൊട്ടി……..ഞാൻ നിന്നെയല്ലാതെ  വേറെ ഏത്  പെണ്ണിനെ  നോക്കാനാ… ഞാൻ തമാശക്ക് പറഞ്ഞതല്ലേ അത് ……അതും പറഞ്ഞ് അവളെപിന്നെയും  തോളിലേക്ക് ചായ്ച്ചിരുത്തി …..

മ്മ്മ്……എനിക്ക് അറിയാം അച്ചേട്ടാ…

ആഹ് പിന്നില്ലേ  ഏട്ടാ…. എനിക്ക്  ജാനകിക്കുട്ടിയെ ഒന്ന് വിളിച്ചു തരോ.

ആഹ് കിച്ചുവേ, ഇപ്പോഴാ ഞാൻ ഓർക്കണേ…..  അന്ന് പോയി വന്ന  ദിവസം  ഞാൻ അക്കയെ  വിളിച്ചിരുന്നു……..ജാനകിയോട്  വിളിക്കാൻ പറഞ്ഞിട്ട് ഇതുവരെ  വിളിച്ചിട്ടില്ല …..ഇപ്പോ ഒന്ന്  വിളിച്ചു നോക്കാം ……ഞാൻ ഫോണെടുത്തു  അക്കയെ വിളിച്ചു ……….രണ്ട് റിങ്  അടിച്ചപ്പോൾ  തന്നെ  ഫോണെടുത്തു…

അണ്ണാ……😍

ജാനകിയാണ് ഫോണെടുത്തത്……

ഡീ എവിടെയാടി  ഇത്….

നിന്നോടോന്ന്  ഫ്രീ ആകുമ്പോ  വിളിക്കാൻ പറഞ്ഞിട്ട് ഇതുവരെ നിന്റെ  തിരക്കൊഴിഞ്ഞില്ലേ …….

സോറി അണ്ണാ…….അച്ചുചേട്ടൻ  പോയ  നെക്സ്റ്റ് ഡേ  എന്നുടെ ഫോൺ  വീണു  ഒടഞ്ഞു പോയി…….

ആഹാ മിടുക്കി…….നീ എന്റെ ഫോണിനെ കുറെ  കളിയാക്കിയതിന്റെ ആണെടി 😆…

ആഹ് ഞാൻ ദേ ഒരാൾക്ക് കൊടുക്കാമെന്നു പറഞ്ഞ് ഫോൺ  കിച്ചുവിന് കൊടുത്തു …..

അപ്പോഴാണ്  പിളേളരെ നോക്കിയത്….രണ്ടും വെളളത്തിൽ  ചാടി കളിച്ച് നീങ്ങി നീങ്ങി  പോകുകയാണ് …….ഞാൻ വേഗം  എണീറ്റ് അവരുടെ അടുത്തേക്ക്  നടന്നു …..എന്നോട് ഇറങ്ങാൻ ഒക്കെ  അമ്മു  കൈകൊണ്ട് കാണിക്കുന്നുണ്ടെങ്കിലും ഞാൻ  ഇറങ്ങിയില്ല……..

കിച്ചുവിനെ നോക്കിയപ്പോ ചിരിച്ചുകൊണ്ട് ഒക്കെയാണ്  വർത്താനം പറയുന്നത്………

ജാനകിയുടെ മലയാളം കേൾക്കാൻ നല്ല  രസോണ് ….മലയാളത്തിലെ ചില വാക്കൊക്കെ തെറ്റിപ്പറയുന്ന കേട്ടാൽ  മനുഷ്യൻ  ചിരിച്ചു  വീഴും ……

കുറച്ചു നേരം കഴിഞ്ഞപ്പോൾ കിച്ചു  ഫോൺ ആയിട്ട് എന്റടുത്തേക്ക് വന്നു…….

അച്ചേട്ടാ ദേ ആരോ  രണ്ട് വട്ടം  വിളിച്ചിരുന്നു ….അപ്പോ ജാനകിയോട്  പിന്നെ വിളിക്കാമെന്ന്  പറഞ്ഞ് ഞാൻ വെച്ചതാ……

തോമസ്സേട്ടൻ ആകുമെന്ന് കരുതി ഞാൻ  ഫോൺ വാങ്ങി നോക്കി……..

അപ്പോ പരിചയമില്ലാത്ത ഒരു  നമ്പർ….

തിരിച്ച്  വിളിക്കാൻ  വിളിക്കാൻ പോയതും  ജെസ്സിയും അമ്മുവും ഓടിവരുന്നുണ്ട്……. അവിടവിടെയായി നിന്നിരുന്ന എല്ലാവരും ഓടി കരയിലേക്ക് കേറുന്നു……ഇതെന്താണ് വല്ല സുനാമി വരേണോ…… 😐

അച്ചുച്ചേട്ടാ….. കിച്ചേച്ചി…. ഓടിക്കോ…. മഴ വരുന്നു എന്നും പറഞ്ഞു രണ്ടും കാറിനടുത്തേക്ക് ഓടി…… നോക്കിയപ്പോ കടലിൽ നിന്നും കട്ടകുത്തി  വരികയാണ് മഴ…

പിന്നൊന്നും നോക്കാതെ കിച്ചൂന്റെ കയ്യും പിടിച്ചോരോട്ടമായിരുന്നു…… കാറിൽ കേറിയതും തുളളിക്കൊരു കുടം പോലെ ആർത്തു പെയ്യാൻ തുടങ്ങി…….

മഴപെയ്തപ്പോ ചായ കുടിക്കാനൊരു തോന്നൽ…..  ഗ്ലാസ്സ് തുറന്ന് ചായക്കടയിലെ വല്യപ്പനോട് 4 ചായ പറഞ്ഞു……വേഗം ചായയുമായി കുടയിൽ കേറി  ആളെത്തി…..  കടലിലെ മഴയും കണ്ട് ചൂട് ചായയും കുടിച്ചു  അങ്ങനെ കുറച്ചുനേരം ഇരുന്നു…..

കടലിൽ മഴ പെയ്യുന്നത് കണ്ടിട്ടുണ്ടോ…….. ഇല്ലെങ്കിൽ കാണണം….. നനയാൻ മടിയില്ലെങ്കിൽ നനയണം…….😊

സമയം കഴിയുന്തോറും മഴ തിമിർത്തു പെയ്യുകയാണ്……..

മഴ മാറുമെന്ന് തോന്നുന്നില്ല….. കാറിൽ കറങ്ങിയാലോന്ന് പറഞ്ഞതും മൂന്നിനും സമ്മതം…… ചായഗ്ലാസും, പൈസയും കൊടുത്ത് വണ്ടിയെടുത്തു……. കണ്ണ് കാണാൻ പറ്റാത്ത മഴ…….അമ്മൂസ് സെറ്റ് ഓണാക്കി പാട്ടും വെച്ചതോടെ അടിപൊളി……… പിന്നിലിരുന്ന് രണ്ടും ഡാൻസ് തുടങ്ങി 😄……..

നേരെ ബീച്ച് റോഡിലൂടെ ഓടിച്ചു മെയിൻ റോഡിൽ കേറി……..എങ്ങും മഴ തന്നെ……..നേരെ കൊടുങ്ങല്ലൂർ ടൗണിലേക്ക് വിട്ടു…… സമയം 6 ഒക്കെയായി…………. എല്ലാവർക്കും ചെറിയ വിശപ്പൊക്കെ ആയിട്ടുണ്ട്…….

കാർ നേരെ സഫയർ ഹോട്ടലിലേക്ക് കേറ്റി  …….ഉളളതിൽ വെച്ച് നല്ല ഫുഡ് കിട്ടുന്ന ഹോട്ടൽ  അതാണ് …….

ഇത്തിരി സ്റ്റാൻഡേർഡ് ഉണ്ട്……..

അമ്മുവും ജെസ്സിയും കൂടിയാണ് ഓർഡർ ചെയ്തത്….. ഞാനും കിച്ചുവും ഇരുന്ന് കൊടുത്തതെയുളളു… ഫ്രൈഡ് റൈസും ബട്ടർ ചിക്കനും ഒക്കെയായി ഇത്തിരി ഹെവി ആയിത്തന്നെ കഴിച്ചു…….

അപ്പോളാണ് അമ്മയുടെ വിളി വന്നത് ഞാൻ എടുത്താൽ നല്ലത് കേൾക്കുമെന്ന് അറിയാവുന്നത് കൊണ്ട് കോൾ എടുത്ത് കിച്ചൂന് കൊടുത്തു…….എന്നോട് തന്നെ എടുത്തമതിയെന്നൊക്കെ കിച്ചു പറഞ്ഞെങ്കിലും ഫോൺ അവളുടെ ചെവിയിൽ വെച്ചുകൊടുത്തതോടെ ആള് തന്നെ സംസാരിച്ചു…………  അമ്മയോട് ഇപ്പോ എത്തുമെന്ന് പറഞ്ഞു ഫോൺ കട്ടാക്കിയതും  കിച്ചു എന്നെയൊരു നോട്ടം……  😅….ഞാൻ പല്ലുകാട്ടിയൊരു ചിരി കൊടുത്തു 😆….അല്ല പിന്നെ…..

മോളെ പിന്നെ അമ്മ ഒന്നും പറയില്ലല്ലോ……

ഫുഡ് കഴിച്ചു പുറത്തേക്കിറങ്ങിയതും മഴ മാറി….. കാറെടുത്ത് വീട് ലക്ഷ്യമാക്കി നീങ്ങി..

കുറച്ചു കഴിഞ്ഞപ്പോഴാണ് പിന്നിൽ പോലീസ് ജീപ്പ് ലൈറ്റ് ഇട്ടുകിടന്ന് ഓടുന്നത് ശ്രദ്ധിച്ചത്…… കൈ കൊണ്ട് കേറി പോകാൻ സിഗ്നൽ കാണിച്ചിട്ടും പോകുന്നില്ല……..

ഞാൻ ഇത്തിരി സ്പീഡ് കൂട്ടിയതും ജീപ്പും സ്പീഡ് എടുത്തു……

ഇതെന്ത് മൈരാണെന്ന് മനസ്സിലോർത്തതും ജീപ്പ് ഓവർടേക്ക് ചെയ്ത് കാറിന്റെ മുന്നിലെത്തി  വട്ടം വെച്ചു……… വായിൽ പച്ചത്തെറിയാണ് വന്നത്…. കൂടെ ഇവരുളളത്‌ കൊണ്ട് വായിൽ വന്നത് വിഴുങ്ങി……..

കിച്ചൂസും അമ്മുവും ജെസ്സിയും ചെറുതായൊന്ന് പകച്ചു……

ഞാൻ വേഗം വണ്ടി സൈഡ്  ആക്കി,   കാറിൽ നിന്നിറങ്ങി……… ‘എന്ത് കാണിച്ചാടോ  ഓടിക്കുന്നതെന്നും’ ചോദിച്ചാണ് ജീപ്പിനടുത്തേക്ക് പോയത്……..കലിപ്പ് കേറിയാൽ ലോറിക്കാരുടെ കാടൻ സ്വഭാവം ഇതുപോലെ പുറത്ത് വരും…….

പോലീസ് ജീപ്പിന്റെ ഡ്രൈവിംഗ് സീറ്റിൽ നിന്നുമിറങ്ങിയ  ആളെ കണ്ടതും എനിക്ക് എന്തെന്നില്ലാത്ത സന്തോഷം……എന്റെ ചങ്ക് പോലെ  നടന്നിരുന്ന കൂട്ടുകാരനായിരുന്ന അക്ബർ  എന്ന അക്കു…….പ്ലസ് ടു കഴിഞ്ഞ്  അവൻ ഡിഗ്രിക്കും ഞാൻ ഐടിഐ ക്കും പോയി……. അത് കഴിഞ്ഞു പിന്നെ ഞാനും അവനും കൂടി തീരുമാനിച്ചു  പി എസ് സി  പഠിക്കാൻ പോയി……പക്ഷെ പതിവഴിയിൽ ഞാൻ ഇട്ടിട്ട് പോന്നു ….അവൻ പക്ഷെ പിന്മാറിയില്ല …എന്നാൽ  ഇപ്പോ രണ്ട് പേരും കാക്കി തന്നെയാ ഇടുന്നെ 😂

‘ഡാ എത്ര നാളായെടാ കണ്ടിട്ട്…..’ എന്നെ കെട്ടിപിടിച്ചുകൊണ്ടാണ്  അക്കു അത് ചോദിച്ചത്‌……

ഡാ നീ യൂണിഫോമിൽ ആയത് കൊണ്ട് ഞാൻ ഒന്നും പറയുന്നില്ല ….

ഒന്ന് വിളിച്ചൂടെഡാ നാറി …….

എന്ത് പറയാനാടാ അച്ചു ….. സിം കാർഡ് ഡാമേജ് ആയതോടെ എല്ലാവരുടെയും നമ്പർ പോയി….

‘ആഹ് അത് പിന്നെ അങ്ങനെയാണല്ലോ…..’ അല്ല നീ എന്താണിത് ഒരു സർപ്രൈസ് ആയിട്ട്…. എന്നെ എങ്ങനെ കണ്ടെടാ നീ…..

ഡാ എനിക്ക് ഇങ്ങോട്ട് ട്രാൻസ്ഫർ ആയെടാ…..ടൗൺ എസ് ഐ ആയിട്ട് ഇന്ന് രാവിലെ തന്നെ  ചാർജ് എടുത്ത് കോട്ടേഴ്‌സ് ഒക്കെ സെറ്റ് ആക്കി നമ്മുടെ പി എസ്  സി  സെന്ററിൽ പോയി നിന്റെ നമ്പർ തപ്പിയെടുത്ത്  വൈകിട്ട് വിളിച്ചപ്പോ നീ ബിസി…….. എന്നാ മിസ്സ്‌ കോൾ കാണുമ്പോഴെങ്കിലും തിരിച്ചു വിളിച്ചൂടെടാ ……

അവൻ ഒരുമാതിരി പ്രതികളെ ചോദ്യം ചെയ്യുന്ന പോലെയാണ് ചോദിക്കുന്നത്….😆

ശെടാ…… നീ ആയിരുന്ന വിളിച്ചേ….. സോറിയെടാ……കോൾ കണ്ടെങ്കിലും പിന്നെ മറന്നു പോയി……

ആഹ് നീ മറക്കും……..ഇപ്പോ ദേ പെട്രോളിങ്ങിന് ഇറങ്ങിയതാ…….റോഡ് സൈഡിൽ കിടന്നപ്പോ ദേ നീ പോകുന്നു …. വേഗം പിന്നാലെ പിടിച്ചു…….

നീ എന്നാ വാടാ….. വീട്ടിൽ പോയിട്ട് വരാം………അമ്മ ഇടക്ക് ചോദിക്കാറുണ്ട്……. നീ വീട് മാറി പോയതിൽ പിന്നെ ഇങ്ങോട്ട് വന്നിട്ടില്ലലോ…….

‘ഡാ ഇന്നിനി വേണ്ടടാ ……. ഒന്നാമത്തെ ഡ്യൂട്ടിയിലാണ്……. അടുത്ത ദിവസം എന്തായാലും വിളിച്ചിട്ട് വാരാടാ……’

അപ്പോഴും വയർലെസ്സിൽ  കരകരാന്ന് എന്തൊക്കെയോ പറയുന്ന കേൾക്കാം………അത് കേട്ടതും  അവൻ വിളിക്കാമെന്ന് പറഞ്ഞ്  ജീപ്പെടുത്ത് പോയി……

അക്കുവിനെ കണ്ടപ്പോ പഴയ കാലം ഒക്കെ ഓർമ വന്നു ……… തിരികെ നടന്നു കാറിൽ കേറിയതും അത് കൂട്ടുകാരനാണെന്ന് പറഞ്ഞതോടെ

എല്ലാത്തിനും സമാധാനമായി…. എന്തോ പ്രശ്നം ആണെന്ന് കരുതി ഇരിക്കുകയായിരുന്നു മൂന്നും……

അങ്ങനെ ജെസ്സിയെ അവളുടെ  വീട്ടിൽ ആക്കി , വേഗം വീട്ടിലേക്ക് പോയി .. ഇപ്പോ തന്നെ വൈകി…… അമ്മയുടെ വക ഇനിയെന്താണാവോ കേൾക്കാൻ പോകുന്നെ……

അമ്മുവും കിച്ചൂസും ഞാൻ വണ്ടി ഓഫാക്കി ഇറങ്ങുന്ന വരെ അകത്തേക്ക് കേറാതെ എന്നെയും കാത്തുനിന്നു…….

അമ്മ വഴക്ക് പറയോന്നുളള പേടിയുണ്ട് രണ്ടിനും 😄…..

ഞാൻ കാറിൽ നിന്നിറങ്ങിയപ്പോഴേക്കും അമ്മ ഇറയത്തേക്ക് വന്നു…..

ആഹ് എത്തിയോ…….. ഡാ നിന്നോട് ഞാൻ പറഞ്ഞതല്ലേ വൈകരുതെന്ന്….

ദേ മുത്തശ്ശൻ ഇത്രേം നേരം ഇവിടെ നോക്കിയിരുന്നു, ക്ഷീണം തോന്നിയപ്പോ അച്ഛൻ അവിടേക്ക് കൊണ്ടുപോയി ……..

അയ്യോ…മരുന്ന് എടുത്ത് വെച്ചിട്ട അമ്മേ ഞാൻ പോയത്….. കഴിക്കാൻ മറന്നിട്ടുണ്ടാകും……..മുത്തശ്ശന്റെ ആസ്മയുടെ കാര്യം  കിച്ചുവിനു പേടിയാണ്…..

ഒന്നുല്ല മോളെ….അവിടെ പോയി കിടക്കണം എന്ന് പറഞ്ഞപ്പോ അച്ഛൻ കൊണ്ടുപോയതാ……… ഡാ നീ മോളെ കൊണ്ടുപോയി ആക്കിയിട്ടു വായോ …….. അമ്മ  അതും പറഞ്ഞു അമ്മൂസിനെയും കൊണ്ട് അകത്തേക്ക് പോയി ………

മൊബൈൽ ടോർച്ചു തെളിയിച്ചു പിന്നിലേക്ക് നടന്നു… കിളിവാതിൽ തുറന്നതും അച്ഛനും മുത്തശ്ശനും ഇറയത്തു വർത്താനം പറഞ്ഞിരിക്കുന്നു……..

ഡീ ഇതാണോ അമ്മ ക്ഷീണം ആണെന്നൊക്കെ പറഞ്ഞെ……

ഇവർക്ക് ഇതിനും മാത്രം എന്താണാവോ സംസാരിക്കാനുളളത്‌….. ഞാൻ പറഞ്ഞത് കേട്ട് കിച്ചുവിന് ചിരി വരുന്നുണ്ട്………

‘ആഹ് എത്തിയോ…… എന്റെ മോളെവിടെ………’ അച്ഛൻ അമ്മൂവിനെ  കാണാത്തത് കൊണ്ട് ചോദിച്ചു…….

അവൾ അമ്മയുടെ കൂടെയാ അച്ഛാ……കിച്ചു അച്ഛന്റെ ചോദ്യം കേട്ട് മറുപടി പറഞ്ഞു…….

എന്നാ മോള് മുത്തശ്ശന് ആഹാരം കൊടുക്ക് ……. ഡാ അച്ചു, നീ വന്നെ….. അച്ഛൻ അതും പറഞ്ഞു എന്നെയും വിളിച്ചു കുളക്കടവിലേക്ക് നടന്നു…..

കിച്ചു മുത്തശ്ശനെ എഴുന്നേൽപ്പിച്ചുകൊണ്ട് അകത്തേക്ക് നടക്കുന്നതിനിടയിൽ എന്നെ  കണ്ണുകൊണ്ട് എന്താ എന്നർത്ഥത്തിൽ നോക്കുന്നുണ്ട്….

കിച്ചുവിനെ നോക്കി  ഫോൺ വിളിക്കാമെന്ന് ഞാൻ കൈകൊണ്ട് കാണിച്ചത് കണ്ട് അവൾ അകത്തേക്ക് പോയി………..

‘ഡാ എന്തുട്ടാ നീ കഥകളി കാണിക്കണേ……… നടന്നേ ഇങ്ങോട്ട്….’

അച്ഛന്റെ ഒച്ച ഇത്തിരി കൂടിപ്പോയി..

ഞാൻ ചെറുതായിട്ടൊന്ന് ഞെട്ടി വേഗം പിന്നാലെ നടന്നു……..

എന്താണാവോ പറയാൻ പോകുന്നെ…

നിസ്സാര കാര്യത്തിന് വരെ ഗൗരവം കാണിക്കും…..

‘നാളെ നിനക്ക് എവിടെയെങ്കിലും പോകാനുണ്ടോടാ…….’

നടക്കുന്നതിനിടയിൽ മുഖത്ത് നോക്കാതെയാണ്  അച്ഛന്റെ ചോദ്യങ്ങളൊക്കെ……….

ഇല്ലച്ഛാ…. എങ്ങും പോകാനില്ല…. പിന്നെ  ഇന്ന് പോയി ഓട്ടത്തിന്റെ  പൈസ വാങ്ങിച്ചു…….

ആഹ്….പൈസ കൈയിൽ വെച്ചോടാ……..

അപ്പോഴേക്കും ഞങ്ങൾ കുളത്തിന്റെ അടുത്തെത്തി…… അച്ഛൻ പടിക്കെട്ടിൽ ഇരുന്നതും ഒരു സിഗരറ്റ് എടുത്ത് കത്തിച്ചു……….

ഏഹ് അച്ഛൻ ഇതെന്ന് വലി തുടങ്ങി…

ഞാൻ അതും ആലോചിച്ച് അച്ഛൻ വലിക്കുന്നതും നോക്കി  ഒന്നും മിണ്ടാതെ അടുത്തിരുന്നു…….

‘എന്താടാ വേണോ……’ ഞാൻ നോക്കിയിരിക്കുന്നത് കണ്ട് അച്ഛൻ പാക്കറ്റ് എനിക്ക് നേരെ നീട്ടി………

ഏയ്യ് എനിക്ക് വേണ്ട……..

വലിക്കുന്നതത്ര നല്ലത് അല്ലച്ചാ…. 😇

ആണാ……. എന്നാലെ എനിക്കിത് കിട്ടിയത് നിന്റെ മുറിയിൽ നിന്ന….

എന്നിട്ടാണ് എന്നെ ഉപദേശിക്കുന്നത്…

വേണമെങ്കിൽ ഒരെണ്ണം വലിക്കെന്നും പറഞ്ഞു തീപ്പെട്ടിയും സിഗരറ്റും പടിക്കെട്ടിൽ വെച്ചു………

അത് കേട്ടതും ഞാൻ തലയിൽ കൈ വെച്ചു പോയി…… പണി പാളിയ ദൈവമേ………. ഏയ്യ് അച്ഛന്റെ മൈൻഡ് കണ്ടിട്ട് സീൻ ഇല്ലന്ന് തോന്നുന്നു……..

പണ്ട് ലിസിയാന്റി  ഫെബിന്റെ ഷർട്ട് അലക്കാൻ എടുത്തപ്പോ  പോക്കറ്റിൽ നിന്ന് ബീഡി കിട്ടിയ സംഭവമാണ് ഇപ്പോ എനിക്ക് ഓർമ വരുന്നത്…….

അന്ന് അവന് കിട്ടിയ അടി 😐…..

കടയിൽ പോയിട്ട് ബാക്കി തരാൻ  ചില്ലറ ഇല്ലാത്തതിനാൽ കടക്കാരൻ കൊടുത്തതാണെന്ന് പറഞ്ഞ മണ്ടനാണ് ഫെബിൻ 😂😂😂….

അതുകൊണ്ട് തന്നെ ഞാൻ അച്ഛനോട് ഒന്നും മിണ്ടാതെയിരുന്നു……

ഡാ നാളെ  കൃഷ്ണമോളുടെ മുത്തശ്ശനായി ഒന്ന് സംസാരിക്കണം…

ഞാൻ നിന്റെ മാമനോടും അമ്മായിനോടും വരാൻ പറഞ്ഞിട്ടുണ്ട്……..കാര്യം ഞാൻ മുത്തശ്ശനോട് ചെറുതായിട്ടൊന്ന് സൂചിപ്പിച്ചു……നീ പേടിക്കണ്ട….മുത്തശ്ശന് ഒരു ഇഷ്ടക്കേടും ഇല്ലടാ…… അതും പറഞ്ഞു അച്ഛൻ വട്ടത്തിൽ ഒരു പുകയൂതി വിട്ടു……….

എനിക്ക് അത് കേട്ടതും സന്തോഷം വന്നിട്ട് കുളത്തിലേക്കെടുത്ത് ചാടാനാണ് തോന്നിയത് 😆……..

മാമനെയും അമ്മായിയേയും ഇന്ന് തന്നെ പോയി കൊണ്ടുവന്നാലോ എന്ന് വരെ നിമിഷ നേരം കൊണ്ട് ചിന്തിച്ചു പോയി………. 😇

‘നീ എന്താടാ സ്വപ്നം കണ്ട് ചിരിക്കുന്നത്……’അച്ഛന്റെ ശബ്ദമാണ് എന്നെ ഉണർത്തിയത്……….

‘അച്ഛന് വട്ടത്തിൽ ഒക്കെ പുകവിടാൻ അറിയാലെ ‘എന്ന് ചോദിച്ചതും

ഒറ്റ ചിരിയായിരുന്നു അച്ഛൻ…….

ഹിഹി……… വല്ലപ്പോഴും മാത്രം കാണുന്ന ചിരി 😊…………